Teimatoa ni Kakorakoraa Am Reitaki ae Kaan ma Buum

1. Bukin tera bwa bon te bwaintituaraoi mairoun Iehova raao ni koaua?

BON te bwaintituaraoi mairoun Iehova raao ni koaua. (Iak. 1:17) A tangira te Atua ao a tangirira. A uataboa kimwareireira ngkana ti kukurei, a kabebeteira ngkana a bwara nanora, a anganira te taeka n reirei ma te aki wimakiki ngkana ti kainnanoia. A kakaonimaki ni koaua, ao ti kona n onimakinia. A “kakimwareireia te nano,” raoraora aika aekaki akanne!—TaeRab. 27:9.

2. Bukin tera bwa e kakawaki irouia taanga ni mare bwa a na teimatoa ni kakorakoraa aia reitaki? (Mataio 19:6)

² E kakawaki iroun te mwaane ma buuna bwa a na riki bwa raao ni koaua. A aki riai ni kakeaa bongan aia reitaki ae kaan ma a riai n teimatoa ni kakorakoraa. Ngkana a aki tabe ma aia reitaki, a kona ni moanna n namakinna ae a moanna ni maroaa, n ebu ao n un naba. Ma ngkana a teimatoa ni karikirakea aia reitaki, a kona n rangi ni kaan reitakia i marenaia. (Wareka Mataio 19:6.) N te kaongora aei, ti na nora aroia taanga ni mare ni kona n teimatoa ni kakorakoraa reitakia. Ma ti na maroroakina moa aroia Kristian aika akea buuia ni kona n rineiia buuia aika a na riki bwa raoraoia n uaa mateia.

AROM N RINEA BUUM AE E NA RIKI BWA RAORAOM

3-4. Tera ae e na buoka te aomata ni kakaaea buuna ae raoiroi? (Taeka N Rabakau 18:22)

³ Imwain ae ti karaoa ara motinnano ae bubura, ti riai n tarai baika karuanikai aika kona n riki, kakabwaia, ao mwina. A kona n rotaki maiura i nanon te tai ae maan man ara motinnano aika bubura, ngaia are e kakawaki bwa ti na iaiangoi raoi.

⁴ Ngkana ti na rinea raoraora ae e na riki bwa buura, ti a karaoa iai teuana mai buakon te motinnano ae rangi ni kakawaki. Ngkai bon Iehova ae moani karaoa te babaire ibukin te mare, ti riai ngkanne n ukera ana kairiri ni kakaaeani buura. E tangiria Iehova bwa e na karekea buuna ae raoiroi te mwaane ao E tangiria bwa e na karekea buuna ae raoiroi te aine. E ataa Iehova ae te kabanea n tamaroa ibukira n taai nako. (Wareka Taeka N Rabakau 18:22; Ita. 48:17, 18) A kona booto n reirei man te Baibara ni buoka te Kristian ni kakaaea temanna ae tau ibukina.

5. Bukin tera ngkai e kakawaki rinean te aomata ae bwabetitoaki bwa buum?

⁵ Ngkana ti bwabetitoaki, ti a riki iai bwa raoraon te Atua. (TaiAre. 25:14) Ngkana ko kani mare, ko riai n rinea buum i buakoia raoraon Iehova. (1Kor. 7:39) Karaoan anne, ko kaota iai am kakaitau ibukin ana kaetieti Iehova ao ane ko na iangoa buum bwa te kakabwaia mairoun Iehova. (TaeRab. 19:14) Ane ko na totokoi naba kangaanga aika a na riki ngkana ko “reitaki” ma ae tiaki kaain te onimaki. (2Kor. 6:14) Ko bon aki kaota te wanawana ngkana ko iraorao ni karekenano ma ae tiaki kaain te onimaki bwa tao ko iangoia ae e a aki kona n reke i buakoia raom ni Kristian ngkai a karako. Ko na bon aki naba kauarerekea kairuan te iraorao ma ae tiaki kaain te onimaki, n iangoan ae e kona ni manga reiakina te koaua.

6-7. Baikara titiraki aika riai ni kaekaaki n tain te iraorao ni karekenano?

⁶ E koaua ae tiaki ni kabane aika bwabetitoaki aika kona n riki bwa buum. Iaiangoa te aomata ae kona n riki bwa buum.a Titirakiniko aei: ‘Tera arona nakoia ana utu? E tabeakinia ao ni karinerine? Antai raoraona? Tera arona ngkana e aki boraoi n iango ma tabemwaang? E tatangiria bwa e na kakaraoaki ae tangiria, ke e kukurei ni butimwaei aia iango tabemwaang ngkana akea te boto n reirei n te Baibara ae uruakaki? Tera aroarona ni kaineti ma te mwane?’

⁷ Ko kona naba n titirakiniko aei: ‘E oti iroun raoraou aei bwa e rangi n tangira Iehova? E karina i aona “te aroaro ae boou”? E na buokai bwa N na kabatiaa riki au tai ni beku iroun Iehova? Titeboo tiara n te onimaki? Ti kona n riki bwa raao ni koaua aika rangi ni kaan reitakia?’ (IKoro. 3:9, 10) Ngkana te tari te aine ngkoe, e na riki te tari te mwaane ane ko karekenano ma ngaia bwa raoraom ae raoiroi ao atun te utu ae raoiroi? (1Kor. 11:3) Ngkana te tari te mwaane ngkoe, e na kukurei te tari te aine ane ko karekenano ma ngaia ni butimwaea am kairiri bwa atun te utu n aki ongea aki kororaoim? E kainnanoa te tai ae maan teutana kaekaan titiraki akanne. Ngaia are kamanena am tai n iraorao ni karekenano ni kinaa raoi te aomata ane e na riki bwa buum.

8-9. Tera ae kona ni buoka temanna ae iraorao ni karekenano ni karaoa te motinnano ma te wanawana? (Nora naba te taamnei.)

⁸ N tain am iraorao ni karekenano, ko kona riki ni karaoa am motinnano ma te wanawana ngkana ko kataia n ataa raoi anuan te aomata. Ukeria bwa tera aia iango tabemwaang ibukin raoraom anne. Ko kona n ongora irouia tabemwaang bwa tera anuana ao tera aia iango kaain te ekaretia ibukina. N te katoto, e kinaaki bwa e taotaonakinnano, e akoi ao e bwaina te wanawana? E kangai te tari te aine ae Sarah, i French Guiana are e mare ma te tari te mwaane ae Daniel: “I ongora rongorongon Daniel mairoun te tari te mwaane ae raona ni maeka ao toana ni bwaiania, mairoun te unimwaane n ana ekaretia Daniel, mairouia naake a kinaira ni kauoman, ao mairouia taari aine n ana ekaretia.” Ko kona n titirakina te aomata are ko iraorao ma ngaia ma te akoi ngkana iai te bwai ae ko riai n ataia ibukini maiuna ngkoa ke ngkai, kioina ngkai iai bwaai ke anua tabeua aika kona ni karikii kangaanga n te mare imwina riki.

⁹ Tai kakeaa bongan nanououam ke aia taeka raoraom aika ikawai n te onimaki ibukin aroaron te aomata ae ko iraorao ma ngaia aika aki raoiroi. Karaoan anne, ko na kona iai ni motikia bwa ko bwaina te wanawana ngkana ko reitaanako te iraorao ni karekenano ke ko aki.b Ma ngkai, ti na maroroakini baika a kona ni karaoia taanga ake a a tia ni mareaki.

KABANEA AMI TAI I MARENAMI NI KAKORAKORAA AMI REITAKI

10. Bukin tera ngkai e raoiroi iroun te buu te mwaane ao te buu te aine ni karekea aia tai i marenaia?

¹⁰ E kona te buu te mwaane ao te buu te aine ni kateimatoa korakoran aia reitaki ao aia mare n aroia ni kakarekea aia tai i marenaia, n aki ongei tabetabeia. E reke iai aia tai ni maroroakini baika riki ni katoabong, ni kaotii aia iango ao aia namakin, ni kaotiota aia tangira i marenaia, ao ni kaai ni kukurei.

11. Tera ae kona n urua reitakia taanga?

¹¹ A tatangiria taanga aika a kaan reitakia n aki kani maenako. E koaua ae a kona ni maenako i nanon tabeua te tai. Ma e kona ni karuanikai te maenako i nanon te tai ae maan. N te katoto, iai tabeman aika a karekei aia mwakuri n te aba teuana, ao ni kararoaia iai ma aia utu i nanon te tai ae maan. E ngae ngke e kona n reke aia karekemwane n te babaire aei, ma e kona n ruanikai aia mare ngkana a maenako i nanon te tai ae maan.

12-13. (a) Tera ae a a tia ni karaoia tabeman taanga ni Kristian bwa a aonga ni karekea aia tai ma buuia? (Nora naba te taamnei.) (b) Tera aroni kakawakin reitakim ma buum? (Nora te bwaoki ae “Kakawakira Buum ni Maium?”)

¹² Nora te bwai ae a karaoia taanga tabeman ni kakabanea aia tai i marenaia. E taku Leah, ae kaain Guam: “I unga ma buu ngkana ti kaai ni karaoi baika kakaokoro. E kuri kangaanga ae ti na kaei botaki ke ni butimwaei kakao ngkana ti aki nako ni kauoman.” E reitia n taku Roxanne, n te United States: “Ibukina bwa ti rangi n tatabetabe ti noria ae ti riai ni bairea ara tai bon tii ibukira ni kauoman n aron ae ti kakaraoia ibukini botaki tabeua aika kakawaki.” (Kabotaua ma Amota 3:3.) E taekina aei Damien i Buranti: “Ti a bwaati arora ni karekea tangirani baika e tatangiria temanna iroura.” (Mat. 7:12) E kangai Katie ae mena naba n te United States: “N tabetai ti katikui ara tareboon bwa ti aonga n aki katabetabeaki.”

¹³ Ma ae kakawaki riki, kabanea ami tai i marenami ibukini baika irekereke ma te onimaki. E kangai Myriam, ae kaaini Buranti: “Ti moana kanoan ara bong ni warekan te Baibara ao n tibwaani baika a anaaki nanora iai ao baika ti kona ni maiuakinna. I rangi ni kukurei ni kakaraoan aei.” E reitia n taku neiei: “I tatangiria naba ngkana ti kaai n tataro ao I ongora n aroni buu ni kaota korakoran tangiran Iehova irouna.” E taku Katie are taekinaki mai mwaina: “I rangi n taatangira ara tai are ti kaai ni mwakuri ni minita iai. E kaunga ongoraeakinan arora ni kaotiota ara onimaki ao ti teimatoa n reiakini baika boou ibukira.”—TaeRab. 27:17.

TEIMATOA NI KAANINGKAMI NGKANA A RIKI KANGAANGA

14-15. Bukin tera ngkai a riai ni kabanea aia konaa taanga n tokanikai i aoni kangaanga aika kona n riki n aia mare? Taekina te katoto.

¹⁴ A na bon rinanoni kangaanga taanga n aia mare ngkai a aki kororaoi. E taekinaki n te Baibara ae e na “reke rawawatan te rabwata” irouia taanga ni mare. (1Kor. 7:28) E taekinaki n te study note n te kibu aei, bwa te taeka aei, “e kaineti nakoni kangaanga ao kataaki aika riiriki nakoia taanga ni mare.” Ngkana a riki kangaanga akanne, bukin tera ngkai a kabanea aia konaa n tokanikai i aoia ao n teimatoa ni kaania aia reitaki i marenaia?

¹⁵ Iangoa te kaikonaki aei. Ngkana e uruaki te kateitei ae rangi ni kinaaki ke te korotaamnei teuana, a na boni bae n iangoa manga onobwaiana naake a bwaibwai iai. A bae ni kabanea te mwane ae mwaiti ao kaubwaia riki tabeua ibukin onobwaiana, ao e kona n anaa iraua te ririki katiaana. Bukin tera? Ibukina bwa e rangi ni kakawaki te kateitei ke te korotaamnei anne irouia. N aron anne, a kakawaki maare ni kabane. E na bon riki naba te kangaanga irouia taanga aika e rangi ni kaan reitakia. Ma n aron te kateitei ke te korotaamnei ae uruaki ae kona ni manga onobwaiaki, e kona naba ni kanakoraoaki te mare ae bati iai te kangaanga. E na bae n anaa te tai ae maan teutana ao te mwakuri korakora, ma e na boni kukurei Iehova ngkana a mwakuri korakora taanga ni kakorakoraa aia mare ao n aki maenako. (Maraki 2:16) Karaoan anne irouia, a kaota iai aia tangira ao aia karinerine tiaki tii i marenaia ma nakon naba Iehova are ngaia ae e Moani karaoa te mare.

16. Ni kaineti ma 1 I-Korinto 13:4-8a, tera ae kona ni buokiia taanga aika kaaitara ma te kangaanga ae kakaiaki n aia mare? (Nora naba te taamnei ao te bwaoki ae “Te Ibuobuoki Ibukini Kakorakoraan Reitakimi.”)

¹⁶ Ngkana a riki kangaanga n am mare, tai waekoa ni maenako. (1Kor. 7:​10, 11) Ma titirakiniko aei, ‘I kona ni karaoa ae bati riki ni kakorakoraa iai reitakira?’ Rinanoi baika taekinaki n te Baibara ibukini kaotiotan te tangira, ao titirakiniko ngkana ko kona ni kanakoraoi riki iroum aroaro tabeua ake a taekinaki n 1 I-Korinto 13:4-8a. (Warekia.) N oneani mwin ae ko na kakaaea am anga ni kitana buum, kabanea am konaa ni kakaaea te anga ae kam na kaaniaki riki iai. Kaatuua am iango i aon te bae ko kona ni karaoia ni manga kakorakoraa iai reitakimi. Tataro nakon Iehova bwa e na kaiririko. Karekea buokam mani booki ao viteo, irouia unimwaane ao Kristian aika ikawai n te onimaki. Ngkana ko onimakina Iehova, are ngaia te katennai ni karai ao te kabanea ni matoatoa n am “karai ae te nano tennai,” ane e na “aki waekoa ni moti” am mare.—TeMin. 4:12.

17. A na kangaa naake a iaiangoa te mare ao naake a a tia ni mareaki ni karekea te kukurei?

¹⁷ E tangiriia ana aomata ni kabane Iehova bwa a na kukurei, n ikotaki naba ma naake a iaiangoa te mare ao naake a a tia ni mareaki. Ngaia are ngkana akea buum ao ko kani mare, rinea raoi buum ae e na riki bwa raoraom. Ao ngkana ko a tia ni mare, teimatoa ni kakorakoraa reitakim ma buum. Mwakuria arom n tokanikai i aoni kangaanga aika riki n am mare ao onimakina ana ibuobuoki Iehova. Ngkana ko karaoi baikai, ane ko na ‘kukurei iai n te maiu’ aei ma buum!—TeMin. 9:9.