Ezekiyɛ́li
47 Énɛ́ gúdo ɔ, é kplá mì lɛ́ kɔ wá sinsɛnxɔ ɔ sín alinu. Bɔ ɖo fínɛ́ ɔ, un mɔ sin ɖo sisa wɛ sín alihɛ́nnu sinsɛnxɔ ɔ tɔn glɔ́ xwe zǎnzǎnhwe jí, ɖó zǎnzǎnhwe jí wɛ sinsɛnxɔ ɔ kpan nukɔn. Sin ɔ ɖo sisa sín sinsɛnxɔ ɔ glɔ́ wɛ ɖo aɖisíxwé bo nɔ gbɔn vɔ̌sákpe ɔ sín afɔligbé.
2 Énɛ́ gúdo ɔ, é kplá mì tɔ́n gbɔn hɔntogbó totaligbé tɔn ɔ nu, bo kplá mì lɛ́ dó gbɔn kɔ́xo káká wá hɔntogbó kɔ́xota tɔn, éé kpan nukɔn zǎnzǎnhwe jí é kɔn. Bɔ un mɔ sin ɖo sisa sín hɔntogbó ɔ sín aɖisíxwé wɛ.
3 Hwenu e nya ɔ tɔ́n bo tunta zǎnzǎnhwe jí bo hɛn nǔjlɛ́kan ɖokpó alɔ mɛ é ɔ, é jlɛ́ awabá* 1 000, bo byɔ́ mì ɖɔ nyi ní gbɔn sin ɔ mɛ: sin ɔ fán mì dó afɔgókɔ.
4 Énɛ́ gúdo ɔ, é jlɛ́ awabá 1 000 ɖěvo bo byɔ́ mì ɖɔ nyi ní gbɔn sin ɔ mɛ, bɔ sin ɔ fán mì dó koli.
É jlɛ́ awabá 1 000 ɖěvo bo byɔ́ mì ɖɔ nyi ní gbɔn sin ɔ mɛ, bɔ sin ɔ fán mì dó alin.
5 Hwenu e é jlɛ́ awabá 1 000 ɖěvo é ɔ, sin ɔ sukpɔ́ tawun, bɔ un kpé wú bo ɖi zɔnlin gbɔn mɛ dín ǎ, ɖó sin ɔ gɔ́ngɔ́n sɔmɔ̌ bɔ tɔ jɛ́n è ná lin, é sukpɔ́ sɔmɔ̌ bɔ è sixú ɖi zɔnlin gbɔn mɛ ǎ.
6 É kanbyɔ́ mì ɖɔ: “Gbɛtɔ́ví è, a mɔ nǔ énɛ́ a?”
Énɛ́ gúdo ɔ, é ɖɔ bɔ un ɖi zɔnlin lɛ́ kɔ wá tɔsisa ɔ tó. 7 Ée un lɛ́ kɔ wá é ɔ, un mɔ atín kpɔ́ gégé ɖo tɔsisa ɔ sín awa we lɛ́ xwé. 8 Énɛ́ gúdo ɔ, é ɖɔ nú mì ɖɔ: “Sin énɛ́ nɔ sa tunta zǎnzǎnhwe jí sín gbě jí, bo nɔ sa gbɔn Alába* lobo nɔ sa kɔn nyi xu ɔ mɛ. Ényí é sa yi kɔn dó xu ɔ mɛ ɔ, xu ɔ sín sin ná húzú sin ɖagbe. 9 Nǔɖogbɛ* wɔ̌búwɔ́bú lɛ́ ná kpé wú bá nɔ gbɛ ɖo fí ɖěbǔ e sin ɔ* sa yi é. Hweví ná túnflá ɖó sin énɛ́ ná sa yi fínɛ́ wútu. Xu ɔ sín sin ná húzú sin ɖagbe, bɔ nǔ lɛ́ bǐ ná nɔ gbɛ ɖo fí ɖěbǔ e tɔsisa ɔ sa yi é.
10 “Hwehutɔ́ lɛ́ ná nɔ te ɖo xu ɔ kpá sín Eyínu-Gɛdi káká yi Eyínu-Eglayímu, fí e è ná nɔ xyá ɖɔgbó* lɛ́ ɖó é. Hweví wunmɛ gěgé ná túnflá hweví e ɖo Xu Ðaxó ɔ* mɛ lɛ́ é ɖɔhun.
11 “Fí e nyí gba lɛ́ é kpó fí e ɖó adu lɛ́ é kpó ná ɖo fínɛ́, fí énɛ́ lɛ́ ka ná jɛ ganjí ǎ. Yě ná kpo ɖo jɛgba nyí wɛ.
12 “Ðo tɔsisa ɔ tó ɔ, atín tɛnmɛ tɛnmɛ e nɔ ná nǔɖuɖu lɛ́ é bǐ ná wú gbɔn ɖisí amyɔ. Ama yětɔn lɛ́ ná yɔ́ ǎ; mɔ̌ jɛ́n yě ma ná gɔn sínsɛ́n ná ǎ é nɛ́. Sunmɛ sunmɛ ɔ, yě ná nɔ ná sínsɛ́n yɔ̌yɔ́, ɖó mawuxɔ ɔ mɛ wɛ sin nɔ sa sín wá nú yě. Sínsɛ́n yětɔn lɛ́ ná nyí nǔɖuɖu, bɔ ama yětɔn lɛ́ ná nɔ gbɔ azɔn.”
13 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Ayǐkúngban énɛ́ wɛ mi ná ná akɔta Izlayɛ́li tɔn 12 lɛ́, bɔ é ná nyí gǔ nú yě, bɔ Jozɛ́fu ná yí mǐmá we. 14 Mi ná ɖu gǔ tɔn bo ná yí ɖó zɛ̌nzɛ̌n.* Un xwlé nǔ ɖɔ un ná ná ayǐkúngban énɛ́ tɔ́gbó mitɔn lɛ́, bɔ din ɔ, è ná mi* bɔ é nyí gǔ mitɔn.
15 “Fí ɖěɖěe nyí dogbó ayǐkúngban ɔ tɔn ɖo totaligbé lɛ́ é ɖíe: é bɛ́ sín Xu Ðaxó ɔ kɔn bo gbɔn ali e yi Hetlɔ́ni é bo tunta Sedádi, 16 Hamáti, Belóta, gɔ́ nú Siblayímu, éé ɖo ayǐkúngban Damási tɔn kpó Hamáti tɔn kpó tɛ́ntin é, káká yi Hasɛ́ɛ-Tikɔ́ni, éé ɖo Holáni sín dogbó kpá é. 17 Hǔn dogbó ɔ ná bɛ́ sín xu ɔ kɔn yi Hasáa-Ɛnáni, bo ná gbɔn dogbó Damási tɔn jí ɖo taligbé, lobo lɛ́ gbɔn dogbó Hamáti tɔn jí. Dogbó totaligbé tɔn ɔ nɛ́.
18 “Dogbó zǎnzǎnhwe jí tɔn ɔ bɛ́ sín Holáni kpó Damási kpó tɛ́ntin, bo gbɔn Judɛ́ɛn ɔ kpá ɖo Galádi kpó Izlayɛ́li to ɔ kpó tɛ́ntin. Mi ná jlɛ́ sín dogbó totaligbé tɔn ɔ jí yi zǎnzǎnhwe jí sín xu ɔ* kɔn. Dogbó zǎnzǎnhwe jí tɔn ɔ nɛ́.
19 “Dogbó tofɔligbé tɔn ɔ* ná bɛ́ sín Tamáa yi Mɛlíba-Kadɛ́ci sin ɔ kɔn yi Tɔsisa ɔ* kpó Xu Ðaxó ɔ kpó kɔn. Dogbó tofɔligbé tɔn ɔ* nɛ́.
20 “Xu Ðaxó ɔ ɖo dogbó gbadahwe jí tɔn ɔ jí, sín dogbó tofɔligbé tɔn ɔ jí káká yi fí ɖé ɖo fí e kpan nukɔn Lɛbo-Hamáti é.* Dogbó gbadahwe jí tɔn ɔ nɛ́.”
21 “Mi ɖó ná má to énɛ́ ɖo miɖée lɛ́ tɛ́ntin, ɛɛn, ɖo akɔta 12 Izlayɛ́li tɔn lɛ́ tɛ́ntin. 22 Mi ná má to ɔ ɖo tɛ́ntin mitɔn bɔ é ná nyí gǔ nú mi kpó jǒnɔ e ɖo tɛ́ntin mitɔn, bo ji vǐ hwenu e yě ɖo kpɔ́ xá mi lɛ́ é kpó; Izlayɛ́li ví jiji lɛ́ ɖɔhun wɛ yě ná cí nú mi. Yě ná yí gǔ ɖo akɔta Izlayɛ́li tɔn lɛ́ mɛ miɖɔhun. 23 Akɔta e mɛ jǒnɔ ɔ ɖe é sín ayǐkúngban jí wɛ mi ná ná ɛ gǔ ɖe,” wɛ Aklúnɔ Nǔbǐwúkpétɔ́ Jexóva ɖɔ.