Ezekiyɛ́li
45 “‘Hwenu e mi ná má ayǐkúngban ɔ gǔ ɖɔhun é ɔ, mi ɖó ná ɖe kanta mímɛ́ ɖé ɖó vo nú Jexóva, bɔ é ná nyí nǔníná ɖé. Ga tɔn ná bló awabá* 25 000, bɔ gblǒ tɔn ná bló awabá 10 000. Fí énɛ́ blěbú* ná nyí akpáxwé mímɛ́. 2 Tɛnmɛ e ɖó gblǒ zɛ̌ɛ́n gǎ zɛ̌ɛ́n é ɖé ná ɖ’é mɛ, bo ná nyí fí mímɛ́ ɔ tɔn, bɔ akpáxwé tɔn lɛ́ ɖokpó ɖokpó ná bló awabá 500;* é ná ɖó amagbo ɖo awa lɛ́ ɖokpó ɖokpó xwé, bɔ gblǒ yětɔn ná bló awabá 50. 3 A ná jlɛ́ akpáxwé ɖé sín ayǐkúngban énɛ́ e è jlɛ́ é mɛ bɔ ga tɔn ná bló 25 000 bɔ gblǒ tɔn ná bló 10 000, bɔ mawuxɔ ɔ, énɛ́ wɛ nyí nǔ mímɛ́ bǐ ɔ ná nɔ jí. 4 Kanta mímɛ́ ayǐkúngban ɔ tɔn ɖé wɛ é ná nyí nú vɔ̌sánúxwlémawutɔ́ lɛ́; yědɛɛ lɛ́ wɛ nyí sinsɛnzɔ́watɔ́ ɖo mawuxɔ ɔ mɛ, bo nɔ sɛkpɔ́ Jexóva dó wa sinsɛnzɔ́ n’i. Fí ɖé wɛ bɔ xwé yětɔn lɛ́ ná nɔ bɔ é lɛ́ nyí fí e è ɖe ɖó vo nú mawuxɔ ɔ é.
5 “‘Akpáxwé ɖé ná nyí Levíi ví e nɔ wa sinsɛnzɔ́ ɖo sinsɛnxɔ ɔ mɛ lɛ́ é tɔn, bɔ ga tɔn ná bló awabá 25 000, bɔ gblǒ tɔn ná bló awabá 10 000; gɔ́ ná ɔ, nǔɖuɖuxɔsá* 20 ná nyí nǔɖókan yětɔn.
6 “‘Mi ɖó ná ná nɔtɛn ɖé bɔ é ná nyí nǔɖókan toxo ɔ tɔn bɔ ga tɔn ná bló awabá 25 000 (sɔgbe xá nǔníná mímɛ́ ɔ), bɔ gblǒ tɔn ná bló awabá 5 000. É ná nyí togun Izlayɛ́li tɔn ɔ bǐ tɔn.
7 “‘Gǎn ɔ ná ɖó ayǐkúngban ɖo awa we lɛ́ bǐ xwé nú nǔníná mímɛ́ ɔ kpó tɛnmɛ e è kán nú toxo ɔ é kpó. É ná ɖo nǔníná mímɛ́ ɔ kpó nǔɖókan toxo ɔ tɔn kpó kpá. É ná ɖo akpáxwé gbadahwe jí tɔn ɔ, bo lɛ́ ɖo akpáxwé zǎnzǎnhwe jí tɔn ɔ. Bɛ́ sín dogbó gbadahwe jí tɔn ɔ jí, yi dogbó zǎnzǎnhwe jí tɔn ɔ jí ɔ, ga tɔn ná sɔgbe xá kanta akɔta lɛ́ ɖokpó tɔn sín ga. 8 Ayǐkúngban énɛ́ ná húzú nǔɖókan tɔn ɖo Izlayɛ́li. Gǎn e un sɔ́ lɛ́ é sɔ́ ná nɔ xo dǎka togun ce wú ɖě ǎ, bɔ yě ná ná ayǐkúngban togun Izlayɛ́li tɔn, bɔ akɔta ɖokpó ɖokpó ná yí kanta ɖé ɖ’é mɛ.’
9 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Gǎn Izlayɛ́li tɔn lɛ́ è mi, nǔwiwa mitɔn lɛ́ wá zɛ kpá bǐ!’
“‘Mi ma sɔ́ nɔ xo dǎka ɖě alǒ dó ya nú mɛ ɖě ó. Mi ní nɔ wa nǔ e sɔgbe é bo nɔ lɛ́ wa nǔ jlɔ́jlɔ́. Mi ma sɔ́ nɔ klá jɛ togun ce sín ayǐkúngban nu ɖě ó,’ wɛ Aklúnɔ Nǔbǐwúkpétɔ́ Jexóva ɖɔ. 10 ‘Mi ní nɔ zán nǔdagan e sɔgbe lɛ́ é, nǔjlɛ́nú efáa* e sɔgbe é kpó nǔjlɛ́nú bǎti* e sɔgbe é kpó. 11 Nǔjlɛ́nú efáa ɖó ná ɖó jlɛ̌ tɔn, bɔ nǔjlɛ́nú bǎti ɖó ná ɖó jlɛ̌ tɔn. Nǔjlɛ́nú bǎti ná nɔ hɛn homɛ́ɛ* mǎɖówǒ, bɔ nǔjlɛ́nú efáa ná nɔ hɛn homɛ́ɛ mǎɖówǒ. Homɛ́ɛ wɛ nyí nǔjlɛ́nú e wú è ná nɔ kpɔ́n dó dó jlɛ́ nǔ é. 12 Síklu* ɖokpó ná bló gěla* 20. Síklu 20 gɔ́ nú síklu 25 gɔ́ nú síklu 15 wɛ ná bló manɛ́ɛ* e mi nɔ zán é ɖokpó.’
13 “‘Nǔníná e mi ná nɔ sɔ́ jó é ɖíe: È ná nɔ ɖe efáa ayizɛ́nvlɔ́ɖó sín blěe homɛ́ɛ ɖokpó mɛ, bo ná nɔ ɖe efáa ayizɛ́nvlɔ́ɖó sín ɔ́ji homɛ́ɛ ɖokpó mɛ. 14 Nǔjlɛ́nú bǎti jí wɛ è ná zɔn dó dó ɖɔ ami nabí e è ɖó ná ná é. Bǎti ɖokpó bló kɔ́ɔ* mǎɖówǒ, bɔ bǎti wǒ bló homɛ́ɛ ɖokpó, ɖó bǎti wǒ wɛ nɔ ná homɛ́ɛ ɖokpó. 15 Ðo lɛ̌ngbɔ́hwan e ɖo Izlayɛ́li lɛ́ é mɛ ɔ, è ná nɔ ɖe lɛ̌ngbɔ́ ɖokpó sín lɛ̌ngbɔ́ 200 mɛ, bo ná nɔ ná. È ná zán nǔ énɛ́ lɛ́ nú nǔníná jinukún tɔn, vɔ̌ e è nɔ dó blěbú tɔn zo é kpó kɔnɖókpɔ́vɔ́ lɛ́ kpó, bo ná dó súnsún hwɛ sín kɔ nú togun ɔ,’ wɛ Aklúnɔ Nǔbǐwúkpétɔ́ Jexóva ɖɔ.
16 “‘Mɛ e nɔ nɔ to ɔ mɛ lɛ́ é bǐ ná nɔ sɔ́ nǔníná énɛ́ jó nú gǎn e ɖo Izlayɛ́li é. 17 Gǎn ɔ wɛ ka ná nɔ kpé nukún dó vɔ̌ e è nɔ dó blěbú tɔn zo lɛ́ é, nǔníná jinukún tɔn ɔ kpó nǔníná vɛ̌ɛn tɔn ɔ kpó wú, ɖo xwe lɛ́, sunwájǐxwe lɛ́ kpó gbɔjɛzán lɛ́ kpó hwenu, ɛɛn, ɖo xwe e è sɔ́ ɖó te nú togun Izlayɛ́li tɔn ɔ lɛ́ é bǐ hwenu. Éyɛ́ wɛ ná nɔ sɔ́ hwɛhuhuvɔ́ ɔ, nǔníná jinukún tɔn ɔ, vɔ̌ e è nɔ dó blěbú tɔn zo é kpó kɔnɖókpɔ́vɔ́ lɛ́ kpó sín nǔníná lɛ́ jó, bónú è ná dó súnsún hwɛ sín kɔ nú togun Izlayɛ́li tɔn.’
18 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðo sun nukɔntɔn ɔ sín azǎn nukɔntɔn ɔ gbe ɔ, a ná sɔ́ nyibúsú wínnyáwínnyá e ma ɖó blɔ̌ ɖo wǔ ǎ é ɖokpó ɖo kanlinhwan ɔ mɛ, bo ná slá wǔ nú mawuxɔ ɔ sín hwɛhuhu sí. 19 Vɔ̌sánúxwlémawutɔ́ ɔ ná yí hwɛhuhuvɔ́ ɔ sín hun ɖě, bo ná sá dó sinsɛnxɔ ɔ sín dotín lɛ́ wú, dó akpáxwé ɖaxó vɔ̌sákpe ɔ tɔn sín zo ɛnɛ lɛ́ wú, bo lɛ́ sá dó hɔntogbó kɔ́xota kpɛví ɔ tɔn sín dotín lɛ́ wú. 20 Nǔ e a ná lɛ́ wa ɖo sun ɔ sín azǎn tɛ́nwegɔ́ ɔ gbe, dó mɛ ɖěbǔ e ma jló ǎ bo hu hwɛ, alǒ hu hwɛ ɖo manywɛ́ mɛ é tamɛ é nɛ́; mi ɖó ná lɛ́ slá wǔ nú sinsɛnxɔ ɔ.
21 “‘Ðo azǎn 14gɔ́ sun nukɔntɔn ɔ tɔn gbe ɔ, mi ná ɖu Dǐndínwáyixwe ɔ. È ná ɖu wɔ̌xúxú e mɛ è ma dó tɔ́n ǎ é nú azǎn tɛ́nwe. 22 Ðo azǎn énɛ́ gbe ɔ, gǎn ɔ ná sɔ́ nyibúsú wínnyáwínnyá ɖokpó jó, bónú è ná dó sá hwɛhuhuvɔ́ dó éɖésúnɔ kpó mɛ e ɖo to ɔ mɛ lɛ́ é bǐ kpó tamɛ. 23 Nú azǎn tɛ́nwe e è ná ɖu xwe ɔ ná lɛ́ é ɔ, é ná sɔ́ nyibúsú wínnyáwínnyá e ma ɖó blɔ̌ ɖo wǔ ǎ é tɛ́nwe kpó agbo e ma ɖó blɔ̌ ɖo wǔ ǎ é tɛ́nwe kpó jó ɖo azǎn tɛ́nwe lɛ́ ɖokpó ɖokpó jí, bónú è ná dó sá vɔ̌ e è nɔ dó blěbú tɔn zo é ná nú Jexóva; é ná lɛ́ sɔ́ gbagbǎ ɖokpó jó ɖo azǎn ɖokpó ɖokpó jí, bónú è ná sá hwɛhuhuvɔ́ ná. 24 É ná lɛ́ sɔ́ nǔníná jinukún tɔn nǔjlɛ́nú efáa ɖokpó jó dó nyibúsú wínnyáwínnyá ɖokpó ɖokpó jí, bo ná lɛ́ sɔ́ nǔníná jinukún tɔn nǔjlɛ́nú efáa ɖokpó jó dó agbo ɖokpó ɖokpó jí, mɔ̌ ɖokpó ɔ, é ná sɔ́ ami nǔjlɛ́nú hǐni* ɖokpó jó dó nǔníná jinukún tɔn nǔjlɛ́nú efáa ɖokpó ɖokpó jí.
25 “‘Bɛ́ sín azǎn 15gɔ́ sun tɛ́nwegɔ́ ɔ tɔn gbe ɔ, ɖo azǎn tɛ́nwe e è ná ɖu xwe ɔ ná lɛ́ é ɖokpó ɖokpó jí ɔ, hwɛhuhuvɔ́ sín nǔníná ɖokpó ɔ, vɔ̌ e è nɔ dó blěbú tɔn zo é sín nǔníná ɖokpó ɔ, nǔníná jinukún tɔn ɖokpó ɔ kpó ami ɖokpó ɔ kpó wɛ é ná sɔ́ jó.’”