Lěe è ná bló tuto nú alɔwlíwlí e wlí yɛ̌yi nú Jexóva é gbɔn é

1-2. Linlin tɛ́ Jexóva ka nɔ ɖó dó alɔwlíwlí wú?

A ÐO tuto bló wɛ bá wlí alɔ wɛ a? Ényí mɔ̌ wɛ hǔn, alɔ towe ɖíe! A sixú ko ɖo tuto tɔn bló wɛ wunnáwúnná. Jexóva ba ɖɔ alɔwlíwlí towe ní kpa we. É ba ɖɔ mi ní ɖu alɔwlíwlízána mitɔn sín vǐví, bo lɛ́ ɖu sɔgúdo ɖagbe ɖé sín vǐví ɖó kpɔ́.—Nǔx. 5:18; Han. 3:11.

² É jɛxá ɖɔ mi ní wlí yɛ̌yi nú Jexóva ɖo alɔwlíwlízán mitɔn gbe. Étɛ́wú mǐ ka sixú ɖɔ mɔ̌? Bɔ nɛ̌ mi ka sixú wa mɔ̌ gbɔn? Nǔgbó wɛ ɖɔ mɛ ɖěɖěe ɖo tuto alɔwlíwlí tɔn bló wɛ lɛ́ é wɛ è sɔ́ nǔ nú xóta élɔ́ ná, amɔ̌, nǔgbódodó ɖěɖěe jí è ɖɔ xó dó lɛ́ é sixú d’alɔ mǐ mɛ bǐ bɔ mǐ ná wlí yɛ̌yi nú Jexóva, ényí mǐ yi alɔwlíwlí ɖé domɛ, alǒ ényí è byɔ́ alɔdó mǐtɔn hwenu e è ɖo nǔ sɔ́ nú alɔwlíwlí ɖé wɛ é ɔ nɛ́.

ÉTƐ́WÚ È KA ÐÓ NÁ WLÍ YƐ̌YI NÚ JEXÓVA?

3. Étɛ́ nɔví súnnu kpó nɔví nyɔ̌nu kpó e ɖo tuto alɔwlíwlí tɔn bló wɛ é ka ɖó ná hɛn dó ayi mɛ? Étɛ́wú?

³ Súnnu kpó nyɔ̌nu kpó klisánwun e ɖo alɔwlíwlí sín tuto bló wɛ lɛ́ é ɖó ná wa mɔ̌ sɔgbe xá nǔgbódodó Jexóva tɔn ɖěɖěe É sɔ́ dó Xó tɔn mɛ lɛ́ é. Étɛ́wú? Ðó Jexóva wɛ nyí Dǒwátɔ́ alɔwlíwlí tɔn wútu. É bló tuto alɔwlíwlí nukɔntɔn ɔ tɔn, énɛ́ wɛ nyí ɖɔ é dɔn Adámu kpó Ɛvu kpó cá, bɔ yě húzú asú kpó asi kpó. (Bǐb. 1:28; 2:24) Énɛ́ wú ɔ, linlin Mawu tɔn wɛ ɖó ná nyí nǔ tají hú gǎn e ná ɖo ayi mɛ nú mɛ ɖěɖěe ɖo tuto alɔwlíwlí tɔn bló wɛ lɛ́ é.

4. Hwɛjijɔ tɛ́ wú mɛ ɖěɖěe jló ná wlí alɔ lɛ́ é ka ɖó ná wlí yɛ̌yi nú Jexóva ɖo alɔwlíwlízán yětɔn gbe?

⁴ Hwɛjijɔ e wú a ɖó ná gbéjé linlin e Jexóva nɔ ɖó dó alɔwlíwlízán towe wú é tají ɖé ɖíe: É wɛ nyí Tɔ́ towe jǐxwé tɔn ɔ, bo lɛ́ nyí Xɔ́ntɔn towe ɖagbe hú gǎn ɔ. (Ebl. 12:9) É ɖo wɛn ɖɔ, a ba ɖɔ nǔ ní kpo ɖo mɔ̌ nyí wɛ. A ná ba gbeɖé ɖɔ nǔɖé ní jɛ gbe nɛ́ gbe, alǒ azǎn ɖěvo gbe bo ná zɔ́n bɔ xomɛ ná sin Xɔ́ntɔn towe ǎ. (Ðɛh. 25:14) Ényí a lin tamɛ dó nǔ e Jexóva ko wa nú we lɛ́ é kpó nǔ e é ná wá wa nú we lɛ́ é kpó bǐ jí ɔ, a ná yí gbe ɖɔ é jɛxá ɖɔ émí ní wlí yɛ̌yi n’i ɖo alɔwlíwlízán émítɔn gbe ǎ cé?—Ðɛh. 116:12.

NƐ̌ A KA SIXÚ WLÍ YƐ̌YI NÚ JEXÓVA GBƆN?

5. Nɛ̌ Biblu ka sixú d’alɔ súnnu kpó nyɔ̌nu kpó e jló ná wlí alɔ lɛ́ é bɔ yě ná bló tuto nú alɔwlíwlí yětɔn gbɔn?

⁵ Biblu slɛ́ sɛ́n lɛ́ dó lěe alɔwlíwlí klisánwun tɔn ɖó ná cí é wú, alǒ dó jǒnɔyíyí ɖěbǔ e sixú jɛ túnu tɔn é wú ǎ. Énɛ́ wú ɔ, súnnu kpó nyɔ̌nu kpó e jló ná wlí alɔ lɛ́ é sixú sɔ́ nǔ nú alɔwlíwlí yětɔn sɔgbe xá ninɔmɛ yětɔn, lěe nǔ lɛ́ nɔ nyí gbɔn ɖo xá yětɔn mɛ é, alǒ lěe yě ba gbɔn é. Klisánwun nǔgbó lɛ́ nɔ lɛ́ ɖó sísí nú nǔ e Sezáa byɔ́ lɛ́ é. (Mat. 22:21) É ɖo mɔ̌ có, alɔwlíwlí e è sɔ́ nǔ ná sɔgbe xá nǔgbódodó Biblu tɔn lɛ́ é ná wlí yɛ̌yi nú Jexóva, bo ná lɛ́ d’awǎjijɛ n’i. Énɛ́ wú ɔ, nǔgbódodó tɛ́ lɛ́ mi ka ɖó ná hɛn ayi mɛ?

6. Étɛ́wú é ka ɖo tají ɖɔ súnnu kpó nyɔ̌nu kpó e jló ná wlí alɔ lɛ́ é ní wa nǔ sɔgbe xá nǔ e axɔ́súsɛ́n byɔ́ dó alɔwlíwlí wú é?

⁶ Mi wa nǔ sɔgbe xá axɔ́súsɛ́n lɛ́. (Hlɔ̌. 13:1, 2) Ðo to gěgé mɛ ɔ, súnnu kpó nyɔ̌nu kpó e jló ná wlí alɔ lɛ́ é ɖó ná wa nǔ sɔgbe xá nǔ e sɛ́n byɔ́ é ɖé lɛ́ cóbá wlí alɔ. Súnnu kpó nyɔ̌nu kpó e jló ná wlí alɔ lɛ́ é ɖó ná tuun nǔ e sɛ́n byɔ́ ɖo fí e yě nɔ nɔ é. Ényí a ɖó nǔkanbyɔ́ dó lěe a ná wa mɔ̌ gbɔn é wú hǔn, vo fɛɛ bo kan nǔ byɔ́ mɛxó agun tɔn towe lɛ́.b

7. Nǔwiwa alɔkpa tɛ́ alɔwlíwlí ɖé ka ɖó ná nyí?

⁷ Blǒ bónú nǔwiwa ɔ ní wlí yɛ̌yi. (1 Kɔ. 10:31, 32) Tɛ́n kpɔ́n bónú alɔwlíwlí towe ní ɖe sínsɛ́n gbigbɔ Mawu tɔn tɔn lɛ́ xlɛ́, é ní ma nyí gbigbɔ gbɛ ɔ tɔn ó. (Ga. 5:19-26) Ðó súnnu ɔ wɛ nyí ta xwédo yɔ̌yɔ́ ɔ tɔn wútu ɔ, é ɖó ná tɛ́n kpɔ́n bɔ alɔwlíwlí ɔ ná nyí nǔwiwa e víví, bo lɛ́ wlí yɛ̌yi é. Étɛ́ ka sixú d’alɔ bɔ nǔ ná nyí mɔ̌? Xóɖiɖɔ alɔwlíwlí tɔn e jínjɔ́n Biblu jí bɔ è xwlé mɛ kpó wǎnyíyí kpó, kpó akpakpa sɔ́ mɛ kpó, kpódó yɛ̌yi kpán é nɔ zɔ́n bɔ tuto alɔwlíwlí tɔn e Mawu sɔ́ ɖ’ayǐ é nɔ lɛ́ su nukún yětɔn mɛ d’é jí. Mɛ e wá xóɖiɖɔ ɔ domɛ lɛ́ é bǐ sixú ɖu le tɔn, ɖó é ná zɔ́n bɔ yě ná mɔ nukúnnú jɛ lěe nǔwiwa ɔ nyí nǔ tají sɔ é wú. Ðó hwɛjijɔ énɛ́ wú ɔ, gěgé klisánwun lɛ́ tɔn nɔ ba ɖɔ è ní bló nǔwiwa ɔ ɖo kpléxɔ Axɔ́súɖuto ɔ tɔn ɖé mɛ, ényí é nyɔ́ bló ɔ nɛ́. Ényí mi ba ná zán kpléxɔ Axɔ́súɖuto ɔ tɔn ɖé ɔ, mi ɖó ná yá wǔ wlán nǔ sɛ́dó kplékplé mɛxó lɛ́ tɔn jɛ nukɔn dó byɔ́.

8. Ényí mi ba ná yí jǒnɔ ɖo alɔwlíwlí mitɔn hwenu ɔ, nɛ̌ mi ka sixú wa gbɔn dó kú d’é jí ɖɔ é wlí yɛ̌yi nú Jexóva? (Hlɔ̌manu lɛ́ 13:13)

⁸ Xa Hlɔ̌manu lɛ́ 13:13. Ényí mi wá gbeta ɔ kɔn bo ná yí jǒnɔ ɖo alɔwlíwlí mitɔn hwenu ɔ, nɛ̌ mi ka sixú bló gbɔn bɔ é ma ná ɖe gbigbɔ gbɛ ɔ tɔn xlɛ́ ǎ? Xókwín Glɛ̌kigbe tɔn e è tínmɛ dó “agɔ̌ e tɛnmɛ è nɔ wa nǔ gblégblé ɖe lɛ́ é” nɔ dó gesí mɛkplékpɔ́mɛ-núwiwa e hwenu è nɔ nu ahan zɛ xwé wú ɖe, bo nɔ lɛ́ ɖo nǔ xo wɛ káká jɛ zǎn xwete é. (Kpɔ́n tínmɛ e Biblu nǔkplɔ́nkplɔ́n tɔn ná dó “agɔ̌ e tɛnmɛ è nɔ wa nǔ gblégblé ɖe lɛ́ é,” éé tɔ́n ɖo Hlɔ̌manu lɛ́ 13:13 mɛ é wú é.) Ényí mi wá gbeta ɔ kɔn bónú è ná xwlé ahan syɛ́nsyɛ́n mɛ hǔn, mi bló bónú mɛɖé ní ma nu zɛ xwé wú ó.c Ényí è ná xo nǔ hǔn, mi dɔn ɖó bǎ e mɛ é ná nɔ bɔ jǒnɔ lɛ́ ná kpo ɖo xóɖɔɖókpɔ́ sín vǐví ɖu wɛ é. Mi xwe sɔ bo gbéjé nǔxixo ɔ kpó nǔ e ɖɔ wɛ han lɛ́ ɖe é kpó kpɔ́n, bónú yě ma wá nyí afɔklɛ́nnú nú mɛɖé ó.

9. Étɛ́ súnnu kpó nyɔ̌nu kpó e jló ná wlí alɔ lɛ́ é ka ɖó ná hɛn dó ayi mɛ dó xó ɖěɖěe è ná ɖɔ ɖo jǒnɔyíyí yětɔn domɛ lɛ́ é, alǒ ayiɖeɖayǐ ɖěvo e ná dín lɛ́ é wú?

⁹ Mɛ ɖěvo lɛ́ ka ná ɖɔ xó kléwún ɖé dó mi wú, xlɛ́ fɔtóo mitɔn, alǒ wa ayiɖeɖayǐ sín nǔ ɖěvo lɛ́ ɖo jǒnɔyíyí mitɔn domɛ wɛ a? Hwɛhwɛ ɔ, nǔ énɛ́ lɛ́ nɔ dó jɛ̌ kɔ nú azǎn ɔ. É ɖo mɔ̌ có, mi kú d’é jí ɖɔ nǔ e è ná xlɛ́ lɛ́ é ná dó wǔsyɛ́n lanmɛ nú mɛ. (Filí. 4:8) Mi kanbyɔ́ miɖée ɖɔ: ‘É ka ná xlɛ́ ɖɔ è ɖó sísí nú mɛ ɖěvo lɛ́ a? É ka ná wlí yɛ̌yi nú tuto alɔwlíwlí tɔn ɔ a?’ Bɔ tají hú gǎn ɔ, mi kanbyɔ́ miɖée ɖɔ: ‘É ka ná wlí yɛ̌yi nú Jexóva a?’ Nǔgbó wɛ ɖɔ alisá ɖé lɛ́ sixú dó jɛ̌ kɔ nú nǔwiwa ɔ, amɔ̌, mi nyi alɔ nú nǔ ɖěbǔ e ma sɔgbe ǎ lɛ́ é, ɖi nǔ ɖěɖěe ná zɔ́n bɔ mɛ lɛ́ sín ayi ná yi xóɖóxámɛ jí lɛ́ é. (Efɛ́. 5:3) Mi kú d’é jí ɖɔ mɛ e ɖo xwédo mitɔn mɛ lɛ́ é kpó xɔ́ntɔn mitɔn lɛ́ kpó, ɖěɖěe ná ɖɔ xó kléwún lɛ́ é mɔ nukúnnú jɛ nǔ e jló mi lɛ́ é wú, bo ná lɛ́ ɖó sísí ná.

10. Étɛ́wú súnnu kpó nyɔ̌nu kpó e jló ná wlí alɔ lɛ́ é ka ɖó ná nɔ jlɛ̌ jí hwenu e yě ɖo tuto alɔwlíwlí yětɔn tɔn bló wɛ é? (1 Jaan 2:15-17)

¹⁰ Mi nɔ jlɛ̌ jí. (Xa 1 Jaan 2:15-17.) Ényí mɛsɛntɔ́ Jexóva tɔn lɛ́ nɔ ba ná wlí yɛ̌yi n’i, bo ma nɔ ba ná dɔn ayi wá yěɖée jí ɖo ali e ma sɔgbe ǎ é nu ǎ ɔ, é nɔ su nukún tɔn mɛ. Énɛ́ wú ɔ, klisánwun e nɔ nɔ jlɛ̌ jí lɛ́ é nɔ nyi alɔ nú akwɛ́ wǒsúwósú zínzán kpó “nǔɖókan mɛtɔn lɛ́ jíjlá” kpó. Ényí mi bló bónú alɔwlíwlí mitɔn nɔ jlɛ̌ jí ɔ, nɛ̌ é ka ná hɛn le wá nú mi gbɔn? Gbějé kpɔ́ndéwú nɔví súnnu e nɔ nyí Mike, bo gosín Norvège é tɔn kpɔ́n. É ɖɔ: “Mǐ nyi alɔ nú axɔ́, bo kpo ɖo gběxosín-alijítɔ́zɔ́ wa wɛ. Alɔwlíwlí mǐtɔn nɔ jlɛ̌ jí, cóbó ka kpo ɖo nǔ e jɛ acɔ́, bo lɛ́ nyí nǔ manáwɔn é nyí wɛ.” Nɔví nyɔ̌nu ɖé nɔ nyí Tabitha, bo gosín Inde, bo ɖɔ: “Mǐ nyi alɔ nú adohu adohu gěgé. Blǒ e mǐ bló bɔ alɔwlíwlí mǐtɔn nɔ jlɛ̌ jí é zɔ́n bɔ é sɔ́ byɔ́ ɖɔ mǐ ní bló tuto nǔ gěgé tɔn, alǒ ɖe ɖɛ gbemanɔkpɔ́ gěgé ǎ.”

11. Nɛ̌ yawó ɖé kpó asisúnɔ ɖé kpó ka sixú nɔ jlɛ̌ jí ɖo nǔsísɔ́ kpó acɔ́biba kpó yětɔn kpáxwé gbɔn? (Kpɔ́n ɖiɖe lɛ́ lɔmɔ̌.)

¹¹ Mi ka ko wá nǔ e mi ná dó lɛ́ é sín gbeta kɔn a? É ɖo wɛn ɖɔ, mi mɛ we lɛ́ ná ba ná ɖo cékéé. É ná bo tlɛ nyí ɖo Biblu sín táan mɛ ɔ, nǔ e yawó ɖé kpó asisúnɔ ɖé kpó ná dó é nɔ ɖu ayi mɛ nú yě tawun. (Eza. 61:10) É sɔgbe ɖɔ nǔ e a ná dó ɖo alɔwlíwlízán towe gbe é sixú gbɔn vo nú nǔ e a ná dó ɖo nǔwiwa ɖěvo lɛ́ domɛ é ɖo ali ɖé nu, amɔ̌, é ɖó ná gɔn jlɛ̌ jí nɔ ǎ. (1 Tim. 2:9) Mi ma lɔn nú nǔzínzán, alǒ nǔ agbaza tɔn ɖěvo ɖěbǔ wá húzú nǔ e ɖo tají hú gǎn nú alɔwlíwlí mitɔn é ó.—1 Pi. 3:3, 4. 

12. Étɛ́wú súnnu kpó nyɔ̌nu kpó e jló ná wlí alɔ lɛ́ é ka ɖó ná tɛ́n kpɔ́n bo ná nyi alɔ nú alɔwlíwlí núwiwa ɖěbǔ e gba kpé ɖo xá yětɔn mɛ bo ma ka sɔgbe xá nǔgbódodó Biblu tɔn lɛ́ ǎ é?

¹² Nyi alɔ nú nǔwalɔ e ma sɔgbe xá Biblu ǎ lɛ́ é. (Nǔɖe. 18:4) Satáan zé pagáwun núwiwa lɛ́, awǒvinúwiwa lɛ́ kpó xɛxó lɛ́ kpó dó hɛn alɔwlíwlí núwiwa lɛ́ blí. Jexóva gba akpá nú mǐ nyi wɛn ɖɔ mǐ ní nɔ zɔ nú nǔ blíblí mɔ̌hun lɛ́. (2 Kɔ. 6:14-17) Ényí nǔwalɔ ɖé lɛ́, alǒ nǔwiwa ɖé lɛ́ tíin ɖo xá mitɔn mɛ bɔ mɛ lɛ́ nɔ xo nǔ kpɔ́n d’é wú hǔn, mi gbéjé fí e yě jɔ sín é kpó nǔgbódodó Biblu tɔn e kunkplá yě lɛ́ é kpó kpɔ́n hwɛ̌, cóbó wá gbeta nǔ e mi ná sɔ́ dó alɔwlíwlí mitɔn mɛ é tɔn kɔn.

13. Nɛ̌ súnnu kpó nyɔ̌nu kpó e jló ná wlí alɔ é ka sixú xwedó kpɔ́ndéwú Jexóva tɔn ɖo linlin e yě ná ɖó dó nǔ e mɛ ɖěvo lɛ́ ná ná yě é wú é kpáxwé gbɔn?

¹³ Walɔ mɛ wɛ é ko ɖe ɖo xá towe mɛ ɖɔ mɛ e è ylɔ́ wá alɔwlíwlí ɔ domɛ lɛ́ é ní ná nǔ asú kpó asi kpó ɔ a? Ninɔmɛ akwɛ́zínzán tɔn jǒnɔ ɖé lɛ́ tɔn sixú kunkplá nǔ e yě ba ná ná é. Nǔgbó wɛ ɖɔ è dó wǔsyɛ́n lanmɛ nú klisánwun lɛ́ ɖɔ yě ní nɔ ná nǔ mɛ, ɖó énɛ́ ná zɔ́n bɔ yě ná ɖó awǎjijɛ. (Nǔx. 11:25; Mɛ. 20:35) É ɖo mɔ̌ có, mǐ ba ɖɔ jǒnɔ mǐtɔn lɛ́ ní mɔ ɖɔ dandan wɛ é nyí ɖɔ émí ní ná nǔ ǎ; mɔ̌ jɛ́n mǐ ma ka ná bló bɔ yě ná lin ɖɔ nǔ e ɖo jlɛ̌ jí é níná kún ná su mɛ nukúnmɛ ó ǎ é nɛ́. Mǐ nɔ xwedó kpɔ́ndéwú Jexóva tɔn, bo nɔ tɛ́n kpɔ́n bo nɔ ɖó linlin e é ɖó dó nǔnámɛ wú é, bo nɔ jó mɛ ɖěvo lɛ́ dó bɔ yě nɔ ná nǔ sɔgbe xá nǔwúkpíkpé yětɔn kpó lěe é ɖe gbɔn ɖo ayi yětɔn mɛ é kpó.—2 Kɔ. 9:7.

ALƆ NYINYI NÚ TAGBA LƐ́ KPÓ ÐUÐU ÐO YĚ JÍ KPÓ

14. Wǔvɛ́ tɛ́ lɛ́ mɛ e jló ná wlí alɔ é ɖé lɛ́ ka ɖí xwi xá?

¹⁴ Ée mi ná ɖo tíntɛ́nkpɔ́n wɛ bo ná bló tuto alɔwlíwlí e ná wlí yɛ̌yi nú Jexóva é tɔn é ɔ, mi sixú ɖí xwi xá wǔvɛ́ ɖé lɛ́. Ði kpɔ́ndéwú ɔ, alɔwlíwlí e ɖo jlɛ̌ jí é sín tuto blóbló sixú vɛ́ wǔ nú we. Charlie e gosín Îles Salomon é ɖɔ: “Mɛ ɖěɖěe mǐ ná ylɔ́ wá jǒnɔyíyí ɔ domɛ lɛ́ é sín gbeta kɔn wíwá vɛ́ wǔ nú mǐ tawun. Mǐ ɖó xɔ́ntɔn gěgé, bɔ ɖo xá mǐtɔn mɛ ɔ, mɛ bǐ wɛ nɔ ɖó nukún ɖɔ è ní ylɔ́ émí!” Tabitha e xó mǐ ɖɔ wá yi é ɖɔ: “Fí e un nɔ nɔ é ɔ, agɔ̌ gɛnnyigɛnnyi wɛ mɛ lɛ́ nɔ yí. É byɔ́ hwenu cóbɔ mɛjitɔ́ mǐtɔn lɛ́ wá yí gbe nú gbeta e kɔn mǐ wá bá ylɔ́ mɛ 100 mɔ̌ kpowun é.” Sarah e gosín Inde é ɖɔ: “Mɛɖé lɛ́ nɔ sɔ́ ayi ɖó tɛn e mɛ è ɖe é jí tawun. Hɛ̌nnumɔ ce ɖé lɛ́ wlí alɔ gɛnnyigɛnnyi, énɛ́ wú ɔ, un lin ɖɔ mɛ lɛ́ nɔ ɖó nukún ɖɔ cɛ ní d’agba hú mɔ̌.” Étɛ́ ka sixú d’alɔ mi bɔ mi ná ɖu ɖo wǔvɛ́ énɛ́ lɛ́ kpó ɖěvo lɛ́ kpó jí?

15. Étɛ́wú ɖɛ ka ɖo tají tawun ɖo tuto alɔwlíwlí tɔn blóbló kpáxwé?

¹⁵ Mi sɔ́ tuto alɔwlíwlí tɔn ɔ dó ɖó nǔ e jí mi ná xo ɖɛ dó é. Mi sixú xo ɖɛ sɛ́dó Jexóva dó nǔ ɖěbǔ e ɖí xwi xá wɛ mi ɖe é, alǒ dó lěe nǔ cí nú mi é wú. (Filí. 4:6, 7) Mi sixú byɔ́ ɛ ɖɔ é ní d’alɔ mi nú mi ná wá gbeta ɖagbe lɛ́ kɔn, nɔ xwíí hwenu e mi ɖó linkpɔ́n é, bo lɛ́ kpan akɔ́n hwenu e é byɔ́ ɖó mɔ̌ é. (1 Pi. 5:7) Jiɖe e mi ɖó dó Jexóva wú é ná jɛjí hwenu e mi ná mɔ ɖɔ é ɖo nǔ wa dó ta mitɔn mɛ wɛ é. Tabitha e xó mǐ ɖɔ wá yi é ɖɔ: “Ado nɔ hu nyi kpó asú xɔ́ntɔn ce kpó dó gbemanɔkpɔ́ e sixú wá xwetɔ́n ɖo mǐɖée kpó xwédo mǐtɔn lɛ́ kpó tɛ́ntin é wú. Énɛ́ wú ɔ, hweɖébǔnu e mǐ ɖo xó ɖɔ dó tuto alɔwlíwlí tɔn mǐtɔn lɛ́ jí wɛ é ɔ, mǐ nɔ bɛ́ kpó ɖɛ kpó. Mǐ ɖu alɔdó Jexóva tɔn sín vǐví tawun, bɔ nǔ lɛ́ lɛ́vɔ́ yi ɖo fífá mɛ.”

16-17. Nɛ̌ xóɖɔɖókpɔ́ ɖagbe ka sixú d’alɔ hwenu e è ɖo tuto alɔwlíwlí tɔn bló wɛ é gbɔn?

¹⁶ Mi nɔ ɖɔ xó ɖó kpɔ́ nyi wɛn bo nɔ lɛ́ wa mɔ̌ kpó nǔnywɛ́ kpó. (Nǔx. 15:22) É byɔ́ ɖɔ mi ní wá gbeta gěgé kɔn ɖó kpɔ́ dó alɔwlíwlí mitɔn wú. Gbe e gbe mi ná wlí alɔ ɔ é, akwɛ́ e mi ná zán é, mɛ ɖěɖěe mi ná ylɔ́ lɛ́ é kpó nǔ gěgé ɖěvo lɛ́ kpó ɖo gbeta énɛ́ lɛ́ mɛ. Cóbónú mi ná wá gbeta ɖé kɔn hǔn, mi gbéjé linlin mitɔn lɛ́ kpɔ́n ɖó kpɔ́, ɖɔ xó ɖó kpɔ́ dó nǔgbódodó Biblu tɔn ɖěɖěe kunkplá lɛ́ é jí, káká jɛ wě ɖěbǔ e klisánwun e zin bo ko mɔ nǔ kpɔ́n lɛ́ é ɖe xá mi lɛ́ é jí. Ényí a ɖo nǔjlómɛ mɛɖésúnɔ tɔn lɛ́ xó ɖɔ wɛ hǔn, nyɔ̌ xomɛ, se wǔvɛ́ xá mɛ, bo ma lɛ́ hɛn nǔ gángángán ó. Ényí hɛ̌nnumɔ mitɔn e sɛkpɔ́ mi lɛ́ é, ɖi mɛjitɔ́ mitɔn lɛ́ byɔ́ nǔ e ɖo jlɛ̌ jí lɛ́ é mi hǔn, mi tɛ́n kpɔ́n bo wlí yɛ̌yi nú yě. Nǔwiwa bǔnɔ wɛ nǔwiwa ɔ nyí nú yě lɔmɔ̌. Ényí mi ma sixú wa nǔ sɔgbe xá nǔ e ba wɛ yě ɖe é ǎ hǔn, mi tín nǔ e wú wɛ é mɛ nú yě kpó sísí kpó. (Koló. 4:6) Mi tínmɛ nú hɛ̌nnumɔ mitɔn lɛ́ nyi wɛn ɖɔ nǔ tají e gbé nya wɛ mi ɖe é wɛ nyí ɖɔ nǔwiwa ɔ ní víví, bo lɛ́ wlí yɛ̌yi nú Jexóva.

¹⁷ Gbeta mitɔn lɛ́ tíntínmɛ nú hɛ̌nnumɔ mitɔn lɛ́ sixú vɛ́ wǔ tawun, ɖo tají ɔ, ényí yě ma ɖo nǔgbó ɔ mɛ ǎ ɔ nɛ́, amɔ̌, é sixú kpa mi. Nɔví súnnu ɖé nɔ nyí Santhosh bo gosín Inde bo ɖɔ: “Xwédo mǐtɔn lɛ́ ba ná zé yɛsu fifɔ Hindu tɔn vovo lɛ́ dó tuto ɔ mɛ. Hwenu gěgé wɛ nyi kpó asi xɔ́ntɔn ce kpó zán dó tínmɛ gbeta e kɔn mǐ wá lɛ́ é nú yě. Mǐ bló hǔzúhúzú ɖé lɛ́ ɖo fí e mǐ lin ɖɔ mɔ̌ wiwa kún ná dó xomɛsin nú Jexóva ó ɖe é ɖé lɛ́. Ði kpɔ́ndéwú ɔ, mǐ húzú nǔ e è ná ɖu ɖo jǒnɔyíyí ɔ tɛnmɛ lɛ́ é sɔgbe xá nǔɖuɖu e nɔ nyɔ́ nukún yětɔn mɛ lɛ́ é, bo lɛ́ wá gbeta ɔ kɔn ɖɔ è kún ná xo nǔ ɖě, alǒ ɖú we ó, ɖó nǔ mɔ̌hun lɛ́ ko má yě ǎ wútu.”

18. Étɛ́ ka sixú d’alɔ mi bɔ mi ná kú d’é jí ɖɔ nǔ lɛ́ ná yi ganjí ɖo alɔwlíwlízán ɔ gbe? (1 Kɔlɛ́ntinu lɛ́ 14:40) (Kpɔ́n ɖiɖe ɔ lɔmɔ̌.)

¹⁸ Mi bló tuto ɔ kpó sɔxwixwe kpó. Ényí mi bló tuto lɛ́ ganjí ɔ, énɛ́ ná ɖibla zɔ́n bɔ linkpɔ́n mitɔn ná ɖe kpo ɖo alɔwlíwlízán mitɔn gbe. (Xa 1 Kɔlɛ́ntinu lɛ́ 14:40.) Wayne e gosín Taïwan é ɖɔ: “Azǎn kpɛɖé jɛ nukɔn nú alɔwlíwlí mǐtɔn ɔ, mǐ bló kplé kléwún ɖé xá jlǒɖótɔ́ ɖěɖěe ná d’alɔ mǐ ɖo nǔwiwa ɔ hwenu lɛ́ é. Mǐ ɖɔ xó dó tuto e mǐ bló lɛ́ é jí, bo lɛ́ vɔ́ akpáxwé tuto ɔ tɔn ɖé lɛ́ jí gbɔn dó kú d’é jí ɖɔ nǔwiwa ɔ ná yi ganjí.” Mi wa nǔ e wú mi kpé lɛ́ é bǐ bo nɔ ganmɛ jí, ɖó sísí e mi ɖó nú jǒnɔ lɛ́ é wútu.

19. Étɛ́ ka sixú d’alɔ mi bɔ mi ná ɖó acɛ dó lěe nǔ lɛ́ ná yi ɖo alɔwlíwlí mitɔn sín jǒnɔyíyí hwenu gbɔn é jí?

¹⁹ Nǔ mɔ sɛ́dó nukɔn sixú zɔ́n bɔ mi ná nyi alɔ nú tagba gěgé. (Nǔx. 22:3) Ði kpɔ́ndéwú ɔ, ényí mi nɔ nɔ xá ɖé mɛ bɔ mɛ e è ma ylɔ́ dó alɔwlíwlí sín jǒnɔyíyí domɛ ǎ lɛ́ é nɔ wá xwetɔ́n hǔn, mi gbéjé nǔ e mi sixú wa dó gbo kpo nyi ali jí nú nǔ mɔ̌hun é kpɔ́n. Mi tɛ́n kpɔ́n bónú hɛ̌nnumɔ ɖěbǔ e ma ɖo nǔgbó ɔ mɛ ǎ é ní tuun nǔ e é sixú wá mɔ é, bo tínmɛ linlin e mi nɔ ɖó dó alɔwlíwlí walɔ ɖé lɛ́ wú é n’i. Mi sixú má xóta “Nɛ̌ alɔwlíwlí Kúnnuɖetɔ́ Jexóva tɔn lɛ́ tɔn ka nɔ nyí gbɔn?” éé ɖo jw.org jí é xá ɛ. Bo ná dó ɖó acɛ dó lěe nǔ lɛ́ ná yi gbɔn ɖo jǒnɔyíyí mitɔn hwenu é jí hǔn, mi sɔ́ nɔví súnnu e zin é ɖé bónú é ní “kpé nukún dó alɔwlíwlígɔ́ ɔ” wú. (Jaan 2:8) Ényí mi kpó é kpó ɖɔ xó dó tuto lɛ́ jí nyi wɛn ɔ, é sixú d’alɔ mi bɔ alɔwlíwlí mitɔn ná wlí yɛ̌yi, bɔ nǔ lɛ́ ná yi ɖó tuto jí.

20. Étɛ́ súnnu kpó nyɔ̌nu kpó e jló ná wlí alɔ lɛ́ é ka ɖó ná flín dó alɔwlíwlí yětɔn wú?

²⁰ Ényí mi lin tamɛ dó nǔ e tuto blóbló nú alɔwlíwlí mitɔn ná byɔ́ lɛ́ é bǐ jí ɔ, mi sixú mɔ ɖɔ é hú agbɔ̌n émí. É ɖo mɔ̌ có, mi flín ɖɔ alɔwlíwlí mitɔn ɔ, nǔwiwa gbe ɖokpó kpowun tɔn wɛ é nyí. Jexóva sinsɛn ɖó kpɔ́ sín gbɛzán awǎjijɛnɔ ɖé sín bǐbɛ́mɛ wɛ é nyí. Mi wa nǔ e wú mi kpé é bǐ bónú alɔwlíwlí mitɔn ní nɔ jlɛ̌ jí, bo lɛ́ wlí yɛ̌yi. Mi ɖeji dó Jexóva wú. Kpó alɔdó tɔn kpó ɔ, mi ná kpé wú bo bló tuto nú alɔwlíwlí mitɔn, bɔ ényí mi wá kpɔ́n gǔdo sɛ́dó ɔ, mi ná flín nǔ ɖaaɖagbe e nɔ sɔ́ akpakpa mɛ lɛ́ é, é nyí nǔ e ná vɛ́ nú mi lɛ́ é ǎ.—Ðɛh. 37:3, 4.