Ezekiyɛ́li

5 “Gbɛtɔ́ví è, hwɛ ɔ, sɔ́ hwǐ ɖíɖá ɖokpó bo zán atánxwlɛ́nú ɖɔhun. Xwlɛ́ ta towe kpó atán towe kpó, bɔ énɛ́ gúdo ɔ, a ná sɔ́ nǔdagan bo da ɖa lɛ́ kpó atán lɛ́ kpó bo lɛ́ má yě ɖó donu atɔn. 2 A ná dó atɔnvlɔ́ɖó zo ɖo toxo ɔ tɛ́ntin, hwenu e azǎn nabí e a ná ján go dó toxo ɔ xɔ é ná wá vivɔnu é. Énɛ́ gúdo ɔ, a ná sɔ́ atɔnvlɔ́ɖó ɖěvo, bo ná xú hwǐ mɛ* lɛ́ lɛ̌ dó toxo ɔ* bǐ, bɔ atɔnvlɔ́ɖó gǔdo tɔn ɔ, a ná fúnfún kpé gbɔn jɔhɔn mɛ, bɔ un ná sún hwǐ bo ná jɛ gǔdo tɔn.

3 “A ɖó ná lɛ́ bɛ́ kpɛɖé sín mɛ, bo ná slɛ́ gǒ dó awu towe tó. 4 Lɛ̌ bɛ́ kpɛɖé ɖ’é mɛ, bo bɛ́ kɔn nyi myɔ mɛ lobo fyɔ́ ɛ. Myɔ énɛ́ ná vun blá togun Izlayɛ́li tɔn ɔ bǐ.

5 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Jeluzalɛ́mu nɛ́. Un sɔ́ ɛ ɖó akɔta lɛ́ tɛ́ntin bɔ to lɛ́ lɛ́ lɛ̌ dó è. 6 Amɔ̌, é fɔ́n gǔ dó hwɛɖiɖɔ sín gbeta ce lɛ́ kpó gbetakɛ́n ce lɛ́ kpó jí, bo wa nǔ e nylá lɛ́ é b’ɛ hú gǎn akɔta lɛ́ kpó to e lɛ́ lɛ̌ dó è lɛ́ é bǐ kpó tɔn. Ðó togun ɔ xo hwɛɖiɖɔ sín gbeta ce lɛ́ nyi kɛ́n, bɔ yě wa nǔ sɔgbe xá gbetakɛ́n ce lɛ́ ǎ.’

7 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó mi gbɛ́ hɛn hú akɔta e lɛ́ lɛ̌ dó mi lɛ́ é bǐ, bo ma xwedó gbetakɛ́n ce lɛ́, alǒ wa nǔ sɔgbe xá hwɛɖiɖɔ sín gbeta ce lɛ́ ǎ, bo ka xwedó hwɛɖiɖɔ sín gbeta akɔta e lɛ́ lɛ̌ dó mi lɛ́ é bǐ tɔn lɛ́ wútu ɔ, 8 nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Toxo élɔ́ è, un ná jɛ gǔdo towe, nyiɖésúnɔ ná wa nǔ xá we sɔgbe xá hwɛ e un ɖó nú we é ɖo akɔta lɛ́ nukúnmɛ. 9 Un ná wa nǔ e un ma wa kpɔ́n gbeɖé ǎ lɛ́ é xá we, ɛɛn, nǔ e un ma sɔ́ ná lɛ́ wa kpɔ́n gbeɖé ǎ lɛ́ é, ɖó nǔwalɔ towe e xyɔ́ wǔ lɛ́ é bǐ wútu.

10 “‘“Énɛ́ wú ɔ, tɔ́ e ɖo toxo ɔ mɛ lɛ́ é ná ɖu vǐ yětɔn lɛ́, bɔ vǐ lɛ́ ná ɖu tɔ́ yětɔn lɛ́, bɔ un ná wa nǔ xá we sɔgbe xá hwɛ e un ɖó nú we é, bo ná gba mɛ towe e kpo lɛ́ é bǐ dó gbɔn awa lɛ́ bǐ xwé.”’*

11 “‘Énɛ́ wú ɔ, un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘ɖó a hɛn sinsɛnxɔ ce blí gbɔn bǒcyɔ xyɔ́ wǔ towe lɛ́ bǐ kpó nǔwalɔ towe e xyɔ́ wǔ lɛ́ é bǐ kpó gblamɛ wútu ɔ, nyi lɔ ná gbɛ́ we;* un* ná kú nǔbláwǔ nú we ǎ, un ná se wǔvɛ́ ɖěbǔ xá we ǎ. 12 Jɛmɛjí* ná hu atɔnvlɔ́ɖó toxo ɔ tɔn, alǒ adɔ ná sú kún yětɔn dó ɖo toxo ɔ tɛ́ntin. Atɔnvlɔ́ɖó ɖěvo ná kú hwǐ kú lɛ́ lɛ̌ dó we. Bɔ un ná gba atɔnvlɔ́ɖó gǔdo tɔn ɔ dó gbɔn awa lɛ́ bǐ xwé,* bo ná sún hwǐ bo ná jɛ gǔdo tɔn. 13 Énɛ́ ɔ, xomɛsin ce ná nɔ te, bɔ adǎn e jí un ɖe ɖó yě wú é ná ɖe kpo, lobɔ xomɛ ná hun mì. Bɔ hwenu e un ná wa adǎn e jí un ɖe ɖó yě wú é sín nǔ xá yě fó é ɔ, yě ná wá tuun ɖɔ nyɛ Jexóva wɛ ɖɔ xó, ɖó un nɔ byɔ́ vɛ́návɛ́ná ɖɔ è ní sɔ́ mɛɖée jó nú mì bǐ mlɛ́mlɛ́.

14 “‘Un ná bló bɔ a ná húzú nɔtɛn e è vívá é, bo ná lɛ́ húzú zuntín ɖo akɔta e lɛ́ lɛ̌ dó we lɛ́ é tɛ́ntin, ɖo mɛ e ná gbɔn fínɛ́ lɛ́ é bǐ nukúnmɛ. 15 A ná húzú zuntín kpó winnyánú kpó, kpɔ́ndéwú akpágbanúmɛ tɔn ɖé kpó nǔ e xyɔ́ wǔ é kpó nú akɔta e lɛ́ lɛ̌ dó we lɛ́ é, hwenu e un ná ɖo xomɛsin kpó adǎn kpó jí bo ná wa nǔ xá we sɔgbe xá hwɛ e un ɖó nú we é, bo lɛ́ dɔn tó nú we syɛ́nsyɛ́n é. Nyɛ, Jexóva, wɛ ɖɔ xó.

16 “‘Un ná sɛ́ adɔ dó yě bɔ é ná cí gǎ ɖěɖěe nɔ hu mɛ lɛ́ é ɖɔhun, bɔ é ná sú kún yětɔn dó. Gǎ ɖěɖěe un ná sɛ́ dó lɛ́ é ná sú kún dó nú mi. Un ná bló bɔ adɔ ɔ ná syɛ́n d’é jí nú mi gbɔn fí e nǔɖuɖu nɔ gosín wá nú mi lɛ́ é súsú dó* gblamɛ. 17 Un ná sɛ́ adɔ kpó adǎnkanlin lɛ́ kpó dó we, bɔ yě ná yí vǐ towe lɛ́ sín así towe. Jɛmɛjí kpó hun kinkɔn nyi ayǐ kpó ná vívá we, bɔ un ná sɔ́ hwǐ dó jǐ towe. Nyɛ, Jexóva, wɛ ɖɔ xó.’”