“Te Bwai ae E Riai ni Kakukurei Nanoia Aomata ni Kabaneia”
TUVALU, bon aban te Betebeke Maiaki teuana ae tamaroa ae iai abamwakorona aika ruaiua, ae a kaainaki irouia aomata aika 10,500 tabun mwaitiia. Ma kioina ngkai kaain Ana Tia Kakoaua Iehova ake a mena iai a ataia bwa bon ‘nanon te Atua bwa a na kamaiuaki aomata ni kabaneia ma n reke irouia ataakin taekan te koaua,’ a ingainga nanoia n tangiria bwa a na rairaki booki aika a kabwarabwara te Baibara nakon oin aia taetae. (1 Timoteo 2:4) E kangaanga karaoan anne, ibukina bwa bon akea te rikitinare ae tauraoi n te taetae anne n te tai arei. N 1979, temanna te mitinare ae kaain Ana Tia Kakoaua Iehova ae e beku i Tuvalu, e kaitara ma te kangaanga anne. Ngaia ma buna a maiu ma te utu n Tuvalu teuana, ike a reiakina iai aia taetae, ao teutana imwin teutana, a bobotii taeka n te taetae n Tuvalu ma ni korei kabwarabwaran nanon taeka aikai. E a tauraoi n 1984 te boki ae Ko Kona ni Maiu n Aki Toki n te Baretaiti i aon te Aonnaba n te taetae n Tuvalu, iroun te Watchtower Bible and Tract Society of New York, Inc.
Dr. T. Puapua, are mataniwin te tautaeka i Tuvalu rimoa, e korea te reta teuana are e kaota iai kukurein nanona n te boki ae te Maiu n Aki Toki. E korea ae kangai: “Te boki aei bon te bwai teuana ae boou ma ni kakawaki, ae kanoan ‘kaubwain’ Tuvalu. Ko riai n rangi ni kukurei n am ibuobuoki ae ko a tia ni karaoia iai—ae te ibuobuoki ae moanibaan te raoiroi ibukin karikirakean tangiran bwaai n taamnei i nanoni maiuiia kaain te aba aei. Au koaua bwa te mwakuri aei e na uringaki n rongorongon Tuvalu ni kaineti ma boretiakin booki n reirei. . . . [Te mwakuri] aei bon te bwai ae e riai ni kakukurei nanoia aomata ni kabane.”
Taeka ake e bobotii te tia rairai aei e a karika boretiakin te rikitinare n te taetae n Tuvalu nakon te taetae n Ingiriti n 1993. Aio bon te moan rikitinare ae kona ni kabonganaki irouia aomata ni kabane n te taetae anne. N taai aika a tibwa nako, te National Language Board of Tuvalu, e bubutii kabonganan te rikitinare aei ibukin karaoan aia moan rikitinare n te taetae n Tuvalu.
Man Tianuare 1 1989, e a boretiaki Te Taua-n-Tantani n te taetae n Tuvalu ni katoa namwakaina. Ngkana ko wareka te maekatin aei n te taetae teuana ae tiaki oin am taetae, ao bukin tera bwa ko aki nora te iteraniba 2 n te maekatin aei, n noria bwa iai Te Taua-n-Tantani ae e kona n reke n oin am taetae? Warekana n oin am taetae e na kakukurei riki nakoim.