“Mi ná se ahwanfunfun sín zǐngídi”

“Sín hwenu e un jɛ nǔ e jɛ ɖo gbɛ ɔ mɛ lɛ́ é sín gbe ɖó jí sín xwe 60 mɔ̌ ɖíe é ɔ, ahwan e è fun gbɔn gbɛ ɔ bǐ mɛ é 40 jɛjí sín gbe wɛ un ko ɖó. Un mɔ bɔ ahwan e États-Unis kpó Union Soviétique kpó ɖo funfun wɛ é wá syɛ́n bǐ, bɔ ajijimɛ kpowun, é ɖó te. Amɔ̌, un ko mɔ xwe ɖě bónú é ɖó adohu adohu nú mɛ sɔ 2025 ǎ, ɖó è ɖo ahwan ɖaxó gěgé fun wɛ. Hwɛjijɔ ɖěvo wɛ lɛ́ nyí ɖɔ ahwan énɛ́ lɛ́ ɖokpó ɖo nǔ wa dó akpáxwé gbɛ ɔ tɔn gěgé wú wɛ, lěe é ma ko nyí gbɔn kpɔ́n ǎ é.”—John Simpson, BBC sín xójláwémawlántɔ́ e nɔ ɖɔ xó dó nǔ e ɖo jijɛ wɛ ɖo gbɛ ɔ mɛ lɛ́ é wú é. (Mǐɖésú wɛ sɔ́ nǔ e ɖo wěkwín kloklo lɔ jí é ɖó mɔ̌.)

Ado nɔ hu mɛ lɛ́ dó ahwan syɛ́nsyɛ́n e fun wɛ è ɖe ɖo gbɛ ɔ mɛ lɛ́ é wú. Mɛ gěgé nɔ kanbyɔ́ ɖɔ ahwan ka ná wá nɔ te gbe ɖokpó a jí. Étɛ́ Jezu ka kplɔ́n mɛ?

Nǔ e Jezu kplɔ́n mɛ é

Jezu ko ɖɔ nǔ e ɖo jijɛ wɛ ɖo égbé lɛ́ é sín xó ɖ’ayǐ. É gb’akpá nú ahwanvú tɔn lɛ́ ɖɔ: “Mi ná se ahwanfunfun sín zǐngídi ɖo fí e sɛkpɔ́ mi lɛ́ é, bo ná se ahwanfunfunxó ɖo fí e lín dó mi lɛ́ é.”—Matíe 24:6.

Ahwan kpó hunnyahunnya kpó e mɔ wɛ mǐ ɖe ɖo égbé lɛ́ é nɔ ɖó adohu adohu nú mǐ có, mǐ ka ɖó hwɛjijɔ ɖagbe e wú mǐ ná ɖó nukún nǔ é. Aniwú? Ðó Jezu kplɔ́n mɛ ɖɔ ahwan e ná wa nǔ dó mɛ gěgé wú zɛ̌ɛ́n lɛ́ é, káká jɛ nǔ ɖěvo lɛ́, ninɔmɛ nǔ lɛ́ tɔn, gɔ́ nú nǔwalɔ mɛ lɛ́ tɔn jí wɛ ná nyí “wuntun” ɖěɖěe ná dó gesí “azǎn gǔdo gúdo tɔn gbɛ élɔ́ tɔn lɛ́” é. (Matíe 24:3; Luki 21:7) Énɛ́ xlɛ́ ɖɔ gbe ɖokpó ná wá su bɔ Jezu ná ɖó nǔ ahwan nu bǐ mlɛ́mlɛ́. Nɛ̌ é ka ná wa mɔ̌ gbɔn?

Nǔ e Jezu ná wa é

Ðo malínmálín mɛ ɔ, Jezu e nyí Axɔ́sú nú Axɔ́súɖuto Mawu tɔn é ná “sú ahwan kún dó gbɔn gbɛ ɔ bǐ mɛ.”—Ðɛhan 46:9.

Nú a jló ná ɖó mɔjɛmɛ ɖěvo lɛ́ dó sɔgúdo énɛ́ e ná hɛn fífá wá é, lěe é ná wá gbɔn é kpó ɖagbe e é ná wa nú mǐ lɛ́ é kpó wú hǔn, xa xóta “Lěe è ná ɖó nǔ ahwan kpó hunnyahunnya lɛ́ kpó nu gbɔn é.”