Ko Boni Kinaa Tamam Are I Karawa?

TERA aroni kinaakin tamam iroum? Tao e kona ni kamimi te titiraki aei iroum ngkana ko ikawairake n te utu ae tatangira. Ko na bae ni kangai, ‘Eng, I boni kinaa raoi!’ E koaua bwa angiia a atai baike e tangiri ao n ribaai tamaia ao arona ni kaineti ma bwaai tabeua aika riki ao arona n tararuaa te utu.

Ma tao bon iai taai aika ko a tia n rangi ni mimi n nora arona ae ko aki kantaningaia. Tao n te katoto, e kinaa tamana te teinimwaane bwa e kabuingoingo ao n nimamannei. Ma ngke e a riki te kabuanibwai, e a tii karina naba n nora ninikoriana ao etimatoana ibukini kamanoan ana utu.

Tera ngkanne aroni kinaakin raoi ara tia Karikiriki? Ti tuangaki ae kangai ni kaineti ma ngaia: “Bon i Rouna ae ti maiu, ao ti kakamakuri, ao bon iai ngaira.” (Mwakuri 17:28) Aani maiura te Atua. N te aro naba anne, e riki bwa tamaia baika maiu ni kabane. (Itaia 64:8) Tao anne ae ko namakinna ibukin te Atua ao e bon raoiroi ao n riai. Ma e bati riki ae ti riai n ataia ibukina ao n reiakinna bwa ti aonga ni kakabwaiaaki ao ni kimwareirei.

Am namakin ibukin tamam ao am karinerine ibukina, a boto i aoni kinaakina raoi. N aron naba anne, ngkana e rikirake kinaakin raoi te Atua iroum, e na kaaniaki riki iai am itoman ma ngaia. E kona ni buokiko rinanoni kataaki ao kangaanga n te maiu aei, ngkana ko kinaa raoi ao n reiakina karaoan nanona.

Te aeka n aomata raa te Atua? Tera aron rotakim ibukin te Atua n ataakin aroarona? Ibukina bwa ko a kinaa, nanona bwa ko a bae iai n te aro are e a kairiko nanom ni karaoi bwaai tabeua? Ko na nori kaekaan titiraki aikai n te kaongora ae imwin aei.

[Kabwarabwaraan n iteraniba 3]

A kona n rotaki am namakin ibukia aomata man arom ni kinaiia raoi