Ezekiyɛ́li

6 “‘Amɔ̌, ényí mɛcɔ́tɔ́ ɔ mɔ hwǐ ɔ ja, bo ma ka kwín lanzo bo gb’akpá nú togun ɔ ǎ, bónú hwǐ ɔ wá bo xo mɛɖé sín gbɛ* yí ɖo yě mɛ ɔ, mɛ énɛ́ ná kú ɖó nǔwanyido éɖésúnɔ tɔn wú, loɔ, un ná kan hun tɔn byɔ́* mɛcɔ́tɔ́ ɔ.’

7 “Amɔ̌, hwɛ gbɛtɔ́ví è, un sɔ́ we mɛcɔ́tɔ́ ɖó togun Izlayɛ́li tɔn nu, bɔ ényí a se xó sín nu ce ɔ, a ɖó ná gb’akpá nú yě nú mì. 8 Ényí un ɖɔ nú mɛ nyanya ɖɔ: ‘Mɛ nyanya è, a ná kú jɛ́n wɛ!’ bónú hwɛ ma ka ɖɔ xó nú mɛ nyanya ɔ dó gb’akpá n’i bónú é húzú walɔ tɔn ǎ ɔ, é ná kú ɖó mɛ nyanya e é nyí é wútu, ɖó nǔwanyido éɖésúnɔ tɔn wú, amɔ̌, un ná kan hun tɔn byɔ́ we. 9 Loɔ, ényí a gb’akpá nú mɛ nyanya ɖɔ é ní jó walɔ tɔn dó, bónú é gbɛ́ walɔ tɔn húzú ɔ, é ná kú ɖó nǔwanyido tɔn wú, amɔ̌ hwɛ ɔ, é ɖo wɛn ɖɔ a ná hwlɛ́n gbɛ* hwiɖésúnɔ tɔn gán.

10 “Hwɛ gbɛtɔ́ví è, ɖɔ nú togun Izlayɛ́li tɔn ɖɔ: ‘Mi ɖɔ: “Gǔfínfɔ́n mǐtɔn lɛ́ kpó hwɛ mǐtɔn lɛ́ kpó kpɛn mǐ wangban ɖɔhun, bo bló bɔ mǐ xú gǒ; énɛ́ wú ɔ, nɛ̌ mǐ ka ná nɔ gbɛ gbɔn?”’ 11 Ðɔ nú yě ɖɔ: ‘“Un ɖo gbɛ jɛ́n wɛ ɔ,” wɛ Aklúnɔ Nǔbǐwúkpétɔ́ Jexóva ɖɔ, “mɛ nyanya sín kú nɔ víví nú mì ǎ, é nyɔ́ wa ɔ, ba wɛ un nɔ ba ɖɔ mɛ e nyí mɛ nyanya é ní bló hǔzúhúzú bo nɔ gbɛ. Togun Izlayɛ́li tɔn è mi, mi lɛ́ kɔ, ɛɛn, mi lɛ́ kɔ sín ali mitɔn nyanya lɛ́ jí, ɖó étɛ́wú mi ka ná kú?”’

12 “Hwɛ gbɛtɔ́ví è, ɖɔ nú togun towe sín vǐ lɛ́ ɖɔ: ‘Ényí nǔjlɔ́jlɔ́watɔ́ fɔ́n gǔ ɔ, nǔjlɔ́jlɔ́wiwa tɔn ná hwlɛ́n ɛ ǎ; mɔ̌ jɛ́n, ényí nǔnyanyawatɔ́ lɛ́ kɔ sín nǔnyanyawiwa tɔn gúdo ɔ, nǔnyanyawiwa ma ná zɔ́n bónú é ná j’ayǐ* ǎ é nɛ́. Mɔ̌ ɖokpó ɔ, ényí nǔjlɔ́jlɔ́watɔ́ ɖé hu hwɛ gbeɖé ɔ, é ná sín nǔjlɔ́jlɔ́wiwa tɔn wú bónú é ná nɔ gbɛ ǎ. 13 Ényí un ɖɔ nú nǔjlɔ́jlɔ́watɔ́ ɖɔ: “É ɖo wɛn ɖɔ a ná nɔ gbɛ,” bónú é ɖeji dó nǔjlɔ́jlɔ́wiwa éɖésúnɔ tɔn wú bo nɔ wa nǔ nyanya* ɔ, è sɔ́ ná flín nǔ jlɔ́jlɔ́ e é wa lɛ́ é ɖě ǎ, é nyɔ́ wa ɔ, é ná kú ɖó nǔ nyanya e é wa lɛ́ é wú.

14 “‘Ényí un ɖɔ nú mɛ nyanya ɖɔ: “A ná kú jɛ́n wɛ,” bónú é lɛ́ kɔ sín hwɛ tɔn gúdo, bo nɔ wa nǔ e sɔgbe é, gɔ́ nú nǔ jlɔ́jlɔ́, 15 bo lɛ́ kɔ nú nǔ e é yí ɖó gba nu é, sɔ́ nǔ e é fin é jó, lobo ma nɔ wa nǔ nyanya ǎ dó xwedó gbetakɛ́n ɖěɖěe nɔ kplá mɛ bɔ è nɔ mɔ gbɛ é ɔ, é ná nɔ gbɛ jɛ́n wɛ. É ná kú ǎ. 16 Hwɛ e é hu lɛ́ é ɔ, è ná xa ɖě dó kɔ n’i ǎ.* Ðó é nɔ wa nǔ e sɔgbe é, gɔ́ nú nǔ jlɔ́jlɔ́ wútu ɔ, é ná nɔ gbɛ jɛ́n wɛ.’

17 “Loɔ, togun towe ɖɔ: ‘Ali Jexóva tɔn jlɔ́ ǎ,’ è ka ná ɖɔ xójɔxó ɔ, ali yědɛɛ lɛ́ tɔn wɛ ma jlɔ́ ǎ.

18 “Ényí nǔjlɔ́jlɔ́watɔ́ jó nǔjlɔ́jlɔ́wiwa tɔn dó bo nɔ wa nǔ nyanya ɔ, é ɖó ná kú ɖó énɛ́ wú. 19 Amɔ̌, ényí mɛ e nɔ wa nǔ nyanya é ɖé lɛ́ kɔ sín nǔnyanyawiwa tɔn gúdo, bo nɔ wa nǔ e sɔgbe é, gɔ́ nú nǔ jlɔ́jlɔ́ ɔ, é ná nɔ gbɛ ɖó mɔ̌ e é wa é wú.

20 “Loɔ, mi ɖɔ: ‘Ali Jexóva tɔn jlɔ́ ǎ.’ Togun Izlayɛ́li tɔn è mi, un ná ɖɔ hwɛ xá mɛ ɖokpó ɖokpó sɔgbe xá nǔwiwa tɔn lɛ́.”

21 Ðo nukɔnmɛ, ɖo kannumɔgbénu yiyi mǐtɔn sín xwe 12gɔ́ ɔ mɛ, ɖo azǎn atɔ́ɔ́ngɔ́ sun 10gɔ́ ɔ tɔn gbe ɔ, nya e gán hwenu e è tɔ́n ahwan Jeluzalɛ́mu é ɖokpó wá gɔ̌n ce, bo ɖɔ: “È yí toxo ɔ!”

22 Ðo gbadanu e jɛ nukɔn nú gbe e gbe nya e gán ɖ’é mɛ é wá é ɔ, hlɔ̌nhlɔ́n* Jexóva tɔn wá jǐ ce, bɔ é bló bɔ un kpé wú bo lɛ́ jɛ xó ɖɔ jí, cóbɔ nya ɔ wá gɔ̌n ce ayǐhɔ́ngbe tɔn zǎnzǎn. Énɛ́ ɔ, ɖɛ̌ ce tún kan, bɔ un sɔ́ nyí ɖɛ̌kúnánɔ ǎ.

23 Énɛ́ gúdo ɔ, Jexóva ɖɔ xó nú mì, bo ɖɔ: 24 “Gbɛtɔ́ví è, mɛ e nɔ nɔ aglingbigba énɛ́ lɛ́ mɛ lɛ́ é ɖo ɖiɖɔ dó Izlayɛ́li to ɔ wú wɛ ɖɔ: ‘Ablaxámu ɔ, éɖokpó wɛ có, é ka yí to ɔ. Mǐdɛɛ lɛ́ ka sukpɔ́; é ɖo wɛn ɖɔ è ko ná to ɔ mǐ bɔ é nyí nǔɖókan mǐtɔn.’

25 “Énɛ́ wú ɔ, ɖɔ nú yě ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Mi nɔ ɖu lan e mɛ hun ɖe é, bo nɔ ɖeji dó bǒcyɔ xyɔ́ wǔ* mitɔn lɛ́ wú, lobo nɔ ɖo hun kɔn nyi ayǐ wɛ. Nǔ ɖo mɔ̌ bɔ to ɔ ná nyí mitɔn a? 26 Mi ɖeji dó hwǐ mitɔn wú, bo dó ta nǔwalɔ e xyɔ́ wǔ lɛ́ é mɛ, bɔ mɛ ɖokpó ɖokpó nɔ dó afɔ gbě nú nɔzo tɔn sín asi.* Nǔ ɖo mɔ̌ bɔ to ɔ ná nyí mitɔn a?”’

27 “Nǔ e a ɖó ná ɖɔ nú yě é ɖíe: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ɖo gbɛ jɛ́n wɛ ɔ, mɛ e nɔ nɔ aglingbigba ɔ mɛ lɛ́ é ná kú hwǐ kú; un ná jó mɛ e ɖo gle mɛ agbawungba lɛ́ é nú gběkanlin lɛ́, bɔ yě ná nyí nǔɖuɖu nú yě, bɔ azɔn ná hu mɛ ɖěɖěe ɖo ahohó lɛ́ kpó sónu lɛ́ kpó mɛ lɛ́ é. 28 Un ná bló bɔ to ɔ ná húzú gbětótló e jɛ vɔ̌ mlɛ́mlɛ́ é, bo ná ɖó nǔ goyíyí tɔn kpó afɔ e é nɔ tɛ ayǐ é kpó nu, bɔ Izlayɛ́li só lɛ́ ná jɛ vɔ̌, bɔ mɛɖé sɔ́ ná gbɔn fínɛ́ dín ǎ. 29 Bɔ hwenu e un ná bló bɔ to ɔ ná húzú gbětótló e jɛ vɔ̌ mlɛ́mlɛ́, ɖó nǔ e xyɔ́ wǔ bɔ yě wa lɛ́ é bǐ wútu é ɔ, yě ná wá tuun ɖɔ nyɛ wɛ nyí Jexóva.”’

30 “Hwɛ gbɛtɔ́ví è, mɛ e ɖo togun towe mɛ lɛ́ é ɖo xó towe ɖɔ wɛ xá yěɖée lɛ́ ɖo dǒ lɛ́ kpá, bo lɛ́ ɖ’é wú ɖo xɔ lɛ́ sín ali lɛ́ nu. Yě nɔ ɖɔ nú yěɖée lɛ́, ɛɛn, mɛ ɖokpó ɖokpó nɔ ɖɔ nú nɔví tɔn ɖɔ: ‘Wǎ, bónú mǐ ní se xó e Jexóva ɖɔ é.’ 31 Yě ná nyi ahwan wá jínjɔ́n nukɔn towe lěe togun ce ná bló gbɔn é ɖɔhun, yě ná se xó towe lɛ́, yě ka ná bló ɖ’é jí ǎ. Ðó yě nɔ sɔ́ nu yětɔn dó ɖɔ xó víví* nú we, loɔ, afu ɖuɖu sín nukúnkɛn wɛ ayi yětɔn nɔ dó. 32 Kpɔ́n! Wǎnyíyíhan e è ji kpó gbe ɖagbe ɖagbe kpó, bo xo kanhún d’é mɛ kpó azɔ̌ tuuntuun kpó é ɖɔhun wɛ a cí nú yě. Yě ná se xó towe lɛ́, yě ɖě ka ná bló ɖ’é jí ǎ. 33 Bɔ hwenu e é ná jɛnu é ɔ, (é ka ná jɛnu), yě ná wá tuun ɖɔ gbeyíɖɔ ɖokpó nɔ tɛ́ntin yětɔn.”