Aroni “Karekean Te Maiu Are Aki Toki”
“Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”—IOANE 17:3.
A KONA ni kamaiuaki aomata n te atatai. E aoraki Nouhou ngke tebwina ana namwakaina ao e—ataa te bwai ae e riai ni karaoia tinana ae te tia ibuobuoki ibukin tararuaan te mauri i aon Niger. E karaoa niman natina n te ran ae buro ae mwaitoro, ae renganaki n te taoro ma te tioka ibukini kaokan ranin rabwatana. E ribootinaki n te UNICEF bwa ibukini “waekoan neiei ni karaoa anne ao n reitaki ma taani kuakua n ana kaawa, e a waekoa iai ni marurung natina.”
A kona naba ni kamaiuaki aomata n te atatai man te Baibara. E taekina ae kangai Mote are e moani korea te Baibara: “Tiaki te bwai ae akea manena i roumi; ba kioina ngkai boni maiumi, ao ane kam na kabatiai ami bong.” (Te Tua-Kaua 32:47, BG) E kona te Baibara ni kabatiai ara bong? Tera nanon anne nakoni maiura?
E kateretereaki ni kaongora aika nimaua ake imwain aei teuana imwin teuana, bwa te Baibara bon te boki ae akea kabotauana bwa a onimakinaki taetae ni burabeti ake i nanona, a aki kauntaba ao a boraoi ma te rabakau n aonnaba ao rongorongon rimoa, a boraoi kanoana ni kabane, ao a manena reirei ake iai. E a kaotaki iai kaokoron te Baibara ma booki nako. Ngaia are ngkana e taekinaki iai bwa e na kaabwabwaka maiura, ae nanona te maiu n aki toki, ko aki riai ngkanne n iaiangoi raoi kaongora akanne?
Ti kaungako bwa ko na reiakina aroni karekean te raunnano ngkai ao te kukurei nakon taai aika a na roko, man te atatai ae eti n te Baibara. A kukurei Ana Tia Kakoaua Iehova n reireiniko aroni karekean te atatai aei.
[Bwaoki/Taamnei n iteraniba 9]
E kaokoro naba te Baibara ma booki nako, bwa iai i nanona kaeka aika karaunano nakon titiraki aika kakawaki aikai:
• Tera bukini menara ikai?
• E aera ngkai e bati te rawawata?
• Iai te kantaninga ibukia aika tangiraki irou ake a a tia ni mate?
Ko kona ni karekei kaekaan titiraki akanne man te Baibara, n te Tera Ana Beirei ni Koaua te Baibara boki aei ae boreetiaki irouia Ana Tia Kakoaua Iehova.