Antai Ioane te Tia Bwabetito?
Ana kaeka te Baibara
Ioane te tia Bwabetito bon ana burabeti te Atua. (Ruka 1:76) E bungiaki imwain raoi ae bane te moan tienture B.C.E. ao e ooa naba te moan tienture C.E. E mwiokoaki iroun te Atua bwa e na katauraoa te kawai ibukin te Mesia ke Kristo. E karaoa anne Ioane n arona n uarongorongoa ana taeka te Atua nakoia raona n I-Iutaia bwa a aonga ni bitii nanoia ao n okira te Atua.—Mareko 1:1-4; Ruka 1:13, 16, 17.
A buokaki n ana rongorongo Ioane naake a ongora bwa a na kona n ataia ae Iesu are te I-Natareta bon te Mesia are e beritanaki. (Mataio 11:10) E kaumakiia naake a ongora Ioane bwa a na rairi nanoia man aia bure ao a na bwabetitoaki bwa kaotan aia rairannano. (Ruka 3:3-6) Ibukina bwa e bwabetitoia aomata aika bati Ioane, e a aranaki iai bwa te tia Bwabetito. Te bwabetito ae te kabanea ni kakawaki are e karaoia Ioane, boni bwabetitoan Iesu.a—Mareko 1:9.
N te kaongora aei
Tera ae e kaokoro iai Ioane te tia Bwabetito?
E a kaman taekinaki ana mwakuri: Man ana mwakuri n uarongorongo Ioane e a kakoroa iai bukin te taetae ni burabeti are e na riki bwa ana tia uataeka Iehova. (Maraki 3:1; Mataio 3:1-3) E kaotia bwa boni ngaia are e na ‘katauraoiia aomata imwain Iehova,’ n arona ni buokiia raona n I-Iutaia bwa a na butimwaea teuare e na tei ibukin Iehova are Iesu Kristo.—Ruka 1:17.
Karakinana: E taekinna Iesu bwa “e tuai ni kaoti mai buakoia aomata aika bungiaki, temanna ae kakannato riki nakon Ioane te tia Bwabetito. Ma e kakannato riki nakoina ane moan te mangori n te Tautaeka n Uea ae bwaini karawa.” (Mataio 11:11) Ibukina bwa tiaki tii te burabeti Ioane ma “te tia uataeka” naba are e a kaman taekinaki, akea temanna ana toro te Atua imwaina ae e kakannato riki nakoina. E oti naba n ana taeka Iesu bwa e na aki uea n te Tautaeka n Uea are i karawa Ioane.b E mate te burabeti ae kakaonimaki aei imwain ae e kauka te kawai nakon te maiu i karawa Iesu. (Ebera 10:19, 20) Ma e ngae n anne, e na karekea te maiu i aon te aba Ioane i aan ana Tautaeka n Uea te Atua, ao e na maiu n aki toki n te Bwaretaiti.—Taian Areru 37:29; Ruka 23:43.
Antai ana karo Ioane te tia Bwabetito?
Bon taanga aika mareaki ana karo Ioane aika Tekaria ao Eritabeta. Tekaria bon te ibonga ae te I-Iutaia. Bon te kakai bungiakin Ioane, ibukina bwa e kanoabo tinana, ke e aki kona ni kariki. Ao ibukina naba bwa “a a uaia ni kara” ngaia ma Tekaria.—Ruka 1:5-7, 13.
Antai ae kamatea Ioane te tia Bwabetito?
E kabakuaki roroan Ioane iroun te Uea ae Erote Antibati. E karaoa anne i aan ana kaumaki buuna are Eroria. E riribaa Ioane neiei ibukina bwa e tuanga Erote ae e aki riai i aan te tua n I-Iutaia bwa e na mare ma ngaia.—Mataio 14:1-12; Mareko 6:16-19.
E kakaiangatoa Ioane te tia Bwabetito ma Iesu?
Bon akea n te Baibara te rongorongo ae oti iai bwa a kakaiangatoa. (Ioane 3:25-30) Ma ni koauana, e taekinna Ioane ae bon tabena bwa e na katauraoa kawain te Mesia, ma tiaki te tia kaitaraa. E taku Ioane: “Bukin rokou ni bwabetito n te ran, bwa e aonga ni kaotaki teuaei nakoia tibun Iteraera.” Ao e a manga taku: “Teuaei bon Natin te Atua.” (Ioane 1:26-34) E rangi ni kukurei Ioane n ongo ae e nakoraoi ana mwakuri ni minita Iesu.
a “E aki karaoa ae bure” Iesu. (1 Betero 2:21, 22) Ngaia are e bwabetito tiaki ibukin ae e na raira nanona, ma ibukina bwa e na anga ngaia bwa e na karaoa nanon te Atua. Ae teuana mai iai, e na anga maiuna Iesu ibukira.—Ebera 10:7-10.
b Nora te kaongora “Antai Aika Nako karawa?”