Ezekiyɛ́li
7 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, nǔ e Aklúnɔ Nǔbǐwúkpétɔ́ Jexóva ɖɔ nú Izlayɛ́li to ɔ é ɖíe: ‘Vivɔnu ɔ wá! Ɛɛn, vivɔnu ɔ wá to ɔ sín zwe ɛnɛ lɛ́ jí. 3 Vivɔnu ɔ wá jǐ towe lo, bɔ un ná tún xomɛsin e jí un ɖe é kɔn nyi jǐ towe, bo ná ɖɔ hwɛ xá we sɔgbe xá walɔ towe lɛ́, lobo ná byɔ́ we ɖɔ a ní ɖó nǔ e xyɔ́ wǔ bɔ a wa lɛ́ é bǐ sín gbe. 4 Un* ná kú nǔbláwǔ nú we ǎ; mɔ̌ jɛ́n un ma ná se wǔvɛ́ xá we ǎ é nɛ́, ɖó un ná bló bɔ a ná se xɔxɔ nǔ e walɔ hwiɖésúnɔ tɔn lɛ́ ji lɛ́ é tɔn, bɔ nǔ e xyɔ́ wǔ bɔ a wa lɛ́ é ɔ, a ná sún sin nǔ e yě ji lɛ́ é tɔn. Bɔ a ná wá tuun ɖɔ nyɛ wɛ nyí Jexóva.’
5 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Éɖíe! Awěxomɛ ɖé jawě, ɛɛn, awěxomɛ e ma kpé we ǎ é ɖé. 6 Vivɔnu ɖé jawě; vivɔnu ɔ ná wá; é ná sí te* dó jǐ towe. Kpɔ́n! É jawě. 7 Hwi mɛ e nɔ nɔ to ɔ mɛ é ɔ, ahwan jɛ jǐ we.* Hwe ɔ nu jawě, azǎn ɔ sɛkpɔ́. Hunnyahunnya wɛ ɖo só lɛ́ jí, é nyí xósúsú awǎjijɛ tɔn ǎ.
8 “‘Zaanɖé din ɔ, un ná húzú adǎn e jí un ɖe é kɔn nyi jǐ towe, bo ná tún xomɛsin e jí un ɖe é kɔn nyi jǐ towe bǐ mlɛ́mlɛ́, bo ná ɖɔ hwɛ xá we sɔgbe xá walɔ towe lɛ́, lobo ná byɔ́ we ɖɔ a ní ɖó nǔ e xyɔ́ wǔ bɔ a wa lɛ́ é bǐ sín gbe. 9 Un* ná kú nǔbláwǔ nú we ǎ, mɔ̌ jɛ́n un ma ná se wǔvɛ́ xá we ǎ é nɛ́. Un ná bló bɔ a ná se xɔxɔ nǔ e walɔ towe lɛ́ ji lɛ́ é tɔn, bɔ nǔ e xyɔ́ wǔ bɔ hwiɖésúnɔ wa lɛ́ é ɔ, a ná sún sin nǔ e yě ji lɛ́ é tɔn. Bɔ a ná wá tuun ɖɔ nyɛ Jexóva wɛ ɖo xixo we wɛ.
10 “‘Azǎn ɔ ɖíe! É jawě! Ahwan jɛ jǐ we;* kpo ɔ gba sɛ́, bɔ goyíyí ɔ tɔ́n kun. 11 Dǎkaxixo húzú kpo nǔnyanyawiwa tɔn. Yěɖésúnɔ alǒ dɔkun yětɔn, kabǐ ahwan yětɔn lɛ́, alǒ susu yětɔn ná xo gló ǎ. 12 Hwe ɔ nu ná su, azǎn ɔ ná wá. Nǔxɔtɔ́ ní ma j’awǎ ó, nǔsatɔ́ ní ma nɔ aluwɛ mɛ ó, ɖó un sin xomɛ syɛ́nsyɛ́n dó ahwan ɔ bǐ.* 13 Ényí nǔsatɔ́ ɔ ná bo tlɛ nɔ gbɛ ɔ, é ná lɛ́ kɔ yi nǔ e é ko sa é kɔn ǎ, ɖó ahwan ɔ blěbú wú wɛ nǔmimɔ ɔ ná wa nǔ dó. Mɛ ɖě ná lɛ́ kɔ ɖo yě mɛ ǎ, bɔ ɖó nǔwanyido tɔn wú ɔ,* mɛ ɖě ná hwlɛ́n gbɛ tɔn ɖo yě mɛ ǎ.
14 “‘È kún kpɛn, bɔ mɛ bǐ ɖo gbesisɔmɛ, amɔ̌, mɛ ɖě xwe ahwan ǎ, ɖó un sin xomɛ dó ahwan ɔ blěbú syɛ́nsyɛ́n wútu. 15 Hwǐ ɖo toxo ɔ gúdo, bɔ jɛmɛjí kpó adɔ kpó ɖo toxo ɔ mɛ. Mɛ ɖěbǔ e ɖo gle mɛ é ná kú hwǐ kú, bɔ adɔ kpó jɛmɛjí kpó ná hu mɛ e ɖo toxo ɔ mɛ lɛ́ é. 16 Mɛ ɖěɖěe gán, bo kpé wú bo hɔn lɛ́ é ná yi sókan mɛ, bɔ ahwannɛ́ tɔdo mɛ tɔn lɛ́ ɖɔhun ɔ, mɛ ɖokpó ɖokpó ná ná alě ɖó nǔwanyido tɔn wú. 17 Alɔ yětɔn lɛ́ bǐ ná kú yɛ, bɔ koli yětɔn lɛ́ bǐ ná nɔ kun sin.* 18 Yě ná dó ati, xɛsi ná jɛ yě jí,* bɔ yě ná sísɔ́. È ná dó winnyá mɛ lɛ́ bǐ, bo ná sún ahɔn mɛ lɛ́ bǐ.*
19 “‘Yě ná nyi kpatágan yětɔn dó ali lɛ́ jí, bɔ siká yětɔn ná húzú nǔ e xyɔ́ wǔ é nú yě. Kpatágan yětɔn alǒ siká yětɔn ná kpé wú bo hwlɛ́n yě ɖo xomɛsin syɛ́nsyɛ́n Jexóva tɔn sín azǎn gbe ǎ. Yě* ná ɖu nǔ b’ɛ ná jɛmɛ nú yě ǎ, mɔ̌ jɛ́n yě ma ka ná lɛ́ gɔ́ xo ǎ é nɛ́, ɖó dɔkun énɛ́ lɛ́* húzú afɔklɛ́nnú e dɔn yě dó nǔwanyido mɛ é. 20 Yě nɔ gó ɖó acɔ́ɖónú yětɔn lɛ́ sín ɖɛkpɛ wú, bo nɔ sɔ́ yě* dó bló ɖiɖe xyɔ́ wǔ yětɔn lɛ́, ɛɛn, bǒcyɔ xyɔ́ wǔ yětɔn lɛ́ ná. Énɛ́ wú wɛ un ná sɔ́ dɔkun énɛ́ lɛ́* dó bló nǔ e xyɔ́ wǔ é nú yě. 21 Un ná jó dɔkun énɛ́ lɛ́ nú toɖévomɛnu lɛ́, bɔ yě ná vɔ yě, nú mɛ nyanya e ɖo ayǐkúngban ɔ jí lɛ́ é bɔ yě ná bɛ́ yi, lobo ná hɛn blí.
22 “‘Un ná ɖe nukún ce sín yě jí, bɔ yě ná hɛn nɔtɛn hwíhwlá* ce blí, lobɔ ajotɔ́ lɛ́ ná byɔ́ mɛ, bo hɛn blí.
23 “‘Blǒ wlɔ ɖokpó,* ɖó mɛ e è ɖó hwɛ agɔ ná lɛ́ é sín hun* kpé to ɔ bǐ mɛ, bɔ dǎkaxixo kpé toxo ɔ bǐ mɛ. 24 Un ná kplá mɛ e nylá hú mɛ lɛ́ bǐ ɖo akɔta lɛ́ mɛ lɛ́ é wá, bɔ yě ná klá jɛ xwé yětɔn lɛ́ nu, un ná ɖó nǔ goyíyí hlɔ̌nhlɔ́nnɔ lɛ́ tɔn nu, bɔ è ná hɛn nɔtɛn ɖeɖóvo yětɔn lɛ́ blí. 25 Hwenu e yě ná ɖo adohu adohu jí é ɔ, yě ná ba fífá, loɔ, é ná ɖe ǎ. 26 Awě lɛ́ ná wá ɖějɛɖěgúdo, è ná se gbeɖíɖó ɖějɛɖěgúdo, bɔ mɛ lɛ́ ná ba nǔmimɔ ɖo gbeyíɖɔ ɔ gɔ́n, amɔ̌, sɛ́n* sɔ́ ná ɖo vɔ̌sánúxwlémawutɔ́ ɔ gɔ́n ǎ, bɔ wěɖexámɛ sɔ́ ná ɖo tomɛxó lɛ́ gɔ́n ǎ. 27 Axɔ́sú ɔ ná byɔ́ aluwɛ mɛ, gǎn ɔ ná ba nukúnɖíɖó kpo,* bɔ mɛ e ɖo to ɔ mɛ lɛ́ é sín alɔ lɛ́ ná sísɔ́ ɖó xɛsi ɖaxó wú. Un ná wa nǔ xá yě sɔgbe xá walɔ yětɔn lɛ́, bɔ un ná ɖɔ hwɛ xá yě lěe yě ɖɔ hwɛ xá mɛ ɖěvo lɛ́ gbɔn é. Bɔ yě ná wá tuun ɖɔ nyɛ wɛ nyí Jexóva.’”