Mi nɔ yá wǔ ɖe ɖɛ gbemanɔkpɔ́ lɛ́!

Nǔjlɛ́dónǔwú ɖé ɖíe. È ɖó ná kpé xú e wɛ́n é ganjí bónú é ná dó sixú w’azɔ̌ ɖo nukɔnmɛ bo ma wá dó wǔvɛ́ nú mɛ ó. Amɔ̌, ényí è ma kpé nukún d’é wú ganjí ǎ ɔ, wǔvɛ́ ɔ sixú gbɛ́ kɔ gbo. Nylá hú bǐ ɔ wɛ nyí ɖɔ, xú énɛ́ e wɛ́n é sixú zɔ́n bɔ mɛ ɔ ná ɖó blɔ̌ ɖo wǔ, alǒ é sɔ́ ná nɔ w’azɔ̌ ganjí lěe é ɖó ná nyí gbɔn é ǎ.

Xɔ́ntɔn e è zun xá nǔɖitɔ́ hǎtɔ́ ɖé bɔ akpa ko jɛ wú é cí xú e wɛ́n é ɖɔhun, bɔ è ɖó ná yá wǔ kpé nukún d’é wú. É ma nyí mɔ̌ ǎ ɔ, xɔ́ntɔn mitɔn e ko gblé é sín wǔvɛ́ ná fɔ́n bo ɖo jijɛjí wɛ. A sixú wá hɛn ɛ dó xomɛ, bɔ vlafo ɔ, hǎ mitɔn ná klán. Jezu ɖɔ: “Yǎ wǔ ɖe ɖɛ tagba lɛ́.” (Mat. 5:25) Énɛ́ wú ɔ, yi mɔ xɔ́ntɔn towe, bo ɖɔ xó n’i kpó xomɛnyínyɔ́ kpó, bo ma ka hwlá lěe nǔ cí nú we dó xó ɔ wú é ó. Étɛ́wú énɛ́ ka sixú vɛ́ wǔ? Hwɛjijɔ we ɖíe.

Nukɔntɔn, a sixú wɔn ya nú ninɔmɛ ɔ, bo gɔn ɖiɖeɖɛ, bóyá, ɖó a mɔ ɖɔ ényí émí ɖo xó ɖɔ d’é wú wɛ ɔ, émí kún ná vo ó.b Lin tamɛ dó Evodíi kpó Sɛntíci kpó jí; é cí ɖɔ yě kún kpé wú bo ɖe ɖɛ gbemanɔkpɔ́ e ɖo tɛ́ntin yětɔn é ɖé ó ɖɔhun. É cí ɖɔ tagba e ɖo tɛ́ntin yětɔn é nɔ ayǐ nú hwenu línlín, ɖó mɛsɛ́dó Pɔ́lu e ɖo káká Hlɔ̌ma é tlɛ se. É dó wǔsyɛ́n lanmɛ nú yě ɖɔ yě ní wa nǔ e wú yě kpé é bǐ bo lɛ́ ɖó gbe kpɔ́. (Filí. 4:2) Mɛɖéesɔ́hwe, xóɖɔɖókpɔ́ ɖagbe kpó hwɛsɔ́kɛmɛ nǔgbó ɔ kpó sixú zɔ́n bɔ yě lɛ́ zun xɔ́ntɔn.

Wegɔ́, a sixú ɖó nukún ɖɔ mɛ ɖě ɔ ní yí hwɛ gbe. Amɔ̌, mi ní lɛ́ nyí xɔ́ntɔn gbé nya wɛ a ɖe, é nyí mɛ e kú hwɛ é ba ná ɖe xlɛ́ wɛ a ɖe ǎ. Azɔn gbigbɔ jí wɛ dotóo e ɖo xú e wɛ́n é wú kpé nukún dó wɛ é nɔ sɔ́ ayi ɖó, é nyí ɖó do biba nú nǔ ɖěɖěe zɔ́n bɔ xú ɔ wɛ́n lɛ́ é bǐ jí ǎ. Hwenu e a ɖo xó ɖɔ xá xɔ́ntɔn towe wɛ é ɔ, ma sɔ́ ayi ɖó mɛ e kú hwɛ ɖo xó ɔ mɛ é jí ó. É nyɔ́ wa hǔn, flín lěe xɔ́ntɔn e hwi kpó é kpó zun é xɔ akwɛ́ nú we sɔ é, bo sɔ́ ayi ɖó nǔ e a ɖó ná wa dó jlá nǔ lɛ́ ɖó é jí.

Étɛ́wú a ma ka ná ɖɔ xó xá nɔví súnnu towe, alǒ nɔví nyɔ̌nu towe égbé, bónú mi ná jlá nǔ lɛ́ ɖó, lobonú xɔ́ntɔn e mi zun xá miɖée lɛ́ é ná lɛ́ jɛ tɛn tɔn mɛ ǎ? “Mi ma nɔ xomɛsin jí káká bónú hwe ní yi xɔ ó.” (Efɛ́. 4:26) Ényí a ɖe afɔ e jɛxá lɛ́ é bónú mi yá wǔ jlá nǔ lɛ́ ɖó ɔ, a ná d’alɔ bɔ è ná nya xɛ ɖo “fífá mɛ” e mǐ nɔ nɔ ‘xá mǐɖée lɛ́ é’ jí.—Efɛ́. 4:1-3.