E Manena Ni Boong Aikai
“Boni bwaeni waeu am taeka, Ao ootani kawaiu.” —TAIAN ARERU 119:105, BG.
E KANGA NI KAOKORO TE BAIBARA? A kona n iangoaki booki tabeua bwa a rangi ni kani warekaia, ma a aki tau ibukini kairan te aroaro ni maiu. Ao a riai n rinanoaki n taai nako booki ni kaetieti n taai aikai. N te itera teuana, e taekinaki n te Baibara bwa “bwaai ni kabane ake a koreaki ngkoa, a koreaki ibukin reireiara.”—I-Rom 15:4.
TE KATOTO: E ngae ngke e aki karaoaki te Baibara bwa te boki ibukini kaetieti ni kaineti ma te bwainnaoraki, ma bon iai reirei i nanona aika manena ibukini marurungin te rabwata ao te namakin. N te katoto, e taekinaki ae kangai n te Baibara: “Te rau n nano boni marurungin te rabata.” (Taeka N Rabakau 14:30, BK) Ti kauringaki naba n te Baibara ni kangai: “Ane raure ma aomata ao e ukoukora ae tangiraki i rouna, Ao e un nakon te rabakau ni kabanea.” (Taeka N Rabakau 18:1, BG) N iterana teuana, e taekinaki ae kangai: “E kakukurei riki te anga nakon te anganaki.”—Mwakuri 20:35.
AIA KUKUNE TAANI KAKAAE: E kona ni kanakoraoa marurungim bwainan te nanoraoi, te itoman ae nene ao te tituaraoi. E ribootinaki n te maekatin ae The Journal of the American Medical Association ni kangai: “E kakai reke riki te aoraki ae te boo irouia aomata ake a aki toki ni mwamwangaingai, nakoia ake a taotaon nanoia.” Imwin te kakaae i Aotiteria ae manna tebwina te ririki, ao e kuneaki bwa a teimaan riki maiuia kaara ake “a rereitaki n te Internet ma raoraoia, ao aomata ake a kona ni kaotii nanoia aika raba nakoia.” Ao a kunea taan rabakau mai Kanata ao te United States n 2008 bwa “e kakukurei riki kabanean am mane ibukia tabemwaang, nakoni kabaneana i boni bukim.”
TERA AM IANGO? Ko na onimakini kaetieti ibukin tararuaan te mauri n te boki riki teuana are e a kamani koreaki tao 2,000 te ririki n nako? Ke e kaokoro te Baibara ma booki nako?
[Reirei ae kakawaki n iteraniba 8]
“E korakora onimakinan te Baibara irou . . . ibukina bwa iai reirei ni kaetieti ibukin te aoraki aika rangi n raraoi i nanona.”—HOWARD KELLY, M.D., TEMANNA KAAIN TE BOTAKI ARE E MOANI KUNEI RIKIN AO TOTOKOAN AORAKI N TE JOHNS HOPKINS UNIVERSITY SCHOOL OF MEDICINE