Alɔdó nú nukúntɔ́nnɔ lɛ́

Gbɔn gbɛ ɔ bǐ mɛ ɔ, gbɛtɔ́ lǐvi 43 mɔ̌ wɛ tɔ́n nukún, bɔ mɛ lǐvi 295 mɔ̌ sɔ́ nɔ mɔ nǔ ganjí ǎ.a É blá wǔ ɖɔ mɛ gěgé nɔ xo dǎka mɛ mɔ̌hun lɛ́ wú.

Nɛ̌ nǔ ka nɔ cí nú Mawu dó nukúntɔ́nnɔ lɛ́ wú? Étɛ́ Biblu ka ɖɔ dó yě wú? Nɛ̌ kúnnuɖetɔ́ Jexóva tɔn lɛ́ ka ɖo alɔ dó yě wɛ gbɔn ɖo égbé?

Lěe nǔ nɔ cí nú Mawu dó nukúntɔ́nnɔ lɛ́ wú é

Biblu ɖe xlɛ́ ɖɔ nǔ mɛ e tɔ́n nukún lɛ́ é tɔn nɔ ɖu ayi mɛ nú Jexóvab tawun. É ba ɖɔ è ní wa nǔ xá yě ɖo ali e sɔgbe é nu, bo lɛ́ ba ɖɔ yě ní ɖu vǐví nǔ e é nɔ kplɔ́n mɛ lɛ́ é tɔn. É lɛ́ d’akpá nukúnɖíɖó jí wǔ ɖé tɔn nú yě ɖo sɔgúdo.

Wěmafɔ: “Heelú mɛ e dɔn nukúntíntɔ́nnɔ bú ali é!”—Sɛ́nflínmɛ 27:18.

Wěmafɔ: “Mawu . . . nɔ ɖe mɛɖé ɖó vo ɖo mɛɖé mɛ [ǎ].”—Mɛsɛ́dó 10:34.

Wěmafɔ: Jezu “hun nukún nú nukúntɔ́nnɔ gěgé bɔ yě kpé wú bo mɔ nǔ.”—Luki 7:21.

Wěmafɔ: “Nukún nukúntɔ́nnɔ lɛ́ tɔn ná hun.”—Ezayíi 35:5.

Tínmɛ: Jexóva d’akpá ɖɔ ɖo malínmálín mɛ hwenu e Axɔ́súɖuto ɔ ná kp’acɛ dó ayǐkúngban jí é ɔ, nukúntɔ́nnɔ lɛ́ ná kpé wú bá mɔ nǔ.

Lěe kúnnuɖetɔ́ Jexóva tɔn lɛ́ nɔ d’alɔ gbɔn é

Gbɔn gbɛ ɔ bǐ mɛ ɔ, mǐ mɛ kúnnuɖetɔ́ Jexóva tɔn lɛ́ nɔ jlá wɛn Mawu tɔn e nɔ ná nukúnɖíɖó mɛ é nukúntɔ́nnɔ lɛ́. Nɛ̌ mǐ ka nɔ wa mɔ̌ gbɔn?

• Mǐ nɔ ɖe Biblu, wěma mǐtɔn lɛ́, gɔ́ nú video lɛ́ tɔ́n dó alɔ vovo jí bɔ è sixú yí nú nukúntɔ́nnɔ lɛ́ kpó mɛ e ma nɔ mɔ nǔ ganjí ǎ lɛ́ é kpó; mǐ nɔ lɛ́ ɖe nǔ lɛ́ tɔ́n dó alɔ élɔ́ lɛ́ jí: nukúntɔ́nnɔ lɛ́ sín nǔwlánwlánlɔ jí (braille), wěkwín kloklo lɔ jí kpó xóyídókanjí lɔ jí kpó.

• Hwebǐnu wɛ mǐ nɔ hun kpléxɔ mǐtɔn lɛ́ sín hɔn kɛ́ nú mɛ bǐ, káká jɛ nukúntɔ́nnɔ lɛ́ jí.

• Mǐ nɔ hun ali nú mɛ bǐ, bɔ mɛ e jló lɛ́ é sixú kplɔ́n Biblu xá nǔkplɔ́nmɛtɔ́ ɖé lě tawun.c

Vɔ̌nu wɛ mǐ nɔ wa nǔ énɛ́ lɛ́ bǐ. Aniwú? Ðó Jezu ɖe gbe ɖɔ: “Vɔ̌nu wɛ è ná mi, mi lɔ ní ná mɛ vɔ̌nu.”—Matíe 10:8.

Nǔ nukúntɔ́nnɔ lɛ́ tɔn nɔ ɖu ayi mɛ nú kúnnuɖetɔ́ Jexóva tɔn lɛ́ tawun. Mɛ ɖěɖěe ba ná sɛn Mawu xá mǐ lɛ́ é bǐ ná mɔ xɔ́ntɔn ɖagbe e nɔ lɛ́ d’alɔ mɛ lɛ́ é. Ð’ayi nǔ e kúnnuɖetɔ́ Jexóva tɔn e tɔ́n nukún é ɖé lɛ́ mɔ kpɔ́n é wú.

Talita Alnashi nɔ nɔ Suède. Sín hwenu e è ji i é ɔ, é nɔ mɔ nukúnnú ganjí ǎ. Kpɔ́n lěe mɛjitɔ́ tɔn lɛ́ zán Biblu dó kplɔ́n nǔ i gbɔn é kpó lěe é kpó xwédo tɔn kpó ɖu wǎnyíyí gɔ́ nú gǔdo e xɔ́ntɔn yětɔn lɛ́ nɔ nú yě é kpó tɔn gbɔn é.

Cynthia Pablo nɔ nɔ Philippines. Tókúnɔ kpó nukúntɔ́nnɔ kpó wɛ n’i. Nɛ̌ nǔɖitɔ́ hǎtɔ́ tɔn lɛ́ ka nɔ gǔdo n’i ɖo jɛmɛjí covid-19 hwenu gbɔn? Kpɔ́n lěe nǔ nyí mɔ̌ gbɔn é ɖo xóta “Une assemblée soutient une sœur sourde et aveugle pendant la pandémie” mɛ.

Wěma Biblu kplɔ́nkplɔ́n tɔn alɔkpa tɛ́ lɛ́ wɛ mǐ ka nɔ ɖe tɔ́n?

Ée ɖo nukúntɔ́nnɔ lɛ́ sín nǔwlánwlánlɔ jí lɛ́ é. Mǐ nɔ ɖe Biblu blěbú alǒ akpáxwé tɔn tɔ́n dó nukúntɔ́nnɔ lɛ́ sín nǔwlánwlánlɔ jí, ɖo gbe gěgé mɛ. (Kpɔ́n gbǎví “Biblu gbɛ yɔ̌yɔ́ ɔ tɔn ɖo nukúntɔ́nnɔ lɛ́ sín nǔwlánwlán lɔ jí.”) Mǐ nɔ lɛ́ ɖe wěma mǐtɔn lɛ́ tɔ́n dó nukúntɔ́nnɔ lɛ́ sín nǔwlánwlánlɔ jí, ɖo gbe gěgé mɛ. Mǐ lɛ́ ɖe wěma Learn to Read Braille tɔ́n nú mɛ ɖěɖěe ba ná kplɔ́n lěe è nɔ xa nukúntɔ́nnɔ lɛ́ sín nǔwlánwlán gbɔn é. È sɔ́ nǔ ná bo ná dó d’alɔ mɛ ɖěɖěe tɔ́n nukún lɛ́ é bónú mɛ e nɔ mɔ nǔ lɛ́ é ná d’alɔ yě bɔ yě ná kplɔ́n nukúntɔ́nnɔ lɛ́ sín nǔwlánwlánlɔ kpó xixa tɔn kpó.

• Ðɔ xó xá kúnnuɖetɔ́ Jexóva tɔn ɖokpó bónú é ní ná we wěma e è zín dó nukúntɔ́nnɔ lɛ́ sín nǔwlánwlánlɔ jí lɛ́ é, alǒ byɔ̌ ɖɔ è ní wá ba émí kpɔ́n.

• Yǐ nǔ e nɔ d’alɔ nukúntɔ́nnɔ lɛ́ bɔ yě nɔ sɔ́ nǔ lɛ́ sín kɛ́n lɛ́ é, alǒkan jí tɔn ɔ ɖo jw.org jí.

• Ðɔ xó xá kúnnuɖetɔ́ Jexóva tɔn ɖokpó bónú é ní ná we wěma e è zín dó wěkwín kloklo lɔ jí lɛ́ é, alǒ byɔ̌ ɖɔ è ní wá ba émí kpɔ́n.

• Yǐ wěma e è ɖe tɔ́n dó wěkwín kloklo lɔ jí bɔ é sɔgbe xá ée è zín lɛ́ é alǒkan lɔ jí tɔn ɔ, ɖo jw.org jí.

• Xo xóyídókanjí énɛ́ lɛ́ tlɔlɔ alǒ yǐ yě ɖo jw.org jí kabǐ ɖo JW Library mɛ.

• Yǐ xóyídókanjí lɛ́ ɖó alɔ e jí é ná nɔ bɔ tuto ɔdinatɛ́ɛ jí tɔn ɖěɖěe nɔ xa nǔ ɖěbǔ e vɛ́ ko ɖo alǒkan, alǒ tablɛ́ti jí lɛ́ é ná xa é ɖo jw.org jí.

Video ɖěɖěe mɛ è nɔ tínmɛ nǔ e ɖo jijɛ wɛ ɖo yě mɛ lɛ́ é ɖe é.d Kúnnuɖetɔ́ Jexóva tɔn lɛ́ nɔ ɖe video ɖěɖěe mɛ è nɔ tínmɛ nǔ e ɖo jijɛ wɛ ɖo yě mɛ lɛ́ é ɖe lɛ́ é tɔ́n dó gbe 100 jɛjí mɛ. Video énɛ́ lɛ́ nɔ d’alɔ mɛ lɛ́ bɔ yě nɔ mɔ nukúnnú jɛ wěɖexámɛ tawun tawun e ɖo Biblu mɛ lɛ́ é wú, lobo nɔ lɛ́ zán yě.

A sixú ɖótó video ɖěbɔdóɖěwú mɔ̌hun e ɖo akpáxwé élɔ́ lɛ́ mɛ lɛ́ é:

• Nǔ e nɔ zɔ́n bɔ alɔwlíwlí ɖé nɔ ɖó awǎjijɛ lɛ́ é

• Biblu nɔ húzú gbɛzán mɛtɔn

• Ðiɖe cicaví tɔn lɛ́

• Ba fí e mǐ nɔ bló kplé mǐtɔn lɛ́ ɖe é.

• Kplɔ́n nǔ dó kpléɖókpɔ́ ɖaxó xwewú xwewú tɔn mǐtɔn lɛ́ wú.

• Yi kú Klísu tɔn flínflín, éé nyí nǔwiwa mǐtɔn tají hú gǎn xwe ɔ tɔn é domɛ.

José Luis Ayala nɔ nɔ Mexique. È ji tókúnɔ tɔn, bɔ é lɛ́ wá húzú nukúntɔ́nnɔ hwenu e é ɖó xwe 29 é. Kpɔ́n lěe kplé mǐtɔn lɛ́ ɖo tají n’i sɔ é kpó lěe é wá húzú Biblu kplɔ́nmɛtɔ́ alɔsekpɛ́nnánɔ ɖé gbɔn é kpó.