E Ibuobuoki Nakon Toara Karikirakean Rabakaura n Ara Mwakuri ni Minita

Bukini Kakawakina: E ataia Iesu bwa e kakawaki bwa e na iai toan te tia uarongorongo n te mwakuri n uarongorongo. Ngaia are ngke e kanakoia taan rimwina ake 70 bwa a na rimoana n uarongorongo ao e boni kanakoia ni kakauomania. (Ruka 10:1) E kona ni buokaki te tia uarongorongo iroun toana ngkana e kainnanoia n aitarana n te kangaanga, ke e aki koaua raoi n arona ni kaekaa kaain te auti. (TeMin. 4:9, 10) E kona n tibwaa rabakauna ao n anga naba ana iango n tabetai n te aro are e kona ni buokaki iai toana bwa e na riki bwa te tia uarongorongo ae mwaatai. (TaeRab. 27:17) E kona naba ni kaungaaki te tia uarongorongo rinanon ana maroro aika kaunganano toana n te mwakuri ni minita.​—IBir. 4:8.