Karekea Reireiam Mairoun “te Atua ae Anga te Kabebetenano n Aekana Nako”

1. Bukin tera ngkai ti kabebeteia tabemwaang?

TI BANE ni “karawawataaki . . . ni kataaki aika kakaokoro,” ngaia are n tabetai ti kainnanoa te kabebeteaki ao te kaungaunga. (1Bet. 1:6) Ti kakaitau ngkana ti kabebeteaki irouia tabemwaang, ngaia are ti riai naba ni waekoa ni kabebeteia naake a karawawataaki. (Mat. 7:12) E kaota nakoira arora ni “kabebeteia akana kataaki n aeka ni kataaki nako,” Iehova ae “te Atua ae anga te kabebetenano n aekana nako.” Ti kona ni kakairi n ana katoto n arora ni ‘kabebeteira i marenara.’ (2Kor. 1:3, 4; 1Tet. 4:18) Ti karaoia tiaki ibukin ae ti kabaeaki nako iai, ma ibukina bwa ti tangiriia tarira n te onimaki. N te kaongora aei, ti na maroroakina (1) nanon te taeka ae kabebetea ae kabwarabwaraaki n te Baibara, (2) arora ni kona ni kabebeteia tabemwaang ao (3) te bwai ae ti kona ni karaoia ngkana ti kainnanoa te kabebetenano.

KABWARABWARAAN TE TAEKA AE KABEBETEA N TE BAIBARA

2. Tera nanon te taeka ae “kabebetea” n te Baibara?

² N te Baibara, ao te taetae ni Kuriiti ae rairaki bwa “kabebetea” e kona ni mwaiti nanona ni kaineti ma tein te rongorongo. E kona n nanona “kaungaa,” ke “kaumakia.” (IRom 12:8; nora te study note i aon “encourages.”) Nanon raoi te taeka aei “ko wetea temanna nako rarikim.” Ngaia are ti kona ni kataamneia te rao temanna ae waekoa ni buoka raoraona ae rawawata, ao ni katauraoa te ibuobuoki ke te boutoka ae e kainnanoia. N aki ongeia bwa tera te ibuobuoki ae katauraoia te rao ni koaua anne, ma titeboo n taai nako mwin te kabebetenano ni koaua, ae kateimatoaan ao kakorakoraan te aomata ae karawawataaki.

3. E kangaa Barenaba ni katea te katoto ni kabebeteaia tabemwaang? (Nora naba te taamnei.)

³ Iangoa te katoto n te Baibara. Iai te Kristian ae arana Ioteba ae kaotiota te aeka ni konabwai teuana ae rianako, ae kaungaaia ao kabebeteaia tabemwaang ao ibukin anne a aranna abotoro bwa Barenaba ae nanona “Natin te Kabebetenano.” (Mwa. 4:36) E tonu raoi arana anne ngaia are e aki manga kabonganaaki oin arana n te Baibara. A bati taai ake e maiuakina iai nanon arana Barenaba, n arona ni buokiia tarina n te onimaki ngkana a kainnanoa te ibuobuoki. N te katoto, ngke e a tibwa roko i Ierutarem te tia rimwin Iesu ae boou are Tauro, ao e kani kaitiboo ma taan rimwin Iesu. Ma a maakua ibukina bwa a ataia ae te tia bwainikirinia aomata. Ma e onimakina Tauro Barenaba ao e kairia nakoia abotoro.—Mwa. 9:26-28.

ARORA NI KABEBETEIA TABEMWAANG

4. Tera te anga teuana ae te kabanea n tamaroa ni kabebeteaia tabemwaang? (I-Rom 1:11, 12)

⁴ Kawariia ngkana ko konaa. E kabonganaia Iehova ana toro ni kabebeteia iai tabemwaang. N te katoto, ngke e rawawata te burabeti are Eria, ao Iehova e kabongana te anera ni kaungaa teuaei. (1Uea 19:4-7) E ataia naba te abotoro Bauro ae e kona riki ni kaungaia tarina ngkana e boni kawariia. (Wareka I-Rom 1:11, 12.) Ngkana ko kawara temanna bwa ko na kabebetea, karekea am tai ae maan teutana nakon tii te maroro ae kimototo. (1Kor. 16:7) Ma ngkana ko aki kona ni kawara temanna ae kainnanoa buokana, ko kona n tareboonia, ni kororeta, ni korea te taeka ae uarereke n te beeba ke ni kanakoa am rongorongo n te tareboon bwa ko aonga ni kakorakoraa. Ko na kariaia bwa e na kabonganako Iehova ni kabebeteia tabemwaang?

5. Baikara kangaanga aika ti kona ni kantaningai bwa ti na kaaitarai?

⁵ Ngkai e a karuanikai riki kabaneani boong aikai, ti kona ni kantaningaia bwa ti na aitara ma kangaanga aika bati riki ngkana ti kataia ni boni kawariia tarira ao mwaanera n te onimaki ni kabebeteia. Ngke e kabureaki Bauro i Rom, ao Onetiboro are kaain Ebeto e kakaaea Bauro e ngae ngke e kona ni kabureaki iai ke ni boni kamateaki naba. (2Tim. 1:16-18) A kaotiota naba te aeka n nano anne taani Kakoaua i Rutia ngke a bwainikirinaki tariia ao mwaaneia ibukin aia onimaki. Ngkana a kaboowiaki taani Kakoaua, ao a roko naba n te tabo ni boowi tariia ao mwaaneia n te onimaki ni kaota aia boutoka, e ngae ngke karaoan anne a kona n ruanikai iai inaomataia. E aera ko aki katauraoiko ni kakairi n aia katoto n ninikoria, n arom n ukeuke i aon aroia ana aomata te Atua rimoa ao ni boong aikai ni boutokaiia i marenaia ao ni karekea kimwareireia n aki ongea te bwainikirinaki?

6. Ti na kangaa ni kakairi iroun Iehova ngkana ti kabebeteia tabemwaang? (Nora naba te taamnei.)

⁶ Kakauongo nakoia. Ngke e namakinna te burabeti are Eria bwa e a ruanikai maiuna, ao e bunra nanona nakon Iehova. E kakauongo Atuara ae tatangira nakon Eria ngke e kaotii tabeaiangana e ngae ngke E a kaman ataa te bwai ae rawawata iai teuaei. E kakauongo naba Iehova ma te taotaonakinnano ngke e okioki baike e taekini Eria! (1Uea 19:9, 10, 14) E kariaia naba Iehova te burabeti ae Abakuka bwa e na kaotii tabeaiangana ao nanououana n te aro ae e taraa iai ni kaitaraa mwaakan te Atua ni kairiri. (Aba. 1:2, 3) N ara bong aikai, e kakauongo raoi Iehova nakon ara tataro e ngae ngkana e a kaman atai baika ti kainnanoi. Ti kona ni kakairi iroun Iehova ngkana ti kakauongo raoi ma te karinerine ngkana a taetae nakoira tarira ao mwaanera. “Waekoa n ongora” ngkana a taetae, ao tai uruana aia taetae ke n un e ngae naba ngkana a taraa n taetae ma te aki iango ke ngkana e a okioki baika a taekini.—Iak. 1:19; TeMin. 7:9.

7. Ti na kangaa n ataa kainnanon te aomata ae rawawata?

⁷ Ataia bwa tera ae e kainnanoia te aomata. Ti aki kona n nori naano n aron Iehova, ngaia are ti tii kona n ataia bwa tera te aeka ni kabebetenano ae kainnanoia te aomata ngkana ti kakauongo raoi nakoina. Tai iangoia bwa ko ataa te bae e kainnanoia te aomata ibukin ae ko ataa te bwai ae ko na kainnanoia ngkana ko rinanon te kangaanga ae titeboo ma are e rinanona. A kakaokoro arora. Ngaia are karekea am tai ae maan teutana, kakauongo raoi, ao tabeki titiraki aika a na buokiko n ataa ana namakin.—TaeRab. 20:5.

8. E kangaa Iesu ni kabebetea Mareta ao Maria imwini maten Rataro? (Nori naba taamnei.)

⁸ Iangoa aron Iesu ni kabebetea Mareta ao Maria imwini mateni mwaaneia are Rataro. Titeboo rawawataia aine aikai, ma e kabebeteia Iesu n aanga aika kaokoro. Ngke e tia Iesu n taetae ma Mareta ao e tibwai koaua ibukin te mangauti nakoina ao ni buokia ni kakorakoraa riki ana onimaki n te kantaninga ae katauraoaki anne. Ma ngke e roko Maria n tang nakon Iesu ao e aki taekina taekan te mangauti nakon neiei. Ma e tang ma Maria ao e titirakinna bwa e kaweneaki ia Rataro. (Ioa. 11:20-35) Tera reireiara? Ngkana ti kabebeteia naake a rawawata, ti riai n atai baika a kainnanoi n oneani mwin are ti na kataia ni kabebeteia aomata nako n te anga ae tii teuana.

9. Ti na kangaa ni kamanena te Baibara ni kabebeteia iai tabemwaang? (I-Rom 15:4, 5)

⁹ Kamanena te Baibara. Ngkana ko taekina “te kabebeteaki man te Koroboki ae Tabu” nakon temanna, ko kona ni buokia iai ni karekea ana kantaninga. (Wareka I-Rom 15:4, 5.) E kona te kantaninga anne ni karekea riki te kabebeteaki ao te kaungaunga. (Ita. 40:31) Ko na kangaa ni kakaaei kiibu man te Baibara ae ko na kaungaa iai temanna? Iai tabeman aika kakawakini kiibu aika a korei ae a okiokiri ngkana a kainnanoi, n aroni kiibu ake i aan te atu n reirei ae “Comfort” n te boki ae Scriptures for Christian Living. Butiia Iehova bwa e na buokiko ni kamanena ana Taeka n te anga ae te kabanea n tamaroa ae ko na katauraoa iai te kaungaunga. E kona ni buokiko taamneina n uringi kiibu aika riai ngkana ko kainnanoi.—Ioa. 14:26.

10. Bukin tera bwa ti riai n taetae ma te akoi ngkana ti kataia ni kaungaa temanna?

¹⁰ Taetae ma te akoi. N te moani koroboki ae kabonganaaki iai te taeka ae “kabebetea” e kona n rairaki bwa “kaungaa,” ke “kaumaka.” N tabetai, ko bae ni kainnanoia bwa ko na kaungaa, ke ni kaumaka te aomata are ko kabebetea bwa e na bita ana iango. Ngkana anne ae kainnanoaki, iaiango raoi imwain ae ko taetae bwa e aonga n ae a aki kammaraki am taeka ma a riki bwa te bwai ni kamaiu. (TaeRab. 12:18) E katea te katoto ae kororaoi Iehova ngke e taetae ma Eria, are e kairua ana iango ibukini kakawakin ana mwakuri ao ibukini mwaitiia taan tannako man te koaua i aon Iteraera. E buoka Eria Iehova ma te akoi ni kaeta ana iango ma e aki taekini ana kairua. (1Uea 19:15-18) Ko kona naba ni karaoa anne ma te akoi ao te iaiango raoi. Ngkana ko anga am kabwarabwara ke am kaeka ni bobotaki ni Kristian, taetae n taai nako ma te akoi ao taekina te bwai ae raoiroi ngkana ko kataia ni kaungaia ao ni kakorakoraia tarim n te onimaki.

11. Tera ae a kainnanoia n angiin te tai naake a rawawata? (1 Ioane 3:18)

¹¹ Katauraoa te ibuobuoki ae manena. N angiin te tai a kainnanoa ae bati riki naake a rawawata nakon tii taeka ni kabebetenano. (Wareka 1 Ioane 3:18.) E katea te katoto ae raoiroi Barenaba ngke e kaboonakoa abana ao ni bwaintangiraa mwanena bwa boutokaaia tarina n te onimaki aika tibwa bwabetitoaki ake a kainnanoa te ibuobuoki. (Mwa. 4:36, 37) A bati raora ni Kristian n ara bong aikai aika a kakairi n ana katoto ae tamaroa aei n aroia ni katauraoa te ibuobuoki ae manena nakoia naake a kainnanoia. E rangi n rotaki Gabriela mai Poland ngke e urubekebeke ana auti n te ieka. E taku neiei: “I rangi ni maaku ao n raraoma ao bon au karo naba ake a maeka irou. I raraoma bwa ai tera arou. Ma a roko taari man ekaretia aika uakaan ao a onobwaia mwengau n tii tebongina. Man te baere I rinanona anne, e a kakorakoraaki iai irou onimakinan ae e boni kairiia ana aomata Iehova bwa a na kabebeteia naake a rawawata.”

12. Ko na kangaa ni buokiia raom ni Kristian ngkana ko kakaonimaki n nanomwaaka i aani kataaki?

¹² Nanomwaaka i aani kataakim. E tuangia kaain Tetaronike Bauro ae e reke kabebeteana ao korakorana ae boou ngke e ongo taekan aia kakaonimaki n nanomwaaka. E ataia ae e aki matebuaka ana mwakuri. (1Tet. 3:5-8) E kantaningaia Bauro bwa e na kabebeteia tarina n ikotaki naba ma naake a tuai ni kinaa, n arona ni kakorakoraa ibukia. (IKoro. 2:1, 2) N aron anne, ngkana a nora aron Iehova ni buokira n nanomwaaka i aani kataakira raora ni Kristian, a na rangi ni kaungaaki iai.

13. Tera ae ti riai n teimatoa ni karaoia ngkana ti kaungaia tabemwaang?

¹³ Bwaina te taotaonakinnano. A kona taari n te onimaki aika a bwara nanoia n aki kani butimwaea ara kakorakora ni kabebeteia. E kaungaira te Baibara bwa ti na ‘teimatoa ni kaungaira i marenara.’ Te taeka ae “teimatoa ni kaungaingkami” e kabwarabwaraa te mwakuri ae reitinako karaoana. (1Tet. 5:11) Taotaona nanom ngkai ko teimatoa ni karaui nanoia ao ni kabebeteia naake a kainnanoa am ibuobuoki. (1Tet. 5:14) E koaua ae n tabetai ti na boni kainnanoa te kabebetenano n tatabemanira nako. Tera ae ti kona ni karaoia ngkanne?

NGKANA KO KAINNANOA TE KABEBETENANO

14-15. Tera ae ti riai ni karaoia ngkana ti raraoma ke n rawawata?

¹⁴ Tataro nakon Iehova. Butiia bwa e na kabebeteko n taai ake ko raraoma iai ke n rawawata. (TaiAre. 94:19) Taekina raoi te bae ko kainnanoia n am tataro ao bunra nanom nakon Iehova. (TaiAre. 62:8) E koaua ae e a kaman atai Iehova ara namakin imwain ae ti tataro. Ma taekinan am iango n am tataro ae nako mai nanom e kaotaki iai am onimaki. Ao e na boni kaekai Iehova aia tataro aomata aika a onimakinna. (Mareko 11:24) E kaumakira I-Biribi 4:6, 7 ni kangai: “A na kaotaki ami bubutii ni bwaai ni kabane nakon te Atua . . . ao te rau are mairoun te Atua ae riaon aia iango aomata, e na kawakin nanomi ma ami iango.”

¹⁵ Bubutii buokam irouia tabemwaang. Kaotii am namakin nakon raoraom ae ikawai, ao maroro ma te unimwaane ae ko onimakinna. A kona n riki tarim n te onimaki bwa nibwani kabebeteam ma a aki kona n ataa am namakin ke te bae ko kainnanoia ngkana ko aki tuangia. (TaeRab. 14:10) Ko kona ni bubutiia bwa a na kakauongo nakoim, ke n tibwaa te kibu ke te kaongora teuana ae a noria bwa e kabebetenano.

16. Tera ae kona n riki ngkana a kataia ni kaungako tabemwaang, ma tera ae ko riai n uringnga?

¹⁶ Bwaina te taotaonakinnano ao te kabwarabure. A kona ni karaoi kairua taari n te onimaki ngkana a kataia ni kaungako. N te katoto, a kona n taekina ke ni karaoa te bwai teuana ae ko na rawawata riki iai, ao n aki kabebeteaki. Taotaona nanom ngkana e riki anne. (1Kor. 13:4, 7) Ao uringi taeka ake n Iakobo 3:2: “Ngkana e aki titibanako temanna n ana taetae, ao bon te aomata ngaia ae kororaoi.” Uringnga are a kani buokingkami tarimi n te onimaki. Uringnga ae “e bon ingainga te nano, ma e mamaara te rabwata.”—Mat. 26:41.

17. Tera ae ti riai ni motinnanoia bwa ti na karaoia?

¹⁷ Ti bane ni kainnanoa te kabebetenano ao te kaungaunga, ao e na rikirake riki kainnanoana ngkana e a karuanikai riki kabaneani boong aikai ao ngkana a kakaaitaraira riki taani kairiribai nakon te Atua. Ti bia motinnanoia bwa ti na kakorakoraira ni kabebeteira i marenara.