Ezekiyɛ́li
9 Énɛ́ gúdo ɔ, é sú xó tlílí dó tó ce mɛ bo ɖɔ: “Mi xo mɛ ɖěɖěe ná dɔn tó nú toxo ɔ lɛ́ é kplé, bónú yě mɛ ɖokpó ɖokpó ní hɛn alyánnú kúnsúdónúnǔ tɔn alɔ mɛ!”
2 Un mɔ súnnu ayizɛ́n gosín hɔntogbó aga tɔn e kpan nukɔn totaligbé é kɔn jawě; yě mɛ ɖokpó ɖokpó hɛn alyánnú yětɔn alɔ mɛ bo ná hɛn nǔ gblé, bɔ súnnu ɖokpó ɖo tɛ́ntin yětɔn bo dó lɛ̌ɛnkanvɔ, bɔ wěgbójínɔtɔ́ sín nǔwlánnú* ɖokpó ɖo alin tɔn. Ée yě wá é ɔ, yě nɔ te ɖo vɔ̌sákpe e è sɔ́ ganvɔ dó bló é kpá.
3 Énɛ́ gúdo ɔ, Mawu Izlayɛ́li tɔn sín susu gosín fí e é ɖe ɖo celubɛ́ɛn lɛ́ tanu é bo sɛ tɛn yi xwé ɔ sín alihɛ́nnu. Bɔ é* jɛ xó sú ylɔ́ nya e dó lɛ̌ɛnkanvɔ bɔ wěgbójínɔtɔ́ sín nǔwlánnú ɖo alin tɔn é jí. 4 Jexóva ɖɔ n’i ɖɔ: “Gbɔn Jeluzalɛ́mu, ɛɛn, gbɔn toxo ɔ bǐ mɛ, bo ɖó wuntun nukɔn nú mɛ ɖěɖěe ɖo nyɔkwín ɖú wɛ, bo ɖo azɔn wɛn wɛ, ɖó nǔ e xyɔ́ wǔ bɔ è ɖo wiwa wɛ ɖo toxo ɔ mɛ lɛ́ é bǐ wútu lɛ́ é.”
5 Bɔ un se bɔ é ɖɔ nú mɛ ɖě lɛ́ ɖɔ: “Mi jɛ gǔdo tɔn gbɔn toxo ɔ bǐ mɛ bo hu mɛ lɛ́. Mi* ma kú nǔbláwǔ nú mɛ ó, mi ma ka lɛ́ se wǔvɛ́ ɖěbǔ xá mɛ ó. 6 Mi ɖó ná hu súnnu mɛxómɔ lɛ́, súnnu wínnyáwínnyá lɛ́, ɖyɔ̌vǐ ɖo alɔjí lɛ́, yɔkpɔ́vú lɛ́ kpó nyɔ̌nu lɛ́ kpó bǐ xwíí. Amɔ̌, mi ma sɛkpɔ́ mɛ ɖěbǔ e wú wuntun ɔ ɖe é ó. Sinsɛnxɔ ce mɛ wɛ mi ka ɖó ná bɛ́ sín.” Énɛ́ ɔ, yě bɛ́ sín tomɛxó e ɖo xwé ɔ nukɔn lɛ́ é jí. 7 Énɛ́ gúdo ɔ, é ɖɔ nú yě ɖɔ: “Mi hɛn xwé ɔ blí bo bló bónú cyɔ lɛ́ ní gɔ́ kɔ́xota we lɛ́. Mi yi!” Énɛ́ ɔ, yě tɔ́n bo hu mɛ lɛ́ ɖo toxo ɔ mɛ.
8 Ée yě ɖo mɛ lɛ́ hu wɛ é ɔ, nyiɖokpónɔ wɛ wá kpo ɖo gbɛ. Bɔ un xwe agbɔ̌nnusú do bo sú xó bo ɖɔ: “Áo! Aklúnɔ Nǔbǐwúkpétɔ́ Jexóva! A ná sú kún dó nú mɛ e kpo ɖo Izlayɛ́li lɛ́ é bǐ, hwenu e a ɖo adǎn e jí a ɖe é gba kɔn nyi Jeluzalɛ́mu jí wɛ é wɛ a?”
9 Énɛ́ ɔ, é ɖɔ nú mì ɖɔ: “Nǔwanyido togun Izlayɛ́li kpó Judáa kpó tɔn d’agba, ɛɛn, é d’agba tawun. È kɔn hun kɔn nyi ayǐ kpé to ɔ mɛ, bɔ nǔagɔwiwa kpé toxo ɔ mɛ. Ðó yě nɔ ɖɔ: ‘Jexóva ko gosín to ɔ mɛ. Jexóva ɖo mǐ mɔ wɛ ǎ.’ 10 Amɔ̌, nyɛ ɔ, un* ná kú nǔbláwǔ nú yě ǎ; mɔ̌ jɛ́n un ma ka ná lɛ́ se wǔvɛ́ xá yě ǎ é nɛ́. Un ná bló bɔ yě ná se xɔxɔ nǔ e walɔ yětɔn ji lɛ́ é tɔn.”
11 Énɛ́ gúdo ɔ, un mɔ nya e dó lɛ̌ɛnkanvɔ, bɔ nǔwlánnú ɖo alin tɔn é lɛ́ kɔ wá bo ɖó gbe ɖɔ: “Un ko bló lěe a ɖe gbe tɔn nú mì gbɔn é pɛ́pɛ́pɛ́.”