Ezekiyɛ́li
4 “Hwɛ gbɛtɔ́ví è, sɔ́ blǐki ɖokpó bo zé ɖó nukɔn towe. Ðe toxo Jeluzalɛ́mu tɔn sín ɖiɖe d’é wú. 2 Jǎn go dó è, mɛ dǒ lɛ́ lɛ̌ dó è dó ján go dó è, mɛ ahohó lɛ́ lɛ̌ dó è dó ján go dó è, ɖǒ gɔnu lɛ́ dó ján go dó è, bo bɛ́ ahwanlyánnú e è nɔ sɔ́ dó gba nǔ lɛ́ é lɛ́ lɛ̌ dó è. 3 Zě nǔsɔgannú ɖokpó, bo sɔ́ ɖó hwi kpó toxo ɔ kpó tɛ́ntin cí nǔ ɖɔ dǒ gannɔ wɛ ɖɔhun. Énɛ́ gúdo hǔn, hǔzú kpan nukɔn toxo ɔ, è ná ján go dó è; hwi wɛ ná ján go dó è. Wuntun ɖé wɛ énɛ́ nyí nú togun* Izlayɛ́li tɔn.
4 “Énɛ́ gúdo ɔ, a ná mlɔ́ amyɔ towe jí bo ná sɔ́ hwɛ e togun* Izlayɛ́li tɔn hu é ɖó kɔ nú hwiɖée.* A ná hɛn hwɛ yětɔn lɛ́ xɔ azǎn nabí e a ná mlɔ́ amyɔ towe jí ná é. 5 Un ná byɔ́ we ɖɔ a ní wa mɔ̌ nú azǎn 390, sɔgbe xá xwe nabí e yě hu hwɛ ná lɛ́ é, bɔ a ná hɛn togun* Izlayɛ́li tɔn sín hwɛ. 6 A ɖó ná wa mɔ̌ káká yi vivɔnu azǎn énɛ́ lɛ́ tɔn.
“Énɛ́ gúdo ɔ, a ná mlɔ́ ayǐ azɔn wegɔ́ ɔ, amɔ̌ din tɔn ɔ, ɖisí towe jí wɛ a ná mlɔ́, bo ná hɛn hwɛ e togun* Judáa tɔn hu é nú azǎn 40. Azǎn ɖokpó nú xwe ɖokpó, ɛɛn, azǎn ɖokpó nú xwe ɖokpó, nǔ e un byɔ́ ɖo así towe é nɛ́. 7 Bɔ a ná lílɛ́ kpan nukɔn Jeluzalɛ́mu e è ján go dó é, awa towe ka ná ɖo wěxo, bɔ a ɖó ná ɖɔ nǔ e ná jɛ dó wǔ tɔn é ɖ’ayǐ.
8 “Éɖíe! Un ná blá we kpó kan kpó bɔ a ná sixú lílɛ́ sín akpá ɖé xwé jɛ akpá ɖě ɔ xwé ǎ, káká jɛ hwenu e azǎn nabí e a ná ján go dó toxo ɔ xɔ é ná wá vivɔnu é.
9 “A ná fɔ blěe, ɔ́ji, akpakún, ayikún, milɛ́ɛ kpó epótlu kpó, bo bɛ́ yě dó gannú ɖokpó mɛ, bo ná dó ɖa wɔ̌xúxú e a ná nɔ ɖu é. Nú azǎn nabí e a ná mlɔ́ aja towe jí ná é, énɛ́ wɛ nyí azǎn 390 lɛ́ ɔ, a ná ɖu nǔ énɛ́. 10 A ná nɔ ɖa nǔɖuɖu glǎmu 230 mɔ̌* bo ná nɔ ɖu ɖo azǎn ɖokpó ɖokpó jí. Hwe ɖokpó ɔ nu wɛ a ná nɔ ɖu gbe bǐ gbe.
11 “Sin kɔ́fu we géé* wɛ a ná nɔ nu. Hwe ɖokpó ɔ nu wɛ a ná nɔ nu gbe bǐ gbe.
12 “A ná ɖu lěe a nɔ ɖu ɔ́ji sín wɔ̌xúxú mlímlí ɖé gbɔn é ɖɔhun; a ná ɖa ɖo nukún yětɔn mɛ, gbɛtɔ́mí xúxú wɛ a ná zán dó flɔ́ myɔ ɔ ná.” 13 Jexóva lɛ́ ɖɔ: “Mɔ̌ wɛ Izlayɛ́li ví lɛ́ ná ɖu wɔ̌xúxú yětɔn gbɔn, ɛɛn, wɔ̌xúxú yětɔn blíblí ɔ, ɖo akɔta ɖěɖěe mɛ un ná fúnfún yě kpé gbɔn lɛ́ é mɛ.”
14 Énɛ́ ɔ, un ɖɔ: “Ní ma nyí mɔ̌ ó, Aklúnɔ Nǔbǐwúkpétɔ́ Jexóva! Sín hwenu e un ɖo vǔ é káká jɛ din ɔ, un hɛn nyiɖée* blí gbɔn kanlin e è mɔ kúkú tɔn é, alǒ kanlin e gběkanlin tlɛ́n ɖu é sín lan ɖuɖu gblamɛ ǎ, lan blíblí* ɖě ka jɛ nu ce kpɔ́n ǎ.”
15 Énɛ́ wú ɔ, é ɖɔ nú mì ɖɔ: “É nyɔ́, un ná yí gbe bɔ a ná zán nyibúmí, é sɔ́ ná nyí gbɛtɔ́mí ǎ; é jí wɛ a ná ɖa wɔ̌xúxú towe ɖe.” 16 Énɛ́ gúdo ɔ, é ɖɔ nú mì ɖɔ: “Gbɛtɔ́ví è, un ná sú fí e nǔɖuɖu nɔ gosín wá lɛ́ é dó* ɖo Jeluzalɛ́mu, bɔ kpó adohu adohu ɖaxó kpó wɛ yě ná nɔ ɖu wɔ̌xúxú sín kanta yětɔn e è da é, bo ná nɔ nu sin sín kanta yětɔn e è jlɛ́ é kpó xɛsi ɖaxó kpó. 17 Nǔ ná nyí mɔ̌, bónú nú yě ba wɔ̌xúxú kpó sin kpó kpo ɔ, yě ná kpɔ́n yěɖée lɛ́ kpó ahwixomɛ kpó, bo ná lɛ́ xú gǒ, ɖó nǔwanyido yětɔn wútu.