Te Aro E Kairiri Nakon te Raoiroi ke te Buakaka?

“E TAEKINAKI ae kangai n te moan taeka are oti n te boki ae te Two Thousand Years​—The First Millennium: The Birth of Christianity to the Crusades: “I kukurei ni bwaai ake e a tia ni karaoi ibukiu te Aro ni Kristian, ao au kaantaninga ba a riai naba ni kukurei iai kaain te aonnaba aei aika a maiu i nanon ririki aika 2000 ake a a tia n nako.”

Taeka ni kamoamoa aikai ibukin “te waaki ni Kristian” ae aongkoa e riai, a taekinaki iroun te I-Engiran ae te tia koro-rongorongo ao te tia kanako-rongorongo n te terewitin, ae arana Melvyn Bragg. A oti n ana taeka aikai aia kaantaninga kaain te aonnaba aika mirion ma mirion mwaitiia aika a namakinna naba bwa iai baeia ae korakora ao a riai naba ni kakaonimaki nakon te Aro teuana ke teuana. A kakoauaa bwa e korakora te kairiri nakon te raoiroi iroun te Aro. N te katoto, e taekinna te tia koro-rongorongo temanna, bwa te onimaki ni Mutirim e “karikirakea te botannaomata ae moan te raoiroi . . . [are e a tia] ni kakabwaiaia kaain te aonnaba ni kabane.”

E Raoiroi Ana Mwakuri te Aro ke E Buakaka?

Ma e ngae n anne ao ana taeka Bragg rimwi riki e kauekea te nanououa ni kaineti ma raoiroin te Aro. E a manga taku: “Iai te bwai ae riai ni kabwarabwaraa nakoiu te waaki ni Kristian.” Tera ae e tangiria bwa e na kabwarabwaraki nakoina? E taku: “Mwakuri aika kaakaraoaki n aron te riribai, te buakaka, aia iowawa aomata nakoia raoia, ao nanoia n aki-bwerengaki n te koaua.”

A mwaiti aomata aika kakoauaa bwa angiia Aaro a a tia ni waakina te riribai, te buakaka, te iowawa, ao te aki-bwerengaki n te koaua. A taku bwa te Aro e tii baka n ibuobuoki nakoia aomata, ao e ngae ngkai e taraa n raoiroi ma n itiaki, ma e onrake n te babakanikawai ao te kewe. (Mataio 23:27, 28) E taekinaki ae kangai n te Rationalist Encyclopædia: “E bati n taekinaki bwa e rangi ni kakawaki te Aro nakoia aomata. Ma e kai noraki ni bwaai aika kaakaraoaki mangkekei ni karokoa ngkai bwa e aki koaua anne.”

Ngkana ko wareka te beeba ni kaongora ni boong aikai, ao ko na kunei katoto aika rangi ni mwaiti n aroia mataniwin Aaro ake a reirei taekan te tangira, te rau, ao te nanoanga, ma ni koauana a kaungaa te kairiribai, ao a kabongana aran te Atua ibukin kariaiakan aia itabarara aika tiritiri. Maroaka ae a a mwaiti aomata aika a taku bwa n angiin te tai, ao te Aro bon te bwai n urubwai nakoni maiuiia!

E na Raoiroi Riki Ngkana Akea te Aro?

A a tia tabeman n iangoa are e a tia naba n iangoia te tia rabakau ni karekeiango ae te I-Engiran ae arana Bertrand Russell, bwa e na raoiroi riki ngkana a “mauna nako Aaro ni kabane.” A taku n aia iango bwa kamaunan te Aro, boni ngaia raoi katokan aia kangaanga aomata. Ma a kona ni baka ni mwaninga are te koraki ake a rawa nakon te Aro, a kona naba ni karika te riribai ae korakora n ai aroia aomata ake a kakaonimaki ni boutokaa te Aro. E kauringira te tia korea rongorongon te Aro ae Nei Karen Armstrong ni kangai n te boki ae The Battle for God​—Fundamentalism in Judaism, Christianity and Islam: “E kaotia nakoira te Holocaust bwa ribaakin Aaro nako e kona ni karika te kabuanibwai n aron naba are e riki n aia buaka Aaro ake rimoa.

Mangaia are, e kairiri ngkanne nakon te raoiroi te Aro, ke boni ngaia raoi boton aia kangaanga aomata? Te koaua bwa katokan kangaanga akanne boni kamaunan Aaro ni kabane? Iangoa ae e taekinaki n te Baibara i aon aei n te kaongora are imwina. Ko na bae ni mimi ni kaekaana.