Ezekiyɛ́li

36 “Hwɛ gbɛtɔ́ví è, ɖɔ nǔ e ná jɛ dó só Izlayɛ́li tɔn lɛ́ wú é ɖ’ayǐ, bo ɖɔ: ‘Só Izlayɛ́li tɔn lɛ́ è mi, mi ɖótó xó e Jexóva ɖɔ é. 2 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Kɛntɔ́ lɛ́ ɖɔ dó mi wú ɖɔ: ‘Acɔnkwín! Fí ɖěɖěe yi jǐ ɖ’ayǐ xóxó lɛ́ é lɔ húzú mǐtɔn!’”’

3 “Énɛ́ wú ɔ, ɖɔ nǔ e ná jɛ é ɖ’ayǐ bo ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Kɛntɔ́ mitɔn lɛ́ vɔ mi, bo tɔ́n ahwan mi sín awa lɛ́ bǐ xwé, bɔ mɔ̌ mɛ ɔ, mi húzú nǔɖókan mɛ e gán ɖo* akɔta lɛ́ mɛ lɛ́ é tɔn, bɔ mɛ lɛ́ nɔ ɖo nǔ mitɔn ɖɔ wɛ bo nɔ lɛ́ ɖo ji dó mi wɛ magbokɔ. 4 Énɛ́ wú ɔ, só Izlayɛ́li tɔn lɛ́ è mi, mi ɖótó xó e Aklúnɔ Nǔbǐwúkpétɔ́ Jexóva ɖɔ é! Nǔ e Aklúnɔ Nǔbǐwúkpétɔ́ Jexóva ɖɔ nú só ɖaxó lɛ́ kpó só kpɛví lɛ́ kpó, nú tɔsisa lɛ́ kpó tɔdo lɛ́ kpó, nú aglingbigba e jɛ vɔ̌ lɛ́ é, gɔ́ nú toxo e mɛ mɛɖé ma sɔ́ ɖe ǎ lɛ́ é, ɛɛn, toxo ɖěɖěe mɛ e gán ɖo akɔta e lɛ́ lɛ̌ dó yě lɛ́ é mɛ lɛ́ é vɔ, bo lɛ́ cá ko lɛ́ é ɖíe; 5 ɛɛn, Aklúnɔ Nǔbǐwúkpétɔ́ Jexóva ɖɔ nú nǔ énɛ́ lɛ́ ɖɔ: ‘Ðo akpakpa sɔ́ mɛ sín myɔ ce mɛ ɔ, un ná ɖó hwɛ nú mɛ e gán ɖo akɔta lɛ́ mɛ lɛ́ é kpó Edɔ́mu blěbú kpó, mɛ énɛ́ lɛ́ e sɔ́ to ce dó ɖó yětɔn kpó awǎjijɛ ɖaxó kpó, kpó mɛcáko syɛ́nsyɛ́n* kpó, bo ná dó yí amagbo tɔn lɛ́, lobo lɛ́ vɔ ɛ lɛ́ é.’”’

6 “Énɛ́ wú ɔ, ɖɔ lěe nǔ ná nyí gbɔn nú Izlayɛ́li to ɔ é ɖ’ayǐ, bo ɖɔ nú só ɖaxó lɛ́ kpó só kpɛví lɛ́ kpó, nú tɔsisa lɛ́ kpó tɔdo lɛ́ kpó ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Éɖíe, ɖó akɔta lɛ́ dó winnyá mi wútu ɔ, un ná ɖɔ xó ɖo akpakpa sɔ́ mɛ ce kpó adǎn e jí un ɖe é kpó mɛ.”’

7 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Nyiɖésúnɔ sɔ́ alɔ dó jǐ, bo xwlé nǔ ɖɔ akɔta e lɛ́ lɛ̌ dó mi lɛ́ é ná hɛn winnyá yěɖésúnɔ tɔn sín agban. 8 Amɔ̌, mi só Izlayɛ́li tɔn lɛ́ è mi, mi ná zɛ ala, bo ná ná atínsínsɛ́n togun ce Izlayɛ́li, ɖó yě ná lɛ́ kɔ wá ɖo malínmálín mɛ. 9 Ðó un ɖo kpɔ́ xá mi, bo ná nyi kɔ kpɔ́n mi; è ná lɛ mi, bo ná dó nǔkún nyi mi jí. 10 Un ná bló bɔ mɛ mitɔn lɛ́, énɛ́ wɛ nyí togun Izlayɛ́li tɔn ɔ blěbú, ɛɛn, yě bǐ ná sukpɔ́ d’é jí. Yě ná nɔ toxo lɛ́ mɛ, bo ná vɔ́ aglingbigba lɛ́ mɛ. 11 Ɛɛn, un ná bló bɔ togun mitɔn kpó kanlinhwan mitɔn kpó ná sukpɔ́ d’é jí; yě ná sukpɔ́ d’é jí, bo lɛ́ gba kún. Un ná bló bɔ è ná nɔ mi mɛ lěe è nɔ gbɔn ɖ’ayǐ é, bo ná bló bɔ nǔ ná nyɔ́ nú mi hú xóxó ɔ, bɔ mi ná wá tuun ɖɔ nyɛ wɛ nyí Jexóva. 12 Un ná bló bɔ mɛ lɛ́, énɛ́ wɛ nyí togun ce Izlayɛ́li, ná ɖi zɔnlin gbɔn mi jí, bɔ mi ná húzú nǔɖókan yětɔn. Mi ná húzú gǔ yětɔn, bɔ mi sɔ́ ná yí vǐ yětɔn lɛ́ sín yě sí gbeɖé ǎ.’”

13 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Yě nɔ ɖɔ nú we ɖɔ: “To e nɔ vúnvún mɛ, bo nɔ hu akɔta tɔn lɛ́ sín vǐ lɛ́ é wɛ nú we.”’ 14 ‘Énɛ́ wú ɔ, a sɔ́ ná vúnvún mɛ lɛ́, alǒ yí akɔta towe lɛ́ sín vǐ lɛ́ sín yě sí ɖě ǎ,’ wɛ Aklúnɔ Nǔbǐwúkpétɔ́ Jexóva ɖɔ. 15 ‘Un sɔ́ ná jó we nú zun akɔta lɛ́ tɔn, alǒ bló bónú a ná hɛn togun ɔ sín slamɛ ɖiɖɔ sín agban lɛ́ ɖě ǎ, bɔ a sɔ́ ná bló bónú akɔta towe lɛ́ ná j’ayǐ* ɖě ǎ,’ wɛ Aklúnɔ Nǔbǐwúkpétɔ́ Jexóva ɖɔ.”

16 Bɔ Jexóva lɛ́ ɖɔ xó nú mì, bo ɖɔ: 17 “Gbɛtɔ́ví è, hwenu e togun Izlayɛ́li tɔn ɔ nɔ nɔ to yětɔn mɛ é ɔ, yě hɛn ɛ blí, gbɔn nǔwalɔ yětɔn lɛ́ kpó nǔwiwa yětɔn lɛ́ kpó gblamɛ. Nǔwalɔ yětɔn lɛ́ blí ɖo nukún ce mɛ, glegbe e nyɔ̌nu nɔ jɛ é ɖɔhun. 18 Énɛ́ wú ɔ, un gba adǎn e jí un ɖe é kɔn nyi jǐ yětɔn, ɖó hun e yě kɔn nyi ayǐ ɖo to ɔ mɛ, bo lɛ́ hɛn to ɔ blí kpó bǒcyɔ xyɔ́ wǔ* yětɔn lɛ́ kpó é wútu. 19 Un gba yě dó gbɔn akɔta lɛ́ mɛ, bo fúnfún yě kpé gbɔn to lɛ́ mɛ. Un ɖó hwɛ nú yě sɔgbe xá nǔwalɔ yětɔn kpó nǔwiwa yětɔn lɛ́ kpó. 20 Amɔ̌, hwenu e yě yi akɔta énɛ́ lɛ́ mɛ é ɔ, mɛ lɛ́ ɖɔ xó élɔ́ dó yě wú dó sɔ́ nyǐkɔ mímɛ́ ce xo kɔ́: ‘Togun Jexóva tɔn wɛ nyí mɛ énɛ́ lɛ́, loɔ, é ɖo dandan ɖɔ yě ní gosín to tɔn mɛ.’ 21 Énɛ́ wɛ zɔ́n bɔ un ná wa nǔ dó nyǐkɔ ce tamɛ, nyǐkɔ mímɛ́ ce e togun Izlayɛ́li tɔn ɔ sɔ́ xo kɔ́ ɖo akɔta e mɛ yě yi lɛ́ é tɛ́ntin é.”

22 “Énɛ́ wú ɔ, ɖɔ nú togun Izlayɛ́li tɔn ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Togun Izlayɛ́li tɔn è mi, é nyí mi wú wɛ un ɖo nǔ wa wɛ ǎ, loɔ, nyǐkɔ mímɛ́ ce e mi sɔ́ xo kɔ́ ɖo akɔta e mɛ mi yi lɛ́ é tɛ́ntin é wú wɛ.”’ 23 ‘É ɖo wɛn ɖɔ un ná bló bɔ nyǐkɔ ɖaxó ce e è sɔ́ xo kɔ́ ɖo akɔta lɛ́ tɛ́ntin é, ɛɛn, ée midɛɛ lɛ́ sɔ́ xo kɔ́ ɖo tɛ́ntin yětɔn é ná nyí nǔ mímɛ́; bɔ akɔta lɛ́ ná wá tuun ɖɔ nyɛ wɛ nyí Jexóva,’ wɛ Aklúnɔ Nǔbǐwúkpétɔ́ Jexóva ɖɔ, ‘hwenu e nyǐkɔ ce ná nyí nǔ mímɛ́ ɖo tɛ́ntin mitɔn, ɖo nukún yětɔn mɛ é. 24 Un ná ɖe mi sín akɔta lɛ́ mɛ, bo ná xo mi kplé sín to lɛ́ bǐ mɛ, lobo ná kplá mi lɛ́ kɔ yi to mitɔn mɛ. 25 Un ná mì sin mímɛ́ dó mi wú, bɔ mi ná húzú mɛ mímɛ́; un ná lɛ mi wé sín nǔblíblíwiwa mitɔn lɛ́ bǐ mɛ, bo ná ɖe bǒcyɔ xyɔ́ wǔ mitɔn lɛ́ bǐ síin. 26 Un ná ná ayi yɔ̌yɔ́ ɖé mi, bo ná sɔ́ linlin yɔ̌yɔ́ ɖé dó xomɛ nú mi. Un ná ɖe ayi mitɔn e syɛ́n awǐnnya ɖɔhun é sín xomɛ nú mi, bo ná ná mi ayi e bɔ lan ɖɔhun é.* 27 Un ná sɔ́ gbigbɔ ce dó xomɛ nú mi, bo ná bló bɔ mi ná nɔ xwedó gbetakɛ́n ce lɛ́, lobɔ mi ná nɔ wa nǔ sɔgbe xá hwɛɖiɖɔ sín gbeta ce lɛ́, bo lɛ́ nyi yě. 28 Énɛ́ gúdo ɔ, mi ná nɔ to e un ná tɔ́gbó mitɔn lɛ́ é mɛ, bɔ mi ná nyí togun ce, lobɔ nyɛ ná nyí Mawu mitɔn.’

29 “‘Un ná hwlɛ́n mi sín nǔblíblíwiwa mitɔn lɛ́ bǐ mɛ, bo ná ɖe gbe nú jinukún lɛ́ ɖɔ yě ní nyɔ́, bo sukpɔ́; un ná sɔ́ adɔ dó wa nǔ xá mi ǎ. 30 Un ná bló bɔ atínsínsɛ́n lɛ́ kpó jinukún lɛ́ kpó ná sukpɔ́, bónú mi ní ma sɔ́ ɖu winnyá ɖó adɔ wú ɖo akɔta lɛ́ tɛ́ntin gbeɖé ó. 31 Énɛ́ gúdo ɔ, mi ná flín walɔ gblégblé mitɔn lɛ́ kpó nǔwalɔ mitɔn e ma nyɔ́ ǎ lɛ́ é kpó, bɔ nǔ miɖésúnɔ tɔn ná vɛ́ miɖée wú ɖó nǔwanyido mitɔn kpó nǔwalɔ xyɔ́ wǔ mitɔn lɛ́ kpó wútu. 32 Mi ní ka tuun nǔ élɔ́: é nyí mi wú wɛ un ɖo nǔ énɛ́ wa wɛ ǎ,’ wɛ Aklúnɔ Nǔbǐwúkpétɔ́ Jexóva ɖɔ. ‘É nyɔ́ wa ɔ, togun Izlayɛ́li tɔn è mi, winnyá ní hu mi bónú mi ní mɔ ɖɔ wi mitɔn kɔ́n ɖó nǔwalɔ mitɔn lɛ́ wú.’

33 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Gbe e gbe un ná lɛ mi wé sín nǔwanyido mitɔn lɛ́ bǐ mɛ é ɔ, un ná bló bɔ è ná nɔ toxo lɛ́ mɛ, bɔ è ná vɔ́ aglingbigba lɛ́ mɛ. 34 È ná lɛ to e jɛ vɔ̌, bɔ aligbɔntɔ́ lɛ́ bǐ nɔ mɔ vɔ̌ jijɛ tɔn é gle ɖɔhun. 35 Bɔ mɛ lɛ́ ná ɖɔ: “To e jɛ vɔ̌ é wá cí jikpá Edɛ́ni tɔn ɖɔhun, bɔ toxo e nyí aglingbigba bo jɛ vɔ̌ bɔ è hɔ́ lɛ́ é, wá nyí toxo syɛ́nsyɛ́n lɛ́ din bɔ gbɛtɔ́ gɔ́ mɛ.” 36 Bɔ akɔta ɖěɖěe kpo, bo lɛ́ lɛ̌ dó mi lɛ́ é ná wá tuun ɖɔ nyɛ Jexóva ɖésúnɔ wɛ vɔ́ nǔ e hɔ́ é gbá, bo dó nǔ dó ayǐkúngban e jɛ vɔ̌ é jí. Nyɛ Jexóva ɖésúnɔ wɛ ɖɔ xó, bo bló.’

37 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná lɛ́ yí gbe bɔ togun Izlayɛ́li tɔn ná byɔ́ mì ɖɔ nyi ní bló bónú mɛ émítɔn lɛ́ ní sukpɔ́ kanlinhwan ɖɔhun, bɔ un ná wa mɔ̌. 38 Lěe mɛ mímɛ́ lɛ́ sín ahwan, ɛɛn, ahwan nɔ ɖo Jeluzalɛ́mu ɖo xwe tɔn lɛ́ hwenu gbɔn é ɔ,* mɔ̌ wɛ gbɛtɔ́hwan gěgé ná gɔ́ toxo ɖěɖěe nyí aglingbigba ɖ’ayǐ lɛ́ é mɛ gbɔn; bɔ yě ná wá tuun ɖɔ nyɛ wɛ nyí Jexóva.’”