Ezekiyɛ́li
43 Énɛ́ gúdo ɔ, é kplá mì yi hɔntogbó e kpan nukɔn zǎnzǎnhwe jí é kɔn. 2 Ðo fínɛ́ ɔ, un mɔ Mawu Izlayɛ́li tɔn sín susu gosín zǎnzǎnhwe jí jawě, bɔ gbe tɔn cí sin e ɖo sisa wɛ kpó zǐngídi kpó é sín gbe ɖɔhun, bɔ susu tɔn hɔ́n dó ayǐkúngban ɔ jí. 3 Nǔ e un mɔ é cí nǔmimɔ e un mɔ, hwenu e un* wá bo ná gba toxo ɔ hánnyá é ɖɔhun, é cí nǔ e un mɔ ɖo tɔsisa Kebáa tó é ɖɔhun; énɛ́ ɔ, un xwe agbɔ̌nnusú do.
4 Énɛ́ gúdo ɔ, susu Jexóva tɔn byɔ́ sinsɛnxɔ ɔ mɛ* gbɔn hɔntogbó e kpan nukɔn zǎnzǎnhwe jí é nu. 5 Énɛ́ ɔ, gbigbɔ ɖé sɔ́ mì dó jǐ bo kplá mì yi kɔ́xota kpɛví ɔ, bɔ un mɔ bɔ susu Jexóva tɔn kpé sinsɛnxɔ ɔ mɛ. 6 Énɛ́ gúdo ɔ, un se bɔ mɛɖé ɖo xó ɖɔ sɛ́ dó mì wɛ sín sinsɛnxɔ ɔ mɛ, bɔ nya ɔ wá nɔ te akpá ce. 7 É ɖɔ nú mì ɖɔ:
“Gbɛtɔ́ví è, fí e axɔ́súzinkpo ce ɖe é ɖíe, afɔɖótɛn ce ɖíe; fí wɛ un ná nɔ togun Izlayɛ́li tɔn tɛ́ntin ɖe káká sɔ́yi. Togun Izlayɛ́li tɔn sɔ́ ná hɛn nyǐkɔ mímɛ́ ce blí ɖě ǎ, yě kpó axɔ́sú yětɔn lɛ́ kpó sɔ́ ná wa mɔ̌ gbɔn to nyinya ɖo gbigbɔ lixo kpó axɔ́sú yětɔn e kú lɛ́ é sín cyɔ kpó gblamɛ ɖě ǎ. 8 Yě bló bɔ alihɛ́nnu yětɔn bɔ dó alihɛ́nnu ce wú, lobɔ hɔn yětɔn sín dotín ɖo hɔn ce sín dotín kpá, bɔ dǒ ɖokpó géé wɛ ɖo nyi kpó yě kpó tɛ́ntin, mɔ̌ mɛ ɔ, yě hɛn nyǐkɔ mímɛ́ ce blí gbɔn nǔ e xyɔ́ wǔ bɔ yě wa lɛ́ é gblamɛ. Énɛ́ wú ɔ, ɖo xomɛsin ce mɛ ɔ, un sú kún yětɔn dó. 9 Din ɔ, yě ní sɛ to nyinya ɖo gbigbɔ lixo kpó axɔ́sú yětɔn lɛ́ sín cyɔ lɛ́ kpó dó zɔ nú mì, énɛ́ ɔ, un ná nɔ tɛ́ntin yětɔn káká sɔ́yi.
10 “Amɔ̌ hwɛ gbɛtɔ́ví è, tínmɛ lěe sinsɛnxɔ ɔ cí é nú togun Izlayɛ́li tɔn, bónú winnyá ní hu yě dó nǔwanyido yětɔn lɛ́ wú; yě ɖó ná kplɔ́n sinsɛnxɔ ɔ sín ɖiɖe.* 11 Ényí winnyá hu yě dó nǔ e yě wa lɛ́ é bǐ wú ɔ, a ɖó ná ɖɔ xó nú yě dó sinsɛnxɔ ɔ sín ɖiɖe, lěe è bló gbɔn é, fí e è nɔ gbɔn tɔ́n lɛ́ é kpó alinu tɔn lɛ́ kpó wú. Xlɛ́ yě ɖiɖe tɔn lɛ́ bǐ kpó gbetakɛ́n tɔn lɛ́ kpó, ɖiɖe tɔn lɛ́ kpó sɛ́n tɔn lɛ́ kpó, bo wlán yě ɖ’ayǐ ɖo nukún yětɔn mɛ, bónú yě ní dó sixú gbéjé ɖiɖe tɔn bǐ kpɔ́n bo lɛ́ xwedó gbetakɛ́n tɔn lɛ́. 12 Sinsɛnxɔ ɔ sín sɛ́n ɖíe: ayǐkúngban e lɛ́ lɛ̌ dó só ɔ tanu lɛ́ é bǐ wɛ mɛ́ bɔ nǔ bǐ vɔ ɖ’é wú. Ɛɛn, sinsɛnxɔ ɔ sín sɛ́n nɛ́.
13 “Nǔjlɛ́nú awabá (è gɔ́ alɔkpákpámɛ sín gblǒ ɖokpó nú awabá ɖokpó ɖokpó)* wɛ è zán dó jlɛ́ vɔ̌sákpe ɔ. Dodónu tɔn sín jǐyiyi bló awabá ɖokpó, bɔ gblǒ ɔ bló awabá ɖokpó. Nǔ gbɔn tó tɔn lɛ́ lɛ̌ dó, bɔ gblǒ tɔn bló alɔbá* ɖokpó. Vɔ̌sákpe ɔ sín dodónu nɛ́. 14 Bɛ́ sín dodónu ɔ jí ɖo kɔ́mɛ yi akpáxwé kpɛví vɔ̌sákpe ɔ tɔn sín tanu ɔ, é bló awabá we, bɔ gblǒ tɔn bló awabá ɖokpó. Sín akpáxwé kpɛví ɔ tanu yi akpáxwé ɖaxó ɔ tanu ɔ, é bló awabá ɛnɛ bɔ gblǒ tɔn bló awabá ɖokpó. 15 Adogwle vɔ̌sákpe ɔ tɔn sín jǐyiyi bló awabá ɛnɛ, bɔ zo ɛnɛ tɔ́n ta ɖo vɔ̌sákpe ɔ sín adogwle jí. 16 Vɔ̌sákpe ɔ sín adogwle ɖó gblǒ zɛ̌ɛ́n ga zɛ̌ɛ́n: ga tɔn bló awabá 12 bɔ gblǒ tɔn bló awabá 12. 17 Akpáxwé ɖaxó vɔ̌sákpe ɔ tɔn sín akpáxwé ɛnɛ lɛ́ sín ga bló awabá 14 bɔ gblǒ yětɔn bló awabá 14. Nǔ e gbɔn tó tɔn lɛ́ lɛ̌ dó é bló awabá vlɔ̌, bɔ dodónu tɔn bló awabá ɖokpó ɖo akpáxwé lɛ́ bǐ.
“Kpekán tɔn lɛ́ kpan nukɔn zǎnzǎnhwe jí.”
18 Énɛ́ gúdo ɔ, é ɖɔ nú mì ɖɔ: “Gbɛtɔ́ví è, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Hwenu e è ná bló vɔ̌sákpe ɔ, bónú è ná nɔ xwlé vɔ̌ e è nɔ dó blěbú tɔn zo lɛ́ é ɖ’é jí lobo ná nɔ mì hun d’é jí é ɔ, wěɖexámɛ e è ná nɔ xwedó lɛ́ é ɖíe.’
19 “‘A ná sɔ́ nyibúsú wínnyáwínnyá kanlinhwan ɔ tɔn ɖokpó jó nú Levíi ví vɔ̌sánúxwlémawutɔ́ e gosín kúnkan Sadɔ́ki tɔn mɛ bo nɔ sɛkpɔ́ mì, lobo nɔ wa sinsɛnzɔ́ nú mì lɛ́ é, bɔ é ná nyí hwɛhuhuvɔ́,’ wɛ Aklúnɔ Nǔbǐwúkpétɔ́ Jexóva ɖɔ. 20 ‘A ɖó ná yí hun tɔn ɖě bo ná sá nú vɔ̌sákpe ɔ sín zo ɛnɛ lɛ́, akpáxwé ɖaxó vɔ̌sákpe ɔ tɔn sín zwe ɛnɛ lɛ́, kpó nǔ e gbɔn tó tɔn lɛ́ lɛ̌ dó é kpó, bo ná mɔ tɛn dó slá wǔ ná sín hwɛhuhu sí, lobo súnsún hwɛ tɔn. 21 Énɛ́ gúdo ɔ, a ná sɔ́ nyibúsú wínnyáwínnyá ɔ, énɛ́ wɛ nyí hwɛhuhuvɔ́ ɔ, bónú è ná dó zo ɖo sinsɛnxɔ ɔ sín fí e è sɔ́ é, é ná nyí ɖo mawuxɔ ɔ mɛ ǎ. 22 Ayǐhɔ́ngbe tɔn ɔ, a ná sɔ́ gbagbǎ e ma ɖó blɔ̌ ɖo wǔ ǎ é ɖokpó jó bónú è ná sá hwɛhuhuvɔ́; bɔ yě ná slá wǔ nú vɔ̌sákpe ɔ sín hwɛhuhu sí, lěe yě sɔ́ nyibúsú wínnyáwínnyá ɔ dó slá wǔ ná sín hwɛhuhu sí gbɔn é.’
23 “‘Ée a ná slá wǔ ná sín hwɛhuhu sí fó é ɔ, a ná sɔ́ nyibúsú wínnyáwínnyá e ma ɖó blɔ̌ ɖo wǔ ǎ é ɖokpó ɖo kanlinhwan ɔ mɛ, bo lɛ́ sɔ́ agbo e ma ɖó blɔ̌ ɖo wǔ ǎ é ɖokpó ɖo lɛ̌ngbɔ́hwan ɔ mɛ dó sá vɔ̌. 24 A ná xwlé yě Jexóva, bɔ vɔ̌sánúxwlémawutɔ́ lɛ́ ɖó ná kɔn jɛ dó yě jí, bo ná sɔ́ yě dó sá vɔ̌ e è nɔ dó blěbú tɔn zo é nú Jexóva. 25 A ná nɔ sɔ́ gbagbǎ ɖokpó jó ayǐhɔ́ngbe ayǐhɔ́ngbe bónú è ná nɔ dó sá hwɛhuhuvɔ́ ná nú azǎn tɛ́nwe, a ná nɔ lɛ́ sɔ́ nyibúsú wínnyáwínnyá e ɖo kanlinhwan ɔ mɛ é ɖokpó kpó agbo e ɖo lɛ̌ngbɔ́hwan ɔ mɛ é ɖokpó kpó dó wa nǔ ɖokpó ɔ; kanlin e ma ɖó blɔ̌ ɖo wǔ ǎ lɛ́ é* wɛ a ná nɔ sɔ́ dó sá vɔ̌. 26 Nú azǎn tɛ́nwe ɔ, yě ɖó ná súnsún hwɛ vɔ̌sákpe ɔ tɔn, bo slá wǔ ná, lobo sɔ́ nǔ ná nú zǐnzán tɔn. 27 Hwenu e azǎn lɛ́ ná wá vivɔnu é ɔ, bɛ́ sín azǎn tántɔngɔ́ ɔ gbe ɔ, vɔ̌sánúxwlémawutɔ́ lɛ́ ná nɔ xwlé vɔ̌sánú mitɔn* e è nɔ dó blěbú tɔn zo lɛ́ é kpó kɔnɖókpɔ́vɔ́ mitɔn lɛ́ kpó ɖo vɔ̌sákpe ɔ jí; énɛ́ ɔ, mi ná dó xomɛhunhun nú mì,’ wɛ Aklúnɔ Nǔbǐwúkpétɔ́ Jexóva ɖɔ.”