Ezekiyɛ́li

48 “Bɛ́ sín totaligbé bǐ ɔ, akɔta lɛ́ sín nyǐkɔ lɛ́ ɖíe: Dan sín ayǐkúngban gbɔn Hetlɔ́ni sín ali jí yi Lɛbo-Hamáti* káká yi Hasáa-Ɛnáni, bo gbɔn dogbó Damási tɔn jí tunta totaligbé ɖo Hamáti kpá; é vlɔ́n kan sín dogbó zǎnzǎnhwe jí tɔn ɔ jí káká yi dogbó gbadahwe jí tɔn ɔ jí. 2 Ayǐkúngban Acɛ́ɛ tɔn kpé dogbó xá Dan tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 3 Ayǐkúngban Nɛfutáli tɔn kpé dogbó xá Acɛ́ɛ tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 4 Ayǐkúngban Manasée tɔn kpé dogbó xá Nɛfutáli tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 5 Ayǐkúngban Eflayímu tɔn kpé dogbó xá Manasée tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 6 Ayǐkúngban Hwlibɛ́ni tɔn kpé dogbó xá Eflayímu tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 7 Ayǐkúngban Judáa tɔn kpé dogbó xá Hwlibɛ́ni tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 8 Ðo dogbó Judáa tɔn jí, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí ɔ, nǔníná e mi ɖó ná ɖe ɖó vo é sín gblǒ ná bló awabá* 25 000. Dogbó tɔn lɛ́ sín ga ná sɔgbe xá akɔta e kpó é kpó kpé dogbó lɛ́ é sín ayǐkúngban lɛ́ tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. Mawuxɔ ɔ ná ɖo tɛ́ntin tɔn.

9 “Nǔníná e mi ná ɖe ɖó vo nú Jexóva é sín ga ná bló awabá 25 000, bɔ gblǒ tɔn ná bló awabá 10 000. 10 Nǔníná mímɛ́ wɛ é ná nyí nú vɔ̌sánúxwlémawutɔ́ lɛ́. É ná bló awabá 25 000 ɖo totaligbé kpáxwé, 10 000 ɖo gbadahwe jí, 10 000 ɖo zǎnzǎnhwe jí, 25 000 ɖo tofɔligbé. Sinsɛnxɔ Jexóva tɔn ná ɖo tɛ́ntin tɔn. 11 É ná nyí vɔ̌sánúxwlémawutɔ́ e è ɖe ɖó vo ɖo kúnkan Sadɔ́ki tɔn mɛ lɛ́ é tɔn; yědɛɛ lɛ́ kpé nukún dó azɔ̌ yětɔn lɛ́ wú ganjí ɖo nukɔn ce, bo zɛ gbě ǎ, hwenu e Izlayɛ́li ví lɛ́ kpó Levíi ví lɛ́ kpó wa mɔ̌ é. 12 Yě ná ɖó ayǐkúngban ɖé ɖo nǔníná to ɔ tɔn e è ɖe ɖó vo bɔ é nyí nǔ mímɛ́ hú gǎn bǐ é mɛ, bɔ é ná kpé dogbó xá ayǐkúngban Levíi ví lɛ́ tɔn.

13 “Ðo vɔ̌sánúxwlémawutɔ́ lɛ́ sín ayǐkúngban kpá tlóló ɔ, Levíi ví lɛ́ ná ɖó ayǐkúngban ɖé bɔ ga tɔn ná bló awabá 25 000, bɔ gblǒ tɔn ná bló awabá 10 000. (Ga ɔ blěbú ná bló awabá 25 000, bɔ gblǒ ɔ ná bló awabá 10 000.) 14 Yě ɖó ná sa akpáxwé ɖagbe hú gǎn ayǐkúngban ɔ tɔn énɛ́ ǎ, yě ka ɖó ná sɔ́ dó ɖyɔ́ ɖěvo, alǒ sɔ́ jó nú mɛ e ma nyí Levíi ví ǎ é ǎ, ɖó nǔ mímɛ́ wɛ é nyí nú Jexóva.

15 “Tɛnmɛ e kpo bɔ gblǒ tɔn bló awabá 5 000, bɔ é ɖo dogbó e ga tɔn bló awabá 25 000 é kpá é ɔ, è ná zán nú nǔ kpaa e è nɔ wa ɖo toxo ɔ mɛ lɛ́ é. È ná gbá xɔ d’é jí bɔ amagbo ná lɛ́ nɔ fínɛ́. Toxo ɔ ná ɖo tɛ́ntin tɔn. 16 Jlɛ̌ e toxo ɔ ɖó lɛ́ é ɖíe: dogbó totaligbé tɔn ɔ bló awabá 4 500, dogbó tofɔligbé tɔn ɔ bló awabá 4 500, dogbó zǎnzǎnhwe jí tɔn ɔ bló awabá 4 500, bɔ dogbó gbadahwe jí tɔn ɔ bló awabá 4 500. 17 Amagbo e ná lɛ́ lɛ̌ dó toxo ɔ é ná bló awabá 250 ɖo totaligbé, 250 ɖo tofɔligbé, 250 ɖo zǎnzǎnhwe jí, 250 ɖo gbadahwe jí.

18 “Tɛnmɛ e kpo é sín ga ná sɔgbe xá nǔníná mímɛ́ ɔ, é ná bló awabá 10 000 ɖo zǎnzǎnhwe jí, awabá 10 000 ɖo gbadahwe jí. É ná sɔgbe xá nǔníná mímɛ́ ɔ, bɔ sínsɛ́n tɔn lɛ́ ná nɔ ná nǔɖuɖu mɛ e nɔ w’azɔ̌ nú toxo ɔ lɛ́ é. 19 Mɛ e nɔ w’azɔ̌ nú toxo ɔ, bo gosín akɔta Izlayɛ́li tɔn lɛ́ bǐ mɛ lɛ́ é ná nɔ lɛ gle ɖ’é jí.

20 “Nǔníná ɔ blěbú ɖó gblǒ zɛ̌ɛ́n ga zɛ̌ɛ́n: awabá 25 000. Mi ɖó ná ɖe ɖó vo bɔ é ná nyí nǔníná mímɛ́, gɔ́ nú nǔɖókan toxo ɔ tɔn.

21 “Fí e kpo bo ɖo akpá we lɛ́ xwé nú nǔníná mímɛ́ ɔ kpó nǔɖókan toxo ɔ tɔn kpó lɛ́ é ná nyí gǎn ɔ tɔn. É ná ɖo dogbó e awabá tɔn bló 25 000, bo ɖo zǎnzǎnhwe jí kpó gbadahwe jí kpó nú nǔníná ɔ é kpá. É ná sɔgbe xá ayǐkúngban ɖěɖěe ɖo akpá tɔn lɛ́ é, bɔ é ná nyí gǎn ɔ tɔn. Nǔníná mímɛ́ ɔ kpó mawuxɔ ɔ kpó ná ɖo tɛ́ntin tɔn.

22 “Nǔɖókan Levíi ví lɛ́ tɔn kpó nǔɖókan toxo ɔ tɔn kpó ná ɖo nǔ e nyí gǎn ɔ tɔn lɛ́ é tɛ́ntin. Gǎn ɔ sín ayǐkúngban ná ɖo dogbó Judáa tɔn kpó dogbó Bɛnjamɛ́ɛ tɔn kpó tɛ́ntin.

23 “Nú akɔta e kpo lɛ́ é ɔ, ayǐkúngban Bɛnjamɛ́ɛ tɔn gosín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 24 Ayǐkúngban Sinmɛnyɔ́ɔ tɔn kpé dogbó xá Bɛnjamɛ́ɛ tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 25 Ayǐkúngban Isakáa tɔn kpé dogbó xá Sinmɛnyɔ́ɔ tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 26 Ayǐkúngban Zabulɔ́ɔn tɔn kpé dogbó xá Isakáa tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 27 Ayǐkúngban Gadi tɔn kpé dogbó xá Zabulɔ́ɔn tɔn, sín dogbó zǎnzǎnhwe jí tɔn ɔ jí yi dogbó gbadahwe jí tɔn ɔ jí. 28 Dogbó tofɔligbé tɔn ɔ kpé dogbó xá ayǐkúngban Gadi tɔn, é ná gosín Tamáa káká yi Mɛlíba-Kadɛ́ci sín sin ɔ kɔn bo yi Tɔsisa ɔ* kɔn, bo lɛ́ yi Xu Ðaxó ɔ* kɔn.

29 “Ayǐkúngban e mi ná má nú akɔta Izlayɛ́li tɔn lɛ́, bɔ é ná nyí gǔ yětɔn é nɛ́; mǐmá yětɔn lɛ́ nɛ́,” wɛ Aklúnɔ Nǔbǐwúkpétɔ́ Jexóva ɖɔ.

30 “Fí e è ná nɔ gbɔn bo ná nɔ tɔ́n sín toxo ɔ mɛ lɛ́ é ɖíe: akpáxwé totaligbé tɔn sín jlɛ̌ ná bló awabá 4 500.

31 “Akɔta Izlayɛ́li tɔn lɛ́ sín nyǐkɔ lɛ́ wɛ è ná ná toxo ɔ sín hɔntogbó lɛ́. Hɔntogbó atɔn e ɖo totaligbé lɛ́ é ɔ, ɖokpó nyí Hwlibɛ́ni tɔn, ɖokpó nyí Judáa tɔn, bɔ ɖokpó nyí Levíi tɔn.

32 “Akpáxwé zǎnzǎnhwe jí tɔn ɔ sín ga ná bló awabá 4 500, bɔ hɔntogbó atɔn ná ɖo fínɛ́: ɖokpó nyí Jozɛ́fu tɔn, ɖokpó nyí Bɛnjamɛ́ɛ tɔn, bɔ ɖokpó nyí Dan tɔn.

33 “Akpáxwé tofɔligbé tɔn ɔ sín jlɛ̌ ná bló awabá 4 500, bɔ é ná ɖó hɔntogbó atɔn: ɖokpó nyí Sinmɛnyɔ́ɔ tɔn, ɖokpó nyí Isakáa tɔn, bɔ ɖokpó nyí Zabulɔ́ɔn tɔn.

34 “Akpáxwé gbadahwe jí tɔn ɔ sín ga ná bló awabá 4 500, bɔ é ná ɖó hɔntogbó atɔn: ɖokpó nyí Gadi tɔn, ɖokpó nyí Acɛ́ɛ tɔn, bɔ ɖokpó nyí Nɛfutáli tɔn.

35 “Toxo ɔ sín jlɛ̌ lɛ́ lɛ̌ dó ná bló awabá 18 000. Bɛ́ sín gbe énɛ́ gbe ɖidó ɔ, toxo ɔ sín nyǐkɔ ná nyí Jexóva ɖo fínɛ́.”