Ezekiyɛ́li
46 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Hɔntogbó kɔ́xota kpɛví ɔ tɔn e kpan nukɔn zǎnzǎnhwe jí é ná nɔ súsú jí nú azǎn ayizɛ́n e nyí azɔ̌zángbe lɛ́ é, amɔ̌, ɖo gbɔjɛzángbe kpó sunwájǐzángbe kpó ɔ, é ná nɔ hunhun jí. 2 Gǎn ɔ ná gosín kɔ́xota ɖaxó ɔ, bo ná gbɔn hɔntogbó ɔ sín hɔnnúwa nu, lobo nɔ te ɖo hɔntogbó ɔ sín dotín kpá. Vɔ̌sánúxwlémawutɔ́ lɛ́ ná xwlé nǔ e é hɛn wá bónú è ná dó sá vɔ̌ e è nɔ dó blěbú tɔn zo é kpó kɔnɖókpɔ́vɔ́ lɛ́ kpó ná lɛ́ é, bɔ é ná ɖe kɔ́ ɖo hɔntogbó ɔ sín alihɛ́nnu, bɔ énɛ́ gúdo ɔ, é ná tɔ́n. Amɔ̌, è ná sú hɔntogbó ɔ cóbónú gbadanu ná su ǎ. 3 Mɛ e ɖo to ɔ mɛ lɛ́ é lɔ ná ɖe kɔ́ ɖo Jexóva nukɔn ɖo hɔntogbó ɔ sín alinu ɖo gbɔjɛzángbe lɛ́ kpó sunwájǐzángbe lɛ́ kpó.
4 “‘Vɔ̌ e è nɔ dó blěbú tɔn zo, bɔ gǎn ɔ ná xwlé Jexóva ɖo gbɔjɛzángbe é ɖó ná nyí lɛ̌ngbɔ́ví asú e ma ɖó blɔ̌ ɖo wǔ ǎ é ayizɛ́n kpó agbo e ma ɖó blɔ̌ ɖo wǔ ǎ é ɖokpó kpó. 5 É ná hɛn nǔníná jinukún tɔn efáa* ɖokpó dó agbo ɔ jí, bo ná ná nǔ ɖěbǔ e wú é kpé é dó lɛ̌ngbɔ́ví asú lɛ́ jí; é ná sɔ́ ami hǐni* ɖokpó dó nǔníná jinukún tɔn efáa ɖokpó ɖokpó jí. 6 Ðo sunwájǐzángbe ɔ, nyibúsú wínnyáwínnyá kanlinhwan ɔ tɔn e ma ɖó blɔ̌ ɖo wǔ ǎ é ɖokpó, lɛ̌ngbɔ́ví asú ayizɛ́n kpó agbo ɖokpó kpó wɛ è ná ná; kanlin e ma ɖó blɔ̌ ɖo wǔ ǎ lɛ́ é wɛ yě ná nyí. 7 É ná hɛn nǔníná jinukún tɔn efáa ɖokpó dó nyibúsú wínnyáwínnyá ɔ jí, efáa ɖokpó dó agbo ɔ jí, bo ná ná nǔ ɖěbǔ e wú é kpé é dó lɛ̌ngbɔ́ví asú lɛ́ jí. É ná sɔ́ ami hǐni ɖokpó dó nǔníná jinukún tɔn efáa ɖokpó ɖokpó jí.
8 “‘Ényí gǎn ɔ jló ná byɔ́ mɛ ɔ, hɔnnúwa ɔ sín hɔntogbó nu wɛ é ná nɔ gbɔn, bɔ fí ɖokpó ɔ wɛ é ná lɛ́ tɔ́n gbɔn. 9 Hwenu e mɛ e nɔ nɔ to ɔ mɛ lɛ́ é ná wá Jexóva nukɔn ɖo xwe lɛ́ hwenu é ɔ, mɛ e wá Mawu sɛn gbé bo gbɔn hɔntogbó totaligbé tɔn ɔ nu lɛ́ é ná tɔ́n gbɔn hɔntogbó tofɔligbé tɔn ɔ nu, bɔ mɛ e gbɔn hɔntogbó tofɔligbé tɔn ɔ nu lɛ́ é ná tɔ́n gbɔn hɔntogbó totaligbé tɔn ɔ nu. Mɛ ɖěbǔ ná tɔ́n gbɔn fí e é gbɔn bo byɔ́ mɛ é ǎ, ɖó hɔntogbó e kpan nukɔn yě lɛ́ é nu wɛ yě ɖó ná tɔ́n gbɔn. 10 Gǎn e ɖo tɛ́ntin yětɔn é ɔ, éyɛ́ ná byɔ́ mɛ hwenu e yě ná byɔ́ mɛ é, bo ná tɔ́n hwenu e yě ná tɔ́n é. 11 Ðo xwe lɛ́ hwenu kpó awǎjijɛ hwenu lɛ́ kpó ɔ, nǔníná jinukún tɔn efáa ɖokpó wɛ ná jɛ nyibúsú wínnyáwínnyá ɔ jí, bɔ efáa ɖokpó ná jɛ agbo ɔ jí, bɔ é ná ná nǔ ɖěbǔ e wú é kpé é dó lɛ̌ngbɔ́ví asú lɛ́ jí; é ná sɔ́ ami hǐni ɖokpó dó nǔníná jinukún tɔn efáa ɖokpó ɖokpó jí.
12 “‘Ényí vɔ̌ e è nɔ dó blěbú tɔn zo é sín nǔníná, alǒ kɔnɖókpɔ́vɔ́ lɛ́ sín nǔníná wɛ gǎn ɔ sɔ́ jó, bɔ é ná nyí nǔníná e mɛɖésúnɔ jló bo ná Jexóva é ɔ, è ná hun hɔntogbó e kpan nukɔn zǎnzǎnhwe jí é n’i, bɔ é ná sɔ́ vɔ̌ e è nɔ dó blěbú tɔn zo é sín nǔníná ɔ kpó kɔnɖókpɔ́vɔ́ lɛ́ sín nǔníná ɔ kpó jó, lěe é nɔ bló gbɔn ɖo gbɔjɛzángbe é ɖɔhun. Ényí é tɔ́n gúdo ɔ, è ná sú hɔntogbó ɔ.
13 “‘Ðo azǎn ɖokpó ɖokpó jí ɔ, a ná nɔ sɔ́ lɛ̌ngbɔ́ví asú e ma ɖó blɔ̌ ɖo wǔ ǎ, bo ɖo xwe ɖokpó mɔ̌ ɖó wɛ é jó bɔ é ná nyí vɔ̌ e è nɔ dó blěbú tɔn zo é sín nǔníná nú Jexóva. A ná nɔ wa mɔ̌ zǎnzǎn lɛ́ bǐ. 14 Gɔ́ nú énɛ́ ɔ, zǎnzǎn tɛgbɛ ɔ, nǔníná jinukún tɔn e a ná nɔ sɔ́ jó é ɖíe: efáa ɖokpó sín ayizɛ́nvlɔ́ɖó, bɔ ami hǐni ɖokpó sín atɔnvlɔ́ɖó ná gɔ́ ná bonú è ná fúnfún dó linfín ɖagbe ɖagbe ɔ jí. Nǔníná jinukún tɔn e è ná nɔ xwlé Jexóva ɖo gbesisɔmɛ é nɛ́. Gbetakɛ́n ɖé wɛ bo ná nɔ ayǐ káká sɔ́yi. 15 Zǎnzǎn tɛgbɛ ɔ, è ɖó ná nɔ sɔ́ lɛ̌ngbɔ́ví asú ɔ, nǔníná jinukún tɔn ɔ kpó ami ɔ kpó jó, bɔ è ná nɔ dó xwlé vɔ̌ e è nɔ dó blěbú tɔn zo é ná ɖo gbesisɔmɛ.’
16 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ényí gǎn ɔ ná ayǐkúngban sín gǔ vǐ tɔn lɛ́ ɖokpó ɖokpó ɔ, nǔníná énɛ́ ná húzú nǔɖókan vǐ tɔn lɛ́ tɔn. Nǔɖókan e sín gǔ yě ɖu é wɛ. 17 Amɔ̌, ényí é ná gǔ tɔn ɖě mɛsɛntɔ́ tɔn lɛ́ ɖě ɔ, nǔníná énɛ́ ná nyí mɛsɛntɔ́ ɔ tɔn káká jɛ mɛɖéesíjijɛxwe ɔ mɛ, énɛ́ gúdo ɔ, é ná lɛ́ kɔ nú nǔníná ɔ nú gǎn ɔ. Vǐ tɔn lɛ́ kɛ́ɖɛ́ wɛ ná hɛn gǔ yětɔn káká sɔ́yi. 18 Gǎn ɔ ná yí togun ɔ sín gǔ ɖě ǎ, é ná nya yě gǎnnugǎnnu sín ayǐkúngban yětɔn jí ǎ. Nǔ e nyí éɖésúnɔ tɔn é mɛ wɛ é ná kpɔ́n dó ná gǔ vǐ tɔn lɛ́, énɛ́ ɔ, è ná nya mɛ ɖě ɖo togun ce mɛ sín ayǐkúngban tɔn jí ǎ.’”
19 Énɛ́ gúdo ɔ, é kplá mì byɔ́ mɛ gbɔn ali e ɖo hɔntogbó e kplá mɛ yi nǔɖuɖuxɔsá* mímɛ́ vɔ̌sánúxwlémawutɔ́ lɛ́ tɔn kpá é nu; nǔɖuɖuxɔsá lɛ́ kpan nukɔn totaligbé, bɔ ɖo fínɛ́ ɔ, un mɔ fí ɖé ɖo tó dɔ̌n kpanta gbadahwe jí. 20 É ɖɔ nú mì ɖɔ: “Fínɛ́ wɛ vɔ̌sánúxwlémawutɔ́ lɛ́ ná nɔ fyɛ́ sin nǔwanyidovɔ́ ɔ kpó hwɛhuhuvɔ́ ɔ kpó ɖe. Fínɛ́ wɛ yě ná nɔ lɛ́ ɖa nǔníná jinukún tɔn ɔ ɖe; mɔ̌ mɛ ɔ, yě ná sɔ́ nǔ ɖěbǔ tɔ́n yi kɔ́xota ɖaxó ɔ, bo ná bló bɔ togun ɔ ná húzú mɛ mímɛ́* ǎ.”
21 É kplá mì tɔ́n jɛ kɔ́xota ɖaxó ɔ, bo kplá mì gbɔn kɔ́xota ɔ sín zwe ɛnɛ lɛ́ mɛ, bɔ un mɔ kɔ́xota ɖokpó ɖo kɔ́xota ɔ sín zwe ɖokpó ɖokpó jí. 22 Kɔ́xota kpɛví lɛ́ ɖo kɔ́xota ɔ sín zwe ɛnɛ lɛ́ jí, bɔ ga yětɔn bló awabá* 40, lobɔ gblǒ yětɔn blǒ awabá 30. Jlɛ̌ ɖokpó ɔ wɛ kɔ́xota ɛnɛ lɛ́ ɖó.* 23 È mɛ nǔ* lɛ́ lɛ̌ dó kɔ́xota ɛnɛ lɛ́, bɔ ɖo nǔ e è mɛ lɛ́ lɛ̌ dó lɛ́ é sín do ɔ, è bló fí e è ná nɔ fyɛ́ sin vɔ̌sánú lɛ́ ɖe lɛ́ é. 24 Énɛ́ gúdo ɔ, é ɖɔ nú mì ɖɔ: “Fí énɛ́ lɛ́ wɛ mɛ e nɔ wa sinsɛnzɔ́ ɖo sinsɛnxɔ ɔ mɛ lɛ́ é nɔ fyɛ́ sin togun ɔ sín vɔ̌sánú lɛ́ ɖe.”