Ezekiyɛ́li
31 Ðo xwe 11gɔ́ ɔ mɛ, ɖo azǎn nukɔntɔn sun atɔngɔ́ ɔ tɔn gbe ɔ, Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, ɖɔ nú axɔ́sú Ejípu tɔn Falawɔ́ɔn kpó ahwan tɔn wɔ̌búwɔ́bú ɔ kpó ɖɔ:
‘Mɛ̌ ka d’agba hwiɖɔhun?
3 Asilíinu ɖé ɖɔhun wɛ a cí, ɛɛn, sɛ́dlutín Libáan tɔn ɖé ɖɔhun.
Ala tɔn lɛ́ nyɔ́ ɖɛkpɛ bo cí zun e ɖó yɛtɛn é ɖɔhun; é yi jǐ tawun,
bɔ ɖavínu tɔn yi akpɔ́kpɔ́ lɛ́ mɛ.
4 Sin lɛ́ bló bɔ é su bo d’agba, bɔ tɔjɔtɛn e gɔ́ngɔ́n lɛ́ é bló bɔ é su bo yi jǐ.
Tɔsisa lɛ́ lɛ́ lɛ̌ dó fí e è tun i nyi é;
tɔhwín yětɔn lɛ́ nɔ hú sin nú atín e ɖo gle ɔ mɛ lɛ́ é bǐ.
5 Énɛ́ wú ɔ, é su bo ɖi ga hú atín ɖěvo e ɖo gle ɔ mɛ lɛ́ é bǐ.
Ala tɔn lɛ́ sukpɔ́ d’é jí, bɔ alaví tɔn lɛ́ su bo ɖi ga,
ɖó tɔsisa tɔn lɛ́ sín sin sukpɔ́ tawun wútu.
6 Xɛ e nɔ zɔn gbɔn jǐnukúnsin lɛ́ é bǐ nɔ xo adɔ̌ nyi ala tɔn lɛ́ mɛ,
gběkanlin lɛ́ bǐ nɔ ji vǐ ɖo asá tɔn mɛ,
bɔ akɔta e mɛ gbɛtɔ́ sukpɔ́ ɖe lɛ́ é bǐ nɔ nɔ yɛtɛn tɔn.
7 Ðɛkpɛ tɔn kpó lě do ala tɔn lɛ́ ɖi ga sɔ é kpó zɔ́n bɔ é wá ɖó susu,
ɖó ɖɔ tɔn lɛ́ hun káká yi sin e sukpɔ́ lɛ́ é mɛ wútu.
8 È sixú jlɛ́ sɛ́dlutín e ɖo jikpá Mawu tɔn mɛ lɛ́ é ɖěvo ɖěbǔ dó wǔ tɔn ǎ.
Jenɛvliyéetín ɖě ɖó ala éɖɔhun ǎ.
Platánitín ɖě ɖó alaví éɖɔhun ǎ.
Atín e ɖo jikpá Mawu tɔn mɛ lɛ́ é ɖěvo ɖěbǔ sixú hwlɛ́n agba xá ɛ ɖo ɖɛkpɛ nyínyɔ́ linu ǎ.
9 Un bló bɔ é nyɔ́ ɖɛkpɛ, bɔ ama tɔn lɛ́ dó tawun,
bɔ atín ɖěvo e ɖo Edɛ́ni, jikpá Mawu nǔgbó ɔ tɔn mɛ lɛ́ é bǐ nɔ jló gbɛ tɔn.’
10 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðó é* ɖi ga sɔmɔ̌, bɔ ɖavínu tɔn yi jǐ bo byɔ́ akpɔ́kpɔ́ lɛ́ mɛ, bɔ é sín jǐyiyi tɔn wú bɔ é wá húzú goyítɔ́ ɖo ayi mɛ wútu ɔ, 11 un ná jó è nú acɛkpatɔ́ hlɔ̌nhlɔ́nnɔ akɔta lɛ́ tɔn, bɔ é ɖo wɛn ɖɔ é ná wa nǔ xá ɛ, bɔ un ná gbɛ́ ɛ ɖó nǔnyanyawiwa tɔn wú. 12 Toɖévomɛnu lɛ́, ɛɛn, mɛ e nɔ wa alǎnnú hú gǎn ɖo akɔta lɛ́ mɛ lɛ́ é ná gbo è zin dɛ́ bo ná jó è dó nyi só lɛ́ ta. Bɔ ama tɔn lɛ́ ná kɔn nyi tɔdo lɛ́ bǐ mɛ, bɔ è ná wɛ́n ala tɔn lɛ́ nyi tɔsisa to ɔ tɔn lɛ́ bǐ mɛ. Togun e ɖo ayǐkúngban ɔ jí lɛ́ é bǐ ná gosín yɛtɛn tɔn bo ná jó è dó. 13 Xɛ e nɔ zɔn gbɔn jǐnukúnsin lɛ́ é bǐ ná nɔ nɔ goto tɔn e j’ayǐ é jí, bɔ gběkanlin lɛ́ bǐ ná nɔ nɔ ala tɔn lɛ́ mɛ. 14 Nǔ ná nyí mɔ̌ bónú atín e sɛkpɔ́ sin é ɖě ní ma su bo ɖi ga sɔmɔ̌, alǒ ɖavínu tɔn ní yi jǐ bo byɔ́ akpɔ́kpɔ́ lɛ́ mɛ ó; nǔ ná lɛ́ nyí mɔ̌ bónú atín e è hú sin ná ganjí é ɖě ní ma yi jǐ bo yi sɔ́ akpɔ́kpɔ́ lɛ́ ó. Ðó è ná jó yě bǐ nú kú, bɔ yě ná yi kɔ́ glɔ́, gɔ́ nú gbɛtɔ́ví e xwe do* mɛ lɛ́ é.’
15 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Ðo gbe e gbe é ná yi Yɔdo* mɛ é ɔ, un ná bló bɔ è ná nɔ aluwɛ mɛ. Énɛ́ wú ɔ, un ná cyɔ́n nǔ dó sin e gɔ́ngɔ́n é bo ná glɔ́n ali nú tɔsisa tɔn lɛ́ bónú sin e sukpɔ́ é ní nɔ te. Un ná bló bɔ Libáan ná dó zǐnflú ɖó éyɛ́ wú, bɔ atín e ɖo gle ɔ mɛ lɛ́ é bǐ ná mlú ɖa. 16 Un ná bló bɔ akɔta lɛ́ ná sísɔ́, hwenu e è ná se ayǐjijɛ tɔn sín nǔɖiɖɔ, ɖo hwenu e un ná dɔn ɛ nyi Yɔdo* mɛ gɔ́ nú mɛ ɖěɖěe xwe do* mɛ lɛ́ é bǐ é. Bɔ atín e ɖo Edɛ́ni lɛ́ é bǐ, atín Libáan tɔn e nyɔ́ hú gǎn lɛ́ é kpó ɖagbe hú gǎn lɛ́ kpó, gɔ́ nú atín e è hú sin ná ganjí lɛ́ é bǐ ná mɔ gbɔdónúmɛ ɖo kɔ́ glɔ́. 17 Yě yi Yɔdo* mɛ xá ɛ, yi mɛ ɖěɖěe kú hwǐ kú lɛ́ é gɔ́n, bɔ hunjɛdómɛjítɔ́* tɔn e nɔ yɛtɛn tɔn ɖo akɔta lɛ́ tɛ́ntin lɛ́ é ɖo kpɔ́ xá ɛ.’
18 “‘Atín e ɖo Edɛ́ni lɛ́ é ɖětɛ́ ka ɖó susu bo lɛ́ d’agba hwiɖɔhun? Amɔ̌, é ɖo wɛn ɖɔ è ná dɔn hwi kpó atín e ɖo Edɛ́ni lɛ́ é kpó yi kɔ́ glɔ́. A ná mlɔ́ ayǐ ɖo mɛ e ma gbo ada ǎ lɛ́ é tɛ́ntin, hwi kpó mɛ ɖěɖěe kú hwǐ kú lɛ́ é kpó. Nǔ e ná jɛ dó Falawɔ́ɔn kpó ahwan tɔn wɔ̌búwɔ́bú ɔ bǐ kpó jí é nɛ́,’ wɛ Aklúnɔ Nǔbǐwúkpétɔ́ Jexóva ɖɔ.”