Ezekiyɛ́li

37 Hlɔ̌nhlɔ́n* Jexóva tɔn wá jǐ ce, bɔ Jexóva kplá mì gbɔn gbigbɔ tɔn gblamɛ bo sɔ́ mì ɖó ayǐkúngban wɛnjɛ ɔ tɛ́ntin; xú kpé fínɛ́ bǐ. 2 É bló bɔ un gbɔn xú lɛ́ kpá lɛ́ lɛ̌ dó, bɔ un mɔ ɖɔ xú e ɖo ayǐkúngban wɛnjɛ ɔ jí lɛ́ é sukpɔ́ ɖésú, bɔ yě xú tawun. 3 É kanbyɔ́ mì ɖɔ: “Gbɛtɔ́ví è, xú énɛ́ lɛ́ ka sixú wá gbɛ a?” Bɔ un ɖɔ: “Aklúnɔ Nǔbǐwúkpétɔ́ Jexóva, hwi wɛ tuun.” 4 Énɛ́ ɔ, é ɖɔ nú mì ɖɔ: “Dǒ wɛn ɖé xú énɛ́ lɛ́ nú mì,* bo ɖɔ nú yě ɖɔ: ‘Xú xúxú lɛ́ mi, mi ɖótó xó e Jexóva ɖɔ é:

5 “‘Nǔ e Aklúnɔ Nǔbǐwúkpétɔ́ Jexóva ɖɔ nú xú énɛ́ lɛ́ é ɖíe: “Un ná bló bɔ funfún ná wá mi mɛ, bɔ mi ná wá gbɛ. 6 Un ná bló bɔ kan kpó lanti kpó ná wá mi wú, un ná bló bɔ anyǔ ná cyɔ́n mi, bɔ un ná sɔ́ funfún dó mi mɛ, bɔ mi ná wá gbɛ; énɛ́ ɔ, mi ná wá tuun ɖɔ nyɛ wɛ nyí Jexóva.”’”

7 Bɔ un dó wɛn ɔ lěe è ɖe gbe tɔn nú mì gbɔn é pɛ́pɛ́pɛ́. Ée un jɛ wɛn ɔ dó jí lě é ɔ, un se nǔɖiɖɔ ɖé, nǔɖé ɖɔ nǔ kpó zǐngídi kpó, bɔ xú lɛ́ jɛ sisɛ kplé ɖó kpɔ́ jí. 8 Énɛ́ gúdo ɔ, kan kpó lanti kpó wá yě wú, bɔ anyǔ cyɔ́n yě. Amɔ̌, funfún ɖě ka ko ɖo yě mɛ ǎ.

9 Énɛ́ gúdo ɔ, é ɖɔ nú mì ɖɔ: “Dǒ wɛn ɖé jɔhɔn nú mì. Gbɛtɔ́ví è, dǒ wɛn, ɖɔ nú jɔhɔn ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Jɔhɔn* è, gosín wɛ̌kɛ́zo ɛnɛ lɛ́* jí, bo nyi dó mɛ énɛ́ lɛ́ e è hu lɛ́ é jí, bónú yě ní dó sixú wá gbɛ.”’”

10 Énɛ́ ɔ, un dó wɛn ɔ lěe é ɖe gbe tɔn nú mì gbɔn é pɛ́pɛ́pɛ́, bɔ funfún* wá yě mɛ, bɔ yě jɛ gbɛ wá jí, bo nɔ te ɖo afɔ yětɔn lɛ́ jí; ahwankpá ɖaxó ɖé wɛ nú yě.

11 Énɛ́ gúdo ɔ, é ɖɔ nú mì ɖɔ: “Gbɛtɔ́ví è, togun Izlayɛ́li tɔn ɔ blěbú wɛ nyí xú énɛ́ lɛ́. Yě nɔ ɖo ɖiɖɔ wɛ ɖɔ: ‘Xú mǐtɔn lɛ́ xú, bɔ mǐ sɔ́ ɖó nukúnɖíɖó ɖě ǎ. Gbɛ mǐtɔn vɔ bǐ.’ 12 Énɛ́ wú ɔ, dǒ wɛn nú yě bo ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Togun ce, un ná hun yɔdo mitɔn lɛ́, bo ná ɖe mi sín yɔdo mitɔn lɛ́ mɛ, lobo ná kplá mi yi Izlayɛ́li to mɛ. 13 Togun ce è, hwenu e un ná hun yɔdo mitɔn lɛ́, bo ná ɖe mi sín yɔdo mitɔn lɛ́ mɛ é ɔ, mi ná wá tuun ɖɔ nyɛ wɛ nyí Jexóva.”’ 14 ‘Un ná sɔ́ gbigbɔ ce dó xomɛ nú mi, bɔ mi ná wá gbɛ, un ná kplá mi yi to mitɔn mɛ, bɔ mi ná nɔ fínɛ́; bɔ mi ná wá tuun ɖɔ nyɛ Jexóva ɖésúnɔ wɛ ɖɔ xó, bo bló,’ wɛ Jexóva ɖɔ.”

15 Jexóva lɛ́ ɖɔ xó nú mì, bo ɖɔ: 16 “Hwɛ gbɛtɔ́ví è, sɔ́ kpo ɖokpó bo wlán nǔ élɔ́ d’é wú: ‘Nú Judáa kpó Izlayɛ́li sín mɛ e ɖo kpɔ́ xá ɛ lɛ́ é* kpó.’ Énɛ́ gúdo hǔn, sɔ́ kpo ɖěvo, bo wlán nǔ élɔ́ d’é wú: ‘Nú Jozɛ́fu, kpo Eflayímu tɔn, kpó Izlayɛ́li sín mɛ e ɖo kpɔ́ xá ɛ lɛ́ é* bǐ kpó.’ 17 Énɛ́ gúdo hǔn, xo kpo we lɛ́ kplé, bónú yě ní húzú kpo ɖokpó géé ɖo alɔ towe mɛ. 18 Ényí togun towe* ɖɔ nú we ɖɔ: ‘Étɛ́ ka nyí tínmɛ nǔ énɛ́ lɛ́ tɔn?’ a jí ɔ, 19 a ná ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná sɔ́ kpo Jozɛ́fu tɔn e ɖo alɔ mɛ nú Eflayímu é gɔ́ nú akɔta Izlayɛ́li ví lɛ́ tɔn e ɖo kpɔ́ xá ɛ lɛ́ é bo ná cá xá kpo Judáa tɔn; un ná bló bɔ yě ná nyí kpo ɖokpó, ɛɛn, yě ná húzú ɖokpó ɖo alɔ ce mɛ.”’ 20 Kpo e jí a wlán nǔ dó lɛ́ é ɖó ná ɖo alɔ towe mɛ, bónú yě ná dó sixú mɔ.

21 “Énɛ́ gúdo hǔn, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná ɖe Izlayɛ́li ví lɛ́ tɔ́n sín akɔta e mɛ yě yi lɛ́ é mɛ, bo ná xo yě kplé ɖó kpɔ́ sín awa lɛ́ bǐ xwé, lobo ná kplá yě yi to yětɔn mɛ. 22 Un ná bló bɔ yě ná nyí akɔta ɖokpó ɖo to ɔ mɛ, ɖo só Izlayɛ́li tɔn lɛ́ jí, bɔ axɔ́sú ɖokpó wɛ ná kpa acɛ dó yě bǐ jí, lobɔ yě sɔ́ ná nyí akɔta we ǎ; mɔ̌ jɛ́n yě ma sɔ́ ná má, bo nyí axɔ́súɖuto we ɖě ǎ é nɛ́. 23 Yě sɔ́ ná sɔ́ bǒcyɔ xyɔ́ wǔ* yětɔn lɛ́, nǔwalɔ xyɔ́ wǔ yětɔn lɛ́ kpó hwɛ yětɔn lɛ́ bǐ kpó dó hɛn yěɖée blí ɖě ǎ. Un ná hwlɛ́n yě sín gbejímanɔ e zɔ́n bɔ yě hu hwɛ lɛ́ é bǐ mɛ, bo ná lɛ yě wé. Yě ná nyí togun ce, bɔ nyɛɖésúnɔ ná nyí Mawu yětɔn.

24 “‘“Mɛsɛntɔ́ ce Davídi ná nyí axɔ́sú yětɔn, bɔ lɛ̌ngbɔ́nyitɔ́ ɖokpó wɛ yě bǐ ná ɖó. Yě ná xwedó hwɛɖiɖɔ sín gbeta ce lɛ́, bo ná wa nǔ sɔgbe xá gbetakɛ́n ce lɛ́ tɛ́nwín lɛnwín. 25 Yě ná nɔ to e un ná mɛsɛntɔ́ ce é mɛ, ɛɛn, ée un ná Jakɔ́bu é, fí e tɔ́gbó mitɔn lɛ́ nɔ é, bɔ yě ná nɔ mɛ káká sɔ́yi, yě kpó vǐ* yětɔn lɛ́ kpó, gɔ́ nú vǐvú yětɔn lɛ́; bɔ mɛsɛntɔ́ ce Davídi ná nyí gǎn* yětɔn káká sɔ́yi.

26 “‘“Un ná jɛ fífá sín akɔ ɖé xá yě; akɔjijɛ e ná nɔ ayǐ káká sɔ́yi é ɖé wɛ é ná nyí. Un ná sɔ́ yě ɖó to yětɔn mɛ, bo ná bló bɔ yě ná sukpɔ́, lobo ná sɔ́ sinsɛnxɔ ce ɖó tɛ́ntin yětɔn káká sɔ́yi. 27 Goxɔ* ce ná nɔ kpɔ́ xá yě,* bɔ un ná nyí Mawu yětɔn, bɔ yě ná nyí togun ce. 28 Hwenu e sinsɛnxɔ ce ná ɖo Izlayɛ́li ví lɛ́ tɛ́ntin káká sɔ́yi é ɔ, akɔta lɛ́ ná wá tuun ɖɔ nyɛ Jexóva wɛ ɖo yě* ɖe ɖó vo wɛ, bónú yě ná nyí mɛ mímɛ́.”’”