Ezekiyɛ́li

6 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, lǐlɛ́ kpan nukɔn só Izlayɛ́li tɔn lɛ́ bo ɖɔ nǔ e ná jɛ dó yě wú lɛ́ é ɖ’ayǐ. 3 A ɖó ná ɖɔ: ‘Só Izlayɛ́li tɔn lɛ́ è mi, mi ɖótó xó e Aklúnɔ Nǔbǐwúkpétɔ́ Jexóva ɖɔ é: Nǔ e Aklúnɔ Nǔbǐwúkpétɔ́ Jexóva ɖo ɖiɖɔ nú só ɖaxó lɛ́, só kpɛví lɛ́, tɔsisa lɛ́ kpó tɔdo lɛ́ kpó wɛ é ɖíe: “Éɖíe! Un ná sɛ́ hwǐ dó mi, bo ná vívá nɔtɛn ɖeɖóvo mitɔn lɛ́. 4 È ná gba vɔ̌sákpe mitɔn lɛ́, è ná hánnyá nǔ e jí mi nɔ dó zǎlínkpɔ́n zo ɖe lɛ́ é, bɔ un ná bɛ́ cyɔ mitɔn lɛ́ kɔn nyi bǒcyɔ xyɔ́ wǔ mitɔn lɛ́* nukɔn. 5 Un ná bɛ́ togun Izlayɛ́li tɔn sín cyɔ lɛ́ nyi dó bǒcyɔ xyɔ́ wǔ yětɔn lɛ́ nukɔn, bo ná fúnfún xú mitɔn lɛ́ lɛ́ lɛ̌ dó vɔ̌sákpe mitɔn lɛ́. 6 Ðo fí e mi nɔ nɔ lɛ́ é bǐ ɔ, è ná vívá toxo lɛ́, bo ná gba nɔtɛn ɖeɖóvo lɛ́, bɔ yě ná nɔ gbigba jí. È ná gba vɔ̌sákpe mitɔn lɛ́, bo hánnyá yě, è ná vívá bǒcyɔ xyɔ́ wǔ mitɔn lɛ́, è ná gba nǔ e jí mi nɔ dó zǎlínkpɔ́n zo ɖe lɛ́ é hánnyá, è ná za alɔ mitɔn núwiwa lɛ́ síin. 7 Bɔ mɛ e è hu lɛ́ é ná j’ayǐ ɖo tɛ́ntin mitɔn, bɔ mi ná wá tuun ɖɔ nyɛ wɛ nyí Jexóva.

8 “‘“Amɔ̌, un ná jó mɛ kpɛɖé dó, ɖó mɛɖé lɛ́ ɖo mi mɛ bo ná xo gló hwǐ ɔ ɖo akɔta lɛ́ tɛ́ntin hwenu e è ná fúnfún mi kpé gbɔn to lɛ́ mɛ é. 9 Mɛ e xo gló lɛ́ é ná flín mì ɖo akɔta e mɛ è kplá yě yi kannumɔgbénu ɖe lɛ́ é tɛ́ntin. Yě ná wá tuun ɖɔ ayi yětɔn e ma nɔ gbejí ǎ,* bo jó mì dó é kpó nukún yětɔn e ɖo bǒcyɔ xyɔ́ wǔ yětɔn lɛ́ kpɔ́n wɛ kpó jlǒ syɛ́nsyɛ́n kpó* lɛ́ é kpó zɔ́n bɔ wǔ kú mì tawun. Winnyá ná hu yě ɖó nǔ nyanya e yě wa lɛ́ é kpó nǔ e xyɔ́ wǔ bɔ yě wa lɛ́ é kpó bǐ wú, bɔ yě ná lɛ́ gbɛ́ wǎn ná. 10 Yě ná wá tuun ɖɔ nyɛ wɛ nyí Jexóva, ɖɔ adǎn ɖěɖěe un gblɔ́n ɖɔ un ná sɔ́ awě énɛ́ dó xo yě lɛ́ é kún nyí xó vɔ̌tɔ́ ó.”’

11 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Nɔ xo alɔ, nɔ zin afɔ d’ayǐ bo nɔ ná alě, ɖó nǔ nyanya e togun Izlayɛ́li tɔn wa lɛ́ é kpó nǔ e xyɔ́ wǔ bɔ yě wa lɛ́ é kpó bǐ wútu, ɖó yě ná j’ayǐ gbɔn hwǐ, adɔ kpó jɛmɛjí kpó gblamɛ. 12 Jɛmɛjí ná hu mɛ e ɖo zɔ é, mɛ e ɖo tófí é ná kú hwǐ kú, bɔ adɔ ná hu mɛ ɖěbǔ e xo gló nǔ énɛ́ lɛ́ é; bɔ un ná tún xomɛsin syɛ́nsyɛ́n e jí un ɖe é kɔn nyi yě jí bǐ mlɛ́mlɛ́. 13 Hwenu e cyɔ yětɔn lɛ́ ná ɖo títɛ́ ɖo bǒcyɔ xyɔ́ wǔ yětɔn lɛ́ tɛ́ntin, ná kpé fí bǐ lɛ́ lɛ̌ dó vɔ̌sákpe yětɔn lɛ́, ná gbɔn só kpɛví e yi jǐ lɛ́ é bǐ jí, ná gbɔn só ɖaxó lɛ́ bǐ ta, ná ɖo atín e vun lɛ́ é bǐ sá kpó atín ɖaxó lɛ́ sín ala lɛ́ glɔ́ kpó ɖo fí ɖěɖěe yě nɔ xwlé vɔ̌sánú wǎnɖagbenɔ lɛ́ ɖe, bo ná dó xo hwihwɛ́ bǒcyɔ xyɔ́ wǔ yětɔn lɛ́ é ɔ, yě ná wá tuun ɖɔ nyɛ wɛ nyí Jexóva. 14 Alɔ ce ná jɛ yě wú, bɔ un ná bló bɔ to ɔ ná jɛ vɔ̌, bɔ fí e yě nɔ nɔ lɛ́ é bǐ ná jɛ vɔ̌ bo nylá hú gbětótló e ɖo Dibla kpá é. Bɔ yě ná wá tuun ɖɔ nyɛ wɛ nyí Jexóva.’”