Nɔ ba hwenu bo nɔ kplɔ́n nǔ dó Mawu wú

Ényí a nɔ ba hwenu bo nɔ kplɔ́n nǔ dó Mawu wú, bo nɔ lɛ́ vɛ́ xá ɛ ɔ, gbɛ towe ná kpɔ́n te d’é jí. Ényí a nɔ wa mɔ̌ ɔ, hudó Mawu tɔn e a ɖó é sín do sú wɛ a nɔ ɖe nɛ́. Kpɔ́n nǔ e Jezu ɖɔ dó xóta élɔ́ jí é.

Nǔ e Jezu ɖɔ é

“Awǎjijɛnɔ wɛ nyí mɛ e tuun ɖɔ émí ɖó hudó Mawu tɔn lɛ́ é.”—Matíe 5:3.

• Mǐ mɛ bǐ wɛ nɔ ba ná mɔ xósin nú nǔkanbyɔ́ élɔ́ lɛ́: Étɛ́wú mǐ ka ɖo gbɛ ɔ mɛ? Étɛ́wú wǔvɛ́ mimɔ ka sukpɔ́ sɔmɔ̌? Étɛ́ ka nɔ jɛ ɖo kú gúdo? Xósin mimɔ nú nǔkanbyɔ́ énɛ́ lɛ́ ɖo tají cóbɔ mǐ ná ɖó awǎjijɛ.

“Nǔɖuɖu kɛ́ɖɛ́ wɛ nɔ hɛn mɛ ɖó gbɛ ǎ, loɔ, xó e nɔ tɔ́n sín Jexóvaa nu mɛ é bǐ wɛ nɔ hɛn mɛ ɖó gbɛ.”—Matíe 4:4.

• Lěe mǐ nɔ ɖó nǔɖuɖu agbaza tɔn sín hudó gbɔn é ɔ, mɔ̌ wɛ mǐ nɔ ɖó nǔɖuɖu gbigbɔ tɔn sín hudó gbɔn. Jezu ɖe xlɛ́ nyi wɛn ɖɔ mǐ ɖó ná nɔ gán jɛ Mawu wú hwɛhwɛ bá dó sú hudó Mawu tɔn e mǐ ɖó é sín do.

“Xó towe nyí nǔgbó”—Jaan 17:17.

• Jezu kplɔ́n mɛ ɖɔ ali tají e nu Mawu nɔ sú hudó Mawu tɔn e mǐ ɖó é sín do ɖe é wɛ nyí gbɔn Xó tɔn Biblu ɔ gblamɛ.

Mǐ dó wǔsyɛ́n lanmɛ nú we ɖɔ a ní ba awǎjijɛ jɔ awǎjijɛ gbɔn hwenu zínzán dó kplɔ́n nǔ dó Mawu wú, kpó hudó Mawu tɔn e a ɖó é sín do súsú kpó gblamɛ. Nǔ ɖé lɛ́ ɖíe bo sixú d’alɔ we:

• Xa Biblu vɔ̌nu.

• Byɔ̌ ɖɔ nǔkplɔ́nmɛtɔ́ ɖokpó ní wá kplɔ́n Biblu xá émí tlɔlɔ.