Euangkerion te Tautaeka n Uea Tera Te Bwai Aei?

N te ririki are nako, n aaba aika 235 mwaitiia ni katobibia te aonnaba, iai aomata aika 6,035,564 mwaitiia aika ataei ao aika kaara, ake a kabanea 1,171,270,425 te aoa n tataekina rongorongona nakoia aomata tabemwaang. Irarikin tataekinana ni wiia, ao a anga nako naba booki nakoia aomata ao rongorongo aika boretiaki aika a kabwarabwara taekana, ae e raka mwaitina nakon 700 te mirion. A a tia naba n tibwatibwai ngaa ma ngaa cassette teibi ao viteo teibi ake a kabuta nako naba taekana. Tera “te bwai aei”?

“TE BWAI AEI” bon te rongorongo ae raoiroi ae taekan euangkerion ana Tautaeka n Uea te Atua. Ni koauana, e tuai man tataekinaki ‘euangkerion te tautaeka n uea aei’ n te aro ae korakora riki nakon ae ti a nora aron tataekinana ngkai.​—Mataio 24:14.

Te koraki ake a karaoa te mwakuri n anga reirei ma n tataekina te rongorongo aei ni katobibia te aonnaba, bon taan ibuobuoki aika a anga nanoia ao a aki kabooaki. Irouia aomata aika tiaki kaain te Aro, a kona n tara n aki tau ibukin karaoan te mwakuri aei. Ma tera ngkanne ae karika nanoia n ninikoria, ao bukin tera bwa e bati uaan aia mwakuri? E rangi n irekereke iai mwaakan euangkerion te Tautaeka n Uea, bwa te rongorongo aei bon taekan kakabwaia aika a na reke irouia aomata. Aikai kakabwaia ake a kaman ingainga nanoia aomata ni kariariai rokoia​—te kakukurei, te inaaomata man kangaangan te kataumwane, te tautaeka ae raoiroi, te rau ao te mweeraoi, ao ai te bwai ae angiia aomata a aki bati ni kona n iangoia​—ae taekan te maiu are aki toki! Bon te rongorongo ni koaua aei ae raoiroi nakoia aomata ake a kakakaaea raoi bonganan te maiu. Eng, kakabwaia aikai ni kabane ao ake a mwaiti riki a na reke iroum ngkana ko butimwaea raoi tataekinan euangkerion te Tautaeka n Uea nakoim.

Tera te Tautaeka n Uea?

Ma tera te Tautaeka n Uea are e tabe n tataekinaki ngkai bwa te euangkerio? Bon te Tautaeka n Uea are a a tia n reireiaki aomata aika mirion ma mirion mwaitiia bwa a na tataroia n taeka aika ataaki aikai: “Tamara are i karawa, E na tabuaki aram. E na roko ueam. E na tauaki am taeka i aonaba, n ai aron tauana i karawa.”​—Mataio 6:9, 10.

Bon te Tautaeka n Uea are e taekinaki iroun te burabeti ae te I-Ebera ae Taniera 2,500 tabun te ririki n nako ngke e korea ae kangai: “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.”​—Taniera 2:44.

Mangaia are te euangkerio bon taekan te Tautaeka n Uea ke te tautaeka mairoun te Atua ae e na kamauna te buakaka ni kabane, ma n tautaekana te aonnaba n te raoi. E na kakoroa bukin ana moan kaantaninga te tia Karikiriki ni kaineti ma te botannaomata ao te aonnaba.​—Karikani Bwaai 1:28.

“E a Kan Roko Uean te Atua”

E a kaani koro ngkai 2,000 te ririki imwin te tai are e moan taekinaki iai euangkerion te Tautaeka n Uea iroun te aomata are katabuaki ae e rangi n ataaki irouia aomata kioina ngkai e rangi n okoro aroarona ao taraakina. Te mwaane anne bon Ioane te tia Babetito, ae natin te I-Iutaia ae te ibonga ae Tekaria, ma buna ae Nei Eritabeta. E kunikainna Ioane n te kunnikai ae karaoaki man buraen te kamero ao e kabaea nukana n te roo ae karaoaki man kunin te man, n aron te burabeti are Eria are e a kaman kaikonaka bannan Ioane. Ma e ngae n anne ma bon ana rongorongo are e a anaa nanoia aomata aika mwaiti. “Kam na rairi nanomi,” e taekinna, “ba e a kan roko uean te Atua.”​—Mataio 3:1-6.

Taan ongora iroun Ioane boni kaain Iutaia, ake a taku bwa aongkoa a taromauria te Atua ni koaua ae Iehova. Te botannaomata anne are e anganaki te berita n Tua rinanon Mote, tao 1,500 te ririki mai imwaina. E bon teimatoa naba tein te tembora are moan te tamaroa arei i Ierutarem, ao a kakareanaki iai karea aika a katauaki i aan te Tua. A namakinna I-Iutaia bwa e eti aia taromauri i matan te Atua.

Ma ngke e a ongora te aba iroun Ioane, aomata tabeman a moanna n ataia bwa e kaokoro aron aia Aro ma are a iangoia. Reirei n te Aro n Iutaia a a tia n renganaki ma te katei ao te rabakau ni karekeiango n Erene. E a tia ni kabuakakaki te tua mairoun te Atua ae e reke rinanon Mote, ao e a karaoaki bwa te bwai ae akea manenana ibukina bwa a karinaki iai aia koaua ao aia katei aomata. (Mataio 15:6) A mwamwanaki irouia mataniwin aia Aro aika a matoatoa nanoia ao a aki nanoanga, ao ibukin anne, angiia aomata a aikoa taromauria te Atua n te aro ae riai. (Iakobo 1:27) A riai n raraoma man aia bure nakon te Atua, ao nakon te berita n Tua.

N te tai arei, a mwaiti I-Iutaia ake a kaantaninga kaotin te Mesia ke Kristo are e a kamani beritanaki, ao tabeman a taekina Ioane ni kangai: “Tao te Kristo [ngaia], ke tiaki.” Ma e kakewea anne Ioane, ao e kaira aia iango nakon te aomata temanna are e taku taekana irouna: “I aki riai ni kabara kabaean ana kau.” (Ruka 3:15, 16) E kangai Ioane ngke e kairiia taan rimwina nakon Iesu: “Nora ana Tiibutetei te Atua, ae uoti nako aia bure kain aonaba!”​—Ioane 1:29.

Bon te euangkerio ni koaua anne, bwa Ioane e kaota te kawai nakon te maiu ao te kukurei nakoia aomata ni kabaneia​—are taekan Iesu are e “uoti nako aia bure kain aonaba.” Aomata ni kabane a bungiaki i aan te tautoronaki n te bure ao te mate, kioina ngkai a bane n riki mairoun Atam ao Nei Ewa. E kabwarabwara ni kangai I-Rom 5:19: “Ba aroia aomata aika bati ngke a riki n atongaki ba tani bure n ana aki-ongeaba te aomata ae ti temanna [Atam], ao ai aroia naba aomata aika bati ba a na riki n raoiroi n ana ongeaba ae ti temanna [Iesu].” Iesu bon ai aron te karea ae te tiibutetei, ae e na ‘uota nako te bure,’ ma ni kaibibita aroaroia aomata aika kakaiaki ma n nanokawaki. “Boon te bure te mate,” e kabwarabwara te Baibara, “ma ana bwai n tituaraoi te Atua te maiu are aki toki i nanoni Kristo Iesu are ara Uea.”​—I-Rom 6:23.

E kororaoi Iesu​—ao ni koauana, boni ngaia te kabanea ni kakannato n aomata are e a tia ni maiu​—ngke e moana tataekinan te euangkerio. E kaongoira ni kangai te rongorongo man te Baibara ni Mareko 1:14, 15: “Ao ngke e a tia n anga te aba Ioane nakon te auti ni kaikain, ao Iesu E nako Kariraia n taekina ana euangkerio te Atua, ao E taku, E a koro raoi taina, ao e a kaan uean te Atua: kam na rairi nanomi, ao ira nanon te euangkerio.”

Te koraki ake a butimwaea ana rongorongo Iesu ao a onimakina te euangkerio a rangi ni kakabwaiaki. E kangai Ioane 1:12: “Ma [Iesu] E angania ake a mwaneia, ake a onimakina arana, te kona n riki n natin te Atua.” Kioina ngkai ana ataei ke natin te Atua ngaiia, a na boni kona n anganaki te kaniwanga are te maiu are aki toki.​—1 Ioane 2:25.

Ma te kona n anganaki kakabwaia mairoun te Tautaeka n Uea e aki katauaki nakoia aomata ake a maiu n te moan tienture n tii ngaiia. N aron are e a tia n taekinaki ma imwaina, euangkerion ana Tautaeka n Uea te Atua e a tabe ngkai n tataekinaki ma n reiakinaki ni kabuta te aonnaba are maekanaki ngkai. Mangaia are a kona naba n reke ngkai kakabwaia man te Tautaeka n Uea. Tera aroarom ae riai bwa ko aonga ni karekei kakabwaia aikai iroum? Te kaongora are imwin aei e na kabwarabwara taekan anne.