Ezekiyɛ́li
42 É wá kplá mì yi kɔ́xota ɖaxó ɔ tunta totaligbé. Énɛ́ gúdo ɔ, é kplá mì yi nǔɖuɖuxɔsá lɛ́ kɔn ɖo tɛnmɛ vɔ̌tɔ́ ɔ kpá, ɖo totaligbé nú xɔ e ɖo sinsɛnxɔ ɔ gúdo tlóló é. 2 Ðo alinu totaligbé tɔn ɔ, ga tɔn bló awabá* 100, bɔ gblǒ tɔn bló awabá 50. 3 É ɖo kɔ́xota kpɛví ɔ, ée gblǒ tɔn bló awabá 20 é kpó awǐnnyatítɛ́ kɔ́xota ɖaxó ɔ tɔn kpó tɛ́ntin. Afɔgbɔntɛn tɔn lɛ́ kpan nukɔn yěɖée lɛ́, bɔ é nyí síngbó atɔnnɔ. 4 Ali dwíín ɖé ɖo xo ɔ mɛ bo gbɔn nǔɖuɖuxɔsá* lɛ́ sín nukɔn, bɔ gblǒ tɔn bló awabá 10, lobɔ ga tɔn bló awabá 100;* alinu nǔɖuɖuxɔsá lɛ́ tɔn lɛ́ ɖo totaligbé. 5 Nǔɖuɖuxɔsá e ɖo síngbó ɔ jí aga bǐ lɛ́ é sóbwé hú éé ɖo do lɛ́ é kpó éé ɖo síngbó ɔ jí ɖo tɛ́ntinmɛ lɛ́ é kpó, ɖó afɔgbɔntɛn yětɔn lɛ́ ɖu tɛnmɛ hú gǎn. 6 Nǔɖuɖuxɔsá lɛ́ nyí síngbó atɔnnɔ, amɔ̌, yě ɖó dotín ɖě kɔ́xota lɛ́ ɖɔhun ǎ. Énɛ́ wú wɛ éé ɖo aga bǐ lɛ́ é ma ɖó tɛnmɛ nabí ɖé ɖo kɔ́mɛ sɔ éé ɖo do lɛ́ é kpó éé ɖo síngbó ɔ jí ɖo tɛ́ntinmɛ lɛ́ é kpó ǎ.
7 Dǒ kɔ́xota tɔn e è sɔ́ awǐnnya dó mɛ, bɔ é ɖo nǔɖuɖuxɔsá e ɖo kɔ́xota ɖaxó ɔ kpáxwé lɛ́ é kpá, bo kpan nukɔn nǔɖuɖuxɔsá ɖěvo lɛ́ é sín ga bló awabá 50. 8 Nǔɖuɖuxɔsá e ɖo kɔ́xota ɖaxó ɔ kpáxwé lɛ́ é sín ga bló awabá 50; éé kpan nukɔn mawuxɔ ɔ lɛ́ é tɔn ka bló awabá 100. 9 Nǔɖuɖuxɔsá lɛ́ ɖó alinu ɖé ɖo akpáxwé zǎnzǎnhwe jí tɔn, bɔ nú è gosín kɔ́xota ɖaxó ɔ ɔ, è nɔ gbɔn nu wá fí e yě ɖe é.
10 Nǔɖuɖuxɔsá ɖé lɛ́ lɛ́vɔ́ ɖo kɔ́xota ɔ sín dǒ e è sɔ́ awǐnnya dó mɛ é gúdo* ɖo zǎnzǎnhwe jí kpáxwé, ɖo malínmálín dó tɛnmɛ vɔ̌tɔ́ ɔ kpó xɔ ɔ kpó. 11 Ali dwíín ɖé gbɔn nukɔn yětɔn lěe é nyí gbɔn nú nǔɖuɖuxɔsá totaligbé tɔn lɛ́ é. Ga ɖokpó ɔ lɛ́ kpó gblǒ ɖokpó ɔ lɛ́ kpó wɛ yě ɖó; bɔ fí e è nɔ gbɔn tɔ́n lɛ́ é ɖokpó ɔ lɛ́ wɛ yě ɖó, lobɔ è lɛ́ bló yě ɖó alɔ ɖokpó ɔ jí. Alinu yětɔn lɛ́ 12 cí nǔɖuɖuxɔsá e ɖo tofɔligbé kpáxwé lɛ́ é sín alinu lɛ́ ɖɔhun. Alinu ɖé ɖo bǐbɛ́mɛ ali dwíín ɔ tɔn, ɖo dǒ e è sɔ́ awǐnnya dó mɛ, bɔ é ɖo zǎnzǎnhwe jí kpáxwé é kpá tlóló, bɔ è sixú gbɔn nu.
13 Énɛ́ gúdo ɔ, é ɖɔ nú mì ɖɔ: “Nǔɖuɖuxɔsá totaligbé tɔn lɛ́ kpó nǔɖuɖuxɔsá tofɔligbé tɔn, éé ɖo tɛnmɛ vɔ̌tɔ́ ɔ kpá lɛ́ é kpó wɛ nyí nǔɖuɖuxɔsá mímɛ́ lɛ́. Fínɛ́ wɛ vɔ̌sánúxwlémawutɔ́ e nɔ sɛkpɔ́ Jexóva lɛ́ é nɔ ɖu nǔníná mímɛ́ bǐ lɛ́ ɖe. Fínɛ́ wɛ yě nɔ bɛ́ nǔníná mímɛ́ bǐ lɛ́ ɖó, énɛ́ wɛ nyí: nǔníná jinukún tɔn ɔ, hwɛhuhuvɔ́ ɔ kpó nǔwanyidovɔ́ ɔ kpó, ɖó fí mímɛ́ wɛ fí énɛ́ nyí. 14 Ényí vɔ̌sánúxwlémawutɔ́ lɛ́ byɔ́ fí mímɛ́ ɔ ɔ, yě ɖó ná to ɖe awu e mɛ yě nɔ bo wa sinsɛnzɔ́ ɔ lɛ́ é hwɛ̌, cóbó gosín fínɛ́ yi kɔ́xota ɖaxó ɔ, ɖó nǔ mímɛ́ wɛ nyí nǔ énɛ́ lɛ́. Awu ɖěvo lɛ́ wɛ yě ná nɔ dó bo ná dó sɛkpɔ́ fí e è yí gbe nú togun ɔ ɖɔ é ní wá lɛ́ é.”
15 Ée é jlɛ́ sinsɛnxɔ ɔ xomɛ* fó é ɔ, é kplá mì tɔ́n gbɔn hɔntogbó e kpan nukɔn zǎnzǎnhwe jí é nu, bo jlɛ́ fínɛ́ bǐ.
16 É sɔ́ fántín e è nɔ dó jlɛ́ nǔ é* dó jlɛ́ akpáxwé zǎnzǎnhwe jí tɔn ɔ. Sɔgbe xá fántín e è nɔ dó jlɛ́ nǔ é ɔ, ga tɔn bló fántín 500 sín akpáxwé ɖě jɛ ɖěvo.
17 É jlɛ́ akpáxwé totaligbé tɔn ɔ, bɔ sɔgbe xá fántín e è nɔ dó jlɛ́ nǔ é ɔ, ga tɔn bló fántín 500.
18 É jlɛ́ akpáxwé tofɔligbé tɔn ɔ, bɔ sɔgbe xá fántín e è nɔ dó jlɛ́ nǔ é ɔ, ga tɔn bló fántín 500.
19 É lílɛ́ yi akpáxwé gbadahwe jí tɔn ɔ. É jlɛ́ ga tɔn bo mɔ fántín 500, sɔgbe xá fántín e è nɔ dó jlɛ́ nǔ é.
20 É jlɛ́ fí ɔ sín akpáxwé ɛnɛ lɛ́. É ɖó dǒ lɛ́ lɛ̌ dó, bɔ ga tɔn bló fántín 500, bɔ gblǒ tɔn bló fántín 500, bónú è ná dó ɖe nǔ e nyí nǔ mímɛ́ é ɖó vo nú nǔ e nyí mɛ bǐ kpaa tɔn é.