Ezekiyɛ́li
32 Ðo xwe 12gɔ́ ɔ mɛ, ɖo azǎn nukɔntɔn sun 12gɔ́ ɔ tɔn gbe ɔ, Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, ji gbɛvíhan* ɖé dó axɔ́sú Ejípu tɔn Falawɔ́ɔn tamɛ, bo ɖɔ n’i ɖɔ:
‘A cí kinnikínní wínnyáwínnyá hlɔ̌nhlɔ́nnɔ* akɔta lɛ́ tɔn ɖé ɖɔhun,
amɔ̌, è ko xwe nu towe dó xɔ.
A cí xumɛkanlin ɖaxó ɖé ɖɔhun, a nɔ xo tɔ kpó zǐngídi kpó ɖo tɔsisa towe lɛ́ mɛ,
bo nɔ sɔ́ afɔ towe lɛ́ dó hɛn sin lɛ́ blú, lobo nɔ hɛn tɔsisa* lɛ́ kwíji.’
3 Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
‘Un ná zán kplékplé akɔta gěgé tɔn dó nyi ɖɔ ce dó jǐ towe,
bɔ a ná ɖo ɖɔgbó* ce mɛ bɔ è ná dɔn we tɔ́n.
4 Un ná jó we dó nyi ayǐkúngban jí;
un ná sɔ́ we nyi dó gle mɛ agbawungba.
Un ná bló bɔ xɛ e nɔ zɔn gbɔn jǐnukúnsin lɛ́ é bǐ ná ɖó jɛ jǐ towe;
un ná ná lan towe gběkanlin e ɖo ayǐkúngban ɔ bǐ jí lɛ́ é bɔ yě ná ɖu bɔ é ná jɛmɛ nú yě.
5 Un ná nyi lan towe dó só lɛ́ jí,
bo ná bló bɔ lan towe e kpo é ná gɔ́ tɔdo lɛ́ mɛ.
6 Un ná sɔ́ hun towe e ɖo sisa wɛ é dó hɛn to ɔ fá kpɛncɛɛn káká yi só lɛ́ ta,
bɔ é ná gɔ́ tɔsisa lɛ́.’*
7 ‘Hwenu e xó towe ná fó é ɔ, un ná cyɔ́n nǔ dó jǐnukúnsin, bo ná bló bɔ sunví tɔn lɛ́ ná dó ablu.
Un ná cyɔ́n akpɔ́kpɔ́ dó hwesivɔ́,
bɔ sun ná ná wěziza tɔn ǎ.
8 Un ná bló bɔ nǔ e nɔ ná wěziza ɖo jǐnukúnsin lɛ́ é bǐ ná dó ablu ɖó hwɛ wú,
bɔ un ná sɔ́ ablu dó cyɔ́n to towe,’ wɛ Aklúnɔ Nǔbǐwúkpétɔ́ Jexóva ɖɔ.
9 ‘Un ná bló bɔ mɛ gěgé ná se wǔvɛ́ ɖo ayi mɛ hwenu e un ná kplá kannumɔ towe lɛ́ yi akɔta ɖěvo lɛ́ mɛ,
ɛɛn, yi to e a ma tuun ǎ lɛ́ é mɛ é.
10 Un ná bló bɔ ahwi ná xo mɛ gěgé,
bɔ axɔ́sú yětɔn lɛ́ ná sísɔ́ kpó xɛsi ɖaxó kpó ɖó hwɛ wú, hwenu e un ná zé hwǐ ce dó jǐ ɖo nukɔn yětɔn é.
Yě ná ɖo sísɔ́sísɔ́ wɛ magbokɔ, bɔ mɛ ɖokpó ɖokpó ná ɖo xɛsi jí ɖó gbɛ tɔn wú,
ɖo gbe e gbe a ná j’ayǐ é.’
11 Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe:
‘Axɔ́sú Babilɔ́nu tɔn sín hwǐ ná xo we.
12 Un ná zán ahwanfuntɔ́ hlɔ̌nhlɔ́nnɔ lɛ́ sín hwǐ lɛ́,
ɛɛn, ahwanfuntɔ́ hlɔ̌nhlɔ́nnɔ e nɔ wa alǎnnú hú gǎn ɖo akɔta lɛ́ bǐ mɛ lɛ́ é sín hwǐ lɛ́ dó hu ahwan wɔ̌búwɔ́bú towe ná.
Yě ná hwíhwɛ́ goyíyí Ejípu tɔn, bo ná sú kún dó nú ahwan wɔ̌búwɔ́bú tɔn bǐ mlɛ́mlɛ́.
13 Un ná sú kún dó nú kanlinhwan tɔn lɛ́ bǐ ɖo sin tɔn wɔ̌búwɔ́bú ɔ kpá,
bɔ gbɛtɔ́ ɖě sín afɔ, alǒ kanlin ɖě sín afɔ* sɔ́ ná blú yě gbeɖé ǎ.’
14 ‘Ðo hwe énɛ́ nu ɔ, un ná bló bɔ sin yětɔn lɛ́ ná zin,
lobo bló bɔ tɔsisa yětɔn lɛ́ ná sa ami ɖɔhun,’ wɛ Aklúnɔ Nǔbǐwúkpétɔ́ Jexóva ɖɔ.
15 ‘Hwenu e un ná bló bɔ Ejípu ná húzú gbětótló e jɛ vɔ̌ é, ɛɛn, to e mɛ è bɛ́ nǔ e ɖ’é mɛ lɛ́ é bǐ sín é ɔ,
hwenu e un ná hu mɛ e nɔ nɔ mɛ lɛ́ é bǐ é ɔ,
yě ná wá tuun ɖɔ nyɛ wɛ nyí Jexóva.
16 Gbɛvíhan ɖé wɛ, bɔ é ɖo wɛn ɖɔ mɛ lɛ́ ná ji nǔwamɛhan tɔn;
vǐ nyɔ̌nu akɔta lɛ́ tɔn lɛ́ ná ji.
Yě ná ji dó Ejípu kpó ahwan tɔn wɔ̌búwɔ́bú ɔ bǐ kpó jí,’ wɛ Aklúnɔ Nǔbǐwúkpétɔ́ Jexóva ɖɔ.”
17 Énɛ́ gúdo ɔ, ɖo xwe 12gɔ́ ɔ mɛ, ɖo azǎn 15gɔ́ sun ɔ tɔn gbe* ɔ, Jexóva ɖɔ xó nú mì, bo ɖɔ: 18 “Gbɛtɔ́ví è, dǒ gbɛvíhan dó ahwan wɔ̌búwɔ́bú Ejípu tɔn jí bo kplá ɛ* yi kɔ́ glɔ́, éyɛ́ kpó vǐ nyɔ̌nu akɔta hlɔ̌nhlɔ́nnɔ lɛ́ tɔn kpó, gɔ́ nú mɛ ɖěɖěe xwe do* mɛ lɛ́ é.
19 “‘A lin ɖɔ émí nyɔ́ ɖɛkpɛ hú mɛ ɖěvo lɛ́ wɛ a? Yi do, bo mlɔ́ mɛ e è ma gbo ada ná ǎ lɛ́ é kpá!’
20 “‘Yě ná j’ayǐ ɖo mɛ e kú hwǐ kú lɛ́ é tɛ́ntin. È ko jó è* nú hwǐ; mi dɔn é kpó ahwan wɔ̌búwɔ́bú tɔn bǐ kpó yi zɔ.
21 “‘Ahwanfuntɔ́ e ɖó hlɔ̌nhlɔ́n hú gǎn lɛ́ é ná ɖɔ xó nú Falawɔ́ɔn kpó alɔdómɛtɔ́ tɔn lɛ́ kpó sín Yɔdo* gɔngɔn mɛ. É ɖo wɛn ɖɔ yě ná yi do, bo ná mlɔ́ ayǐ, mɛ ɖěɖěe è ma gbo ada ná ǎ, bɔ yě kú hwǐ kú lɛ́ é ɖɔhun. 22 Fínɛ́ wɛ Asilíi kpó ahwangɔnu tɔn bǐ kpó ɖe. Yɔdo yětɔn lɛ́ lɛ́ lɛ̌ dó è, yě bǐ wɛ kú hwǐ kú. 23 Yɔdo tɔn lɛ́ ɖo fí e gɔ́ngɔ́n hú gǎn ɖo do* mɛ lɛ́ é, bɔ ahwangɔnu tɔn lɛ́ lɛ̌ dó yɔdo tɔn; yě bǐ wɛ kú hwǐ kú, ɖó yě dó xɛsi ɖaxó mɛ e ɖo gbɛ lɛ́ é wútu.
24 “‘Fínɛ́ wɛ Elámu ɖe, bɔ ahwan wɔ̌búwɔ́bú tɔn bǐ lɛ́ lɛ̌ dó yɔdo tɔn, yě bǐ wɛ kú hwǐ kú. Yě mɛ ɖěɖěe dó xɛsi ɖaxó mɛ e ɖo gbɛ lɛ́ é ɔ, yě jɛ te yi kɔ́ glɔ́ ma gbo ada. Din ɔ, yě ná hɛn winnyágban yětɔn, yě kpó mɛ ɖěɖěe ɖo do* mɛ yi wɛ lɛ́ é kpó. 25 È tɛ́ zan ɖokpó n’i ɖo mɛ e è hu lɛ́ é tɛ́ntin, bɔ ahwan tɔn wɔ̌búwɔ́bú ɔ bǐ lɛ́ lɛ̌ dó yɔdo tɔn lɛ́. È gbo ada nú yě mɛ ɖěbǔ ǎ, bɔ yě kú hwǐ kú, ɖó yě dó xɛsi ɖaxó mɛ e ɖo gbɛ lɛ́ é wútu; bɔ yě ná hɛn winnyágban yětɔn, yě kpó mɛ ɖěɖěe ɖo do* mɛ yi wɛ lɛ́ é kpó. È ko sɔ́ ɛ ɖó mɛ e è hu lɛ́ é tɛ́ntin.
26 “‘Fínɛ́ wɛ Mɛcɛ́ki kpó Tubálu kpó, gɔ́ nú ahwan yětɔn* wɔ̌búwɔ́bú lɛ́ bǐ ɖe. Yɔdo yětɔn* lɛ́ lɛ́ lɛ̌ dó è.* È gbo ada nú yě mɛ ɖěbǔ ǎ, bɔ hwǐ xo yě zlɛ́, ɖó yě dó xɛsi ɖaxó mɛ e ɖo gbɛ lɛ́ é wútu. 27 Ahwanfuntɔ́ hlɔ̌nhlɔ́nnɔ e è ma gbo ada ná ǎ, bɔ yě j’ayǐ, bo jɛ te yi Yɔdo* mɛ kpó ahwanfunnú yětɔn lɛ́ kpó lɛ́ é kpá wɛ yě ná mlɔ́ ǎ cé? Yě ná bɛ́ hwǐ yětɔn lɛ́ dó ta yětɔn lɛ́ glɔ́,* bo ná bɛ́ hwɛhuhu yětɔn lɛ́ dó xú yětɔn lɛ́ jí, ɖó ahwanfuntɔ́ hlɔ̌nhlɔ́nnɔ énɛ́ lɛ́ dó xɛsi ɖaxó mɛ e ɖo gbɛ lɛ́ é wútu. 28 Amɔ̌ hwɛ* ɔ, è ná nyínyɛ́ we ɖo mɛ e è ma gbo ada ná ǎ lɛ́ é tɛ́ntin, bɔ a ná mlɔ́ ayǐ ɖo mɛ e kú hwǐ kú lɛ́ é kpá.
29 “‘Fínɛ́ wɛ Edɔ́mu, axɔ́sú tɔn lɛ́ kpó gǎn tɔn lɛ́ bǐ kpó ɖe, yě mɛ e ɖó hlɔ̌nhlɔ́n có, yě ɖo ayǐmlɔ́mlɔ́ ɖo mɛ e kú hwǐ kú lɛ́ é tɛ́ntin é; yě lɔ ná mlɔ́ ayǐ ɖo mɛ e è ma gbo ada ná ǎ lɛ́ é kpó mɛ e ɖo do* mɛ yi wɛ lɛ́ é kpó kpá.
30 “‘Fínɛ́ wɛ axɔ́ví* totaligbé tɔn lɛ́ bǐ ɖe, gɔ́ nú Sidɔ́ɔnnu lɛ́ bǐ, yě mɛ énɛ́ lɛ́ e hlɔ̌nhlɔ́n yětɔn dó xɛsi ɖaxó mɛ có, yě xwedó mɛ e è hu lɛ́ é, bo jɛ te yi do mɛ kpó winnyá kpó é. Yě ná mlɔ́ ayǐ ma gbo ada ɖo mɛ e kú hwǐ kú lɛ́ é kpá, bo ná hɛn winnyágban yětɔn kpó mɛ e ɖo do* mɛ yi wɛ lɛ́ é kpó.
31 “‘Falawɔ́ɔn ná mɔ nǔ énɛ́ lɛ́ bǐ, bɔ nǔ e jɛ dó ahwan tɔn wɔ̌búwɔ́bú ɔ jí é ná dó gbɔ n’i; Falawɔ́ɔn kpó ahwankpá tɔn bǐ kpó ná kú hwǐ kú,’ wɛ Aklúnɔ Nǔbǐwúkpétɔ́ Jexóva ɖɔ.
32 “‘Ðó Falawɔ́ɔn dó xɛsi ɖaxó mɛ e ɖo gbɛ lɛ́ é wútu ɔ, è ná ɖi é kpó ahwan tɔn wɔ̌búwɔ́bú ɔ kpó ɖó kpɔ́ xá mɛ e ma gbo ada ǎ lɛ́ é, ɛɛn, mɛ e kú hwǐ kú lɛ́ é,’ wɛ Aklúnɔ Nǔbǐwúkpétɔ́ Jexóva ɖɔ.”