Tai Riki Bwa te Aomata ae Kainabwabu n te Mwakuri ni Minita

¹ E iangoia Bauro bwa te tai are e kabanea ma raona n te onimaki, bon taai aika a angaraoi ibukin te ‘ikaungaunga i marenaia.’ (IRom 1:12) Ngkana ko toa ma temanna te tia uarongorongo n te mwakuri ni minita, ko kamanena raoi te tai anne ibukini kaungaakina ao buokana? N oneani mwin are ko na riki bwa te aomata ae kainabwabu, e aera ko aki karakin nakoina baike a buokiko n riki bwa te tia uarongorongo ae mwaatai?

2. Tera ae ti kona ni karaoia ibukini kakorakoraan toara n ara mwakuri ni minita bwa e na onimakinna i bon irouna, ao bukin tera bwa e kakawaki aei?

² Karikirakea Onimakinam i Bon Iroum: A namakinna tabeman taan uarongorongo bwa e aki tau aia konabwai, are e a kona n oti n tein ubuia ao bwanaaia. Ti kona ni kakorakoraa ae a na onimakinia i bon irouia n te mwakuri ni minita, ngkana ti kamoamoaia n ara taeka. Baikara aanga tabeua ibukini karikirakean onimakinam i bon iroum? E aki wimakiki te mataniwi ae mwamwananga n taekinna nakon toana bwa e maaku, ao n taekina naba arona n tataro n taai nako ibukini buokana n tokanikai i aon te aeka n namakin anne. E taekina buokana te tari te mwaane temanna ni kaineti ma te baere e buokia ni kaotiota onimakinana i bon irouna, ni kangai: “I moanna man te moangare. N tabetai ao I riai n tataroa te ibuobuoki ibukini kaotiotan te aroaro anne.” Iai te bae e a tia ni buokiko bwa ko na karikirakea onimakinam i bon iroum n te mwakuri ni minita? Karakinna nakon toam n te mwakuri ni minita.

3. Tera ae ti kona n tibwaia nakon toara ae e kona ni buokaki iai bwa e na rangi ni mwaatai n ana mwakuri ni minita?

³ Tibwai Aanga n Uarongorongo: Iai te moantaeka ke te titiraki ae bebete ae ko a tia ni kunea ae tao e irekereke ma te bae e riki n am aono, ae ko mwaatai iai ni moana am maroro? Ko a tia ni karekei uaana aika raraoi, ngkana ko kaota am iango ni kabwarabwaraan te maekatin? Karakinna nakon toam. (TaeRab. 27:17) N am tai ni mwananga ni manga okiriia aomata, ko kona n taekinna nakon toam am babaire ibukini manga okiran te aomata anne ao arom ni kakororaoia. Imwin te reirei n te Baibara, ko kona ni kabwarabwaraa bukina ngkai ko rinea am maroro anne, te kibu, ke te anga n angareirei ibukini baika a kainnanoaki iroun te aomata ae reirei n te Baibara.

4. Bukin tera bwa ti riai ni mutiakina buokaia raora n uarongorongo?

⁴ A aki tii mutiakina buokaia aika tiaki kaain te onimaki, taan uarongorongo ake n te moan tienture. Ma a nora naba kakawakini kaungaaia ao kakorakoraaia i marenaia. (Mwa. 11:23; 15:32) E kataneiaaki Timoteo ae te roro n rikirake iroun te abotoro Bauro, ao imwina e kaungaa bwa e na tibwai baike e a tia n reiakin nakoia tabemwaang. (2 Tim. 2:2) Ngkana ti ururingnga ni karaoa ae raoiroi nakoia raora ni Kristian n te mwakuri ni minita, ti aki tii karikirakea kimwareireia ao mwaataia iai ma ti kakukureia naba Tamara are i karawa.​—Ebera 13:15, 16.