Te Aeka n Aomata Raa Raoi Tamara Are I Karawa?

A MWAITI aomata aika kona ni kamatenanoa te tataro ae Tamara are i Karawa ke Ana Tataro te Uea, ae te tataro ni katoto are e reiakinia iai taan rimwina Iesu. (Mataio 6:9-13) Ni katoa tai are a taekina iai te tataro anne, a aki toki n wetea te Atua bwa ‘Tamaia’. Ma iraman ngkanne aika kona n taku bwa a kinaa raoi?

Tera arom? Tera aroni kinaakin te Atua iroum? Ko kukurei n am itoman ae kaan ma ngaia, ko maroro ma ngaia, ao ko uauataboa kukureim ao nanokawakim ma ngaia? Ni koauana, tera ngkanne ae irekereke ma kinaakin raoi te Atua?

“Bon Iehova Arana”

E bae n tii kinaa tamana te tei ae tibwa nakonako bwa Bwabwa. Ngkana e ikawai riki ao e ataa arana ao taekana ao e kakatia irouna. Ma tera ngkanne aroni kinaakin te tia Anganira te Maiu are mena i karawa? Ko ataa raoi oin arana ao ae nanonaki iai?

A mwaiti aika a kaokioka te kibu n taeka are “E na tabuaki aram” n taekinan Ana Tataro te Uea, ma a bon aki ataa te kaeka ngkana ko titirakinia bwa “Tera te ara anne?” (King James Version) E kakoauaaki bwa iai te Atua ni baikai n aroni karawa ae unekenekeaki n itoi aika bati, maunga aika ririeta, te rakai ae kantara ngkai e kirimatamata ae on ni baika maiu aika bati. Ma e ngae n anne, a aki kaota oin arana nakoira baikai. N reiakinan te ara anne, ti riai n nakon te Baibara ae katereterea raoi ni kangai: “Bon Iehova arana.”​—Te Otinako 15:3.

E tangirira te Atua bwa ti na kinaa n arana ae Iehova. Bukin tera? Ibukina bwa arana e katerea bwa te aeka n aomata raa ngaia. E nanonaki raoi n te ara anne bwa “E na bon Riki bwa te Bwai ae E na Riki.” Ke n taekinana teuana, e riki bwa te bwai are e kainnanoia ibukini kakoroan nanon ana kantaninga. Iangoia n aron aei: Ibukin tararuan ana utu, e riai te tama n riki bwa te tia karekea maiuia kaain ana utu, te tia anga kaetieti n ibuobuoki, te tia moti, te tia raoiakiniia, te tia kamanoia ao te tia reirei, ni kaineti ma kainnanoia ao baika riki nakoia. N te aro naba anne, a karauaki nanora n ataakin te ara ae Iehova bwa e boni konaa te Atua ni karaoi bwaai ni kabane ibukini kakoroan nanona ni kakabwaiaia ake a toro irouna, n aki ongei baika kona n riki.

Ti na neneri ngkai ana mwakuri Atuara ae tatangira aika kakaokoro ake a boraoi ma nanon arana. E na buokiko n ataia bwa te aeka n Atua raa Iehova ao n reiakini naba baika ko riai ni karaoi bwa ko aonga ni kaaniaki riki ma ngaia.

“Te Atua Are E Reke Mai Rouna te Tangira ma te Raoi”

E arana te tia Karaoira te abotoro Bauro bwa “te Atua are e reke mai Rouna te tangira ma te raoi.” (2 I-Korinto 13:11) Bukin tera? E taku ngkoa Iesu Kristo: “E tangiriia aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke i rouna te maiu are aki toki.” (Ioane 3:16) Ibukin ana tangira te Atua ae korakora ibukia aomata, ao e anga iai Natina ae bati n tangiria bwa te karea ni kaboomwi, bwa a aonga ni kona ni karekea te maiu ae aki toki te koraki ake a onimakinna, ao ni kainaomataki man te maraki ao te karawawataaki imwin te bure. Anne bukina ae e kangai iai Bauro: “Boon te bure te mate; ma ana bwai n tituaraoi te Atua te maiu are aki toki i nanoni Kristo Iesu are ara Uea.” (I-Rom 6:23) Ai ngaia are ti a kairaki iai bwa ti riai n tangira te Atua ao ni kaanira riki ma ngaia.

E kaotiota ana tangira te Atua tiaki tii nakoia aomata nako ma nakoia naba ake a kakaonimaki n tatabemania. E taku Mote nakoia tibun Iteraera ngkoa ake aki ongeaba: “Kam kaboa ana akoi Iehova n te aro aei, Ngkami ae te botanaomata ae nanobaba ae aki ataibwai? Tiaki bon tamam ae kaboko Ngaia? E karikiko, ao E kateimatoako.” (Te Tua-Kaua 32:6) Ko ota raoi ni kakawakin taeka aikai? Ibukina bwa bon te karo ae tatangira, e tabeakinia ana aomata Iehova, n aki ongei mamaaraia. Ao e katauraoi baika kainnanoi ibukini maiuia, karauan nanoia ao ibukin aia onimaki.

Ti bane ni kakaaitara ma bibitakini maiura ni kaineti ma kukureira ao n nanokawakira ao ibukin aei ti a karawawataaki n taai tabetai ao ni bwara nanora naba. Ti kainnanoa temanna bwa e na buokira ni kaetii ara iango ibukin ara kangaanga. Antai ae kona ni buokira iai? Rinanon Ana Taeka ae te Baibara, e kaotaki iai Iehova bwa bon te tia Anga Kaetieti n Ibuobuoki ae tatangira ao te tia Tararua naba. E kabwarabwaraki n te Boki ae Tabu anne bukin rikin te rawawata ae bati ao arora ni kekeiaki ribuakona n te aro ae riai. N aron te karo ae tatangira ae buoka natina ae te mwaane ngkana e bwaka ao n ikoaki, e bwatiku naba Iehova n te aro ni kaikonaki, n anganira buokara ae ti kainnanoia. Ni koauana, e boni konaa ao e tauraoi Iehova ni buokia akana onimakinna.​—Itaia 59:1.

E kaotaki ana tangira te Atua ibukira n arona ae ‘te tia Ongo tataro.’ (Taian Areru 65:2) E kanga n riki anne? E kabwarabwaraa te abotoro Bauro ni kangai: “Kam na tai iangoa te bwai teuana n raraomaeakinna; ma a na kaotaki ami bubuti nakon te Atua ni bwaai ni kabane, n te tataro ma te bubuti ma te katituaraoi. Ao te rau are mairoun te Atua, are te rau are aki konaki n ataki teutana, e na kawakin nanomi ao aia iango nanomi i nanoni Kristo Iesu.” (I-Biribi 4:6, 7) Ngkana ko tataro ma nanom ni kabane nakon te Atua ao n toua mwin ana kairiri ae katauraoia n ana Taeka, ko kona naba ngkoe n namakina “te rau are mairoun te Atua, are te rau are aki konaki n ataki teutana.”

“Te Atua ae Ataibwai”

E kabwarabwaraki n te Baibara bwa e ‘kororaoi ana ataibwai’ te Atua ae Iehova. Ngkai “te Atua ae ataibwai” ngaia, e ota raoi riki nakoia aomata nako, n aroia aomata ao baika a kainnanoi naba. (Iobi 36:4; 1 Tamuera 2:3) E kaota aei rinanon ana toro are Mote bwa “e aki maiu te aomata n ti te berena, ma e maiu ni bwaai ni kabane aika oti nako mai win Iehova.” (Te Tua-Kaua 8:3; Mataio 4:4) E nanonaki n aei bwa ngkana ti kani karekea te raunnano ni maiura, ti kainnanoa ae bati riki irarikini bwain te maiu aei.

E anganira kairiri aika kakawaki ao reireiara ara tia Karikiriki rinanon ana Taeka ae te Baibara. Ngkana ti ukeuke n reirei n te Baibara ao ni maiuakinna, ti na kakabwaiaaki iai ngkanne mani “bwaai ni kabane aika oti nako mai win Iehova.” N te katoto, e taku Zuzanna ae te aine ae te Kristian ibukini maiuna n ana utu: “E kamatoaki tekatekara n taanga imwini marera man arora n uaia ni wareware n te Baibara, kakaaeani bobotaki ni Kristian, ao tibwaan nako baike ti reiakin nakoia aomata. E kairira nakon tiara aika titeboo ao ni kakorakoraa naba ara iraorao i marenara n ataakin ao maiuakinan ana kaetieti te Atua ni kaineti ma te onimaki ni koaua.”

Ko na kanga ni kakabwaiaaki man te reirei ao te kairiri ae anganiko te Atua ni kaineti ma maiuakinan te onimaki ni koaua? Tii ngkana ko katoa tai n ukeuke n reirei n te Baibara ao ni maiuakinna ao ngkanne, ko kona ni karekei kakabwaia aika bati mairouna.​—Ebera 12:9.

‘Te Atua ae Reke te Maiu Mairouna’

E onrake te aonnaba n te kakiriwe ni boong aikai. Ti aki kona n ataia bwa tera kanoan te ingabong. Ngkana ko maeka n te tabo ae a karawawataaki kaaina ni buaka aika bati, tao ko boni bae ni kariariaa te rau. N taabo aika bati n te aonnaba, a maeka ma te maaku aomata ibukin te mwakuri n iowawa ao te tiritiri, kangaanga ibukin te mwane, ao mwakuri ni kakeru aika tiritiri. Antai ae na kamaiuira mani baikai ni kabane? A kainnanoa kamanoaia ao kamaiuaia te botannaomata ngkai n te aro ae tuai man noraki mai mwaina.

E taekinaki n te Baibara ae kangai: “Aran Iehova bon te taua ae korakora: E biri nako nanona te aomata ae raoiroi, ao e maiu.” (Taeka N Rabakau 18:10) Ataakin aran te Atua iroura ao onimakinan arana, e kona ni kairira bwa ti na iangoi baika e a tia ni karaoi ao baika e na boni karaoi ni kamaiuia iai akana kaotiota onimakinana. E a tia ni kakoauaa raoi Iehova ae te Atua n akea te nanokokoraki iai bwa e boni konaa ni kamaiuia ana aomata. N te katoto teuana, e kamaiuia Iteraera ngke e kamaunaia ana kaa ni buaka Barao ao ana taanga ni buaka. Bon te Atua ae kakaonimaki Iehova ae e uringia akana karawawataaki ao e kani buokiia naba.​—Te Otinako 15:1-4.

Karekean te maiu are aki toki iroura e boto i aon onimakinan Iehova ae te Atua bwa boni ngaia te tia Kamaiu. E kaota te aeka n onimaki anne Uean Iteraera ngkoa are Tawita ae kaaitara ma kangaanga aika bati, ngke e korea ae kangai ibukin Iehova: “Bon te Atua Ngkoe ae e reke maiuu mai Roum.” (Taian Areru 25:5) E kakoauaa raoi te abotoro Betero ngke e kangai: “E ataki iroun te Uea [ae “Iehova,” NW] te aro ae E na kamaiuia man te kaririaki akana tangiria.”​—2 Betero 2:9.

E a tia ni beritanna te Atua ni kaineti ma te aomata ae onimakinna ibukini buokana ni kangai: “I a kamanoa ngkae e ata arau.” (Taian Areru 91:14, NW) A bon ataa raoi koauan te berita anne ana toro te Atua n taai aikai. E a tia te mwaane ae Henryk ni beku iroun Iehova ma te kakaonimaki i nanon 70 te ririki i Poland, n aki ongei karawawata ma bwainikirinaki. Ngke ai tibwa 16 ana ririki ni maiu Henryk, e kabureaki tamana n te tabo ni kaikain ae Auschwitz. A katukaki Henryk ma tarina ae karimoana n aia tabo ni kaikain taian Nazi ibukia rooro n rikirake. Imwina, e kamwaingaki nakon te tabo ni kaikain teuana ma teuana. Ni kaineti ma baika riki ni boong aikai e ururing rikaaki Henryk ni kangai: “E aki kitanai Iehova i nanon taai aika kamamate nakoiu ni kabane. E katoa tai ni buokai ni kateimatoaa au kakaonimaki, e ngae ngke e kuri ni kabuanibwai maiuu n taai tabetai.” Eng, e bon angania ana toro Iehova te onimaki ao te korakora n nanomwaaka.

N te tai ae e a kaan roko, e na bon riki te Atua bwa te tia Kamaiu ibukia akana onimakinna ni kabane ao ni kakoauaa raoi bwa e na kamaiuia. E taetae ni kangai te Atua: “Bon Iehova Ngai, ae Ngai; ao akea naba te tia kamaiu i rarikiu.” (Itaia 43:11) E na kamaunaia akana buakaka te Atua mai aon te aba ao e na kamaiuia akana moa n raoiroi n tain “te buaka n te bong are kakanato are ana bongi te Atua, ae Moan te Mwaka.” (Te Kaotioti 16:14, 16; Taeka N Rabakau 2:21, 22) E karaui nanora Iehova ni kangai: “A na abana te aba akana nimamanei; ao a na kukurei ni kabatian te raoi.”​—Taian Areru 37:11.

Riiki Bwa “Natin te Atua”

N ana bong te burabeti ae Maraki ao a taku tibun Iteraera bwa Iehova bon Tamaia. Ma, ngke a a riai ni karinea ao ni kaota aia tangira nakoina, a anga karea aika kariki aika kamwaraeaki ao maan aika mataki ao ni mwauku. Ao ibukin anne, e a titirakinia iai ni kangai Iehova: “Ngkana tao te tama Ngai, ao e nga karineau?”​—Maraki 1:6.

Tai karaoa te kairua n aron are a karaoia tibun Iteraera aika aki kakaonimaki akekei. N onean mwin anne, ti kaungako bwa ko na reiakina taekan Iehova ae te Atua ao ni kaaniko riki ma ngaia. E kaumakira te tia rimwini Kristo ae Iakobo ni kangai: “Kam na kaania te Atua, ao ane E na kaaningkami.”​—Iakobo 4:8.

Ni kinaakin Iehova bwa Tamara, ti a bae iai n te aro are ti a kairaki n nanora bwa ti riai ni karaoi bwaai tabeua. E aki kona ni mwaninga am kakorakora te Atua, ngkana ko kekeiaki ni karinea ao ni kakaonimaki ni koaua ni boutokaa ana kaetieti nako n anuani maium ni kabane. Ma ni kaitaraan anne, e na buokiko n nakonako n te kawai ae eti ae na kairiko nakon te waaki ae boou i aon te aba are beritanaki ae “e na akea riki te mate, ao e na akea naba te nanokawaki, ma te tang ma te maraki.” (Te Kaotioti 21:4) N te tai anne, aomata ni kabane aika ongeaba ‘a na kanakoaki man te tautoronaki n te mate nako nanon te kainaomataki are ana bwai neboakiia natin te Atua.’​—I-Rom 8:21.

[Kabwarabwaraan n iteraniba 5]

E tangirira te Atua bwa ti na kinaa n arana ae Iehova ae nanona raoi “E na bon Riki bwa te Bwai ae E na Riki”

[Kabwarabwaraan n iteraniba 6]

“E aki kitanai Iehova n taai aika kamamate nakoiu ni kabane.”​—HENRYK

[Kabwarabwaraan n iteraniba 7]

“E kamatoaki tekatekara n taanga imwini marera man arora n uaia ni wareware n te Baibara, kakaaeani bobotaki ni Kristian, ao tibwaan nako baike ti reiakin nakoia aomata.”​—ZUZANNA