Aia Ribooti Taan Ua Rongorongo Ibukin Te Tautaeka N Uea

Inria​—Te “Katiteuanaki E Ngae Ngkai Iai Te Kakaokoro”

“TE KATITEUANAKI e ngae ngkai iai te Kakaokoro,” bon te kibu n taeka ae tanoata, ae kabonganaki ibukin kabwarabwaran aron katiteuanakin te botannaomata i aon Inria, e ngae ngke a kakaokoro aroia kaaina. E kangaanga reken te katiteuanaki n te aba ae abwabwaki aei, ae a kakaokoro nako aia katei, aia taetae, aia Aro, aron rikiia, aia kunnikai, ao ai kanaia, aomata ake a mena iai. Ma bon iai te katiteuanaki ae e noraki n aia aobiti Ana Tia Kakoaua Iehova are e mena i Inria, e ngae ngkai taan ibuobuoki ake a maeka ma ni mwakuri iai a roko man aono aika kakaokoro nako, ao a kabonganai naba taetae aika kakaokoro aika bati iai.

• Iangoa aron Nei Rajrani​—ae te ateiaine mai Punjab, are i meangin maeaon Inria. Ngke e mena n te reirei Nei Rajrani, raona n reirei temanna e a moanna n reirei n te Baibara ma Ana Tia Kakoaua Iehova. Te ataeinaine ae uarereke aei e kataia n anaa nanon Nei Rajrani n rongorongon te Baibara. Kioina ngkai e uarereke rabakaun te ataeinaine aei n te taetae n Ingiriti ao akea Te Taua-n-Tantani are e karaoaki n te taetae ni Punjabi n te tai arei, ngaia are e a butiia Nei Rajrani bwa e na ibuobuoki n raira kanoan te maekatin nakoina. Bwaai ake e wareki Nei Rajrani i nanon Te Taua-n-Tantani a rangi n rota nanona, n te aro are e a rikirake ni karokoa ae e a katabua maiuna nakon Iehova ae te Atua, e ngae ngke a boni kaitaraa ana waaki ana karo. Ngkai e beku i Beta-era i Inria ao e boni karaoa iai naba te bwai are e a kauka ngkoa matana nakon te koaua rimoa. E rairi booki ni Kristian nakon te taetae ni Punjabi!

• Iangoa naba taekan Bijoe, are e roko man aonon Inria are teuana​—are te aono ae mena i maiakin maeao, ae Kerala. E kabaneaki man te kauarinan n reirei Bijoe ngke e tei i nuka n aki irekereke ma te waaki n nano n aba ae karaoaki. Imwin te boowi ae ananau ae e karekea te tokanikai ae korakora ibukin te taromauri ae itiaki, e a manga okira te reirei Bijoe.a Imwina, e a manga reitanako riki ana reirei n te kuura ae rietata. Ma e aki rau mataniwin nanona n aroaroia aomata aika a mena iai n tangiran te wene ni bure irouia, ngaia are e a kerikaki mai iai imwin te moan term. Ngkai, imwin tebwina ana ririki ni mwakuri i Beta-era, e taku bwa e a kabwaia riki man kaainakin te utu ni Beta-era ae a kakaokoro nako aroia kaaina ma a katiteuanaki, nakon are kabwaiana are aongkoa e na reke man te reirei ae rietata.

• Nei Norma ao Nei Lily bon unaine aika a a tia ni kamani mate buia, ao e a riaon 70 aia ririki ni maiu. A a tia naba nakai ni kabanea kaka 40 te ririki n te beku iroun te Atua are a boni kabwanina aia tai iai. Nei Lily e a tia ni kabanea 20 te ririki ni mwaangan te Totaieti ni mwakuri n raira te taetae n Tamil. Ao Nei Norma e roko i Beta-era 13 te ririki n nako, imwin buan kainnabana. Irarikin aroaroia ae raoiroi n aia mwakuri korakora ae irianaki ma te eti, ao a boutokoa naba te katiteuanaki i marenaia kaain te utu ni Beta-era. A tatangiria ni kani kamaroroia iruwa, ao a kukukurei n reitaki ma ake a ataei riki aika kaaina te utu ni Beta-era, ni maroroakina ungan nanoia i nanon te maiu ni Kristian are a a tia ni waakinna i nanon ririki aika mwaiti. Ngaia are a rangi ni kukurei ni manga kabooa mwin aia mwakuri, te koraki ake a ataei riki, ni kaoiia unaine aikai nakon aia ruu ma ni mamaroro ma ngaiia ao ni buokiia ni bwaai ake a kainnanoi. Boni banna ni katoto ni koaua aika tamaroa nakai!

Kioina ngkai a a tia n tokanikai i aon bwaai aika karika te kangaanga ao te iraraure ae nonoraki i marenaia aomata n taabo aika mwaiti, taan ibuobuoki aikai a kukurei n uaia ni mwakuri ni beku ibukia aomata tabemwaang ngkai a boni kaaina te utu ni Beta-era i Inria ae katiteuanaki raoi.​—Taian Areru 133:1.

[Kabwarabwara ae nano]

[Picture Credit Line n iteraniba 8]

Background: Mountain High Maps® Copyright © 1997 Digital Wisdom, Inc.