Mɛxómɔ lɛ́ mi, mi xɔ akwɛ́ nú agun ɔ

Bóyá, hwi lɔ sɔ́ nɔ kpé wú bo nɔ wa nǔ káká ɖé lěe é ko nɔ nyí gbɔn ɖ’ayǐ é ɖɔhun ǎ, ɖó mɛxóxwe wútu. A ko sɛn Jexóva kpó gbejíninɔ kpó nú xwe mɔ̌kpán có, a sixú nɔ ɖó linlin masɔgbe lɛ́ dó hwiɖée wú, ɖó dogbó towe din tɔn lɛ́ wútu. Ði kpɔ́ndéwú ɔ, a sixú nɔ ba ná jlɛ́ nǔ e wa wɛ a ɖe din lɛ́ é dó nǔ e a ko wa wá yi lɛ́ é wú. Ényí mɔ̌ wɛ ɔ, étɛ́ ka sixú d’alɔ we bɔ a ná ɖí xwi xá linlin mɔ̌hun?

NǓ E JEXÓVA NƆ ÐÓ NUKÚN ÐO ASÍ WE É

Kanbyɔ́ hwiɖée ɖɔ: ‘Étɛ́ Jexóva ka nɔ ɖó nukún ɖo así ce?’ Xó élɔ́ lɛ́ e ɖo Sɛ́nflínmɛ 6:5 mɛ é sixú dó gbɔ nú we: ‘A ná yí wǎn nú Jexóva, Mawu towe kpódó ayi towe bǐ kpó, kpódó lǐndɔ̌n towe bǐ kpó, kpódó hlɔ̌nhlɔ́n towe bǐ kpó.’

Sɔgbe xá wěmafɔ énɛ́ ɔ, Jexóva nɔ ɖó nukún ɖɔ a ní sɛn émí kpó ayi towe bǐ, lǐndɔ̌n towe bǐ kpó hlɔ̌nhlɔ́n towe bǐ kpó. Nǔgbó énɛ́ sixú d’alɔ we bɔ a ná nyi alɔ nú hwiɖée sísɔ́ jlɛ́ dó mɛ ɖěvo lɛ́ wú, alǒ nyi alɔ nú nǔ e a sixú wa din lɛ́ é sísɔ́ jlɛ́ dó nǔ e wú a sixú ko kpé bo wa wá yi lɛ́ é wú.

Lin tamɛ dó nǔ élɔ́ jí: Étɛ́wú a ka kpé bo nɔ ná Jexóva hwenu e a ma ko kpo ǎ é? Gěgé mɛsɛntɔ́ Jexóva tɔn lɛ́ tɔn wɛ ná ɖɔ ɖɔ émí nɔ ná ɛ nǔ ɖagbe hú gǎn e émí ɖó é. Énɛ́ wɛ nyí nǔ ɖagbe hú gǎn e ninɔmɛ towe yí gbe ná bɔ a nɔ ná ɛ hwe ɔ nu é. Étɛ́wú a ka kpé bo sixú ná Jexóva din? Nǔ ɖagbe hú gǎn e sɔgbe xá ninɔmɛ towe din tɔn ɔ é wɛ nyí nǔ e wa wɛ a ɖe din é. Ényí a nɔ kpɔ́n nǔ lɛ́ gbɔn mɔ̌ ɔ, a sixú wá gbeta ɔ kɔn ɖɔ nǔ e ná ɛ wɛ émí ɖe din é kún gbɔn vo nú nǔ e émí ná ɛ wá yi lɛ́ é ó. Nǔ ɖagbe hú gǎn e a ɖó ɖ’ayǐ é wɛ a ná ɛ, bɔ nǔ ɖagbe hú gǎn e a ɖó din é ná ɛ wɛ a ɖe.

MƐ ÐĚVO LƐ́ SIXÚ ÐU NǓ E A MƆ KPƆ́N ÐO GBƐ MƐ LƐ́ É SÍN LE TAWUN

Xó e ɖo atɛ mɛ é sín akpáxwé ɖěvo ɖíe: Ma sɔ́ ayi ɖó dogbó e xwe towe ɖó nú we é jí ó, é nyɔ́ wa ɔ, a hɛn ɔ a ná tɛ́n kpɔ́n bo sɔ́ ayi ɖó ali e é hun nú we é jí. Nǔgbó ɔ, ɖó klisánwun mɛxómɔ ɖé wɛ nú we wútu ɔ, nǔɖé lɛ́ tíin bɔ a sixú wa din bo ka sixú wa hwenu e a ma ko kpo ǎ é ǎ. Ði kpɔ́ndéwú ɔ, a hɛn ɔ a ná bló nǔ élɔ́ lɛ́:

Nɔ má nǔ e a mɔ kpɔ́n lɛ́ é xá mɛ ɖěvo lɛ́. Ð’ayi xógbe élɔ́ lɛ́ e ɖo Biblu mɛ é wú:

Axɔ́sú Davídi: “Un ko nɔ dɔ̌nkpɛ mɛ kpɔ́n cóbó wá kpo din; un ka mɔ Mawu jó hwɛjijɔnɔ lɛ́ dó kpɔ́n ǎ, un ka mɔ vǐ yětɔn lɛ́ ɖě byɔ́ nǔ ɖu kpɔ́n ǎ.”—Ðɛh. 37:25.

Jozuwée: ‘Nyɛ ɔ, zaanɖé din ɔ, un ná yi fí e nǔ e mɔ hwe lɛ́ bǐ ná yi é. Mi ní ka tuun kpó ayi mitɔn bǐ kpó, kpódó lǐndɔ̌n mitɔn bǐ kpó ɖɔ Jexóva, Mawu mitɔn kún gɔn akpá e é dó nú mi lɛ́ ɖěbǔ ɖe ó; bǐ wɛ é ɖe káká yi fó.’—Joz. 23:14.

A sixú ko dó xógbe mɔ̌hun lɛ́ kpɔ́n. Nǔ e Davídi kpó Jozuwée kpó ɖésúnɔ mɔ kpɔ́n lɛ́ é jí wɛ yě zɔn dó bo ɖɔ xó énɛ́ lɛ́. Ðó nǔ e mɛsɛntɔ́ gbejínɔtɔ́ Jexóva tɔn énɛ́ lɛ́ mɔ, bo lɛ́ se nú xwe mɔ̌kpán lɛ́ é wɛ yě ɖɔ wútu ɔ, nǔ e yě ɖɔ lɛ́ é sixú ɖó zin tawun.

Ényí a bɛ́ Jexóva sinsɛn din é ɔ, xwe ko jɛ dó wɛ nyí ɔ, hwi lɔ hɛn ɔ, a ná zɔn dó nǔ e a ko mɔ kpɔ́n lɛ́ é jí bo ɖɔ le e nɔ tɔ́n sín mɔ̌ wiwa mɛ lɛ́ é. A ka flín nyɔ̌ná e Jexóva kɔn dó togun tɔn jí é ɖě, b’ɛ nɔ su nukún towe mɛ a? Vo fɛɛ bo ɖɔ xó d’é wú nú mɛ ɖěvo lɛ́. Lěe nǔ énɛ́ e a mɔ kpɔ́n é fá kɔ nú we gbɔn é wɛ é sixú fá kɔ nú mɛ ɖěvo lɛ́ lɔ gbɔn. Nǔgbó ɔ, ényí mɛ ɖěvo lɛ́ se nǔ e a mɔ kpɔ́n ɖo Jexóva sinsɛn mɛ lɛ́ é ɔ, a sixú nyí jɔtɛn wǔsyɛ́n dó lanmɛ nú mɛ tɔn tají ɖé nú yě.—Hlɔ̌. 1:11, 12.

Ali ɖěvo e nu a sixú dó wǔsyɛ́n lanmɛ nú mɛ ɖěvo lɛ́ ɖe é wɛ nyí ɖɔ a ná nɔ yi kplé lɛ́ domɛ cɔɔ, lěe a kpé wú gbɔn é. Hwi kpó nǔɖitɔ́ hǎtɔ́ towe lɛ́ kpó sixú ɖu miɖée lɛ́ sín le ɖo fínɛ́. Connie e xó mǐ ɖɔ wá yi é ɖɔ: “Kplé lɛ́ yiyi nɔ zɔ́n bɔ awakanmɛ sɔ́ nɔ kú mì ǎ. Kpó wǎnyíyí tootóbú e sín le un nɔ ɖu ɖo kpléxɔ Axɔ́súɖuto ɔ tɔn mɛ é kpó ɔ, nɛ̌ awakanmɛ ka sixú lɛ́ kú mì gbɔn? Un nɔ tɛ́n kpɔ́n bo nɔ ɖe nǔsumɛnukúnmɛ xlɛ́ mɛ ɖěvo lɛ́ gbɔn nǔ kléwún kléwún lɛ́ níná yě gblamɛ. Gɔ́ ná ɔ, un nɔ tɛ́n kpɔ́n bo nɔ lɛ́ ɖ’alɔ ɖo nǔ gbigbɔ tɔn lɛ́ mɛ xá nɔví súnnu kpó nɔví nyɔ̌nu kpó ce lɛ́.”

SINSƐNZƆ́ E A NƆ WA KPÓ GBEJÍNINƆ KPÓ NÚ JEXÓVA É NƆ XƆ AKWƐ́ N’I

Kpɔ́ndéwú mɛ ɖěɖěe ninɔmɛ yětɔn lɛ́ ɖó dogbó nú yě có, Jexóva ka yí wǎn nú yě lɛ́ é tɔn gěgé wɛ ɖo Biblu mɛ. Lin tamɛ dó Sinmɛnyɔ́ɔ jí, mɛxómɔ Izlayɛ́linu ɖé wɛ, bo kpo ɖo gbɛ hwenu e è ji Jezu é. Hwenu e Sinmɛnyɔ́ɔ nɔ yi sinsɛnxɔ ɔ mɛ é ɔ, é sixú ko ɖ’ayi wú ɖɔ súnnu ɖé lɛ́ ɖe bo kún nyí mɛxó sɔ émí ó, bo nɔ kpé nukún dó azɔ̌ tawun tawun ɖé lɛ́ wú ɖo fínɛ́. Bɔ éyɛ́ Sinmɛnyɔ́ɔ ka lo? É sixú ko lin ɖɔ ɖó émí nyí mɛxómɔ wútu ɔ, émí kún sɔ́ xɔ akwɛ́ káká ɖé ɖo Jexóva nukúnmɛ ó, bɔ ɖo gbɛtɔ́ nukúnmɛ ɔ, mɔ̌ wɛ è sixú kpɔ́n nǔ lɛ́ gbɔn. Amɔ̌, vo séé wɛ Jexóva nɔ mɔ nǔ lɛ́ gbɔn. É mɔ ɖɔ Sinmɛnyɔ́ɔ ɔ, “nǔjlɔ́jlɔ́watɔ́ ɖé wɛ bo nɔ tɛ́ dó Mawu wú,” bo jɔ wǔ i bɔ é mɔ Jezu hwenu e é ɖo vǔ é. Jexóva tlɛ zán Sinmɛnyɔ́ɔ bɔ é ɖɔ nǔɖé ɖ’ayi dó Mɛsíya sɔgúdo tɔn énɛ́ wú! (Luk. 2:25-35) É ɖo wɛn ɖɔ, Jexóva mɔ nǔ zɛ lěe Sinmɛnyɔ́ɔ cí ɖo wěxo é wú, bo mɔ ɖɔ nya nǔɖitɔ́ téwúngbéjú ɖé wɛ é nyí, “bɔ gbigbɔ mímɛ́ ɖo jǐ tɔn.”

Ényí nǔ e sixú ɖó dogbó nú we lɛ́ é ná bo ɖo fínɛ́ ɔ, hwi lɔ sixú kú d’é jí ɖɔ sinsɛnzɔ́ e wa nú Jexóva wɛ a ɖe kpó gbejíninɔ kpó é nɔ xɔ akwɛ́ n’i. Ðo nukún Mawu tɔn mɛ ɔ, nǔníná e “sɔgbe xá nǔ e [mɛɖé] ɖó é wɛ Mawu nɔ yí gbe ná hú gǎn, é nyí nǔníná e sɔgbe xá nǔ e é ma ɖó ǎ é ǎ.”—2 Kɔ. 8:12.

Énɛ́ wú ɔ, sɔ́ ayi ɖó nǔ e a sixú wa lɛ́ é jí. Ði kpɔ́ndéwú ɔ, sinsɛnzɔ́ ɔ sín akpáxwé tɛ́ lɛ́ mɛ a ka sixú kpo ɖo alɔ ɖó ɖe wɛ, é ná bo tlɛ nyí táan kpɛɖé wɛ a sixú zán ɖ’é mɛ ɔ nɛ́? A ka ná sixú kpé wú bo d’alɔ mɛ ɖěvo lɛ́ gbɔn yě yíylɔ́ kléwún gbɔn alǒkan jí, alǒ gbɔn nǔɖé wínwlán sɛ́dó yě gblamɛ a? Wǎnyíyí núwiwa kléwún kléwún ɖé lɛ́ sixú wa ɖagbe nú nǔɖitɔ́ hǎtɔ́ towe lɛ́ tawun, ɖo tají ɔ, ényí mɛ e ko sɛn Jexóva nú hwenu línlín é ɖé wɛ wa nǔ énɛ́ lɛ́ ɔ nɛ́.

Ényí mi mɛ mɛxómɔ lɛ́ ná bo ɖó dogbó ɖé lɛ́ ɖo agbaza lixo ɔ, mi sixú wa nǔ gěgé nú Jexóva. Ð’ayi nǔ e jɛ ɖo zǎnzǎnhwe jí Aflíka tɔn bɔ è ɖɔ xó tɔn ɖo gbǎví “Nɔví nyɔ̌nu ɖé zán Biblu dó hwlɛ́n mɛɖé” mɛ é wú.

Hɛn d’ayi mɛ ɖɔ nǔɖiɖi kpó gbejíninɔ kpó towe sixú dó wǔsyɛ́n lanmɛ nú mɛ ɖěvo lɛ́. Kpɔ́ndéwú didɛ tɔn ɖé wɛ a nyí, bɔ a sixú kú d’é jí ɖɔ ‘Mawu kún nyí nǔagɔwatɔ́ bo ná wɔn azɔ̌ e a wa é kpó xlɛ́ e a xlɛ́ ɖɔ émí yí wǎn nú nyǐkɔ tɔn é kpó ó. Lěe a wa nǔ énɛ́ lɛ́ gbɔn é wɛ nyí ɖɔ a d’alɔ mɛ mímɛ́ lɛ́, bo ka lɛ́ kpo ɖo alɔ dó yě wɛ.’ —Ebl. 6:10.

KPO ÐO ALƆNU TOWE HƐN JÁN WƐ LĚE A KPÉ WÚ GBƆN É

Dobanúnǔ xlɛ́ ɖɔ súnnu kpó nyɔ̌nu kpó mɛxómɔ e nɔ d’alɔ mɛ é gěgé sín lanmɛ nɔ ɖo ganjí hú gǎn, yě nɔ kpé wú bo nɔ lin tamɛ ganjí, bo nɔ lɛ́ dɔ́ ji.

É ɖo wɛn ɖɔ nǔ ɖagbe lɛ́ wiwa kún ná ɖe wǔvɛ́ mɛxóxwe tɔn lɛ́ bǐ síin ó. Axɔ́súɖuto Mawu tɔn kɛ́ɖɛ́ jɛ́n sixú sú kún dó nú nǔ e wú mɛxóxwe kpó kú kpó sín é, énɛ́ wɛ nyí hwɛhuhugú e mǐ ɖu é.—Hlɔ̌. 5:12.

É ɖo mɔ̌ có, sinsɛnzɔ́ e wa nú Jexóva wɛ a ɖe, bɔ alɔ dídó mɛ ɖěvo lɛ́ bónú yě ná wá tuun i lɔ ɖ’é mɛ é nɔ zɔ́n bɔ nukúnɖíɖó towe nɔ kpo ɖo dǒ lí wɛ, bo tlɛ sixú wa ɖagbe nú agbaza towe. Mɛxómɔ lɛ́ mi, mi kɛnklɛ́n tuun ɖɔ sinsɛnzɔ́ e wa nú Jexóva wɛ mi ɖe é nɔ xɔ akwɛ́ n’i, bɔ kpɔ́ndéwú nǔɖiɖi tɔn mitɔn nɔ su agun ɔ nukúnmɛ.