TAN GBƐZÁN TƆN
Un yí gbe bɔ Jexóva wa azɔ̌ ɖo wǔ ce
UN NÁ wɔn azɔn nukɔntɔn e un w’azɔ̌ ɖo wěmabláɖókpɔ́xɔsá ɖo Betɛ́li Brooklyn tɔn, ɖo New York, ɖo États-Unis é gbeɖé ǎ. Ée un byɔ́ azɔ̌xɔsá ɔ lě é ɔ, zǐngídi macínu lɛ́ tɔn kpó azɔ̌ e wa wɛ yě ɖe magbokɔ é kpó hu ado nú mì. Jɔhɔn nɔ d’alɔ afúntúntún e bló wɛ wěma lɛ́ ɖe é mɛ, bɔ amiwán nɔ gbɔn xá ɔ mɛ bǐ.
Nǔ e dɔn ayi ce hú gǎn ɖo fínɛ́ é wɛ nyí mɛ ɖěɖěe nɔ w’azɔ̌ ɖo fínɛ́ lɛ́ é. Nɔví súnnu kpó nɔví nyɔ̌nu kpó wínnyáwínnyá e ɖo fínɛ́ lɛ́ é nɔ ɖo azɔ̌ e sixú ci akpɔ nú mɛ lɛ́ é wa wɛ. È tlɛ nɔ mɔ yě lɔ ǎ, có yě nɔ ɖ’awǎjijɛ bɔ nǔ e wa wɛ yě ɖe é nɔ lɛ́ jɛmɛ nú yě. Kpɔ́ndéwú yětɔn kplɔ́n mì nǔ e Mawu sinsɛn kpó mɛɖéesɔ́hwe kpó nyí é.
Ðo xwe lɛ́ vlamɛ ɔ, Jexóva w’azɔ̌ ɖo wǔ ce bɔ un húzú mɛsɛntɔ́ tɔn ɖagbe ɖé. Amɔ̌, mi nú má kpi lěe un ba nǔgbó ɔ gbɔn hwenu e un ɖo sinsɛn Bouddha tɔn mɛ é sín tan nú mi hwɛ̌.
UN BA MAWU HWENU E UN ÐO VǓ É
È ji mì ɖo Chicago, Illinois, ɖo États-Unis, bɔ nyi wɛ nyí fofó nú vǐ ɛnɛ e mɛjitɔ́ ce lɛ́ ji é. Mɛjitɔ́ ce lɛ́ sɛ tɛn sín Japon bo yi Chicago, bo ɖo linlin wɛ ɖɔ émí ná ɖó gbɛzán e nyɔ́ hú gǎn é ɖo États-Unis. Yě ba ɖɔ vǐ émítɔn lɛ́ ní kplɔ́n wěma ganjí lěe é nyɔ́ bló gbɔn é bá dó mɔ gbɛ yětɔn nu.
Bouddha sɛntɔ́ kanɖódónǔwútɔ́ wɛ mɛjitɔ́ ce lɛ́ nyí. Bouddha sín sinsɛnxɔ ɖokpó ɖo xwé e gbe nɔ ce su ɖe é. Bouddha sɛntɔ́ akowunká wɛ nɔ ce sín tɔ́ kpó nylɔ ce we lɛ́ kpó nyí. Énɛ́ wú ɔ, Bouddha sinsɛn ɖo tají tawun ɖo xwédo mǐtɔn mɛ sín hwenu e un kpo ɖo vǔ é. Ényí un lɛ́ kɔ sín azɔ̌mɛ wá xwégbe ɔ, nǔ nukɔntɔn e un nɔ wa é wɛ nyí ɖɔ un nɔ xwlé zǎlínkpɔ́n, mɔ̌likún kpó sin kpó bǒcyɔ Bouddha tɔn mǐtɔn. Ðo aklúnɔzángbe lɛ́ ɔ, mǐ nɔ yi sinsɛnxɔ Bouddha tɔn mɛ, bo nɔ yi ji han nú bǒcyɔ e cí bǒcyɔ mǐtɔn ɖɔhun é, amɔ̌, éyɛ́ d’agba hú mǐdɛɛ lɛ́ tɔn bɔ è lɛ́ sɔ́ siká dó ba acɔ́ n’i.
Un flín ɖɔ hwenu e un ɖo xwe tɛ́nwe mɔ̌ ɖó wɛ é ɔ, un kpɔ́n bǒcyɔ e ɖo xwé mǐtɔn gbe é dáán, bo kanbyɔ́ nyiɖée ɖɔ: ‘Ðo kú ce gúdo ɔ, nɛ̌ gbɛ ce xó ka ná wá nyí gbɔn?’ Sinsɛn Bouddha tɔn kplɔ́n mì ɖɔ ényí nyi kú ɔ, nyi ná húzú nǔɖoyɛswímɛ. Énɛ́ wú ɔ, un tuun ɖɔ xó ce ná fó gbe ɖokpó. Un ná húzú nǔɖoyɛswímɛ, amɔ̌, un sɔ́ ná ɖu gbɛ víví lěe é nɔ nyí gbɔn hwenu e un ɖo gbɛ é ǎ. É blá wǔ tawun! Ajijimɛ kpowun ɔ, linlin un hwɛ́n nǔɖé ǎ tɔn ɖí bú mì.
Hwenu e un jɛ wǐnnyáwínnyá mɛ byɔ́ jí é ɔ, un mɔ ɖɔ yɛsu e mǐ nɔ fɔ nú Bouddha lɛ́ é kún nyi ta fí ɖé ó. Nǔɖé ɖo hwihwe ɖo gbɛzán ce mɛ wɛ. (Mat. 5:3) Ðo xo ce mɛ dɔ̌n ɔ, un nɔ lin ɖɔ Mawu Acɛbǐnɔ, Mawu gbɛɖe ɖé ɖó ná tíin. Un ba ná tuun i. Un lin ɖɔ bóyá, Biblu ɖó xósin nǔkanbyɔ́ lɛ́ tɔn. Énɛ́ wú ɔ, un xɔ Bible du roi Jacques ée è ko zán kpo é ɖokpó ɖo Bouddha sín xweɖuɖu lɛ́ ɖokpó hwenu; è nɔ sa Biblu ɖo fí mɔ̌hun lɛ́ mɔ̌ ǎ!
Nyi kpó Wilson Bashou e kplɔ́n mì nǔgbó ɔ é kpó
Hwenu e un ɖo xwe 17 ɖó wɛ é ɔ, un ɖo sa ɖi kpó cukú ce kpó wɛ gbe ɖokpó bɔ nɔví Wilson Bashou sɛkpɔ́ mì bo kan nǔ élɔ́ byɔ́ mì: “A ka tuun akpá e Mawu dó dó sɔgúdo wú é a?” Nǔkanbyɔ́ énɛ́ hun ali nú mǐ bɔ mǐ ɖɔ xó dó Biblu jí yi gɔngɔn mɛ. Wilson xa Nǔɖexlɛ́mɛ 17:1 bo kanbyɔ́ mì ɖɔ: “Étɛ́ dó gesí wɛ ‘sin gěgé’ e jí tonyatɔ́ ɔ jínjɔ́n é ka ɖe?” Un tuun ǎ, b’ɛ xlɛ́ mì wěmafɔ 15gɔ́ ɔ, fínɛ́ ɖɔ ɖɔ togun lɛ́ dó gesí wɛ sin ɔ ɖe. É jí wǔ nú mì ɖɔ Kúnnuɖetɔ́ Jexóva tɔn lɛ́ nɔ jó Biblu ɔ dó bɔ é nɔ tín éɖée mɛ. Cóbónú Wilson ná yi ɔ, é ná mì wěma Nugbo he Nọ Planmẹ Sọyi Ogbẹ̀ Mavọmavọ Mẹ ɖokpó; wěma kpéwún kpéwún fɛ́sinnɔ énɛ́ húzú gbɛzán ce.
Azǎn wǒ gúdo ɔ, un yi kplé azɔn nukɔntɔn ɔ ɖo kpléxɔ Axɔ́súɖuto ɔ tɔn mɛ. Un ná wɔn lěe mɛ lɛ́ yí mì kpó akpakpa sɔ́ mɛ kpó gbɔn é gbeɖé ǎ. Un sɔ́ gɔn kplé kpɔ́n sín hwenɛ́nu ǎ. Nukɔnmɛ ɔ, Wilson jɛ Biblu kplɔ́n xá mì jí. Un yí wǎn nú nǔ kplɔ́nkplɔ́n dó Biblu wú sɔmɔ̌ bɔ hweɖélɛ́nu ɔ, mǐ nɔ kplɔ́n nǔ nú ganxixo tántɔn ɖo nǔkplɔ́nkplɔ́n ɖokpó hwenu. Ado jɛ mɛjitɔ́ ce lɛ́ hu jí, bɔ yě klán gbe xá mì ɖó nǔ e kplɔ́n wɛ un ɖe é wú. Amɔ̌, lě do un kplɔ́n nǔ sɔ é ɔ, mɔ̌ do wɛ un kú d’é jí ɖɔ nǔgbó ɔ wɛ sɔ. Un bló batɛ́mu ɖo 1983.
UN JÓ KPLƆ́NYIJǏ-ALAVƆ DÓ BÁ BƐ́ GBĚXOSÍN-ALIJÍTƆ́ZƆ́
Hwenu e un bló batɛ́mu é ɔ, kplɔ́nyijǐ-alavɔ nukúnɖéjí ɖé kplɔ́n wěma ɖe wɛ un ɖe, bo ɖo wěma kplɔ́n wɛ ɖo dotóozɔ́wiwa linu. Vɔ̌ gěgé wɛ mɛjitɔ́ ce lɛ́ sá bónú má dó sixú kplɔ́n wěma énɛ́. Un hɛn ɔ, un ná gbɛ kan dó wěma e kplɔ́n wɛ un ɖe ɖo kplɔ́nyijǐ-alavɔ é nu, amɔ̌, un ba ná ná nǔ ɖagbe hú gǎn e un ɖó é Jexóva, bo wa sinsɛnzɔ́ hwebǐnu tɔn n’i.
Tɔ́ ce gb’akpá nú mì ɖɔ: “Ényí a gosín kplɔ́nyijǐ-alavɔ ɔ, un ná nya we sín xwégbe!” Wǔ kú mì, bɔ un lɛ́ dán ɖěwagbɛn. Un yí wǎn nú mɛjitɔ́ ce lɛ́, bo nɔ ba ná dó awakanmɛkú nú yě ǎ. Énɛ́ wú ɔ, hwɛhwɛ ɔ, un nɔ yi kplɔ́nyijǐ-alavɔ ɔ zǎnxwete, bo nɔ xo ɖɛ vívɛ́ sɛ́ dó Jexóva. Un nɔ ɖɔ n’i ɖɔ: “Kɛnklɛ́n Jexóva, d’alɔ mì nú má wá gbeta élɔ́ kɔn.” Ée un wá wá gbeta ɔ kɔn bo jó kplɔ́nyijǐ-alavɔ dó é ɔ, tɔ́ ce ɖɔ nú mì ɖɔ má gosín xwé ɔ gbe. Un ylɔ́ Wilson bo ɖɔ nǔ e jɛ é n’i, b’ɛ byɔ́ mì ɖɔ nyi ní wá nɔ akpá émítɔn. Un sɔ́ sáki ɖokpó bo bɛ́ nǔzínzán ce lɛ́ bǐ d’é mɛ, bo dó mɔ̌to yi xwé tɔn gbe. Un flín ɖɔ agbɔ̌n ce jɛ do tawun, bɔ un tlɛ sixú ɖɔ ǎ. Mɔ̌ e nǔ cí nú mì é zɔ́n bɔ un mɔ ɖɔ gbeta ɖagbe kɔn wɛ un wá.
Un cí xɛ e è ɖe nyi te sín aja mɛ é ɖɔhun! Din ɔ, un vo bo sixú wa sinsɛnzɔ́ bǐ mlɛ́mlɛ́. Un bɛ́ gběxosín-alijítɔ́zɔ́ ɖo 1984.
Ðo xwe ɖěɖěe mɛ un wa gběxosín-alijítɔ́ hwebǐnu tɔn sín azɔ̌ ɖe lɛ́ é mɛ ɔ, Jexóva kplɔ́n mì jijɔ xɔ akwɛ́ lɛ́, ɖi kanɖódónǔwú. Gbe ɖokpó ɔ, un ɖó nǔ e jí un ná zɔn dó bá gɔn kúnnuɖegbé lɛ́ é bǐ. Awakanmɛ kú mì, ɖó un mɔ mɛ ɖěbǔ bónú é ná kplá mì yi sinsɛnzɔ́ ɔ mɛ ɖo gbadanu gbe énɛ́ gbe ǎ. É ɖo mɔ̌ có, un ka yi. Ée un w’azɔ̌ nú ganxixo ɖé lɛ́ gúdo é ɔ, un wá byɔ́ xwé ɖé gbe. Nǔ ci kɔ nú mì, bɔ un lɛ́ zun nyiɖokpó, jǐ lɔ ka lɛ́ wu. Un kanbyɔ́ nyiɖée ɖɔ: ‘Xwé wɛ un ka ná gbɔ bo yi a?’ Ée un xá síngbó atɔngɔ́ ɔ jí é ɔ, un mɔ dɔ̌nkpɛvú Philippines-nu ɖé ɖo nukɔn ce. Un lin nǔ gbɔn lě: ‘É ɖo wɛn ɖɔ é kún ná ba ná ɖótó ó.’ Amɔ̌, un blɛ́ nyiɖée! Un jɛ nǔ kplɔ́n xá nya énɛ́ jí, bɔ é wá húzú mɛsɛntɔ́ Jexóva tɔn.
UN KPLƆ́N NǓ XƆ AKWƐ́ LƐ́ ÐO BETƐ́LI BROOKLYN TƆN
Ée un nɔ kpɔ́ xá Wilson nú xwe we gúdo é ɔ, è ylɔ́ mì ɖɔ má wá Betɛ́li Brooklyn tɔn ɖo 1985. Lěe un ko ɖɔ gbɔn ɖo aga é ɔ, wěmabláɖókpɔ́xɔsá wɛ è sɛ́ mì dó. Gbe ɖokpó ɔ, un ɖo macínu e nɔ zín wěma é zán wɛ, bo tuun ǎ bo hɛn wěma sín akpa kanweko mɔ̌kpán gblé. Wěmabláɖókpɔ́xɔsá ɔ byɔ́ mì ɖɔ má tínmɛ nǔ e jɛ é. Un tínmɛ hwɛjijɔ e wú nǔ ɔ jɛ lɛ́ é bǐ, amɔ̌, nǔ ɖokpó hwe. Nukúnkpénǔwútɔ́ ɔ ɖɔ nú mì kpó xomɛnyínyɔ́ kpó ɖɔ: “É nyɔ́ ɖɔ è ní nɔ dó kɛnklɛ́n hwebǐnu.” Hwenɛ́nu ɔ, un kplɔ́n ɖɔ é ɖo tají ɖɔ má nɔ yí nǔ e un wa nyi do lɛ́ é sín gbe, bo dó kɛnklɛ́n.
Un ɖo nǔ xlɛ́ mɛ e wá ba wěmabláɖókpɔ́xɔsá Brooklyn tɔn kpɔ́n lɛ́ é wɛ
Mɛxómɔ gbejínɔtɔ́ ɖěɖěe ɖo xwédo Betɛ́li tɔn mɛ lɛ́ é kpínkpɔ́n lɔ kplɔ́n lěe un ná wa mɛsɛntɔ́zɔ́ nú mɛ ɖěvo lɛ́ hú gǎn gbɔn é mì. Gbe ɖokpó ɔ, nɔví Milton Henschel, éé ɖo Hǎgbɛ́ alixlɛ́mɛtɔ́ ɔ mɛ é kpó mǐ kpó ɖo ayǐjínjɔ́n ɖo távo e tó è nɔ ɖu hwemɛ núɖuɖu ɖe é. Gbe nɛ́ gbe ɔ, gbɛtɔ́ sukpɔ́ tawun, bɔ nǔɖuɖumátɔ́ lɛ́ ɖo tagba jɛ wɛ syɛ́nsyɛ́n bá má nǔɖuɖu. Mǐ mɛ dɔ̌nkpɛvú e ɖo távo ɔ tó lɛ́ é jɛ nǔ húnhún ɖɔ dó do jí ɖó lěe nǔɖuɖu mímá ɔ lín sɔ é wú. Nɔví Henschel ɖɔ xó tí cóbó sí te bo jɛ sin, pɛ́ɛn kpó bɛ̌ɛ kpó má xá nǔɖuɖumátɔ́ lɛ́ jí ǎ. Un sixú wɔn nǔ énɛ́ e é wa kpó mɛɖéesɔ́hwe kpó é gbeɖé ǎ. É flín mì lěe Jezu wa mɛsɛntɔ́zɔ́ nú mɛsɛ́dó tɔn lɛ́ gbɔn é.—Jaan 13:3-5.
“A ÐÓ NÁ KPLƆ́N JAPON-GBE!”
Nyi kpó Michiko Oda kpó, kpó asú tɔn kpó
Ðo 1987 ɔ, un yi Japon bɔ kanɖódónǔwú kpó mɛɖéesɔ́hwe kpó wɛnjlátɔ́ e ɖo fínɛ́ lɛ́ é tɔn jí wǔ nú mì. Un ba ná d’alɔ yě, amɔ̌, xó ɔ wɛ nyí ɖɔ un se Japon-gbe ǎ. Nɔví nyɔ̌nu ɖokpó ɖo Betɛ́li bo nɔ nyí Michiko Oda, bo kpɔ́n mì dáán bo ɖɔ: “A ɖó ná kplɔ́n Japon-gbe!” Bɔ nǔ e un wá é nɛ́. Un tuun ɖěbǔ ɖɔ xó tɔn lɛ́ ná húzú gbɛzán ce ǎ.
Sun yɔywɛ ɖé gúdo ɔ, è sɛ́ mì dó agun e nɔ dó Japon-gbe é ɖokpó mɛ ɖo New York. Japon-gbe kplɔ́nkplɔ́n hun ali gěgé nú mì nú má sɛn Jexóva Mawu. Ðo 1989 ɔ, un bló kpléɖókpɔ́ ɖaxó azɔn nukɔntɔn ɔ dó Japon-gbe mɛ ɖo Los Angeles, ɖo Californie. Nɔví nyɔ̌nu gběxosín-alijítɔ́ ɖokpó nɔ nyí Miwako Onami bo ɖo wǎzéxlɛ́blótɔ́ lɛ́ mɛ, bɔ nǔ tɔn jɛ ce jí.
Nyi kpó Miwako kpó wlí alɔ ɖo 1992, bɔ mǐ wa sinsɛnzɔ́ ɖo Betɛ́li Brooklyn tɔn. Miwako nɔ nyɔ́ xomɛ, bɔ nǔ mɛtɔn nɔ lɛ́ ɖu ayi mɛ n’i, b’ɛ nɔ ɖo gbesisɔmɛ bá d’alɔ mɛ ɖěvo lɛ́ hwebǐnu. Kpɔ́ndéwú tɔn d’alɔ mì bɔ un w’azɔ̌ ɖo lěe un nɔ wa nǔ xá mɛ ɖěvo lɛ́ gbɔn é kpáxwé. Nǔníná ɖé wɛ é nyí sín Jexóva gɔ́n; é nɔ d’awǎjijɛ kpó gbɔ kpó nú mì hwebǐnu.
Alɔwlíwlízán mǐtɔn gbe
SINSƐNZƆ́ WIWA ÐO ALAXƆ JAPON TƆN MƐ KPÓ GLE Ɔ MƐ KPÓ
Hwenu ɖo yiyi wɛ é ɔ, mɛjitɔ́ Miwako tɔn we lɛ́ bǐ wá bɛ́ azɔn syɛ́nsyɛ́n; Japon wɛ yě nɔ nɔ. Énɛ́ wú ɔ, è nyɔ́ xomɛ dó mǐ wú, bo sɛ́ mǐ dó alaxɔ Japon tɔn mɛ, bónú mǐ ná dó sixú kpé nukún dó yě wú, ɖó fí énɛ́ lín dó yě dín ǎ. Mǐ yi jɛ dɔ̌n ɖo 1999.
Xwédo Betɛ́li tɔn e ɖo Japon é yá wǔ yí mǐ, bɔ mǐ jɛ xwé mǐtɔn yɔ̌yɔ́ ɔ gbe. Un kplɔ́n bo nɔ ná nǔ mɛ, bo nɔ lɛ́ yí mɛ hú gǎn; jijɔ ɖaaɖagbe énɛ́ lɛ́ ɔ, nɔví súnnu kpó nɔví nyɔ̌nu kpó e ɖo Japon lɛ́ é gɔ́n wɛ un kplɔ́n ɖe. Yě nɔ sɔ́ azɔ̌ dó d’ayihún ǎ. Yě nɔ lɛ́ w’azɔ̌ ɖó kpɔ́ tawun. Gbɔn nɛ̌ é? Japon-nu lɛ́ tuun ɖɔ kplé wɛ dě nɔ kplé bɔ ami tɔn nɔ su. Yě nɔ bló gǎn ɖé wlí bɔ tɔn hǔn, é ní cán ǎ. Kpɔ́ndéwú ɖagbe yětɔn dó wǔsyɛ́n lanmɛ nú mì bɔ un ná nɔ w’azɔ̌ xá mɛ ɖěvo lɛ́ kpó mɛɖéesɔ́hwe kpó, bɔ fún kpɛ e un nɔ jɔ dó jlǒ Jexóva tɔn e wa wɛ è ɖe gbɔn gbɛ ɔ bǐ mɛ é mɛ é ná nɔ su nukún ce mɛ.
Amɔ̌, ɖó fí vovo wɛ mǐ su ɖe wútu ɔ, hweɖélɛ́nu ɔ, é nɔ vɛ́ wǔ nú mì nú má mɔ nukúnnú jɛ alɔ e è dó ɖu xó ɖé lɛ́ ná é wú. Un ɖó ná kplɔ́n bo ná nɔ ɖó suúlu, bo ná nɔ nɔ kplakpla jí dó wa nǔ ǎ. Nukɔnmɛ ɔ, un w’azɔ̌ ɖo linlin ce wú, bo mɔ ɖɔ Jexóva sixú kɔn nyɔ̌ná dó gbeta ɖěbǔ jí, ényí è vɛ́ ko xwedó wě e é nɔ ɖe xá mǐ gbɔn tutoblónúnǔ tɔn jí é ɔ nɛ́. È ná ɖɔ ɔ, Jexóva wɛ nɔ zɔ́n bɔ gbeta lɛ́ nɔ yi ta.
Hwɛhwɛ ɔ, un nɔ sɔ́ nǔ e un kplɔ́n ɖo Betɛ́li lɛ́ é jlɛ́ dó azɔ̌ e Jexóva wa ɖo gbeyíɖɔ Mɔyízi wú é wú. Jexóva d’alɔ Mɔyízi bɔ é kplɔ́n xomɛfífá ɖo xwe 40 e é nyi lɛ̌ngbɔ́ ná lɛ́ é mɛ. Mɔyízi ɖɔhun ɔ, nyi lɔ kplɔ́n wěma tawun. Wěma énɛ́ e un kplɔ́n é zɔ́n bɔ un nɔ gó, bo nɔ lɛ́ ɖeji dó nyiɖée wú. Nǔ e un kplɔ́n ɖo Betɛ́li lɛ́ é zɔ́n bɔ un nɔ sɔ́ nyiɖée hwe, bo nɔ lɛ́ ɖeji dó Jexóva wú. Lěe Jexóva wa azɔ̌ ɖo Mɔyízi wú kpó suúlu kpó gbɔn é ɔ, nǔ ɖokpó ɔ wɛ é wa nú nyi lɔmɔ̌ ɖo xwe lɛ́ vlamɛ.
Un ɖo azɔ̌ wa wɛ ɖo alaxɔ Japon tɔn mɛ
Mǐ kpé nukún dó Miwako sín mɛjitɔ́ lɛ́ wú nú xwe 24 mɔ̌ cóbɔ yě wá kú. Kan gěgé wɛ mǐ tɛ, bo lɛ́ ɖí xwi xá hwenu adohu adohu tɔn gěgé, bo lɛ́vɔ́ yi dotóoxwé azɔn mɔ̌kpán. Masako e nyí Miwako sín nɔ é sín lanmɛ wá gblé káká bɔ te sísí bo zun zɔnlin bǐ wá nyí kpɛtɛ n’i. Kplé lɛ́ yiyi kpó kúnnuɖegbé yiyi kpó sɔ́ nɔ bɔ wǔ nú Masako ǎ. Ðo aklúnɔzángbla gǔdo gúdo tɔn e é nɔ gbɛ ná lɛ́ é mɛ ɔ, afɔtɔ́nɔ lɛ́ sín kɛkɛ́ví mɛ wɛ é nɔ nɔ. Nǔ énɛ́ lɛ́ bǐ ɖo fínɛ́ có, wǎn e é yí nú Jexóva é ɖe kpo gbeɖé ǎ. Awǎjijɛ nɔ ɖo nukún tɔn mɛ hweɖébǔnu e é ɖo xó ɖɔ dó nǔgbó ɔ wú wɛ é. Kpɔ́ndéwú e Masako sɔ́ ɖ’ayǐ ɖo mawusinsɛn kpáxwé é, lěe nǔ nɔ su nukún tɔn mɛ gbɔn é kpó awǎjijɛ e é nɔ ɖó ényí é ná bo ɖo ninɔmɛ ɖěbǔ mɛ ɔ é kpó kplɔ́n nǔ mì.
Nyi kpó Miwako kpó ɖo wɛn ɔ jlá wɛ ɖo Okinawa
Do 2024 ɔ, hǔzúhúzú maɖónukún ɖé wá xwetɔ́n ɖo gbɛzán mǐtɔn mɛ. Ée mǐ wa sinsɛnzɔ́ ɖo Betɛ́li nú xwe 30 jɛjí gúdo é ɔ, è byɔ́ mǐ ɖɔ mǐ ní yi gle ɔ mɛ. Gběxosín-alijítɔ́ titewungbe wɛ mǐ nyí din ɖo tɔtɛ́ntinto Okinawa tɔn mɛ, bɔ è jɔ wǔ mǐ bɔ mǐ nɔ ɖe kúnnu nú xwédo ɖěɖěe ɖo malínmálín dó fí e ahwangɔnu ɔ ɖe é. Azɔ̌ ɖagbe e è kplɔ́n mǐ ɖo Betɛ́li é d’alɔ mǐ bɔ mǐ yá wǔ húzú sɔgbe xá gle ɔ mɛ e è sɛ́ mǐ dó é. Mǐ nɔ tɛ́n kpɔ́n bo nɔ bló tuto ɖagbe, bo nɔ zán hwenu mǐtɔn ganjí, gbɔn ayi sísɔ́ ɖó sinsɛnzɔ́ mǐtɔn kpó azɔ̌ syɛ́nsyɛ́n wiwa kpó jí gblamɛ. Jexóva kɔn nyɔ̌ná dó mǐ jí, bɔ mǐ ɖó Biblu kplɔ́ntɔ́ ɖěɖěe wá cí xwédo ɖɔhun nú mǐ lɛ́ é. Mǐ mɔ din hú ɖ’ayǐ tɔn ɖɔ é ɖo tají tawun ɖɔ è ní yí wǎn nú mɛ lɛ́. Nyi kpó Miwako kpó nɔ dó kú nú Jexóva gbe bǐ gbe ɖó azɔ̌ ɖagbe ɖagbe énɛ́ wú.
ÉNYÍ JEXÓVA TLƐ NÁ W’AZƆ̌ ÐO MǏ WÚ GƆ́ NÁ Ɔ MǏ ÐO GBESISƆMƐ
Mɛ e ɖo xwédo ce mɛ lɛ́ é sɔ́ nɔ klán gbe xá mì ǎ có, yě ka ko xo kpóɖó nú mì ɖo mawusinsɛn mímɛ́ ɔ kɔn ǎ. Amɔ̌, Jezu d’akpá ɖɔ mɛ ɖěɖěe ná jó xwédo yětɔn lɛ́ dó bo ná húzú ahwanvú émítɔn lɛ́ é ná mɔ mɔ̌hunkɔtɔn donu 100 jɛjí din ɖo mɛ Jexóva tɔn lɛ́ tɛ́ntin. (Mak. 10:29, 30) Nǔ nyí mɔ̌ nǔgbó ɖo ninɔmɛ ce mɛ. Ðo xwe lɛ́ vlamɛ ɔ, xwédo e gbɔn gbɛ ɔ bǐ mɛ bo yí wǎn nú mì, bɔ nǔ ce nɔ lɛ́ ɖu ayi mɛ nú yě xwédo yětɔn mɛ wɛ un ɖe ɖɔhun lɛ́ é sukpɔ́ tawun, bɔ un sixú xa ǎ.
Wěma Nugbo e Wilson sɔ́ nú mì é kpo ɖo así ce. Wěma fɛ́sinnɔ énɛ́ nɔ flín mì lěe Jexóva dɔn mì kpó xomɛnyínyɔ́ kpó wá éɖée gɔ́n gbɔn é tawun. (1 Tan 28:9) Un kán ɖ’é jí bo ná jó nyiɖée dó b’ɛ ná kpo ɖo azɔ̌ wa ɖo wǔ ce wɛ, bɔ un ná d’alɔ mɛ ɖěvo lɛ́ bɔ yě ná kplɔ́n nǔgbó e nɔ kplá mɛ yi gbɛ mavɔmavɔ mɛ é.