A ka flín a?

A ka xa Atɔxwɛ yaɖéyaɖé e tɔ́n wá yi lɛ́ é ganjí a? É nyɔ́, kpɔ́n ɖɔ a ka sixú ná xósin nú nǔkanbyɔ́ élɔ́ lɛ́ a jí:

Étɛ́ ka nɔ sísɛ́ mǐ bɔ mǐ nɔ sɔ́ Jexóva su?

Mǐ nɔ wa mɔ̌, ɖó mǐ nɔ ɖó sísí nú Jexóva ɖésú, bo lɛ́ yí wǎn n’i dó nǔjɔnǔ mɛ. Mǐ nɔ lɛ́ sɔ́ ɛ su, ɖó mǐ ba ɖɔ mɛ ɖěvo lɛ́ ní tuun i.—w25.01, wěx. 3.

Ényí mɛɖé jɛ agɔ dó mǐ ɔ, nɛ̌ mǐ ka sixú yá wǔ sɔ́ hwɛ kɛ ɛ gbɔn?

Mǐ nɔ wɔn ya nú lěe nǔ cí nú mǐ é kpowun ǎ; é ɖo mɔ̌ có, xomɛsin kpó mɛhɛndóxomɛ kpó jíjódó sixú d’alɔ mǐ bɔ mǐ ná ny’alɔ nú nǔ e xomɛsin syɛ́nsyɛ́n sixú hɛn gblé dó wǔ nú mǐ é.—w25.02, wěx. 15-16.

Étɛ́wú ahwanvú Maki ka nyí kpɔ́ndéwú ɖagbe ɖé nú nɔví súnnu wínnyáwínnyá lɛ́?

Maki yí gbe bá wa azɔ̌ e è sɔ́ d’así n’i é kpó jlǒ kpó. Akpɔ sixú ko ɖó Maki, bɔ awakanmɛ lɛ́ kú i ɖó ninɔmɛ ɖé wú có, é jó gbe ǎ. É tɛ́n kpɔ́n bo zun xɔ́ntɔn xá Pɔ́lu kpó klisánwun e zin é ɖěvo lɛ́ kpó.—w25.04, wěx. 27.

Hwenu e Jezu xo ɖɛ élɔ́ é ɔ, étɛ́ ɖɔ wɛ é ka ɖe: “Un bló bɔ yě tuun nyǐkɔ towe”? (Jaan 17:26)

Ahwanvú tɔn lɛ́ ko tuun nyǐkɔ Mawu tɔn. Amɔ̌, Jezu bló bɔ yě tuun mɛ e ta nyǐkɔ ɔ ɖe é, káká jɛ linlin tɔn lɛ́, azɔ̌ tɔn lɛ́ kpó jijɔ tɔn lɛ́ kpó jí.—w25.05, wěx. 20-21.

Ényí mǐ nɔ nɔ jlɛ̌ jí ɔ, étɛ́ mǐ ka nɔ tuun?

Mǐ nɔ yí gbe ɖɔ nǔɖé lɛ́ tíin bɔ mǐ kún tuun ó. Ði kpɔ́ndéwú ɔ, mǐ tuun hwenu e vivɔnu ɔ ná wá é ǎ, mǐ ka lɛ́ tuun lěe Jexóva sixú wa nǔ gbɔn ɖo hwenɛ́nu é ǎ. Mǐ lɛ́ tuun nǔ e ná jɛ ɖo sɔ é, alǒ lě do Jexóva tuun mǐ sɔ é ǎ.—w25.06, wěx. 15-18.

Étɛ́ ka sixú d’alɔ mǐ bɔ mǐ ná ɖu xóta ɖé, alǒ xóɖiɖɔ nú mɛ bǐ ɖé sín vǐví?

Mǐ sixú kanbyɔ́ mǐɖée ɖɔ: ‘Kúnnuɖenú tɛ́ zán wɛ è ka ɖe bá dó ɖu ɖo tóɖómɛtɔ́ lɛ́ jí? Nǔjlɛ́dónǔwú ɖagbe ɖé ka ɖ’é mɛ bɔ un sixú zán hwenu e un ɖo nǔ kplɔ́n mɛ wɛ é a? Mɛ̌ xóta élɔ́ ka sixú dɔn?’—w25.07, wěx. 19.

Étɛ́ lěe Mawu wa nǔ xá Davídi gbɔn é ka sixú kplɔ́n mǐ dó hwɛsɔ́kɛmɛ tɔn wú?

Davídi hu hwɛ syɛ́nsyɛ́n lɛ́ có, hwenu e hwɛ tɔn lɛ́ vɛ́ n’i dó nǔjɔnǔ mɛ é ɔ, Jexóva sɔ́ hwɛ kɛ ɛ. (1 Axɔ́. 9:4, 5) Ényí Mawu sɔ́ hwɛ kɛ mɛ ɔ, é nɔ lɛ́ wá wa nǔ tɔn xá mɛ, alǒ nɔ lɛ́ wá flín xó ɖokpó ɔ ɖo sɔgúdo ǎ.—w25.08, wěx. 17.

Ényí nukúnnú mimɔ jɛ nǔɖé mɛ ɖo wǔ vɛ́ nú Biblu kplɔ́ntɔ́ ɖé wɛ ɔ, étɛ́ a ka sixú wa?

Ényí a ko wa nǔ e wú a kpé é bǐ bá kplɔ́n ɛ nǔ e Biblu ɖɔ dó xó ɔ wú é có é ka kpo ɖo wǔ vɛ́ n’i wɛ bónú é ná mɔ nukúnnú jɛ mɛ hǔn, jǒ dó hwɛ̌, bo bló tito bo lɛ́ kɔ wá jí ɖo nukɔnmɛ.—w25.09, wěx. 24.

Biblu ɖɔ ɖɔ hwɛhuhu ɖó “hlɔ̌nhlɔ́n mɛblɛ́blɛ́ tɔn.” (Ebl. 3:13) Gbɔn nɛ̌ é?

Hwɛhuhu sixú sísɛ́ mǐ bɔ mǐ ná wa nǔ masɔgbe lɛ́. É sixú lɛ́ blɛ́ mǐ bɔ mǐ ná nɔ ɖo nǔ xo kpɔ́n wɛ magbokɔ, ɖɔ vlafo Mawu ka yí wǎn nú mǐ dóó a jí.—w25.10, wěx. 16.

Nǔ atɔn tɛ́ lɛ́ ka sixú zɔ́n bɔ ɖɛ mǐtɔn lɛ́ ná kpɔ́n te d’é jí?

(1) Mǐ sixú lin tamɛ dó jijɔ Jexóva tɔn lɛ́ jí. (2) Mǐ sixú lin tamɛ dó nǔ e ɖí xwi xá wɛ mǐ ɖe é jí bo ɖɔ ɖo ɖɛ ɔ mɛ, ɖi hwɛ e mǐ ɖó ná sɔ́ kɛ mɛɖé é jí. (3) Mǐ sixú vo ɖo ɖɛ mǐtɔn mɛ. Énɛ́ ná ɖibla zɔ́n hú gǎn bɔ mǐ ná ɖɔ nǔ e ɖo ayixa mǐtɔn mɛ é.— w25.10, wěx. 19-20.

Nɛ̌ mǐ ka sixú d’alɔ mɛxómɔ lɛ́ gbɔn?

Mǐ sixú nɔ ba mɛxómɔ lɛ́ kpɔ́n, alǒ nɔ ylɔ́ yě. Mǐ sixú lɛ́ bló tuto bo nɔ xwedó yě yi dotóoxwé. Alǒ mǐ sixú nɔ wa azɔ̌ xá mɛxómɔ lɛ́ ɖo sinsɛnzɔ́ ɔ sín akpá vovo lɛ́ xwé.—w25.11, wěx. 6-7.

Ðɔ nǔ tawun tawun e ɖo alɔwlíwlí klisánwun tɔn e wlí yɛ̌yi é mɛ lɛ́ é.

Wa nǔ ɖěbǔ e sɔgbe bɔ acɛkpikpa lɛ́ byɔ́ é. Tɛ́n kpɔ́n bónú nǔ e kunkplá alɔwlíwlí ɔ é bǐ, káká jɛ jǒnɔyíyí ɔ jí ní ɖe gbigbɔ Mawu tɔn sín sínsɛ́n lɛ́ xlɛ́. Nɔ jlɛ̌ jí ɖo nǔsísɔ́ towe kpáxwé, bo kú d’é jí ɖɔ émí nyi alɔ nú nǔwalɔ ɖěɖěe ma sɔgbe xá Mawuxó ɔ ǎ lɛ́ é. Mi ɖɔ xó ɖó kpɔ́ ganjí hwenu e mi ɖo tuto alɔwlíwlí ɔ tɔn bló wɛ é.—w25.12, wěx. 21-24.