D’alɔ mɛ ɖěvo lɛ́ bónú yě ní kplɔ́n bo yí wǎn nú Jexóva

1. Nɛ̌ nǔ ka nɔ cí nú we hwenu e Biblu kplɔ́ntɔ́ ɖé jɛ Jexóva sɛn jí é?

NƐ̌ NǓ ka nɔ cí nú we hwenu e Biblu kplɔ́ntɔ́ ɖé wá kplé azɔn nukɔntɔn ɔ, jɛ xósin ná jí, má nǔ e é ɖi nǔ ná lɛ́ é xá mɛ ɖěvo lɛ́, bo wá gbeta ɔ kɔn ɖo nukɔnmɛ bo zé éɖée jó nú Jexóva Mawu é? É ɖo wɛn ɖɔ xomɛ hun we tawun! Ényí Biblu kplɔ́ntɔ́ mǐtɔn yi nukɔn ɖo gbigbɔ lixo ɔ, Jexóva wɛ é jɛxá ɖɔ è ní xɔ susu ná. Nú mǐ mɔ lěe Jexóva d’alɔ mɛɖé bɔ é yi nukɔn ɖo gbigbɔ lixo gbɔn é ɔ, mǐ nɔ kpa susu n’i.—1 Kɔ. 3:5-9; 3 Jaan 3, 4.

2. Étɛ́ Jexóva ka ba nú Biblu kplɔ́ntɔ́ lɛ́? (1 Timɔtée 2:3, 4)

² Jlǒ Mawu tɔn wɛ nyí ɖɔ “mɛ alɔkpa lɛ́ bǐ ní mɔ hwlɛngán, bo lɛ́ ɖó nukúnnúmɔjɛnǔmɛ e sɔgbe é dó nǔgbó ɔ wú.” (Xa 1 Timɔtée 2:3, 4.) Jexóva ba ɖɔ mɛ lɛ́ ní kplɔ́n bo tuun émí kpó linlin émítɔn lɛ́ kpó bǐ mlɛ́mlɛ́ lěe é nyɔ́ bló gbɔn é. (Jel. 9:24) Énɛ́ byɔ́ ɖɔ è ní ɖó nukúnnúmɔjɛnǔmɛ e sɔgbe é. Akɔwé Biblu tɔn ɖé ɖɔ ɖɔ xókwín gbe dodó ɔ tɔn e è tínmɛ dó “nukúnnúmɔjɛnǔmɛ e sɔgbe é” kún nyí nǔ e mɛɖé kplɔ́n lɛ́ é kpowun ó, loɔ, nukúnnúmɔjɛnǔmɛ e “nɔ w’azɔ̌ ɖo mɛ ɔ wú bǐ mlɛ́mlɛ́ é” wɛ. Ényí Biblu kplɔ́ntɔ́ ɖé kplɔ́n bo tuun Jexóva ɔ, nukúnnúmɔjɛnǔmɛ énɛ́ nɔ húzú gbɛzán tɔn, bɔ énɛ́ ná zɔ́n bɔ é ná ɖó nukúnɖíɖó “gbɛ mavɔmavɔ” tɔn.—Jaan 17:3.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Jexóva jɔ wǔ mǐ bɔ mǐ ná d’alɔ mɛ ɖěvo lɛ́ bɔ yě ná kplɔ́n bo tuun i. Ðo xóta élɔ́ mɛ ɔ, mǐ ná ɖɔ xó dó nǔkanbyɔ́ élɔ́ lɛ́ jí: Étɛ́wú Biblu kplɔ́ntɔ́ lɛ́ ka ɖó ná kplɔ́n bo tuun Jexóva ganjí? Nɛ̌ mǐ ka sixú kplɔ́n mɛ alɔkpa e Jexóva nyí é yě gbɔn? Nɛ̌ mǐ ka sixú d’alɔ yě bɔ yě ná zán nǔ e yě tuun dó Jexóva wú lɛ́ é ɖo gbɛzán yětɔn mɛ gbɔn?

D’ALƆ BIBLU KPLƆ́NTƆ́ Ɔ BÓNÚ É NÍ KPLƆ́N BO TUUN JEXÓVA GANJÍ

4. Sɔgbe xá Maki 12:30 ɔ, étɛ́ ka nyí nǔ nukɔntɔn e gbé mǐ nɔ nya hwenu e mǐ ɖo Biblu kplɔ́n xá mɛɖé wɛ é?

⁴ Jezu ɖɔ ɖɔ gbeɖiɖe ɖaxó hú gǎn ɔ wɛ nyí ɖɔ mǐ ní yí wǎn nú Jexóva kpó ayi mǐtɔn bǐ kpó, lǐndɔ̌n mǐtɔn bǐ kpó, linlin mǐtɔn bǐ kpó, kpódó hlɔ̌nhlɔ́n mǐtɔn bǐ kpán. (Xa Maki 12:30.) Biblu kplɔ́ntɔ́ ɖé ɖó ná kplɔ́n bo tuun Jexóva bá dó yí wǎn n’i. Mǐ ba ɖɔ Biblu kplɔ́ntɔ́ mǐtɔn ní sɔ́ gbɛzán tɔn jó nú mǐdɛɛ lɛ́, nǔkplɔ́nmɛ ɖé lɛ́ alǒ tutoblónúnǔ ɖé ǎ, loɔ, nú Jexóva. Énɛ́ wú ɔ, nǔ nukɔntɔn e gbé mǐ nɔ nya hwenu e mǐ ɖo Biblu kplɔ́n xá mɛɖé wɛ é wɛ nyí ɖɔ mǐ ná d’alɔ ɛ bɔ é ná kplɔ́n bo tuun Jexóva lobo lɛ́ yí wǎn n’i.

5. Étɛ́ wǎn yí nú Jexóva ka ná sísɛ́ Biblu kplɔ́ntɔ́ towe bɔ é ná wa?

⁵ Kancícá ɖo wǎnyíyí kpó tónúsise kpó tɛ́ntin. Ényí Biblu kplɔ́ntɔ́ towe kplɔ́n bo tuun Jexóva, bo lɛ́ yí wǎn n’i ɔ, énɛ́ ná sísɛ́ ɛ b’ɛ ná se tónú n’i. Jezu ɖɔ: “Bónú gbɛ ɔ ná dó tuun ɖɔ un yí wǎn nú Tɔ́ ɔ ɔ, un ɖo nǔ wa wɛ lěe Tɔ́ ɔ ɖe gbe tɔn nú mì ɖɔ nyi ní wa gbɔn é.” (Jaan 14:31) Mɔ̌ ɖokpó ɔ, wǎn yí nú Jexóva hú nǔ ɖěvo ɖěbǔ, ná sísɛ́ Biblu kplɔ́ntɔ́ ɖé b’ɛ ná se tónú n’i bo lɛ́ tɛ́ dó wǔ tɔn.—1 Jaan 5:3.

6. Nɛ̌ nǔtuuntuun dó Jexóva wú ka ná d’alɔ Biblu kplɔ́ntɔ́ towe hwenu e é ɖo gbeta lɛ́ kɔn wá wɛ é gbɔn? Jlɛ̌ dó nǔɖé wú.

⁶ É ná bɔ wǔ nú Biblu kplɔ́ntɔ́ e kplɔ́n bo tuun Jexóva ganjí lɛ́ é hú gǎn bɔ yě ná wá gbeta e nǔnywɛ́ kpé lɛ́ é kɔn. Ði kpɔ́ndéwú ɔ, jɔmɛhúnkuntɔ́ ɖé sixú gán jɛ nǔ e é kplɔ́n lɛ́ é kpó tɛ́nkpɔ́n ɖěɖěe é yi lɛ́ é kpó wú kpowun bo ɖɔ émí ko nyɔ́ jɔmɛhún kun ǎ. É ɖó ná to yi tomɛ azɔn mɔ̌kpán hwɛ̌. Hwenu ɖo yiyi wɛ ɔ, é ná kplɔ́n lěe é sixú kun jɔmɛhún ɔ ɖo ninɔmɛ vovo lɛ́ mɛ gbɔn é kpó lěe é sixú wá gbeta ɖagbe lɛ́ kɔn gbɔn hwenu e é ɖo jɔmɛhún kun wɛ é kpó. Mɔ̌ ɖokpó ɔ, é nyí nǔkplɔ́nkplɔ́n kɛ́ɖɛ́ wɛ ná zɔ́n bɔ Biblu kplɔ́ntɔ́ ɖé ná kplɔ́n bo tuun Jexóva ǎ, loɔ, mɔ e é mɔ lěe nǔ lɛ́ yi gbɔn hwenu e é wá gbeta e sɔgbe xá nǔgbódodó Biblu tɔn lɛ́ é kɔn é kpó lɔ ná d’alɔ ɛ. Ée nukúnnúmɔjɛnǔmɛ e é ɖó dó Jexóva wú é ná ɖo jijɛjí wɛ, bɔ é ná lɛ́ mɔ lěe Tɔ́ tɔn jǐxwé tɔn ɔ ɖo alɔ dó è wɛ gbɔn é ɔ, énɛ́ ná sɔ́ nǔ n’i b’ɛ ná nɔ wá gbeta ɖagbe lɛ́ kɔn ɖo ninɔmɛ lɛ́ bǐ mɛ.

7. Nɛ̌ Jexóva tuuntuun ka d’alɔ Jozɛ́fu b’ɛ wá gbeta ɖagbe kɔn gbɔn?

⁷ Jexóva tuuntuun d’alɔ Jozɛ́fu hwenu e Potifáa sín asi tɛ́n kpɔ́n bá bló bɔ é ná mlɔ́ ayǐ xá ɛ é. É ɖo wɛn ɖɔ, sín hwenu e Jozɛ́fu ɖo vǔ é wɛ é ko se xó dó tan Adámu kpó Ɛvu kpó, gɔ́ nú Ablaxámu kpó Sala kpó tɔn wú. (Bǐb. 2:24; 20:3, 6) Tan énɛ́ lɛ́ sixú ko zɔ́n bɔ Jozɛ́fu tuun linlin e Jexóva nɔ ɖó dó alɔwlíwlí kpó nǔníná e xóɖóxámɛ nyí é kpó wú é. Jozɛ́fu wá tuun Jexóva sɔmɔ̌ bo gbɛ́ xó e Potifáa sín asi nɔ ɖo ɖiɖɔ n’i wɛ é bo ɖɔ: “Un sixú dó nǔ baɖabaɖa mɔ̌hun sin, bo hu hwɛ dó Mawu ce ǎ.” (Bǐb. 39:7-9) Jozɛ́fu tuun nǔ e nɔ nyɔ́ Jexóva nukúnmɛ é kpó nǔ e ma nɔ nyɔ́ nukún tɔn mɛ ǎ é kpó. É tuun nǔ e nɔ dó xomɛsin nú Mawu tɔn é. Wǎgbɔ tɔn ɔ, é wá gbeta e sɔgbe é kɔn. Ényí mǐ d’alɔ Biblu kplɔ́ntɔ́ mǐtɔn lɛ́ bónú yě tuun Jexóva ganjí bo tuun mɛ alɔkpa e é nyí é ɔ, yě lɔ ná nɔ wá gbeta e nɔ nyɔ́ nukún tɔn mɛ lɛ́ é kɔn.

KPLƆ́N Ɛ MƐ ALƆKPA E JEXÓVA NYÍ É

8. Nɛ̌ a ka sixú zán wěma Ðu gbɛ víví káká sɔ́yi! dó d’alɔ Biblu kplɔ́ntɔ́ ɖé bɔ é ná kplɔ́n bo tuun Jexóva gbɔn?

⁸ Nɛ̌ a ka sixú kplɔ́n mɛ alɔkpa e Jexóva nyí é Biblu kplɔ́ntɔ́ towe gbɔn lo? Jexóva d’alɔ Jɔbu b’ɛ kplɔ́n nǔ dó wǔ tɔn d’é jí gbɔn nǔkanbyɔ́ lɛ́ zínzán gblamɛ; nǔkanbyɔ́ 50 jɛjí wɛ! (Jɔb. 38:1–41:26) Mǐ lɔ sixú nɔ kan nǔ byɔ́. È sɔ́ nǔ nú nǔkanbyɔ́ ɖé lɛ́ ɖo wěma Ðu gbɛ víví káká sɔ́yi! ɔ mɛ bá dó d’alɔ Biblu kplɔ́ntɔ́ ɖé b’ɛ ná kplɔ́n nǔ dó mɛ alɔkpa e Jexóva nyí é wú kpɛɖé kpɛɖé. (Kpɔ́n gbǎví “Nǔkanbyɔ́ ɖěɖěe nɔ d’alɔ mǐ bɔ mǐ nɔ kplɔ́n Biblu mɛ lɛ́ é” ɔ.) Énɛ́ wú ɔ, zǎn nǔkanbyɔ́ énɛ́ lɛ́ dó d’alɔ nǔkplɔ́ntɔ́ towe bónú é ní kplɔ́n bo tuun Jexóva.

9-10. (a) Étɛ́ ka ná d’alɔ Biblu kplɔ́ntɔ́ lɛ́ bɔ yě ná ɖu Biblu xixa yětɔn sín le hú gǎn? (Jaki 5:11) (b) Jlɛ̌ lěe tan Biblu tɔn ɖé sixú ɖe nǔ e Jexóva yí wǎn ná é alǒ nǔ e é gbɛ́ wǎn ná é xlɛ́ gbɔn é dó nǔɖé wú.

⁹ Ényí mǐ jɛ Biblu kplɔ́n xá mɛ lɛ́ jí ɔ, mǐ nɔ dó wǔsyɛ́n lanmɛ nú yě ɖɔ yě ní jɛ Biblu xa jí gbe bǐ gbe.a Nɛ̌ mǐ ka sixú d’alɔ yě bɔ yě ná ɖu Biblu xixa yětɔn sín le hú gǎn gbɔn? Mǐ sixú ɖe wě xá yě ɖɔ ényí yě xa akpáxwé Mawuxówéma ɔ tɔn ɖěbǔ hǔn, yě ní nɔ lin tamɛ dó nǔ e wú Jexóva sɔ́ dó Xó tɔn mɛ é kpó jijɔ tɔn ɖěɖěe tɔ́n ɖ’é mɛ é kpó jí. Ð’ayi lěe ahwanvú Jaki wa mɔ̌ gbɔn hwenu e é ɖo xó ɖɔ dó tan Jɔbu tɔn wú wɛ é wú. Jaki dɔn ayi wá didɛ Jɔbu tɔn kɛ́ɖɛ́ jí ǎ, loɔ, é lɛ́ dɔn ayi yi wǎnyíyí Jexóva tɔn kpó nǔbláwǔkúnúmɛ tɔn kpó jí.—Xa Jaki 5:11.

¹⁰ Mǐ nɔ ba ɖɔ Biblu kplɔ́ntɔ́ mǐtɔn lɛ́ ní ɖó ayi lěe tan Biblu tɔn lɛ́ ɖokpó ɖokpó nɔ ɖe nǔ e Jexóva yí wǎn ná é alǒ nǔ e é gbɛ́ wǎn ná é xlɛ́ gbɔn é wú. Ði kpɔ́ndéwú ɔ, bóyá Biblu kplɔ́ntɔ́ mǐtɔn jɛ gbǎví “Jɛ Biblu xa jí,” éé ɖo wěma Ðu gbɛ víví káká sɔ́yi! mɛ é gbéjé kpɔ́n jí, bo ɖɔ nú mǐ ɖɔ émí wá gbeta ɔ kɔn bo ná xa tan Daniyɛ́li tɔn hwenu e è sɔ́ ɛ dó kinnikínní do mɛ é. Mǐ sixú dó wǔsyɛ́n lanmɛ n’i ɖɔ é ní lin tamɛ dó nǔkanbyɔ́ lěhun lɛ́ jí: ‘Étɛ́wú Jexóva ka hwlɛ́n Daniyɛ́li? Étɛ́ énɛ́ ka kplɔ́n mì dó nǔ e nɔ dó xomɛhunhun nú Jexóva é wú?’ (Dan. 6:10, 22) É sixú lɛ́ kan nǔ élɔ́ lɛ́ byɔ́ éɖée: ‘Étɛ́ ka jɛ dó mɛ ɖěɖěe dó hwɛ Daniyɛ́li lɛ́ é wú? Étɛ́ énɛ́ ka kplɔ́n mì dó nǔ e ma nɔ nyɔ́ Jexóva nukúnmɛ ǎ lɛ́ é wú?’ (Dan. 6:4, 5, 24) Gǔdo mɛ ɔ, é hɛn ɔ é ná lin tamɛ dó jijɔ Jexóva tɔn ɖěvo e jɛ wě ɖo tan ɔ mɛ lɛ́ é jí.—Dan. 6:26, 27.

11. Nɛ̌ mǐ ka sixú d’alɔ Biblu kplɔ́ntɔ́ mǐtɔn b’ɛ ná mɔ ɖɔ Biblu kplɔ́nkplɔ́n ɔ, nǔníná e gosín Jexóva gɔ́n é wɛ é nyí gbɔn?

¹¹ Ényí nǔ e kplɔ́n wɛ Biblu kplɔ́ntɔ́ mǐtɔn ɖe ɖo Biblu mɛ lɛ́ é nɔ su nukún tɔn mɛ ɔ, é nɔ víví nú mǐ. É ɖo mɔ̌ có, mǐ ɖó ná d’alɔ ɛ b’ɛ ná mɔ ɖɔ mɛ e nyí Jɔtɛn nyɔ̌ná énɛ́ lɛ́ tɔn é wɛ nyí Jexóva Mɛ̌si Ðaxó ɔ. (Eza. 30:20, 21) Nǔkplɔ́ntɔ́ mǐtɔn sixú nɔ dó kú nú mǐ nú nǔ e kplɔ́n wɛ é ɖe lɛ́ é, bo tlɛ sixú nɔ kpa susu nú mǐ ɖó lěe mǐ nɔ kplɔ́n ɛ nǔ gbɔn é wú. Nǔgbó wɛ ɖɔ xógbe énɛ́ lɛ́ e ɖe nǔsumɛnukúnmɛ xlɛ́ nǔgbó nǔgbó é kún nylá ó, amɔ̌, mǐ ɖó ná d’alɔ ɛ b’ɛ ná mɔ ɖɔ Jexóva wɛ susu mɔ̌hun kpó nǔsumɛnukúnmɛ mɔ̌hun kpó jɛxá.

D’ALƆ Ɛ NÚ É NÍ ZÁN NǓ E É TUU NDÓ JEXÓVA WÚ É

12-13. Nɛ̌ kplɔ́nkplɔ́n bo tuun Jexóva ka sixú d’alɔ Biblu kplɔ́ntɔ́ ɖé hwenu e é vɛ́ wǔ n’i bɔ é ná mɔ nukúnnú jɛ tan Biblu tɔn ɖé mɛ é gbɔn? (Kpɔ́n ɖiɖe ɔ lɔmɔ̌.)

¹² Bo ná dó ɖu le nǔtuuntuun e sɔgbe é tɔn bǐ mlɛ́mlɛ́ ɔ, mǐ ɖó ná nɔ zán nǔ e mǐ tuun lɛ́ é. Énɛ́ wú ɔ, nɛ̌ a ka sixú d’alɔ Biblu kplɔ́ntɔ́ towe bɔ é ná zán nǔ e é tuun dó Jexóva wú lɛ́ é gbɔn? Jɛ nukɔn hwɛ̌ ɔ, d’alɔ ɛ nú é ní flín nǔ e é tuun dó Jexóva wú hwenu e é xa tan Biblu tɔn ɖé bɔ é vɛ́ wǔ n’i bɔ é ná mɔ nukúnnú jɛ mɛ é. Ði kpɔ́ndéwú ɔ, ényí é ɖo nǔ xa dó hwɛɖiɖɔ Jexóva tɔn lɛ́ wú wɛ ɔ, é sixú kanbyɔ́ éɖée ɖɔ étɛ́wú Jexóva ka sú kún dó nú mɛɖé lɛ́ bo ka jó mɛ ɖěvo lɛ́ dó a jí. Nɛ̌ a ka sixú d’alɔ Biblu kplɔ́ntɔ́ towe bɔ é ná lin tamɛ dó xó ɔ wú gbɔn?

¹³ A sixú dó wǔsyɛ́n lanmɛ nú Biblu kplɔ́ntɔ́ towe bɔ é ná lin tamɛ dó nǔ e é ko kplɔ́n dó Jexóva wú é jí. Nɛ̌ gbɛ ka xɔ akwɛ́ nú Jexóva sɔ? (2 Pi. 3:9) Mǐ kpo ɖo hwɛhutɔ́ nyí wɛ có, nǔ xɔ akwɛ́ tɛ́ é ka wa dó hwlɛ́n mǐ? (Efɛ́. 2:4, 5) Jexóva ka nɔ dɔn tó nú mɛ e é ma jɛxá ɖɔ è ní dɔn tó ná ǎ lɛ́ é wɛ a? Ðo alɔ ɖěvo mɛ ɔ, é ka ná lɔn bɔ è ná gɔn tó dɔn nú mɛ e é jɛxá ɖɔ è ní dɔn tó ná é wɛ a? (Tín. 34:6, 7) Hweɖélɛ́nu ɔ, tan Biblu tɔn ɖé sixú gɔn gǒflɛ́mɛ e sín hudó mǐ ɖó bo ná mɔ nukúnnú jɛ gbeta e kɔn Jexóva wá é ɖé mɛ hú gǎn lɛ́ é bǐ ná mǐ. Amɔ̌, mǐ ɖó hudó gǒflɛ́mɛ énɛ́ lɛ́ tɔn ǎ. Mǐ tuun Mawu mǐtɔn bo kú d’é jí ɖɔ é nɔ wa nǔ e sɔgbe é hwebǐnu.

14. Ényí mɛ e ɖo agun ɔ mɛ é ɖé dó xomɛsin nú nǔkplɔ́ntɔ́ ɖé ɔ, nɛ̌ a ka sixú d’alɔ ɛ gbɔn?

¹⁴ Lin tamɛ dó ali ɖěvo e nu Biblu kplɔ́ntɔ́ ɖé sixú zán nǔ e é tuun dó Jexóva wú lɛ́ é ɖe é jí. Mǐ ní ɖɔ ɖɔ Biblu kplɔ́ntɔ́ towe ko ɖo kplé lɛ́ wá wɛ din, amɔ̌, mɛ e ɖo agun ɔ mɛ é ɖé dó xomɛsin n’i. Bóyá wɛnjlátɔ́ e ɖo agun ɔ mɛ é ɖé wɛ dó xomɛsin n’i. Dǒ wǔsyɛ́n lanmɛ nú nǔkplɔ́ntɔ́ towe ɖɔ é ní lin tamɛ dó linlin e Jexóva nɔ ɖó dó nɔví súnnu kpó nɔví nyɔ̌nu kpó mǐtɔn lɛ́ wú é jí. Ði kpɔ́ndéwú ɔ, é sixú kanbyɔ́ éɖée ɖɔ: Vɔ̌ tɛ́ Jexóva ka sá dó ɖe wǎn e é yí nú yě é xlɛ́? (Jaan 3:16) Nɛ̌ bǔninɔ klisánwun tɔn mǐtɔn ka ɖo tají n’i sɔ? (Ðɛh. 133:1) Ényí mǐ ɖo gǎn dó wɛ bá nya xɛ ɖo bǔninɔ énɛ́ jí ɔ, nɛ̌ nǔ ka nɔ cí n’i? (2 Kɔ. 13:11) D’alɔ nǔkplɔ́ntɔ́ towe bónú é ní mɔ lěe xomɛ ná hun Jexóva sɔ hwenu e mǐ sɔ́ ayi ɖó jijɔ ɖagbe mɛ ɖěvo lɛ́ tɔn jí b’ɛ ma nyí ɖó nǔwanyido yětɔn lɛ́ jí ǎ é.

15-16. (a) Nɛ̌ Biblu kplɔ́ntɔ́ ɖé ka sixú xwedó kpɔ́ndéwú Jezu tɔn hwenu e é ja gbeta tají ɖé kɔn wá gbé é gbɔn? (Jaan 8:29) (b) Nɛ̌ Marianne ka d’alɔ Biblu kplɔ́ntɔ́ tɔn b’ɛ wá gbeta ɖagbe kɔn gbɔn? (Kpɔ́n ɖiɖe ɔ lɔmɔ̌.)

¹⁵ Gǔdo mɛ ɔ, a sixú d’alɔ Biblu kplɔ́ntɔ́ towe b’ɛ ná zán nǔ e é ko tuun dó Jexóva wú lɛ́ é dó wá gbeta ɖagbe lɛ́ kɔn. A sixú dɔn ayi tɔn yi wěma Ðu gbɛ víví káká sɔ́yi! sín nǔkplɔ́nkplɔ́n 35​gɔ́ e xóta tɔn nyí “Lěe a sixú wá gbeta ɖagbe lɛ́ kɔn gbɔn é” jí jɛ nukɔn. Amɔ̌, ényí nǔkplɔ́ntɔ́ towe ko xo ɖɛ bo lɛ́ ba do nú nǔ cóbɔ gbeta ɖé kɔn wíwá ka kpo ɖo wǔ vɛ́ n’i wɛ ɔ ka lo? É sixú nɔ ma tuun nǔgbódodó e jɛxá ninɔmɛ tɔn hú gǎn ɖo tootóbú e é mɔ lɛ́ é mɛ é. A sixú byɔ́ ɛ ɖɔ é ní lin tamɛ dó kpɔ́ndéwú Jezu tɔn jí. Nɛ̌ Jezu ka nɔ wá gbeta lɛ́ kɔn gbɔn? É ɖɔ: “Un nɔ wa nǔ e nɔ nyɔ́ nukún [Tɔ́ ce] tɔn mɛ lɛ́ é hwebǐnu.” (Xa Jaan 8:29.) Dǒ wǔsyɛ́n lanmɛ n’i ɖɔ é ní kan nǔ élɔ́ byɔ́ éɖée: ‘Ényí un zɔn dó nǔ e un ba do ná lɛ́ é kpó nǔ e un ko kplɔ́n dó Jexóva wú lɛ́ é kpó jí ɔ, gbeta tɛ́ ka ná nyɔ́ nukún tɔn mɛ?’ Gbeta ɖěbǔ e nyɔ́ Jexóva nukúnmɛ é ɔ, gbeta ɖagbe wɛ.

¹⁶ Nǎwe ɖé nɔ nɔ Chili bo ɖo Biblu kplɔ́n wɛ, b’ɛ byɔ́ ɖɔ é ní wá gbeta tají ɖé kɔn. Xwédo tɔn ɖo cɔcɔ dó n’i wɛ bónú é ná yí gbe nú azɔ̌ e kpé akwɛ́ ganjí bo ka jɛ kplé lɛ́ sín ganmɛ mɛ é. Marianne e nɔ kplɔ́n Biblu xá ɛ é ɖɔ: “Un dó wǔsyɛ́n lanmɛ n’i ɖɔ é ní lin tamɛ dó lěe nǔ ná cí nú Jexóva dó gbeta tɔn wú é jí. É ná víví n’i wɛ a alǒ é ná kú wǔ n’i? Un lɛ́ dó wǔsyɛ́n lanmɛ n’i ɖɔ é ní xo ɖɛ sɛ́ dó Jexóva dó xó ɔ wú bo kpɔ́n lěe é ná ná sin ná gbɔn é. É gbɛ́ azɔ̌ ɔ, bɔ táan kpɛɖé gúdo ɔ, é mɔ azɔ̌ ɖěvo e ma ná jɛ kplé gan tɔn lɛ́ mɛ ǎ é.” Marianne ɖɔ nǔ e Biblu kplɔ́ntɔ́ ɔ ná wa é n’i ǎ, loɔ, é d’alɔ ɛ b’ɛ lin tamɛ dó nǔ e é ko tuun dó Jexóva wú é jí. Wǎgbɔ tɔn ɔ, é nyí xɔ́ntɔn e nǔkplɔ́ntɔ́ ɔ zun xá Marianne é kɛ́ɖɛ́ wɛ nǔ énɛ́ e jɛ é ná hlɔ̌nhlɔ́n ǎ, loɔ, é lɛ́ ná hlɔ̌nhlɔ́n xɔ́ntɔn e nǔkplɔ́ntɔ́ ɔ zun xá Jexóva é. Marianne ɖɔ dó nǔkplɔ́ntɔ́ tɔn wú ɖɔ: “É kplɔ́n ɖɔ ényí mǐ sɔ́ Jexóva sinsɛn ɖó tɛn nukɔntɔn ɔ mɛ ɔ, Jexóva nɔ kpé nukún dó mǐ wú.”

NYƆ̌NÁ ÐĚÐĚE MƐ ÐĚÐĚE KPLƆ́N BO TUUN JEXÓVA GANJÍ LƐ́ É NƆ MƆ LƐ́ É

17. Étɛ́ ka ɖo tají hú gǎn bɔ Biblu kplɔ́ntɔ́ lɛ́ ná kplɔ́n?

¹⁷ Nǔ gěgé wɛ Biblu kplɔ́ntɔ́ mǐtɔn lɛ́ nɔ kplɔ́n ɖo Biblu kplɔ́nkplɔ́n yětɔn hwenu. Nǔkplɔ́ntɔ́ lɛ́ nɔ kplɔ́n nǔkplɔ́nmɛ bǐbɛ́mɛ tɔn Biblu tɔn lɛ́, ɖi ninɔmɛ mɛkúkú lɛ́ tɔn, gbɛxixɔ ɔ kpó Axɔ́súɖuto ɔ kpó. Yě nɔ lɛ́ kplɔ́n nǔ dó lěe nǔ lɛ́ nɔ nyí gbɔn ɖo tutoblónúnǔ ɔ mɛ é wú, ɖi lěe nǔ lɛ́ nɔ nyí gbɔn ɖo kplé mǐtɔn lɛ́ jí é, azɔ̌ e mɛxó agun tɔn lɛ́ nɔ wa é kpó mɛ e nyí Hǎgbɛ́ alixlɛ́mɛtɔ́ ɔ é kpó. Amɔ̌, mǐ ba ɖɔ nǔkplɔ́ntɔ́ mǐtɔn lɛ́ ní kplɔ́n nǔ hú nǔ énɛ́ lɛ́ kplɔ́nkplɔ́n kpowun. Mǐ ba ɖɔ yě ní kplɔ́n bo tuun Jexóva ganjí.

18. Ajɔ tɛ́ lɛ́ ka ɖo sɛxwetɛn nú mɛ ɖěɖěe nɔ kplɔ́n bo nɔ tuun Jexóva lɛ́ é?

¹⁸ Wǔjɔmɛ wɛ é nyí nú mǐ ɖɔ mǐ ní kplɔ́n nǔ mɛ ɖěvo lɛ́ bónú yě ní kplɔ́n bo tuun Jexóva! É ná bo tlɛ nyí ɖo din ɔ, Jexóva nɔ sɔ́ gbɛzán awǎjijɛnɔ dó d’ajɔ mɛ ɖěɖěe kplɔ́n bo tuun i bo nɔ sɛn ɛ lɛ́ é. (Ðɛh. 25:12-15) Nukɔnmɛ ɔ, mɛ ɖěɖěe “tuun Mawu nǔgbó ɔ” Jexóva lɛ́ é bǐ ná nɔ gbɛ káká sɔ́yi. (1 Jaan 5:20) É ka ko fó ɖó fínɛ́ ǎ. Biblu ɖɔ nú mǐ ɖɔ Jexóva “tuun” mɛ ɖěɖěe nɔ tɛ́n kpɔ́n bo nɔ kplɔ́n bo nɔ tuun i, lobo nɔ yí wǎn n’i lɛ́ é. (1 Kɔ. 8:3) Ɛɛn, Mawu Nǔbǐwúkpétɔ́ ɔ nɔ ɖ’ayi mǐ wú bo tuun ɖɔ mǐ nyí xɔ́ntɔn émítɔn lɛ́. Ajɔ ɖagbe hú gǎn e è nɔ mɔ ɖo kplɔ́nkplɔ́n bo tuun Mawu nǔgbó ɖokpó géé e tíin é mɛ é nɛ́!