Ezekiyɛ́li
30 Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, ɖɔ nǔ e ná jɛ é ɖ’ayǐ, bo ɖɔ: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Mi dó gbɛvíhan bo ɖɔ: ‘Yéége, azǎn ɔ jawě!’
3 Ðó azǎn ɔ sɛkpɔ́, ɛɛn, azǎn Jexóva tɔn sɛkpɔ́.
Akpɔ́kpɔ́ sín azǎn ɖé wɛ é ná nyí, bo ná nyí hwenu e è sɔ́ ɖó te bo ná ɖɔ hwɛ xá akɔta lɛ́ é.
4 Hwǐ ná xo Ejípu, bɔ xɛsi ná vun blá Etiopíi, hwenu e mɛ e è hu lɛ́ é ná j’ayǐ ɖo Ejípu é;
è bɛ́ dɔkun tɔn lɛ́ bo gba dodónu tɔn lɛ́.
5 Etiopíi, Púti, Ludi kpó mɛ e gosín akɔta ɖěvo lɛ́ mɛ lɛ́ é* bǐ kpó,
gɔ́ nú Kúbu kpó togun e nɔ nɔ akɔjijɛ sín to ɔ mɛ é* kpó
bǐ ná kú hwǐ kú.”’
6 Nǔ e Jexóva ɖɔ é ɖíe:
‘Mɛ e nɔ nɔ gǔdo nú Ejípu lɛ́ é lɔ ná j’ayǐ,
bɔ hlɔ̌nhlɔ́n tɔn e é nɔ dó yí go ná é ná hwíhwɛ́ bǐ.’
“‘Sín Migidɔ́lu káká yi Siɛ́ni ɔ, yě ná kú hwǐ kú ɖo to ɔ mɛ,’ wɛ Aklúnɔ Nǔbǐwúkpétɔ́ Jexóva ɖɔ. 7 ‘È ná bló bɔ to énɛ́ lɛ́ ná húzú to e jɛ vɔ̌ hú gǎn to lɛ́ bǐ é, bɔ toxo yětɔn lɛ́ ná húzú toxo e è vívá hú gǎn toxo lɛ́ bǐ é. 8 Hwenu e un ná flɔ́ myɔ dó Ejípu to ɔ mɛ, bɔ è ná nyínyɛ́ mɛ e jɛ akɔ xá ɛ lɛ́ é bǐ é ɔ, yě ná wá tuun ɖɔ nyɛ wɛ nyí Jexóva. 9 Ðo azǎn énɛ́ gbe ɔ, un ná sɛ́ wɛndótɔ́ lɛ́ dó gbɔn tɔjíhún mɛ, bɔ yě ná bló bɔ Etiopíi e nɔ ɖeji dó éɖée wú zɛ xwé wú é ná sísɔ́; xɛsi ná vun blá yě ɖo azǎn e gbe awě ná xo Ejípu é, ɖó azǎn ɔ ná wá jɛ́n wɛ.’
10 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná zán axɔ́sú Babilɔ́nu tɔn Nabukodonɔzɔ́ɔ* dó sú kún dó nú ahwan wɔ̌búwɔ́bú Ejípu tɔn. 11 Un ná kplá é kpó ahwankpá tɔn lɛ́ kpó, ɛɛn, ahwankpá e nɔ wa alǎnnú hú gǎn ɖo akɔta lɛ́ mɛ lɛ́ é, bɔ yě ná sú kún dó nú to ɔ. Yě ná sún hwǐ yětɔn lɛ́ dó Ejípu jí, bɔ cyɔ lɛ́ ná kpé to ɔ mɛ. 12 Un ná bló bɔ tɔhwín Nilu tɔn lɛ́ ná húzú ayǐkúngban xúxú, bɔ un ná sa to ɔ nú mɛ nyanya lɛ́. Un ná bló bɔ toɖévomɛnu lɛ́ ná vɔ to ɔ kpó nǔ e ɖ’é mɛ lɛ́ é bǐ kpó. Nyɛ Jexóva ɖésúnɔ wɛ ɖɔ xó.’
13 “Nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná lɛ́ vívá bǒcyɔ xyɔ́ wǔ* lɛ́, bo ná sú nǔmɛsɛn maɖótaɖé Nɔfu* tɔn lɛ́ dó. Axɔ́ví* ɖě sɔ́ ná nɔ Ejípu to ɔ mɛ ǎ, bɔ un ná dɔn xɛsi dó Ejípu to ɔ mɛ. 14 Un ná bló bɔ Patlɔ́si ná jɛ vɔ̌, bɔ un ná flɔ́ myɔ nyi Sowáan, bo ná wa nǔ xá Nɔ̌ɔ* sɔgbe xá hwɛ e un ɖó n’i é. 15 Un ná gba adǎn e jí un ɖe é kɔn nyi Sínu e nyí ahohó Ejípu tɔn é jí, bo ná sú kún dó nú mɛ e nɔ nɔ Nɔ̌ɔ lɛ́ é. 16 Un ná flɔ́ myɔ nyi Ejípu; xɛsi ɖaxó ná vun blá Sínu, bɔ è ná tɔ́n ali dó Nɔ̌ɔ sín dǒ lɛ́ mɛ, lobɔ è ná tɔ́n ahwan Nɔfu* kéze ɖéɖé! 17 Dɔ̌nkpɛvú Ɔnu* kpó Pibɛsɛ́ti kpó tɔn lɛ́ ná kú hwǐ kú, bɔ mɛ e nɔ nɔ toxo yětɔn lɛ́ mɛ lɛ́ é ná yi kannumɔgbénu. 18 Ðo Tapanɛ́si ɔ, ablu ná dó kéze ɖéɖé hwenu e un ná wɛ́n agbanhɛnkpo Ejípu tɔn ɖo fínɛ́ é. È ná ɖó nǔ hlɔ̌nhlɔ́n tɔn e é nɔ dó yí go ná é nu, akpɔ́kpɔ́ ná cyɔ́n ɛ, bɔ mɛ e ɖo toxo tɔn mɛ lɛ́ é ná yi kannumɔgbénu. 19 Un ná wa nǔ xá Ejípu sɔgbe xá hwɛ e un ɖó n’i é, bɔ yě ná wá tuun ɖɔ nyɛ wɛ nyí Jexóva.’”
20 Ðo xwe 11gɔ́ ɔ mɛ, ɖo azǎn tɛ́nwegɔ́ sun nukɔntɔn ɔ tɔn gbe ɔ, Jexóva lɛ́ ɖɔ xó nú mì, bo ɖɔ: 21 “Gbɛtɔ́ví è, un wɛ́n awa Falawɔ́ɔn Ejípu xɔ́sú ɔ, è ná blá bónú é ná kpé ǎ, è ka ná lɛ́ akpablánú dó bónú é ná mɔ hlɔ̌nhlɔ́n káká bo hɛn hwǐ ǎ.”
22 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná húzú kpan nukɔn Ejípu xɔ́sú Falawɔ́ɔn, un ná wɛ́n alɔ tɔn lɛ́, éé wú hlɔ̌nhlɔ́n ɖe é kpó éé ko wɛ́n é kpó, bɔ un ná bló bɔ hwǐ ɔ ná j’ayǐ sín alɔ tɔn mɛ. 23 Énɛ́ gúdo ɔ, un ná gba Ejípunu lɛ́ dó gbɔn akɔta lɛ́ mɛ, bo ná fúnfún yě kpé gbɔn to lɛ́ mɛ. 24 Un ná ná hlɔ̌nhlɔ́n Babilɔ́nu xɔ́sú ɔ sín awa lɛ́,* bo ná sɔ́ hwǐ ce dó alɔ tɔn mɛ. Un ná wɛ́n Falawɔ́ɔn sín awa lɛ́ bɔ é ná wɛn azɔn kpó xósúsú kpó, mɛ e ɖo kúdonu é ɖɔhun ɖo nukɔn tɔn.* 25 Un ná ná hlɔ̌nhlɔ́n Babilɔ́nu xɔ́sú ɔ sín awa lɛ́, loɔ, Falawɔ́ɔn sín awa lɛ́ ná kúyɛ. Hwenu e un ná zé hwǐ ce dó axɔ́sú Babilɔ́nu tɔn sín alɔ mɛ bɔ é ná sɔ́ dó xo Ejípu to ɔ ná é ɔ, mɛ lɛ́ ná wá tuun ɖɔ nyɛ wɛ nyí Jexóva. 26 Bɔ un ná gba Ejípunu lɛ́ dó gbɔn akɔta lɛ́ mɛ, bo ná fúnfún yě kpé gbɔn to lɛ́ mɛ, énɛ́ ɔ, mɛ lɛ́ ná wá tuun ɖɔ nyɛ wɛ nyí Jexóva.’”