Ezekiyɛ́li
44 É kplá mì lɛ́ kɔ wá sinsɛnxɔ ɔ sín hɔntogbó kɔ́xota tɔn e kpan nukɔn zǎnzǎnhwe jí é kɔn, bɔ é ɖo súsú jí. 2 Énɛ́ gúdo ɔ, Jexóva ɖɔ nú mì ɖɔ: “Hɔntogbó élɔ́ ná nɔ súsú jí. È ɖó ná hun ǎ, bɔ gbɛtɔ́ ɖěbǔ ɖó ná gbɔn nu dín ǎ; ɖó Jexóva, Mawu Izlayɛ́li tɔn gbɔn nu dín; énɛ́ wú ɔ, é ɖó ná nɔ súsú jí. 3 É ɖo mɔ̌ có, gǎn ɔ ná nɔ jínjɔ́n fínɛ́ bo ná nɔ ɖu wɔ̌xúxú ɖo Jexóva nukɔn, ɖó gǎn wɛ é nyí. É ná nɔ byɔ́ mɛ gbɔn hɔntogbó ɔ sín hɔnnúwa nu, bo ná nɔ lɛ́ tɔ́n gbɔn fínɛ́.”
4 Énɛ́ gúdo ɔ, é kplá mì gbɔn hɔntogbó totaligbé tɔn ɔ nu yi sinsɛnxɔ ɔ sín nukɔn. Ée un kpɔ́n é ɔ, un mɔ bɔ susu Jexóva tɔn kpé sinsɛnxɔ Jexóva tɔn mɛ. Énɛ́ ɔ, un xwe agbɔ̌nnusú do. 5 Énɛ́ gúdo ɔ, Jexóva ɖɔ nú mì ɖɔ: “Gbɛtɔ́ví è, ɖǒ ayi te,* kpɔ́n, bo ɖótó nǔ e ɖɔ nú we wɛ un ɖe dó sinsɛnxɔ Jexóva tɔn sín gbetakɛ́n lɛ́ kpó sɛ́n lɛ́ kpó wú lɛ́ é bǐ ganjí. Ðǒ ayi sinsɛnxɔ ɔ sín alinu kpó fí e è nɔ tɔ́n sín mawuxɔ ɔ mɛ gbɔn lɛ́ é bǐ kpó wú ganjí. 6 A ɖó ná ɖɔ nú togun Izlayɛ́li tɔn gǔfɔ́ntɔ́ ɔ ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Togun Izlayɛ́li tɔn è mi, nǔwalɔ xyɔ́ wǔ mitɔn lɛ́ kpé mɔ̌! 7 Ényí mi kplá toɖévomɛnu ɖěɖěe è ma gbo ada ná ǎ, bɔ ɖo ayi mɛ ɔ, yě ma ka lɛ́ gbo ada ǎ lɛ́ é wá sinsɛnxɔ ce mɛ ɔ, yě nɔ ɖu su nú sinsɛnxɔ ce. Mi nɔ xwlé nǔɖuɖu* ce mì, énɛ́ wɛ nyí jǒ kpó hun kpó, bɔ ɖo hwe ɖokpó ɔ nu ɔ, mi nɔ gba akɔjijɛ ce gbɔn nǔwalɔ xyɔ́ wǔ mitɔn lɛ́ bǐ gblamɛ. 8 Mi kpé nukún dó nǔ mímɛ́ ce lɛ́ wú ǎ. É nyɔ́ wa ɔ, mɛ ɖěvo lɛ́ wɛ mi zɔ́n ɖɔ yě ní nɔ wa azɔ̌ lɛ́ ɖo sinsɛnxɔ ce mɛ.”’
9 “‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Toɖévomɛnu ɖěɖěe nɔ nɔ Izlayɛ́li, bɔ è ma gbo ada ná ǎ, bɔ ɖo ayi mɛ ɔ, yě ma ka lɛ́ gbo ada ǎ lɛ́ é ɖě sixú byɔ́ sinsɛnxɔ ce mɛ ǎ.”’
10 “‘Amɔ̌, Levíi ví ɖěɖěe jɛ zɔ nú mì, hwenu e Izlayɛ́li ví lɛ́ jɛ zɔ nú mì bo xwedó bǒcyɔ xyɔ́ wǔ* yětɔn lɛ́ é ná hɛn nǔ e nǔwanyido yětɔn ji lɛ́ é sín agban. 11 Yě ná húzú mɛsɛntɔ́ ɖo sinsɛnxɔ ce mɛ, bo ná dó nɔ kpé nukún dó sinsɛnxɔ ɔ sín hɔntogbó lɛ́ wú, bo lɛ́ wa sinsɛnzɔ́ ɖo sinsɛnxɔ ɔ mɛ. Yě ná nɔ hu kanlin dó sá vɔ̌ e è nɔ dó blěbú tɔn zo lɛ́ é kpó vɔ̌ ɖěvo lɛ́ kpó dó togun ɔ tamɛ, bɔ yě ná nɔ te ɖo togun ɔ nukɔn, bo ná nɔ wa sinsɛnzɔ́ nú yě. 12 Ðó yě wa sinsɛnzɔ́ nú togun ɔ ɖo bǒcyɔ xyɔ́ wǔ tɔn lɛ́ nukɔn, bo húzú afɔklɛ́nnú e dɔn togun Izlayɛ́li tɔn dó hwɛhuhu mɛ é wútu ɔ, un zé alɔ dó jǐ bo xwlé nǔ ɖɔ un ná wa nǔ xá yě,’ wɛ Aklúnɔ Nǔbǐwúkpétɔ́ Jexóva ɖɔ, ‘bɔ yě ná hɛn nǔ e nǔwanyido yětɔn ji lɛ́ é sín agban. 13 Yě ná sɛkpɔ́ mì, bo ná wa vɔ̌sánúxwlémawutɔ́zɔ́ nú mì ǎ, mɔ̌ jɛ́n yě ma ná sɛkpɔ́ nǔ mímɛ́ ce lɛ́, alǒ nǔ mímɛ́ hú gǎn ce lɛ́ ɖě ǎ é nɛ́, bɔ yě ná hɛn winnyágban yětɔn, ɖó nǔ e xyɔ́ wǔ bɔ yě wa lɛ́ é wú. 14 É ɖo mɔ̌ có, un ná bló bɔ yě ná nɔ kpé nukún dó sinsɛnxɔ ɔ sín azɔ̌ lɛ́ wú, bɔ yě ná nɔ kpé nukún dó azɔ̌ tɔn lɛ́ kpó nǔ e è ɖó ná wa ɖ’é mɛ lɛ́ é bǐ kpó wú.’
15 “‘Amɔ̌, Levíi ví vɔ̌sánúxwlémawutɔ́ e jɔ ɖo kúnkan Sadɔ́ki tɔn mɛ, bo kpé nukún dó sinsɛnxɔ ce sín azɔ̌ lɛ́ wú hwenu e Izlayɛ́li ví lɛ́ jɛ zɔ nú mì lɛ́ é ɔ, yě ná sɛkpɔ́ mì, bo ná wa sinsɛnzɔ́ nú mì, bo ná nɔ te ɖo nukɔn ce bá xwlé jǒ kpó hun kpó mì,’ wɛ Aklúnɔ Nǔbǐwúkpétɔ́ Jexóva ɖɔ. 16 ‘Yě wɛ nyí mɛ e ná byɔ́ sinsɛnxɔ ce mɛ lɛ́ é, bɔ yě ná sɛkpɔ́ távo ce bo ná wa sinsɛnzɔ́ mímɛ́ nú mì, lobo ná kpé nukún dó azɔ̌ e yě ɖó bo ná wa nú mì lɛ́ é wú.
17 “‘Ényí yě gbɔn hɔntogbó lɛ́ nu yi kɔ́xota kpɛví ɔ ɔ, yě ɖó ná dó lɛ̌ɛnkanvɔ. Yě ɖó ná dó lɛ̌ngbɔ́fúnvɔ ɖě hwenu e yě ɖo sinsɛnzɔ́ wa wɛ ɖo kɔ́xota kpɛví ɔ sín hɔntogbó lɛ́ linu, alǒ ɖo kɔ́xota ɔ é ǎ. 18 Tablá e è sɔ́ lɛ̌ɛnkanvɔ dó bló é wɛ ɖó ná ɖo ta yětɔn, bɔ cokoto kpɛví e è sɔ́ lɛ̌ɛnkanvɔ dó bló lɛ́ é ɖó ná bú alin yětɔn. Yě ɖó ná dó nǔ e ná zɔ́n bɔ yě ná jɛ dɛ̌n é ɖě ǎ. 19 Cóbónú yě ná tɔ́n bo ná yi kɔ́xota ɖaxó ɔ (kɔ́xota ɖaxó, fí e togun ɔ ɖe é) ɔ, yě ɖó ná ɖe awu e mɛ yě nɔ bo wa sinsɛnzɔ́ é, bo bɛ́ yě dó nǔɖuɖuxɔsá* mímɛ́ lɛ́ mɛ. Énɛ́ gúdo ɔ, yě ná dó awu ɖěvo lɛ́, mɔ̌ mɛ ɔ, yě ná bló bɔ togun ɔ ná húzú mɛ mímɛ́* ɖó awu yětɔn lɛ́ wú ǎ. 20 Yě ɖó ná xwlɛ́ ta, alǒ jó ɖa yětɔn lɛ́ dó nú é ɖi ga ǎ. Yě ɖó ná nɔ kpa ɖa. 21 Vɔ̌sánúxwlémawutɔ́ lɛ́ ɖó ná nu vɛ̌ɛn hwenu e yě yi kɔ́xota kpɛví ɔ é ǎ. 22 Yě ɖó ná da asúkúsi, alǒ nyɔ̌nu e gbɛ́ asú é ǎ; amɔ̌, yě sixú da nyɔ̌nu e ɖo alɔjí bo gosín kúnkan Izlayɛ́li tɔn mɛ é ɖé, alǒ asúkúsi vɔ̌sánúxwlémawutɔ́ ɖé tɔn.’
23 “‘Yě ɖó ná kplɔ́n togun ce bɔ yě ná tuun vogbingbɔn e ɖo nǔ e nyí nǔ mímɛ́ é kpó nǔ e nyí nǔ yǎyá é kpó tɛ́ntin é; yě ɖó ná kplɔ́n yě bɔ yě ná tuun vogbingbɔn e ɖo nǔ e nyí nǔ blíblí é kpó nǔ e nyí nǔ mímɛ́ é kpó tɛ́ntin é. 24 Ényí hwɛɖiɖɔxó ɖé wá ɔ, yě wɛ ná nyí hwɛɖɔtɔ́ e ɖó ná nɔ kpé nukún d’é wú é. Yě ɖó ná dá hwɛ ɔ bɔ é ná sɔgbe xá hwɛɖiɖɔ sín gbeta ce lɛ́. Yě ɖó ná nɔ nyi sɛ́n ce lɛ́ kpó gbetakɛ́n ce lɛ́ kpó, ɖěɖěe kunkplá xwe ce lɛ́ bǐ é, bo ná nɔ ɖe gbɔjɛzán ce lɛ́ ɖó vo. 25 Yě ɖó ná sɛkpɔ́ cyɔ ɖě ǎ, é ma nyí mɔ̌ ǎ ɔ, yě ná húzú mɛ blíblí. É ɖo mɔ̌ có, yě sixú hɛn yěɖée blí ɖó tɔ́ yětɔn, nɔ yětɔn, vǐ súnnu yětɔn, vǐ nyɔ̌nu yětɔn, nɔví yětɔn súnnu, alǒ nɔví yětɔn nyɔ̌nu e ma ko da asú ǎ é wú. 26 Ényí vɔ̌sánúxwlémawutɔ́ ɖé lɛ éɖée wé ɔ, é ɖó ná nɔ te nú azǎn tɛ́nwe hwɛ̌ cóbó ná lɛ́ jɛ azɔ̌ wa jí. 27 Hwenu e é ná byɔ́ fí mímɛ́ ɔ, ɛɛn, kɔ́xota kpɛví ɔ, bo ná wa sinsɛnzɔ́ ɖo fí mímɛ́ ɔ é ɔ, é ɖó ná xwlé hwɛhuhuvɔ́ tɔn,’ wɛ Aklúnɔ Nǔbǐwúkpétɔ́ Jexóva ɖɔ.
28 “‘Bɔ nǔ e ná nyí gǔ yětɔn é ɖíe: nyɛ wɛ nyí gǔ yětɔn. Mi ɖó ná ná nǔɖókan ɖě yě ɖo Izlayɛ́li ǎ, ɖó nyɛ wɛ nyí nǔɖókan yětɔn. 29 Yě wɛ ná nɔ ɖu nǔníná jinukún tɔn lɛ́, hwɛhuhuvɔ́ lɛ́ kpó nǔwanyidovɔ́ lɛ́ kpó, bɔ nǔ e è ɖe ɖó vo ɖo Izlayɛ́li lɛ́ é bǐ ná nyí yětɔn. 30 Sínsɛ́n nukɔntɔn e myá bo nyɔ́ hú gǎn lɛ́ é bǐ kpó nǔníná alɔkpa alɔkpa e gosín mi gɔ́n lɛ́ é bǐ kpó ná nyí vɔ̌sánúxwlémawutɔ́ lɛ́ tɔn. Bɔ mi ɖó ná ná linfín nyinya mitɔn nukɔntɔn lɛ́ vɔ̌sánúxwlémawutɔ́ ɔ. Énɛ́ ɔ, nyɔ̌ná ná nɔ xwé mitɔn lɛ́ jí. 31 Vɔ̌sánúxwlémawutɔ́ lɛ́ ɖó ná ɖu xɛ, alǒ kanlin ɖěbǔ e è mɔ kúkú tɔn, alǒ kanlin vún ɖu é ǎ.’