Ko Kona ni Karekei Kakabwaia man te Tautaeka n Uea

E RABAKAU te abotoro ni Kristian ae Bauro n taetae tabeua aika a rangi ni kabonganaki n ana tai. E reke naba irouna te reirei ae boraoi ma te reirei n te kuura ae rietata n taai aikai. Iai irouna kakabwaia ao inaaomatana ni kabane ake aia bwai kaain Rom. (Mwakuri 21:37-40; 22:3, 28) Bwaai aikai a kona ni buoka Bauro bwa e na rikirake ni kaubwai ma ni kakannato. Ma e ngae n anne, e kangai teuaei: “Baika kakabaiau, ao I atongi naba ba te kabuanibwai i bukini Kristo . . . ao I atongi ba maange, ba E aonga n reke Kristo i rou.” (I-Biribi 3:7, 8) Bukin tera Bauro ngke e taekina anne?

E a kinaaki rimoa n arana ae Tauro ae te I-Tareto ao n aroarona ni bwainikirinia akana “taua te Aro,” ma Bauro e a manga riki bwa te tia onimaki ngke e anganaki te miitara are e kaotaki iai Iesu are e a tia ni kautaki ma n neboaki. (Mwakuri 9:1-19) Te bwai aei are e riki i aon te kawai are nako Tamateko, e kakoaua n akea te nanououa nakon Bauro, bwa ni kaineti ma are e a kamani beritanaki, Iesu bon te Mesia ke te Kristo are e na uea n te Tautaeka n Uea. Aei e karika naba bitakin anuan maiun Bauro ae korakora, n aron are e oti n ana taeka aika mwaaka ake a taekinaki i eta. N etina, e raraoma Bauro ibukina bwa e raoiroi ma ni kakaonimaki nanona.​—I-Karatia 1:13-16.

N te Baibara, te weabe ae “raraoma” e teimatoa n rairaki man te taeka n Erene ae nanona “reken ataakin te bwai teuana, imwina riki,” ae kaibibitan ae “ataakin te bwai teuana mai imwaina.” Mangaia are te raraoma, e nanona bitakin ana iango te aomata, anuana are e wawaakinna ke ana kaantaninga, ao te rarawa nakon aroarona rimoa aika aki raraoi. (Mwakuri 3:19; Te Kaotioti 2:5) Bauro e aki kariaia te bwai ae kakawaki are e riki nakoina i aon te kawai nako Tamateko, bwa e na iangoia bwa e na anaa nanona n te tai arei, ke tao waakin te Aro teuana. Ma irouna, e a tibwa oota iai bwa akea manenan anuani maiuna rimoa are e wawaakinna n akea ana atatai ibukin Kristo. E ataia naba bwa ngkana e na kakabwaiaki man te atatai ae boou aei ibukin te Kristo, ao e riai ni kaeta aroaron maiuna.​—I-Rom 2:4; I-Ebeto 4:24.

Te Bitaki are E Karekei Kakabwaia

Ataakin te Atua iroun Bauro ngkoa e a reke man te katei n Aro ae te naani Baritaio are e kaainna. A karinaki n aia koaua taian rabakau ni karekeiango ao katei nikawai ake mairouia aomata. Ibukina bwa te katei n Aro anne e boto i aon te kairiribai, e a karika iai kairuan ana mwakuri Bauro ao aron kaotan ingaingan nanona iai. E ngae ngke e taku bwa e beku iroun te Atua, ma ni koauana e boni buakanna.​—I-Biribi 3:5, 6.

Imwin reken te atatai ae eti ibukin Kristo ao ana mwakuri ni kaineti ma ana kaantaninga te Atua, Bauro e a ataia bwa e riai ni karaoa ana rinerine: E na tiku bwa te Baritaio ma nakoana ao karineana ae kakannato, ke e na bita anuani maiuna ma ni moanna ni karaoi bwaai ni kabane aika riai, bwa e aonga ni karekea akoana iroun te Atua? E kakukurei bwa Bauro e rinea ae riai, bwa e kangai: “I aki maamaa n te euangkerio: ba boni mwakan te Atua ni karekea maiun te aomata ae onimaki; ae maiun te I-Iutaia moa, ao te I-Erene naba.” (I-Rom 1:16) Bauro e a riki bwa te tia uarongorongoa euangkerion Kristo ao te Tautaeka n Uea, ae e ingainga nanona iai.

Imwin ririki aika mwaiti, e taekina aei Bauro nakoia raoraona ni Kristian: “Taari, I aki taku ba I a tia n tauua: ma ti teuana te bwai ae I karaoia, I manuoki baika i mwiu, ao I arorai nakoni baika i mwaiu, I kakorakoraai ni biri nakon te tiia ni kani karekea te kaniwanga are te weteaki mai eta iroun te Atua i nanoni Kristo Iesu.” (I-Biribi 3:13, 14) E kakabwaiaki Bauro man te euangkerio, ibukina bwa e kukurei ni kaakeai bwaai ake a kairia nako mairoun te Atua rimoa ma ni manga uaiakin tiia aika boraoi ma ana kaantaninga te Atua, ma nanona ni kabane.

Tera ae Ko na Karaoia?

Tao ko a tibwa ongora taekan euangkerion te Tautaeka n Uea. E anaaki nanom n te kaantaninga ibukin te maiu are aki toki n te baretaiti i aon te aonnaba ae kororaoi? E bae n anaaki, bwa ngaira ni kabane ti bane n tangira te maiu ma te rau ao te mweeraoi. Te Baibara e taekinna bwa te Atua e karina naba i nanora tangiran te maiu n “aki totoki.” (Te Minita 3:11, NW) Mangaia are e riai iroura ngkai kakaantaningan te tai are aomata a na maiu n aki toki ma te rau ao te kukurei. Ao boni ngaia anne te kaantaninga man euangkerion te Tautaeka n Uea.

Ma ibukin karekean kakoroan bukin te kaantaninga anne iroum, ko riai n nenera ma n ataa raoi taekan te euangkerio. E kaungaunga ni kangai te abotoro Bauro: “Kam na riki n ata Nanon te Atua, are raoiroi, are kakukurei, are koro-raoi.” (I-Rom 12:2) Mangaia are n ai aron Bauro, bon iai te rinerine ae ko riai ni karaoia ngkana ko a tia ni karekea am atatai ao ootam.

Ma tao bon iai oin am koaua ibukin bwaai aika a na riki nakoim n taai aika a na roko. Uringnga bwa iai naba oin ana iango Tauro ibukin nanon te Atua, imwain are e riki bwa te abotoro Bauro. N onean mwin kaantaningan reken te aeka ni kaotioti teuana ae kamimi mairoun te Atua i aon te bwai aei, bukin tera bwa ko aki karaua n iangoa raoi taekan te bwai aei? Titirakiniko ni kangai: ‘I bon ataa raoi ana kaantaninga te Atua ibukin te botannaomata ao te aonnaba? Baikara kakoaua aika I kona ni kaotii aika a boutokoa au koaua? A bon eti raoi bwaai ni kakoaua aikai ngkana a kabotauaki ma te oota ae n ana Taeka te Atua ae te Baibara?’ E na noraki etin kakoaua aikai ngkana a tirobwaeaki n te oota man te Baibara. N etina, ko riai n tangiria ni kani karaoa anne ibukina bwa e kaungaunga ni kangai te Baibara: “Ma kam na katai bwaai ni kabane ba ua ra; kam na taua ae raoiroi.” (1 I-Tetaronike 5:21) Bwa n etina, tiaki te koaua bwa e kakawaki riki reken te akoaki mairoun te Atua?​—Ioane 17:3; 1 Timoteo 2:3, 4.

Mataniwin Aaro a kona ni berita nakoira bwa ti na maiu n aki toki. Ma berita aikai a na aki karekea nakoira kakabwaia man ana Tautaeka n Uea te Atua, ngkana a aki boto i aon ana reirei te Baibara. N ana Kabwarabwara i aon te Maunga ae tanoata taekana, Iesu e kamatoa ana reirei ni kangai: “A aki bane n rin n uean te Atua akana kangai nako Iu, Te Uea, Te Uea; ma e na rin iai ane taua ana taeka Tamau are i karawa.”​—Mataio 7:21.

Tara aron Iesu ni kaatuua riki tauan nanon Tamana, are te bwai ni kaetieti ae e na kataua reken kakabwaia man ana Tautaeka n Uea te Atua irouia aomata. N taeka ake tabeua, bwaai aika aongkoa aroaro mairoun te Atua, a kona naba n aki kariaiakaki iroun te Atua. Ni koauana, e reitia nako ni kangai Iesu: “Ane a na kangai nako Iu aomata aika bati n te bong arei, Te Uea, Te Uea, tiaki ti taetae ni burabeti n aram? Ao tiaki ti kanakoia taimonio n aram? Ao tiaki ti karaoi kakai aika bati n aram? Ao Ngai N na taku nako ia, I bon aki ataingkami ma ngkoa: naako mai Rou, ngkami aika kam kakaraoa ae buakaka.” (Mataio 7:22, 23) E teretere bwa e kakawaki riki ae ti na kakoaua bwa ti ota raoi n taekan euangkerion te Tautaeka n Uea, ao ngkanne, ti na karaoa ae boraoi ma ngaia.​—Mataio 7:24, 25.

E Tauraoi te Ibuobuoki

I nanon ririki aika a raka nakon 100, Ana Tia Kakoaua Iehova a a tia n tabe ngkai n tataekina euangkerion ana Tautaeka n Uea te Atua. Rinanon rongorongo aika boretiaki ao n aia taetae nikawai, a tabe ngkai ni buokiia aomata ni katobibia te aonnaba bwa a na karekea te atatai ae eti i aon ataakin ae tera te Tautaeka n Uea, baikara kakabwaia ake e na karokoi, ao baikara bwaai aika a riai ni karaoi aomata ngkana a tangiria ni karekei taiani kakabwaia aikai irouia.

Ti kaungaa nanom bwa ko na butimwaea te rongorongo ae e tabe n tataekinaki irouia Ana Tia Kakoaua Iehova. Ngkana ko butimwaea te euangkerio ma ni karaoa ae boraoi ma ngaia, ao ko na karekei kakabwaia aika moanibaan te raoiroi tiaki tii n te tai aei, ma n te tai naba ae na roko, ngkana e a tautaekana te aonnaba ni kabuta ana Tautaeka n Uea te Atua.​—1 Timoteo 4:8.

Karaoa anne ngkai, bwa e a kaan roko kakabwaia mairoun Ana Tautaeka n Uea te Atua!

[Taamnei n iteraniba 7]

Rinanon rongorongo aika boretiaki ao n aia taetae nikawai, Ana Tia Kakoaua Iehova a tataekina euangkerion ana Tautaeka n Uea te Atua