Ezekiyɛ́li

34 Jexóva lɛ́ ɖɔ xó nú mì bo ɖɔ: 2 “Gbɛtɔ́ví è, ɖɔ nǔ e ná jɛ dó lɛ̌ngbɔ́nyitɔ́ Izlayɛ́li tɔn lɛ́ wú é ɖ’ayǐ. Ðɔ nǔ e ná jɛ é ɖ’ayǐ, ɖɔ nú lɛ̌ngbɔ́nyitɔ́ lɛ́ ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Heelú lɛ̌ngbɔ́nyitɔ́ Izlayɛ́li tɔn e nɔ ɖo adɔ yěɖésúnɔ tɔn kɛ́ɖɛ́ lin wɛ lɛ́ é. Lɛ̌ngbɔ́hwan ɔ wɛ lɛ̌ngbɔ́nyitɔ́ lɛ́ ɖó ná ná nǔɖuɖu ǎ cé? 3 Mi nɔ ɖu jǒ, mi nɔ dó lɛ̌ngbɔ́fúnvɔ, bo nɔ hu kanlin e dó jǒ hú gǎn bǐ é, loɔ, mi nɔ ná nǔɖuɖu lɛ̌ngbɔ́hwan ɔ ǎ. 4 Mi ná hlɔ̌nhlɔ́n lɛ̌ngbɔ́ e ba gǎn kpo é ǎ, mi gbɔ azɔn nú éé ɖo azɔn jɛ wɛ é ǎ, mi blá akpa nú éé gblé wǔ é ǎ, mi kplá éé ɖo flúflú wɛ é lɛ́ kɔ ǎ, mi ka lɛ́ ba éé bú é mɔ ǎ; é nyɔ́ wa ɔ, mi kpa acɛ gannaganna dó yě jí syɛ́nsyɛ́n. 5 Énɛ́ wú ɔ, yě gba kpé ɖó lɛ̌ngbɔ́nyitɔ́ ɖě ɖe ǎ wútu; yě gba kpé bo húzú nǔɖuɖu nú gběkanlin lɛ́ bǐ. 6 Lɛ̌ngbɔ́ ce lɛ́ nɔ ɖo flúflú kpé gbɔn só ɖaxó lɛ́ bǐ kpó só kpɛví e yi jǐ lɛ́ é bǐ kpó jí wɛ; lɛ̌ngbɔ́ ce lɛ́ gba kpé ayǐkúngban ɔ bǐ jí, bɔ mɛ ɖěbǔ yi ba yě mɔ, alǒ yi gbě yětɔn mɛ ǎ.

7 “‘“Énɛ́ wú ɔ, lɛ̌ngbɔ́nyitɔ́ lɛ́ è mi, mi ɖótó xó e Jexóva ɖɔ é: 8 ‘“Un ɖo gbɛ jɛ́n wɛ ɔ,” wɛ Aklúnɔ Nǔbǐwúkpétɔ́ Jexóva ɖɔ, “lɛ̌ngbɔ́ ce lɛ́ húzú nǔ e è ná wlí ɖu é, yě húzú nǔɖuɖu nú gběkanlin lɛ́ bǐ, ɖó lɛ̌ngbɔ́nyitɔ́ ɖě ɖe ǎ, bɔ lɛ̌ngbɔ́nyitɔ́ ce lɛ́ ba lɛ̌ngbɔ́ ce lɛ́ mɔ ǎ; é nyɔ́ wa ɔ, yě nɔ ɖo adɔ yěɖésúnɔ tɔn kɛ́ɖɛ́ lin wɛ, bo nɔ ná nǔɖuɖu lɛ̌ngbɔ́ ce lɛ́ ǎ.”’ 9 Énɛ́ wú ɔ, lɛ̌ngbɔ́nyitɔ́ lɛ́ è mi, mi ɖótó xó e Jexóva ɖɔ é. 10 Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná húzú kpan nukɔn lɛ̌ngbɔ́nyitɔ́ lɛ́, bo ná byɔ́ yě ɖɔ yě ní ɖó lěe yě kpé nukún dó lɛ̌ngbɔ́ ce lɛ́ wú gbɔn é sín gbe.* Un ná yí nǔɖuɖu níná lɛ̌ngbɔ́ ce lɛ́* sín azɔ̌ sín yě sí, bɔ lɛ̌ngbɔ́nyitɔ́ lɛ́ sɔ́ ná lin adɔ yěɖésúnɔ tɔn kɛ́ɖɛ́ ɖě ǎ. Un ná hwlɛ́n lɛ̌ngbɔ́ ce lɛ́ sín nu yětɔn mɛ, bɔ yě sɔ́ ná nyí nǔɖuɖu nú yě ɖě ǎ.’”

11 “‘Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Éɖíe! Nyɛɖésúnɔ ná yi ba lɛ̌ngbɔ́ ce lɛ́ mɔ, bo ná kpé nukún dó yě wú. 12 Un ná kpé nukún dó lɛ̌ngbɔ́ ce lɛ́ wú, lɛ̌ngbɔ́nyitɔ́ e mɔ lɛ̌ngbɔ́ tɔn e gba kpé lɛ́ é, bo nɔ ná nǔɖuɖu yě é ɖɔhun. Un ná hwlɛ́n yě sín fí e è gba yě dó gbɔn lɛ́ é bǐ ɖo akpɔ́kpɔ́ kpó zǐnflú gɔngɔn kpó sín azǎn gbe. 13 Un ná kplá yě tɔ́n sín togun lɛ́ mɛ, bo ná xo yě kplé ɖó kpɔ́ sín to lɛ́ mɛ, un ná kplá yě yi to yětɔn mɛ, bo ná ná nǔɖuɖu yě ɖo só Izlayɛ́li tɔn lɛ́ jí, ɖo tɔsisa lɛ́ tó, bo lɛ́ wa mɔ̌ ɖo fí e è nɔ nɔ ɖo to ɔ mɛ lɛ́ é bǐ kpá. 14 Amagbo ɖagbe mɛ wɛ un ná ná nǔɖuɖu yě ɖe, bɔ ayǐkúngban e jí yě ná ɖu ama ɖe é ná ɖo só Izlayɛ́li tɔn e yi jǐ lɛ́ é jí. Yě ná mlɔ́ fínɛ́ ɖo ayǐkúngban e jí ama zɔ́n ɖe ganjí é jí, bɔ yě ná ɖu nǔ ɖo amagbo e nyɔ́ hú gǎn lɛ́ é mɛ ɖo só Izlayɛ́li tɔn lɛ́ jí.”

15 “‘“Nyɛɖésúnɔ wɛ ná ná nǔɖuɖu lɛ̌ngbɔ́ ce lɛ́, bɔ nyiɖésúnɔ wɛ ná lɛ́ xwe yě dó xɔ,” wɛ Aklúnɔ Nǔbǐwúkpétɔ́ Jexóva ɖɔ. 16 “Un ná ba lɛ̌ngbɔ́ e bú é mɔ, un ná kplá éé ɖo flúflú wɛ é lɛ́ kɔ wá, un ná blá akpa nú éé gblé wǔ é, bo ná ná hlɔ̌nhlɔ́n éé ba gǎn kpo é; amɔ̌, un ná sú kún dó nú éé dó jǒ é kpó éé ɖó hlɔ̌nhlɔ́n é kpó. Hwɛɖónúmɛ wɛ un ná dó ná nǔɖuɖu lɛ̌ngbɔ́ énɛ́ lɛ́.”

17 “‘Amɔ̌, midɛɛ lɛ́, lɛ̌ngbɔ́ ce lɛ́ è mi, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ɖo hwɛ ná ɖɔ wɛ ɖo lɛ̌ngbɔ́ ɖě kpó ɖěvo kpó tɛ́ntin, bo ná lɛ́ ɖɔ ɖo agbo lɛ́ kpó gbagbǎ lɛ́ kpó tɛ́ntin. 18 Nǔ ɖu ɖo amagbo e nyɔ́ hú bǐ lɛ́ é mɛ kpé mi ǎ cé? Mi ɖó ná lɛ́ gbídí amagbo mitɔn e kpo é ɖó afɔ wú wɛ a? Bɔ ée mi nu sin e zin hú gǎn é gúdo é ɔ, mi ɖó ná lɛ́ zin afɔ dó sin ɔ mɛ bo ná hɛn blú wɛ a? 19 Din ɔ, amagbo e mi gbídí ɖó afɔ wú é wɛ lɛ̌ngbɔ́ ce lɛ́ ná ɖu a? Bɔ sin e mɛ mi zin afɔ dó bo hɛn blú é wɛ yě ná nu a?”

20 “‘Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ nú yě é ɖíe: “Éɖíe! Nyɛɖésúnɔ ná ɖɔ hwɛ ɖo lɛ̌ngbɔ́ e dó jǒ é kpó lɛ̌ngbɔ́ e xú gǒ é kpó tɛ́ntin, 21 ɖó mi nɔ zán adaja mitɔn kpó abɔ̌ mitɔn kpó dó nya glǒ lɛ̌ngbɔ́ azinzɔnnɔ lɛ́ bǐ, bo nɔ sɔ́ zo mitɔn lɛ́ dó sísɛ́ yě káká bo gba yě dó gbɔn zɔzɔ. 22 Un ná hwlɛ́n lɛ̌ngbɔ́ ce lɛ́ bɔ yě sɔ́ ná nyí nǔ e è ná wlí ɖu é ɖě ǎ; bɔ un ná ɖɔ hwɛ ɖo lɛ̌ngbɔ́ ɖě kpó ɖěvo kpó tɛ́ntin. 23 Un ná sɔ́ lɛ̌ngbɔ́nyitɔ́ ɖokpó ɖó yě nu, ɛɛn, mɛsɛntɔ́ ce Davídi bɔ é ná ná nǔɖuɖu yě. Éɖésúnɔ wɛ ná nɔ ná nǔɖuɖu yě bo ná húzú lɛ̌ngbɔ́nyitɔ́ yětɔn. 24 Nyɛ Jexóva ná húzú Mawu yětɔn bɔ mɛsɛntɔ́ ce Davídi ná nyí gǎn yětɔn. Nyɛ Jexóva ɖésúnɔ wɛ ɖɔ xó.

25 “‘“Un ná jɛ fífá sín akɔ ɖé xá yě, bo ná nya adǎnkanlin lɛ́ sín to ɔ mɛ, énɛ́ ɔ, yě ná nɔ ayijayǐ mɛ ɖo gbětótló lɛ́ mɛ, bo lɛ́ d’amlɔ ɖo zungbó lɛ́ mɛ. 26 Un ná bló bɔ lɛ̌ngbɔ́ lɛ́ kpó fí e lɛ́ lɛ̌ dó só kpɛví ce é kpó ná nyí nyɔ̌ná, bo ná bló bɔ jǐ ná nɔ ja dó hwetɔnnu. Nyɔ̌ná lɛ́ ná nɔ ja jǐ ɖɔhun. 27 Atín e ɖo gle mɛ lɛ́ é ná ná sínsɛ́n, bɔ ayǐkúngban ná ná jinukún, bɔ yě ná nɔ ayijayǐ mɛ ɖo to ɔ mɛ. Hwenu e un ná wɛ́n agbanhɛnkpo yětɔn lɛ́, bo ná hwlɛ́n yě sín mɛ ɖěɖěe sɔ́ yě dó ɖó kannumɔ lɛ́ é sí é ɔ, yě ná wá tuun ɖɔ nyɛ wɛ nyí Jexóva. 28 Yě sɔ́ ná nyí nǔ e akɔta lɛ́ ná wlí ɖu é ɖě ǎ, bɔ gběkanlin e ɖo ayǐkúngban ɔ jí lɛ́ é ná vún yě ɖu ǎ. Yě ná nɔ ayijayǐ mɛ, bɔ mɛ ɖě ná dó xɛsi yě ǎ.

29 “‘“Un ná ná atíngbó susunɔ* ɖé yě, bɔ yě sɔ́ ná kú adɔ kú ɖě ɖo to ɔ mɛ ǎ, bɔ akɔta lɛ́ sɔ́ ná dó winnyá yě ɖě ǎ. 30 ‘Énɛ́ ɔ, yě ná wá tuun ɖɔ nyɛ Jexóva Mawu yětɔn ɔ, un ɖo kpɔ́ xá yě, bɔ yědɛɛ lɛ́ togun Izlayɛ́li tɔn, wɛ nyí togun ce,’ wɛ Aklúnɔ Nǔbǐwúkpétɔ́ Jexóva ɖɔ.”’

31 “‘Amɔ̌, midɛɛ lɛ́ lɛ̌ngbɔ́ ce lɛ́, lɛ̌ngbɔ́ e wú un nɔ kpé nukún dó lɛ́ é ɔ, gbɛtɔ́ yǎyá wɛ mi nyí bɔ nyɛ nyí Mawu mitɔn,’ wɛ Aklúnɔ Nǔbǐwúkpétɔ́ Jexóva ɖɔ.”