Riiki Bwa te Tia Ibuobuoki ae Raoiroi ni Kawaraia Aomata
1. Baikara kakabwaia aika reke man te mwakuri ma toam n te mwakuri ni minita?
1 N te tai teuana, e kanakoia taan rimwina Iesu aika 70 bwa a na uarongorongo, ao “e kanakoia ni kakauomania.” (Ruka 10:1) Akea te nanououa n te babaire aei bwa a boni buokaki iai taan rimwini Kristo ao n uaia n i kaungaia i marenaia n aia tai n uarongorongo. Tao ti na kanga n ibuobuoki ngkana ti raona te tia uarongorongo temanna n te mwakuri ni minita?
2. Ti na kanga ni kakauongo ngkana e maroro toara, ao e aera bwa e riai aei?
2 Rinanon te Kakauongo: Kakauongo raoi ngkana e taetae toam. (Iak. 1:19) Ngkana e warekaki te kibu, ao iria naba ma am Baibara. Taraa toam ke kaain te auti ngkana a taetae. E kona naba ni kaungaaki kaain te auti ngkana ko kakauongo raoi nakon te maroro.
3. Ningai ae e kukurei iai toara bwa ti na taetae?
3 Iangoan ae Ningai ae Ti na Taetae Iai: Ngkana ti airi ma temanna are e maroro, ti boni karinea n arora ni kariaia bwa e na kaira te maroro. (IRom 12:10) Ti riai n rarawa nakoni kamangaoan te maroro. Ngkana e mwaninga te baere e kan taekinna toara ke e tabeki taeka n totoko ke titiraki kaain te auti ao e tangira te ibuobuoki toara, ti boni kakorakoraira n reita are e taekinna n oneani mwin taekinan te reirei riki teuana ae kaokoro. (TaeRab.16:23; TeMin. 3:1,7) A riai ara taeka ni buoka te uarongorongo are e tabe ni waakinaki ngkana ti taetae.—1Kor. 14:8.
4. Tera ae na buokira ni karikirakea uaan ara mwakuri ni minita ao kimwareireira?
4 Ngke e a bane aia mwakuri taan rimwini Kristo aika 70 ni kakauomania, a ‘oki ma te kimwareirei.’ (Ruka 10:17) Ti na kona naba ngaira ni kimwareirei ao n uaana riki ara mwakuri ni minita, ngkana ti kakauongo ao n iangoia bwa ningai ae ti na taetae iai ao ni buokiia taari ake ti toania ni kawariia aomata.