Ezekiyɛ́li
35 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, lǐlɛ́ kpan nukɔn sókan mɛ gbéjí Seyíi tɔn, bo ɖɔ nǔ e ná wá jɛ dó wǔ tɔn é ɖ’ayǐ. 3 Ðɔ n’i ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Sókan mɛ gbéjí Seyíi tɔn è, un ná wa nǔ xá we, alɔ ce ná jɛ wǔ we, bɔ un ná sɔ́ we dó húzú gbětótló e jɛ vɔ̌ é. 4 Un ná bló bɔ toxo towe lɛ́ ná húzú aglingbigba, bɔ a ná húzú gbětótló e jɛ vɔ̌ é; bɔ a ná wá tuun ɖɔ nyɛ wɛ nyí Jexóva. 5 Ðó a gbɛ́ wǎn nú Izlayɛ́li ví lɛ́ bɔ é gbɛ́ gbigbɔ, bo jó yě nú hwǐ ɖo hwenu e awě xo yě é, ɛɛn, ɖo hwenu e è dɔn tó gǔdo gúdo tɔn ɔ nú yě é.”’
6 “‘Énɛ́ wú ɔ, un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘un ná sɔ́ we ɖ’ayǐ nú hwenu e è ná kɔn hun kɔn nyi ayǐ é, bɔ è ná kɔn hun towe kɔn nyi ayǐ. Ðó a gbɛ́ wǎn nú hun e a kɔn nyi ayǐ é wútu ɔ, è ná kɔn hun towe kɔn nyi ayǐ. 7 Un ná bló bɔ sókan mɛ gbéjí Seyíi tɔn ná húzú gbětótló e jɛ vɔ̌ é, un ná sú kún dó nú mɛ ɖěbǔ e ná gbɔn mɛ dín é kpó mɛ ɖěbǔ e ná lɛ́ kɔ wá mɛ é kpó. 8 Un ná bló bɔ mɛ e è hu lɛ́ é ná kpé só ɖaxó tɔn lɛ́ jí; bɔ mɛ e kú hwǐ kú lɛ́ é ná j’ayǐ jɛ só kpɛví towe lɛ́ jí, tɔdo towe lɛ́ kpó tɔsisa towe lɛ́ bǐ kpó mɛ. 9 Un ná bló bɔ a ná húzú fí e jɛ vɔ̌ é káká sɔ́yi, bɔ mɛɖé sɔ́ ná nɔ toxo towe lɛ́ mɛ ǎ; bɔ mi ná wá tuun ɖɔ nyɛ wɛ nyí Jexóva.’
10 “A ɖɔ: ‘Akɔta we énɛ́ lɛ́ kpó to we énɛ́ lɛ́ kpó ná húzú ce, bɔ mǐ ná yí we lɛ́ bǐ,’ có nyɛ Jexóva ɖésúnɔ ka ɖo tɛ́ntin yětɔn. 11 ‘Énɛ́ wú ɔ, un ɖo gbɛ jɛ́n wɛ ɔ,’ wɛ Aklúnɔ Nǔbǐwúkpétɔ́ Jexóva ɖɔ, ‘lěe a wa nǔ xá yě kpó xomɛsin kpó, kpó wǔhwinhwan kpó ɖo hwenu e a gbɛ́ wǎn nú yě é gbɔn é ɔ, mɔ̌ wɛ un ná wa nǔ xá we gbɔn; un ná bló bɔ è ná tuun mì ɖo tɛ́ntin yětɔn hwenu e un ná ɖɔ hwɛ xá we é. 12 Énɛ́ ɔ, a ná tuun ɖɔ nyɛ Jexóva ɖésúnɔ se mɛmasíxó e a ɖɔ dó só Izlayɛ́li tɔn wú lɛ́ é bǐ, hwenu e a ɖɔ xó élɔ́ é: “Yě ko jɛ vɔ̌, bɔ è ko ná yě mǐ, bónú mǐ ná vún yě ɖu.”* 13 Bɔ mi ɖɔ xó nyanya dó wǔ ce kpó goyíyí kpó, bɔ mi zun mì ɔ, mi nɔ lɛ́ zun. Bǐ wɛ un se.’
14 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Hwenu e un ná sɔ́ we dó húzú gbětótló e jɛ vɔ̌ é ɔ, ayǐkúngban ɔ bǐ ná j’awǎ. 15 Lěe a j’awǎ hwenu e togun Izlayɛ́li tɔn sín gǔ jɛ vɔ̌ é gbɔn é ɔ, mɔ̌ wɛ un ná wa nǔ xá we gbɔn. Sókan mɛ gbéjí Seyíi tɔn, ɛɛn, Edɔ́mu blěbú è, a ná wá húzú aglingbigba e jɛ vɔ̌ é, bɔ mɛ lɛ́ ná wá tuun ɖɔ nyɛ wɛ nyí Jexóva.’”