Bukina Ngkai Ko Kona ni Kukurei Ngkai Ko Ribaaki

1. Tera ana taeka ae kamimi Iesu ni kaineti ma te riribaaki?

E KANGAI Iesu n Ana Kabwarabwara i aon te Maunga: “Kam a kukurei ngkana kam riribaaki irouia aomata.” (Ruka 6:22) A bae ni kubanako n taeka akanne naake a ongora irouna. Ni koauana, akea ae kan riribaaki. Bukin tera ngke e taekin taeka akanne Iesu? Bon te titiraki ae tamaroa iaiangoana, kioina ngkai a riribaaki ni boong aikai taan rimwin Iesu irouia aomata aika bati. Ti na maroroakinna bwa bukin tera ngkai ti riribaaki ao bukin tera ngkai ti kona ni kukurei ngkana ti riribaaki.

BUKIN RIRIBAAKIRA

2-3. Tera bukina teuana ngkai a bwainikirinaki Kristian ni koaua, ao e na kangaa n rotaki iai arora n iangoiia taani kakaaitaraira? (Ioane 16:2, 3)

² Ti riribaaki ibukina bwa ti taromauria Iehova. E kangai Iesu ibukia naake a na bwainikirinia taan rimwina ao n tiringia: “A aki ataa te Tama, ke ngai.” (Wareka Ioane 16:2, 3.) Antai raoi ae e na bukinaki ni kakaitaraaia ana aomata te Atua? Bon Tatan. Bon “atuan te waaki ae ngkai i aon te aba.” (2Kor. 4:3, 4) E kamatakia aomata nakon te koaua ibukin Iehova ao e kariria bwa a na kakaaitaraia naake a ataa ao n tangira te Atua. (Ioa. 8:42-44) E na kangaa ataakin aei ni bita ara iango ibukia taani kakaaitaraira? Ataakin ae a mwamwanaaki, ti a buokaki iai bwa ti na aki riribaiia.

³ Iangoa ana katoto Pavel,a ae maeka n te aba ae katabuakaki iai ara mwakuri. Ibukin teimatoana ni kakaonimaki n taromauria Iehova, e a kabureaki, e batiboaki n aki akaka, ao ni kamatawarikaki n tii ngaia i nanon iraua namwakaina. E taku Pavel ngkai: “E teretere ngkai irou bwa bwainikirinau arei boni mairouia taimonio ibukin ribaan te taromauri ae itiaki. N taraana ao a bon aki riribaira angiina taani mwakuri n te karabuuti. A bon tii karaoa tabeia.” E taku te tari te mwaane temanna mai Croatia are e nanomwaaka i aan te bwainikirinaki ae korakora irouia ana karo aika tiaki kaain te onimaki: “I a noria ae au kairiribai raoi bon Tatan, ao tiaki au karo.”—IEbe. 6:12.

4. Tera reireiara man ana katoto Iesu ao te tia rimwin Iesu are Tetebano? (Nora naba te taamnei.)

⁴ Ti aki riribaiia taani kakaaitaraira. Ni koauana, ti bae ni kairaki bwa ti na tataro ibukia. (Mat. 5:44) Ti kona ni karekea reireiara n aei mairoun Iesu ao te tia rimwina are Tetebano. E tataro ni kangai Iesu ngke e bobitiaki i aon te kai ni kammaraki irouia tautian Rom: “Tamau, kabwarai aia bure.” (Ruka 23:34) E bubutiia Iehova Iesu bwa e na kabwarai aia bure tautia ake a tuangaki bwa a na kamatea. E bae naba n iangoiia tabeman i buakoia aomata aika uanao ake a tatakarua bwa e na kamateaki i aani kairaraangakia irouia mataniwi n Aaro. E ataia Iesu ae a aki ataa te bae a karaoia aomata aikai. N aron anne, e bubutiia naba te Atua te tia rimwini Kristo are Tetebano bwa e na kabwarai aia bure naake a kamatea. (Mwa. 7:58-60) E kaekaa Iehova aia tataro Iesu ao Tetebano? Eng. A bati mai buakoia naake a irekereke ni kaboowian Iesu ao tiringana, ake a a manga rairi nanoia imwina, a kaotiota onimakinan Iesu, ao ni bwabetitoaki. (Mwa. 2:36-41) Ao teuare e kariaia kamatean Tetebano, are Tauro mai Tareto, e riki bwa te Kristian ao e uringaaba ni bwaai aika rangi ni karawawata ake e karaoi ibukin ronnanona.—1Tim. 1:13.

5. Tera reireiam man rongorongon César?

⁵ E teimatoa Iehova ni kaekai tataro ibukia taani kakaaitara ni boong aikai. Iangoa rongorongon César, ae maeka i Venezuela. E korakora kakaitaraan te koaua iroun tamana ngkoa. E kangai César: “Bon te tina ao te buu te aine ni koaua tinau. E ngae ngke e moanibwaia te Tautaeka n Uea, ma e aki te roko ni katinanikua tamau. E reireinai ma tariu ao mwaaneu bwa ti na karinea tamara. E tutuangira naba bwa ti na ongeaba irouna, ma tii ngkana e tuangira bwa ti na karaoa te bwai ae ekaanako nanon te Atua.” Ni waakinakon te ririki, ao e a bitaki riki aroaron tamana. E taku César: “N te bong teuana, ngke I tia n tataro mai nanou, ao I a titirakina tamau bwa I kona n reirei ma ngaia n te Baibara. I a aki kona ni kabwarabwaraa au namakin ngke e kariaia.” Imwina riki ao e a bwabetitoaki taman César. A aki bane ni karaoi aekaki ni bitaki akanne taani kakaaitara, ma tabeman a bitaki teutana imwin noran arora ni bwaina te karinerine n ara taeka ao n aroarora aika tamaroa. Ai kakukureira ngkana a a bitaki! Ti ingainga n nora aron Iehova ae “te tia motika taekan te aonnaba ni kabutaa” ae nananoanga, ni katikiia aeka n aomata aikai nakoina.—KBwaai 18:25.

6. Ni kaineti ma Mareko 13:13, bukin riki tera ngkai ti riribaaki?

⁶ Ti riribaaki ibukina bwa ti karinea Iesu. E taku Iesu bwa a na riribaaki Kristian ni koaua irouia aomata nako “ibukin [arana].” (Wareka Mareko 13:13.) Tera ae tei ibukin ‘aran’ Iesu? E tei ibukin te bae e kinaaki iai ao mwaakana ni kairiri ngkai te Uea ngaia n Ana Tautaeka n Uea te Atua. Ti riribaaki irouia aomata aika onimakinia taani kairiri aika n te aonnaba, ao a aki onimakina teuare e rineia Iehova bwa e na tautaekana te iuniweeti aei ae Iesu Kristo. E a tia ni moana ana tautaeka Iesu bwa te Uea n te Tautaeka n Uea n 1914. N te tai ae waekoa, ao e nang kamaunai tautaeka nako aika kaitaraa mwaakana ni kairiri.

7-8. Bukin tera bwa a bwainingareaki ana aomata Iehova tabeman? (Ioane 15:18-20) (Nori naba taamnei.)

⁷ Ti riribaaki ibukina bwa ti rarawa nakon ana aonnaba Tatan. E kabwarabwaraa Iesu ae a na riribaaki taan rimwina ibukina bwa a “aki arona aroia kaain te aonnaba.” (Wareka Ioane 15:18-20.) N aroia Kristian rimoa, ti rarawa naba nakon aroaroia kaain te aonnaba aei, anuaia, ao aia taetae, aika aki karinea iai te Atua. Ibukin aei, a a bati taari aika riki bwa bwaai ni bwainingareaki n aia tabo ni mwakuri ke n aia reirei. (1Bet. 4:3, 4) Ma ti kukurei bwa iai tabeman taani kakaaitaraira aika a manga bitaki nanoia ao ni mataaiakinira ibukin arora n tei ibukin ara onimaki.

⁸ Iangoa rongorongon Ignacio, mai Amerika Nuka. E kaea ngkoa te kuura n reirei teuana are e aki toki iai ni kakakanikoaki iroun ana tia reirei ibukini maiuakinan te aroaro ni maiu ae riai. Ma imwain ae e angabeeba Ignacio, ao e a titirakinna te tia reirei arei bwa e kangaa ni kona ni maiuakin ana boto n reirei te Baibara n te tabo ae rangi n riribaaki iai. E kabwarabwaraa Ignacio bwa e iaiangoi ana tua te Atua bwa kaanga kamanoana. Ao e kaoa naba ana tia reirei nakon te taromauri n te ekaretia. E mimi Ignacio ngke e roko ana tia reirei arei! E rangi n anaaki nanon te tia reirei arei n aia tangira kaain te ekaretia ao e a teimatoa ni kaakaea te taromauri. Imwina riki ao e a manga kakaitaraaki naba te tia reirei aei, ngkai e a reirei n te Baibara. Ma e teimatoa n rikirake n te onimaki n uaa e bwabetito.

9-10. (a) Bukin riki tera ngkai a tei n okoro Kristian n ana aonnaba Tatan? (b) Tera reireiara man ana katoto te abotoro Bauro?

⁹ Teuana riki bukina ae ti tei iai n okoro n ana aonnaba Tatan aei, ibukina bwa ti tei i nuka ni kaineti ma te waaki n tautaeka ao n te buaka. (Ioa. 18:36) Ni kaineti ma te reirei ni kairiri are n I-Rom 13:1, ti kakorakoraira n riki bwa kaain te aba ngaira aika ti ongeaba n te tua. Ma ngkai Kristian ngaira, ti teimatoa n tei i nuka ni kaineti ma te waaki n tautaeka, ngaia are ti aki uaiakina te kan riki n tia tei ke ni karei aia bwaoki taan rineaki. Bukin tera? Ibukina bwa ti tei n ana itera Iehova ao ana Tautaeka n Uea are kairaki irouni Kristo. A bati Ana Tia Kakoaua Iehova aika a a tia ni kabureaki ibukin aia onimaki. Ma e ngae n anne, a teimatoa n uarongorongo taari aika kabureaki aikai. A katotonga te abotoro Bauro are iraua ana ririki ni kabureaki n te auti ao ni bon te karabuuti. (Mwa. 24:27; 28:16, 30) E teimatoa n tibwaa te rongorongo ae raoiroi nakoia ake a na ongora, n ikotaki naba ma taan teiakina te karabuuti, tautia, kowana, ueea, ao bon ana tautia naba te Embera n Rom are Nero.—Mwa. 9:15.

¹⁰ N aron anne, a uarongorongo naba taari ake a kabureaki nakoia naake a kan ongora, n aroia taani moti, taani mwakuri n te tautaeka ao ai taan teiakinia buure. E taku temanna te tari te mwaane ae kabanea onoua te ririki n te karabuuti ibukin teimatoana n tei i nuka, bwa e iangoa te karabuuti bwa tiaki katuuaaeana, ma boni mwiokoana mairoun Iehova bwa e na kakaaeia iai aika ai aroia tiibu. Ai kukureira ngaira ngkana e kona Iehova ni kabonganaira bwa ti na karoko irouia aeka n aomata aikai ma te rongorongo ae raoiroi! (IKoro. 4:3) Ti na nori riki bukina tabeua ngkai ti riai ni kukurei e ngae ngkana ti riribaaki ngkai ti beku ibukin Iehova.

BUKINA NGKAI TI KONA NI KUKUREI NGKAI TI RIRIBAAKI

11. E kangaa ni kakorakoraaki ara onimaki ngkana ti bwainikirinaki? Aanga te katoto.

¹¹ Ti ataia ae e kakororaoaki te taetae ni burabeti ae n te Baibara n aia kairiribai kaain te aonnaba aei. E a kaman taekinna Iehova n te moan taetae ni burabeti are e koreaki n te Baibara, ae Tatan ma kanoana, ae taekaia naake a kakairi irouna, a na riribaiia naake a tangira Iehova ao a beku irouna. (KBwaai 3:15) E aki toki Iesu ni kaota koauan te taetae ni burabeti aei n aron ae koreaki irouia taani korei euangkerio ake aman. (Mat. 10:22; Mareko 13:9-12; Ruka 6:22, 23; Ioa. 15:20) Ao a korea naba anne tabeman Kristian ake taani korea te Baibara. (2Tim. 3:12; Iak. 1:2; 1Bet. 4:12-14; Iuta 3, 17-19) Ngaia are ti aki kubanako ngkana ti bwainikirinaki. Ma ti kukurei bwa e a kakororaoaki nanon te taetae ni burabeti ae n te Baibara. Ti a kakoauaa iai ae ti beku iroun te Atua ae koaua. E taku te tari te aine temanna ae beku n te aba ae katabuakaki iai ara mwakuri: “I ataia ae ngke I katabua maiuu nakon Iehova, ao N na bwainikirinaki ngkekei naba ke imwina riki. Ngaia are I aki maaku ke ni kubanako ni kataakiu.” Temanna i buakoia taani kakaitaraa neiei aika bati boni buuna. E iowawa nakoina ao e kabueka ana Baibara ma ana boki. Ma n oneani mwin ae e na kekerikaaki ibukini maakuna, e a kakorakoraaki riki ana onimaki neiei. (Ebera 10:39) E taku neiei: “E a kaman taetae ni burabetinaki te bwainikirinaki, ngaia are I ataia ae e na bon riki. Ma ngke I a rinanona, I a kakoauaa ae aei raoi te Aro ae koaua.”

12. Tera ae buoka te tari te mwaane temanna bwa e na nanomwaaka i aan te bwainikirinaki?

¹² E ngae ngke ti kantaningaia bwa ti na bwainikirinaki, ma e boni kangaanga naba iroura bwa ti na nanomwaaka. E korea ae kangai temanna te tari te mwaane ni kaineti ma menana n te karabuuti: “Iai taai ake e a bwara nanou iai ke n raraoma ao I a tang.” Tera ae buoka te tari te mwaane aei n nanomwaaka? E taku: “I tataro n taai nako. I ututi n tataro n te ingabong. Ao ngkana a riki kangaanga i nanon te bong anne I a manga tataro naba. Ao ngkana I un ibukin te ribuaka, I nako n rokanai n te roki n tebotebo ao n tataro.” E kananoa naba ana iango te tari aei i aon aia katoto naake rimoa ao aika ni boong naba aikai ni kaineti ma etin aroia. E buokaki iai teuaei n nanomwaaka i aan te bwainikirinaki ao e karekea te rau are e beritanna Iesu nakoia taan rimwina.—Ioa. 14:27; 16:33.

13. Tera ae kona ni buokira ni kataenikaia te riribai?

¹³ Iai iroura te tangira ae korakora riki nakon te riribai. E tangira Tamana ma nanona ni kabane Iesu n uaa e anaa kabanean ikena. E tangiriia naba raoraona Iesu. (Ioa. 13:1; 15:13) Ngkana ti karikirakea te aeka n tangira anne, ae tangiran Iehova ao tarira ma mwaanera n te onimaki, ti na kona naba ni kataenikaia te riribai. N te aro raa? Ni kaekaan anne, ti na nora ana katoto te abotoro Bauro.

14. Tera are e buoka Bauro bwa e na ninikoria ni kaitaraa te mate?

¹⁴ Imwaini kamateani Bauro ao e kororeta nakon raoraona ae tangiraki irouna ae Timoteo ni kangai: “E aki anganira te Atua te nano ae mamaaku, ma e anganira te nano ae korakora, ae tatangira.” (2Tim. 1:7) Tera are e nanonna Bauro? E taku Bauro bwa e kona tangiran Iehova ae korakora ni kaira te Kristian bwa e na tauraoi ni kaaitarai kataaki aika korakora. (2Tim. 1:8) Akea te nanououa bwa tangiran Iehova irouni Bauro e buokaki iai ni kaitaraa te mate ma te ninikoria ao e aki te roko ni kakeaa te taromauri ae koaua.—Mwa. 20:22-24.

15. A kangaa tarira ao mwaanera n te onimaki n ara tai aikai ni kaotiota te tangira ae aki bangaomata? (Nora naba te taamnei.)

¹⁵ Ti bon tangiriia raora n te onimaki aika teimatoa ni kananomatoaia i aan te bwainikirinaki. Ni boong aikai ao iai tabeman aika tauraoi ni karuanikaia maiuia ibukia tariia ma mwaaneia n te onimaki, n aron Akura ma Beritikira ngke a karuanikaia maiuia ibukini Bauro. (IRom 16:3, 4) N te katoto, a bati i Rutia aika nanako n taabo ni boowi ibukini kaungaaia naake a kabureaki. Ngke e noriia tarina ma mwaanena n te onimaki n roko n te tabo ni boowi te tari te aine are kabureaki, ao e korakora rotakin nanona n te aro are e aki tiinako ana taeka i nanon tabeua te tai. E kakorakoraaki neiei n aia tangira ae aki bangaomata raona n te onimaki n te tai are e kainnanoia raoi iai. Ai kukureira ngaira ngkai iai iroura te tangira ae korakora riki nakon te riribai!

16. E aera te abotoro Betero ngke e taekinna ae iai bukini kukureia naake a bwainikirinaki ibukin aia beku iroun te Atua? (1 Betero 4:14)

¹⁶ Ti ataia ae nanomwaakara i aan te riribai e karekea akoara iroun te Atua. (Wareka 1 Betero 4:14.) E taekinna te abotoro Betero bwa a a kukurei naake a nanomwaaka i aan te bwainikirinaki ibukin ae a beku iroun te Atua. N te aro raa? Te aeka ni bwainikirinaki anne boni kaotan ae “e mena i [aora]” taamnein te Atua. E ataa raoi Betero te namakin ngkana ko akoaki iroun te Atua ao ko nanomwaaka i aani bwainikirinam. Tabeua te tai imwini Bentekota 33 C.E., ao a a kanakoaki bureitimanin te tembora n Iutaia bwa a na katika Betero ma abotoro ake tabeman ibukina bwa a uarongorongo. Ma e ninikoria Betero n tei ibukin ana onimaki. (Mwa. 5:24-29) A aki katoka aia uarongorongo e ngae ngke a oreaki ngaia ma abotoro ake raona. Ma a kimwareirei ibukina bwa a a tia “ni katauaki bwa a na bwainnataeaki ibukin aran Iesu.” Ngaira naba ti kona ni kimwareirei ngkana ti nanomwaaka i aani kataaki.—Mwa. 5:40-42.

17. Tera are e taekinna Iesu nakoia taan rimwina imwaini matena?

¹⁷ N te tairiki are imwain raoi maten Iesu, ao e tuangia taan rimwina ni kangai: “Ane e tangirai e na tangiraki naba iroun Tamau, ao N na tangiria.” (Ioa. 14:21) Ai ingaingara ngaira nakon te tai are ti nang tangiraki iai ibukin ara beku iroun Iehova, ao ti aki riribaaki! (2Tet. 1:6-8) Ngkai moa, ti karekea kabebeteara ao korakorara, ngkai ti ururingi bukina aika bati ae ti riai iai ni kukurei ngkai ti riribaaki.