Ezekiyɛ́li
3 Énɛ́ gúdo ɔ, é ɖɔ nú mì ɖɔ: “Gbɛtɔ́ví è, ɖu nǔ e ɖo nukɔn towe é.* Ðu wěma mlámlá élɔ́, bo yi, bo ɖɔ xó nú togun Izlayɛ́li tɔn.”
2 Énɛ́ ɔ, un hun nu ce, bɔ é sɔ́ wěma mlámlá énɛ́ nú mì ɖɔ má ɖu. 3 É lɛ́ ɖɔ nú mì ɖɔ: “Gbɛtɔ́ví è, ɖu wěma mlámlá élɔ́ e ná we wɛ un ɖe é, bónú adɔgo towe ní gɔ́.” Énɛ́ ɔ, un jɛ ɖuɖu jí, bɔ é víví ɖo nu ce mɛ wǐin ɖɔhun.
4 É ɖɔ nú mì ɖɔ: “Gbɛtɔ́ví è, yi togun Izlayɛ́li tɔn gɔ́n, bo ɖɔ xó ce lɛ́ nú yě. 5 Ðó é nyí togun e nɔ dó gbe e mɛ è ma mɔ nukúnnú jɛ ǎ, alǒ è ma tuun ǎ é gɔ́n wɛ è sɛ́ we dó ǎ, loɔ, togun Izlayɛ́li tɔn gɔ́n wɛ. 6 È sɛ́ we dó togun ɖěɖěe nɔ dó gbe e mɛ è ma mɔ nukúnnú jɛ ǎ é, alǒ gbe e è ma tuun ǎ é gɔ́n ǎ, ɛɛn, togun ɖěɖěe nukúnnú mimɔ jɛ xó yětɔn mɛ ná gló we lɛ́ é gɔ́n wɛ è sɛ́ we dó ǎ. Ényí yědɛɛ lɛ́ gɔ́n wɛ un sɛ́ we dó ɔ, yě ná ɖótó we. 7 Amɔ̌, togun Izlayɛ́li tɔn ná gbɛ́ ɖɔ émí kún ná ɖótó we ó, ɖó yě jló ná ɖótó mì ǎ. Mɛ e ɖo togun Izlayɛ́li tɔn mɛ lɛ́ é bǐ syɛ́n ta, bɔ ayi yětɔn lɛ́ syɛ́n. 8 Éɖíe! Un bló bɔ nukúnmɛ towe syɛ́n nukúnmɛ yětɔn ɖɔhun pɛ́ɛ́, bɔ nukɔn towe syɛ́n nukɔn yětɔn ɖɔhun pɛ́ɛ́. 9 Un bló bɔ nukɔn towe cí diamáa ɖɔhun, bo syɛ́n hú awǐnnya.* Ma ɖi xɛsi nú yě ó, alǒ nukúnmɛ yětɔn ní ma dó xɛsi we ó, ɖó togun gǔfɔ́ntɔ́ wɛ yě nyí wútu.”
10 É lɛ́ ɖɔ nú mì ɖɔ: “Gbɛtɔ́ví è, ɖǒtó xó e ná ɖɔ nú we wɛ un ɖe lɛ́ é bǐ, bo hɛn yě ayi mɛ. 11 Yi togun towe sín mɛ* e ɖo kannumɔgbénu lɛ́ é gɔ́n, bo ɖɔ xó nú yě. Ðɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe,’ ényí yě ɖótó alǒ gbɛ́ ɖɔ émí kún ná ɖótó ó ɔ nɛ́.”
12 Énɛ́ gúdo ɔ, gbigbɔ ɖé kplá mì, bɔ un se gbe ɖaxó ɖé ɖo gǔdo ce, bɔ gbe ɔ ɖɔ: “È ní kpa susu Jexóva tɔn ɖo nɔtɛn tɔn.” 13 Un se nǔɖogbɛ lɛ́ sín awa e ɖo xixo dó yěɖée lɛ́ wú wɛ é sín gbe, bo lɛ́ se kɛkɛ́fɔ e ɖo kpɔ́ xá yě lɛ́ é sín zǐngídi, gɔ́ nú gbe ɖaxó ɖé sín zǐngídi. 14 Bɔ gbigbɔ ɔ kplá mì, bo zé mì, bɔ un yi kpó akpɔ kpó, kpó xomɛsin kpó, lobɔ hlɔ̌nhlɔ́n* Jexóva tɔn nɔ jǐ ce syɛ́nsyɛ́n. 15 Énɛ́ ɔ, un yi togun e ɖo kannumɔgbénu ɖo Tɛli-Abíbu, bo nɔ nɔ tɔsisa Kebáa tó é gɔ́n, bɔ un cí fí e yě nɔ nɔ é; un nɔ tɛ́ntin yětɔn nú azǎn tɛ́nwe, bo flú bǐ.
16 Ðo azǎn tɛ́nwe lɛ́ sín vivɔnu ɔ, Jexóva ɖɔ xó nú mì, bo ɖɔ:
17 “Gbɛtɔ́ví è, un sɔ́ we mɛcɔ́tɔ́ ɖó togun Izlayɛ́li tɔn nu, bɔ ényí a se xó sín nu ce ɔ, a ɖó ná gb’akpá nú yě nú mì. 18 Ényí un ɖɔ nú mɛ nyanya ɖɔ: ‘A ná kú jɛ́n wɛ,’ bónú hwɛ ma ka gb’akpá n’i ǎ, bo ma ɖɔ xó nú mɛ nyanya ɔ dó gb’akpá n’i, bónú é jó walɔ tɔn nyanya ɔ dó bá dó sixú nɔ gbɛ ǎ ɔ, é ná kú ɖó nǔwanyido tɔn wú, ɖó mɛ nyanya wɛ n’i, amɔ̌, un ná kan hun tɔn byɔ́ we.* 19 Loɔ, ényí a gb’akpá nú mɛ nyanya, bónú é ma jó nǔnyanyawiwa tɔn dó, bo lɛ́ jó walɔ tɔn nyanya ɔ dó ǎ ɔ, é ná kú ɖó nǔwanyido tɔn wú, amɔ̌ hwɛ ɔ, é ɖo wɛn ɖɔ a ná hwlɛ́n gbɛ* hwiɖésúnɔ tɔn gán. 20 Amɔ̌, ényí nǔjlɔ́jlɔ́watɔ́ jó nǔjlɔ́jlɔ́wiwa tɔn dó bo nɔ wa nǔ nyanya* ɔ, un ná sɔ́ afɔklɛ́nnú ɖé ɖó nukɔn n’i, bɔ é ná kú. Ényí a ma gb’akpá n’i ǎ ɔ, é ná kú ɖó hwɛ tɔn wú, bɔ è sɔ́ ná flín nǔ jlɔ́jlɔ́ e é wa lɛ́ é ǎ, amɔ̌, un ná kan hun tɔn byɔ́ we.* 21 Ényí a ka gb’akpá nú nǔjlɔ́jlɔ́watɔ́ ɖɔ é ní ma hu hwɛ ó, bónú é ma hu hwɛ ǎ ɔ, é ɖo wɛn ɖɔ é ná nɔ gbɛ, ɖó è gb’akpá n’i wú, bɔ hwɛ ɔ, a ná hwlɛ́n gbɛ* hwiɖésúnɔ tɔn gán.”
22 Hlɔ̌nhlɔ́n* Jexóva tɔn wá jǐ ce ɖo fínɛ́, bɔ é ɖɔ nú mì ɖɔ: “Sí te, yi ayǐkúngban wɛnjɛ ɔ jí, bónú má ɖɔ xó xá we ɖo dɔ̌n.” 23 Énɛ́ ɔ, un sí te bo yi ayǐkúngban wɛnjɛ ɔ jí, bɔ un ná mɔ nǔɖé ɔ, susu Jexóva tɔn ko ɖo fínɛ́, bo cí susu e un mɔ ɖo tɔsisa Kebáa tó é ɖɔhun, bɔ un xwe agbɔ̌nnusú do. 24 Énɛ́ gúdo ɔ, gbigbɔ Mawu tɔn wá jǐ ce, bo bló bɔ un sí te bo nɔ te afɔ ce lɛ́ jí, bɔ Mawu ɖɔ xó nú mì, bo ɖɔ:
“Yi, bo sú hɔn dó ta ɖo xwé towe gbe. 25 Gbɛtɔ́ví è, hwɛ ɔ, yě ná sɔ́ kan dó blá we, bónú a ní ma kpé wú bo tɔ́n wá tɛ́ntin yětɔn ó. 26 Un ná bló bɔ ɖɛ̌ towe ná tɛ́ dó ɖɛxwɛ towe wú, bɔ a ná húzú ɖɛ̌kúnánɔ, bo ná kpé wú bo gbɛ́ nǔ nú yě ǎ, ɖó togun gǔfɔ́ntɔ́ wɛ yě nyí wútu. 27 Amɔ̌, hwenu e un ná ɖɔ xó xá we é ɔ, un ná tún kan nú ɖɛ̌ towe, bɔ a ɖó ná ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe.’ Mɛ e nɔ ɖótó é ní bo nɔ ɖótó, bónú mɛ e nɔ gbɛ́ tó ɖó é ní bo nɔ gbɛ́ tó ɖó, ɖó togun gǔfɔ́ntɔ́ wɛ yě nyí wútu.