A Boraoi Kanoana
“Akea te taetae ni burabeti ae reke mai nanon te aomata, ma a taetae aomata mairoun te Atua ngke a kairaki n te taamnei ae raoiroi.”—2 BETERO 1:21.
E KANGA NI KAOKORO TE BAIBARA? A aki toki ni kauntaba rongorongo ake a kaai ni koreaki ni bokin rimoa, e ngae ngke a koreaki n te tai ae tii teuana. A burenibwai ni boraoi booki ake a koreaki irouia aomata aika kakaokoro, n taabo ma taai aika kakaokoro naba. Ma e taekinaki n te Baibara bwa bon tii temanna te tia Korei bokina ni kabane ake 66, ike e a katereaki iai katiteuanaakin te iango ao boraoin te rongorongo are iai.—2 Timoteo 3:16.
TE KATOTO: N te ka-16 n tienture B.C.E., e a koreaki iroun te tia kawakin tiibu are Mote ni moani bokin te Baibara, taekan te “kariki” are e na kamaiua te botannaomata. E taetae ni burabetinaki naba n te boki aio rimwi riki, bwa te kariki anne boni kanoan Aberaam, Itaaka ao Iakoba. (Karikani Bwaai 3:15; 22:17, 18; 26:24; 28:14) Tao 500 te ririki imwina ao e kaotia te burabeti are Natan, bwa e na otinako te kariki anne man ana utu te uea are Tawita. (2 Tamuera 7:12) Teuana tenga te ririki mwin anne, e kabwarabwaraa te abotoro Bauro bwa kaain te kariki aei, bon Iesu ma te koraki ake e rineiia bwa taan rimwina. (I-Rom 1:1-4; I-Karatia 3:16, 29) N tokina, e taetae ni burabetinaki ni kabaneani bokin te Baibara n raabanen te moan tienture C.E. bwa a na kaotiota taekan Iesu i aon te aba kaain te kariki anne, a na kautaki nako karawa ao n tautaeka ma ngaia i nanon 1,000 te ririki. E na kamaunaaki te Riaboro iroun te kariki aio, ao ni kamaiua te botannaomata.—Te Kaotioti 12:17; 20:6-10.
AIA TAEKA TAANI KANAKORONGORONGO I AON TE BAIBARA: Imwin neneran raoi bokin te Baibara ake 66 iroun Louis Gaussene, ao e koreia n ana boki ae Theopneusty—The Plenary Inspiration of the Holy Scriptures bwa “e rangi ni mimi n aroni katiteuanaakin te iango n te boki aio, are e koreaki n te maan ae tebwi ma nimaua tenga te ririki irouia taani kororongorongo aika bati, . . . ake tii teuana tiaia, aia iango, ao a teimatoa n rikirake n oota ni kamaiuan te botannaomata iroun Natin te Atua.”
TERA AM IANGO? Iai riki te boki ae ko kona ni kunea ae boraoi kanoana ni kabane, ae koreaki irouia mwaane aika 40 aika kakaokoro, n te maan ae raka i aon 1,500 te ririki? Ke e kaokoro te Baibara ma booki nako?
[Reirei ae kakawaki n iteraniba 7]
“Ngkana a bane n ikotaki koroboki aikai ni kabane, a a riki bwa te boki ae tii teuana . . . Bon akea n ai arona, ke katotongana i buakoni booki nako.”—THE PROBLEM OF THE OLD TESTAMENT, MAIROUN JAMES ORR