Ezekiyɛ́li
8 Ðo xwe ayizɛ́ngɔ́ ɔ mɛ, ɖo azǎn atɔ́ɔ́ngɔ́ ɔ sun ayizɛ́ngɔ́ ɔ tɔn gbe, hwenu e un ɖo ayǐjínjɔ́n ɖo xwé ce gbe bɔ tomɛxó Judáa tɔn lɛ́ ɖo ayǐjínjɔ́n ɖo nukɔn ce é ɔ, Aklúnɔ Nǔbǐwúkpétɔ́ Jexóva sín alɔ hɛn mì ɖo fínɛ́. 2 Ée un ɖo kpínkpɔ́n wɛ é ɔ, un mɔ nǔɖé bɔ é ɖó ninɔmɛ gbɛtɔ́ tɔn bo cí myɔ ɖɔhun; myɔ ɖo fí e cí alin tɔn mɛ ɖɔhun é sín do, bɔ lěe é cí ɖo wěxo sín alin tɔn mɛ yi jǐ é, nɔ kɔ́n gan e nɔ kɔ́n é* ɖɔhun. 3 Énɛ́ gúdo ɔ, é dlɛ́n nǔ e cí alɔ ɖɔhun é ɖé bo hɛn ɖa e ɖo ta ce é ɖě. Bɔ gbigbɔ ɖé sɔ́ mì yi ayǐkúngban ɔ kpó jǐnukúnsin kpó tɛ́ntin, bo kplá mì yi Jeluzalɛ́mu, gbɔn nǔmimɔ e gosín Mawu gɔn lɛ́ é gblamɛ, yi hɔntogbó e ɖo xomɛ bo kpan nukɔn totaligbé é linu, fí e bǒcyɔ wǔhwinhwan tɔn sín wuntun,* éé nɔ flɔ́ zo dó glɔ̌ nú wǔhwinhwan é ɖo te ɖe é. 4 Kpɔ́n! Mawu Izlayɛ́li tɔn sín susu ko ɖo fínɛ́, bɔ é cí ée un mɔ ɖo ayǐkúngban wɛnjɛ ɔ jí é ɖɔhun.
5 Énɛ́ gúdo ɔ, é ɖɔ nú mì ɖɔ: “Gbɛtɔ́ví è, kɛnklɛ́n, kpɔ́n totaligbé sɛ́ dó.” Énɛ́ ɔ, un kpɔ́n totaligbé sɛ́ dó, bɔ ɖo vɔ̌sákpe ɔ sín hɔntogbó jí ɖo totaligbé fínɛ́ ɔ, wuntun* wǔhwinhwan tɔn énɛ́ ɖo ali ɔ nu. 6 Bɔ é ɖɔ nú mì ɖɔ: “Gbɛtɔ́ví è, a mɔ nǔ baɖabaɖa, ɛɛn, nǔ ɖěɖěe xyɔ́ wǔ bɔ togun Izlayɛ́li tɔn ɖo wiwa wɛ ɖo fí, b’ɛ zɔ́n bɔ un sɛ yi zɔ tawun nú sinsɛnxɔ ce é a? Amɔ̌, a ná mɔ nǔ ɖěɖěe xyɔ́ wǔ bo tlɛ nylá hú mɔ̌ lɛ́ é.”
7 Énɛ́ gúdo ɔ, é kplá mì yi kɔ́xota ɔ sín alinu, bɔ ée un kpɔ́n é ɔ, un mɔ ali ɖé ɖo dǒ ɔ mɛ. 8 É ɖɔ nú mì ɖɔ: “Gbɛtɔ́ví è, kɛnklɛ́n, gblǒ ali e ɖo dǒ ɔ mɛ é d’é jí.” Énɛ́ ɔ, un gbló ali e ɖo dǒ ɔ mɛ é d’é jí bo mɔ alinu ɖé. 9 É ɖɔ nú mì ɖɔ: “Byɔ̌ mɛ bo kpɔ́n nǔ nyanya, ɛɛn, nǔ e xyɔ́ wǔ bɔ yě ɖo wiwa wɛ ɖo fí lɛ́ é.” 10 Énɛ́ ɔ, un byɔ́ mɛ bo kpɔ́n, lobo mɔ kanlin e nɔ sá lɛ́ é kpó kanlin e xyɔ́ wǔ lɛ́ é kpó sín ɖiɖe alɔkpa lɛ́ bǐ, kpó togun Izlayɛ́li tɔn sín bǒcyɔ xyɔ́ wǔ lɛ́* bǐ kpó; è ɖe yě dó dǒ ɔ mɛ lɛ́ lɛ̌ dó. 11 Bɔ togun Izlayɛ́li tɔn sín tomɛxó 70 ɖo te ɖo nukɔn yětɔn, bɔ Yaazaníya Cafáni ví ɔ lɔ ɖo te ɖo tɛ́ntin yětɔn. Zǎlínkpɔ́nfyɔ́nú ɖo yě mɛ ɖokpó ɖokpó sín alɔ mɛ, bɔ zǎlínkpɔ́n sín azizɔ sín wǎn ɖo jǐ yi wɛ. 12 É ɖɔ nú mì ɖɔ: “Gbɛtɔ́ví è, a mɔ nǔ e wa wɛ togun Izlayɛ́li tɔn sín tomɛxó lɛ́ ɖe ɖo ablu mɛ, bɔ mɛ ɖokpó ɖokpó ɖo xɔnɔnɔ tɔn mɛ ɖo fí e é tɛ́ bǒcyɔ tɔn lɛ́ ɖó é* a? Ðó yě nɔ ɖɔ: ‘Jexóva ɖo mǐ mɔ wɛ ǎ. Jexóva ko gosín to ɔ mɛ.’”
13 É lɛ́ ɖɔ nú mì ɖɔ: “A ná mɔ nǔ ɖěɖěe xyɔ́ wǔ bo tlɛ nylá hú mɔ̌ bɔ yě ɖo wiwa wɛ lɛ́ é.” 14 Énɛ́ ɔ, é kplá mì yi xwé Jexóva tɔn sín hɔntogbó totaligbé tɔn ɔ linu; ɖo fínɛ́ ɔ, un mɔ nyɔ̌nu lɛ́ ɖo ayǐjínjɔ́n bɔ yě ɖo avǐ ya dó nǔmɛsɛn Tamumúzi tamɛ wɛ.
15 É lɛ́ ɖɔ nú mì gɔ́ ná ɖɔ: “Gbɛtɔ́ví è, a mɔ nǔ énɛ́ a? A ná mɔ nǔ ɖěɖěe xyɔ́ wǔ bo tlɛ nylá hú énɛ́ lɛ́ é.” 16 Énɛ́ ɔ, é kplá mì yi xwé Jexóva tɔn sín kɔ́xota kpɛví ɔ. Ðo sinsɛnxɔ Jexóva tɔn sín alinu, ɖo hɔnnúwa ɔ kpó vɔ̌sákpe ɔ kpó tɛ́ntin ɔ, súnnu 25 mɔ̌ dó gǔdo sinsɛnxɔ Jexóva tɔn bo kpan nukɔn zǎnzǎnhwe jí; yě ɖo kɔ́ ɖe nú hwesivɔ́ wɛ ɖo zǎnzǎnhwe jí.
17 É ɖɔ nú mì ɖɔ: “Gbɛtɔ́ví è, a mɔ nǔ énɛ́ a? Nǔ e xyɔ́ wǔ bɔ togun Judáa tɔn wa, bo bló bɔ dǎkaxixo kpé to ɔ mɛ, bo kpo ɖo xomɛsin dó nú mì wɛ é ɔ, nǔ e ma hwɛ́n nǔɖé ǎ é wɛ é nyí a? Din ɔ, yě ɖo atínla* sɔ́ sɔ́ awɔntín ce wɛ. 18 Énɛ́ wú ɔ, un ná wa nǔ kpó xomɛsin ɖaxó kpó. Un* ná kú nǔbláwǔ nú yě ǎ, mɔ̌ jɛ́n un ma ná se wǔvɛ́ xá yě ǎ é nɛ́. Ényí yě ná bo tlɛ sú xó tlílí dó tó ce lɛ́ mɛ ɔ, un ná ɖótó yě ǎ.”