Ezekiyɛ́li
41 Énɛ́ gúdo ɔ, é kplá mì yi mawuxɔ ɔ sín xɔgbasá,* bo jlɛ́ dotín e ɖo adaja mɛ n’i lɛ́ é; gblǒ yětɔn bló awabá* ayizɛ́n ɖo akpá ɖokpó xwé, bo lɛ́ bló awabá ayizɛ́n ɖo akpá ɖě ɔ xwé. 2 Ali ɔ nu sín gblǒ bló awabá wǒ, bɔ dǒ e ɖo akpá ɖokpó ɖokpó xwé nú ali ɔ nu lɛ́ é bló awabá atɔ́ɔ́n ɖo akpá ɖokpó xwé, bo lɛ́ bló awabá atɔ́ɔ́n ɖo akpá ɖě ɔ xwé. É jlɛ́ ga tɔn, bɔ é bló awabá 40, bɔ gblǒ tɔn bló awabá 20.
3 Énɛ́ gúdo ɔ, é byɔ́ mɛ,* bo jlɛ́ dotín e ɖo adaja mɛ nú alinu ɔ é, bɔ tlitli tɔn bló awabá we, bɔ alinu ɔ sín gblǒ bló awabá ayizɛ́n. Dǒ e ɖo akpá ɖokpó ɖokpó xwé nú alinu ɔ lɛ́ é* bló awabá tɛ́nwe. 4 Énɛ́ gúdo ɔ, é jlɛ́ xɔ e kpan nukɔn mawuxɔ ɔ sín xɔgbasá é, bɔ ga tɔn bló awabá 20, bɔ gblǒ tɔn bló awabá 20. Bɔ é ɖɔ nú mì ɖɔ: “Tɛn mímɛ́ bǐ ɔ ɖíe.”
5 Énɛ́ gúdo ɔ, é jlɛ́ sinsɛnxɔ ɔ sín dǒ, bɔ tlitli tɔn bló awabá ayizɛ́n. Xɔ e ɖo adaja mɛ, bo lɛ́ lɛ̌ dó sinsɛnxɔ ɔ lɛ́ é sín gblǒ bló awabá ɛnɛ. 6 Xɔ e ɖo adaja mɛ lɛ́ é nyí síngbó atɔnnɔ, ɖě ɖo ɖě jí, bɔ síngbó ɖokpó ɖokpó nɔ ɖó xɔ 30. È mɛ kpe lɛ́ lɛ̌ dó sinsɛnxɔ ɔ bónú yě ná hɛn xɔ e ɖo adaja mɛ lɛ́ é ɖó te, bónú nǔ e ná hɛn yě ɖó te lɛ́ é ní ma byɔ́ sinsɛnxɔ ɔ ɖésúnɔ sín dǒ mɛ ó. 7 Ali e xá d’é mɛ,* bo nɔ ɖo gblǒgbló d’é jí wɛ, nú è ɖo xɔ e ɖo aga lɛ́ é kɔn yi wɛ é ɖé ɖo sinsɛnxɔ ɔ sín akpáxwé we lɛ́. Ényí è gosín síngbó ɖě jí xwe ɖěvo jí, sín síngbó kpɛví bǐ ɔ jí xwe síngbó ɖaxó bǐ ɔ jí, gbɔn síngbó tɛ́ntinmɛ tɔn ɔ jí ɔ, gblǒ ɔ nɔ ɖo jijɛjí wɛ.
8 Un mɔ ɖɔ kpekán e yi jǐ é ɖé lɛ́ lɛ̌ dó sinsɛnxɔ ɔ, bɔ dodónu xɔ e ɖo adaja mɛ lɛ́ é tɔn lɛ́ sín jlɛ̌ bló fántín blěbú ɖokpó, énɛ́ wɛ nyí, awabá ayizɛ́n, káká yi zwe ɔ mɛ. 9 Xɔ e ɖo adaja mɛ lɛ́ é sín dǒ e ɖo kɔ́xo é ɔ, gblǒ tɔn bló awabá atɔ́ɔ́n. Tɛnmɛ e ɖo faa é* ɖé ɖo xɔ e ɖo adaja mɛ lɛ́ é kpá, bɔ é lɔ ɖo sinsɛnxɔ ɔ mɛ.
10 Tɛnmɛ vɔ̌tɔ́ ɖé ɖo sinsɛnxɔ ɔ kpó nǔɖuɖuxɔsá* lɛ́ kpó tɛ́ntin, bɔ gblǒ tɔn bló awabá 20 ɖo akpá ɖokpó ɖokpó xwé. 11 Alinu ɖé ɖo xɔ e ɖo adaja mɛ lɛ́ é kpó tɛnmɛ faa ɔ kpó tɛ́ntin ɖo totaligbé kpáxwé, bɔ alinu ɖěvo ɖo tofɔligbé kpáxwé. Tɛnmɛ faa ɔ sín gblǒ bló awabá atɔ́ɔ́n lɛ́ lɛ̌ dó.
12 Xɔ e ɖo gbadahwe jí bo kpan nukɔn tɛnmɛ vɔ̌tɔ́ ɔ é sín gblǒ bló awabá 70, bɔ ga tɔn bló awabá 90; dǒ xɔ ɔ tɔn sín tlitli bló awabá atɔ́ɔ́n lɛ́ lɛ̌ dó.
13 É jlɛ́ sinsɛnxɔ ɔ, bɔ ga tɔn bló awabá 100. Tɛnmɛ vɔ̌tɔ́ ɔ, xɔ ɔ* kpó dǒ tɔn lɛ́ kpó lɔ sín ga bló awabá 100. 14 Sinsɛnxɔ ɔ sín nukɔn e kpan nukɔn zǎnzǎnhwe jí kpó tɛnmɛ vɔ̌tɔ́ ɔ kpó é sín gblǒ bló awabá 100.
15 É jlɛ́ xɔ e kpan nukɔn tɛnmɛ vɔ̌tɔ́ ɔ é sín ga ɖo gǔdo, gɔ́ nú afɔgbɔntɛn tɔn lɛ́ ɖo akpá we lɛ́ bǐ xwé, bɔ é bló awabá 100.
É lɛ́ jlɛ́ mawuxɔ ɔ sín xɔgbasá, mawuxɔ ɔ sín xɔnɔnɔ kpó kɔ́xota ɔ sín hɔnnúwa lɛ́ kpó, 16 gɔ́ nú alihɛ́nnu lɛ́, flɛtɛ́li e gbló ɖo xomɛ, bo sóbwé ɖo kɔ́xota lɛ́ é kpó afɔgbɔntɛn lɛ́ kpó, ɖěɖěe ɖo fí atɔn énɛ́ lɛ́ é. Xwlɛ e è ján ɖě dó ɖě mɛ sín kɔ́mɛ yi flɛtɛ́li lɛ́ nu é ɖo alihɛ́nnu ɔ kpá; bɔ è bú nǔ dó flɛtɛ́li lɛ́. 17 É yí jlɛ̌ alinu ɔ sín aga tɔn, sinsɛnxɔ ɔ mɛ tɔn kpó kɔ́xo ɔ ta tɔn kpó, gɔ́ nú dǒ ɔ wú tɔn blěbú lɛ́ lɛ̌ dó. 18 Celubɛ́ɛn sín ɖiɖe lɛ́ kpó dětín sín ɖiɖe lɛ́ kpó ɖo dǒ ɔ mɛ, bɔ dětín ɖokpó nɔ ɖo celubɛ́ɛn we tɛ́ntin; celubɛ́ɛn ɖokpó ɖokpó ɖó nukúnmɛ we. 19 Gbɛtɔ́ sín nukúnmɛ kpan nukɔn dětín ɔ ɖo akpá ɖokpó xwé, bɔ kinnikínní* sín nukúnmɛ kpan nukɔn dětín ɔ ɖo akpá ɖě ɔ xwé. È ɖe yě dó dǒ ɔ mɛ gbɔn mɔ̌ gbɔn sinsɛnxɔ ɔ bǐ mɛ. 20 Celubɛ́ɛn sín ɖiɖe lɛ́ kpó dětín sín ɖiɖe lɛ́ kpó ɖo mawuxɔ ɔ sín dǒ mɛ, gosín kɔ́mɛ káká yi ali ɔ nu sín aga.
21 Mawuxɔ ɔ sín hɔn sín dotín lɛ́* ɖó gblǒ zɛ̌ɛ́n ga zɛ̌ɛ́n. Nǔɖé ɖo fí mímɛ́ ɔ* sín nukɔn bo cí, 22 vɔ̌sákpe e è sɔ́ atín dó bló é ɖɔhun, bɔ jǐyiyi tɔn bló awabá atɔn, bɔ ga tɔn bló awabá we. É ɖó dotín lɛ́ ɖo zwe mɛ, bɔ nǔ e jí é jínjɔ́n é* kpó wǔtu tɔn kpó ɔ, atín wɛ è dó bló ná. Énɛ́ gúdo ɔ, é ɖɔ nú mì ɖɔ: “Távo e ɖo Jexóva nukɔn é ɖíe.”
23 Mawuxɔ ɔ sín xɔgbasá kpó fí mímɛ́ ɔ kpó bǐ ɖó hɔn we we. 24 Hɔn vǐwenɔ wɛ nyí hɔn lɛ́, ɛɛn, hɔn ɖokpó ɖokpó nyí hɔn vǐwenɔ. 25 Celubɛ́ɛn sín ɖiɖe lɛ́ kpó dětín sín ɖiɖe lɛ́ kpó ɖo mawuxɔ ɔ sín hɔn lɛ́ mɛ, lěe é ɖe gbɔn ɖo dǒ lɛ́ mɛ é ɖɔhun. Gɔ́ ná ɔ, jɔhɔnsinglɔ́nnú* e è sɔ́ atín dó bló é ɖé ɖo hɔnnúwa ɔ wú ɖo nukɔn ɖo kɔ́xota. 26 Flɛtɛ́li e gbló ɖo xomɛ, bo sóbwé ɖo kɔ́xota lɛ́ é lɔmɔ̌ ɖo fínɛ́, bɔ dětín sín ɖiɖe lɛ́ ɖo akpá we lɛ́ bǐ xwé nú hɔnnúwa ɔ, bo lɛ́ ɖo xɔ e ɖo adaja mɛ nú sinsɛnxɔ ɔ lɛ́ é kpó jɔhɔnsinglɔ́nnú lɛ́ kpó wú.