Ezekiyɛ́li
29 Ðo xwe 10gɔ́ ɔ mɛ, ɖo azǎn 12gɔ́ sun 10gɔ́ ɔ tɔn gbe ɔ, Jexóva lɛ́ ɖɔ xó nú mì, bo ɖɔ: 2 “Gbɛtɔ́ví è, lǐlɛ́ kpan nukɔn axɔ́sú Ejípu tɔn Falawɔ́ɔn, bo ɖɔ nǔ e ná jɛ dó éyɛ́ kpó Ejípu to ɔ bǐ kpó wú é ɖ’ayǐ. 3 Nǔ e a ná ɖɔ é ɖíe: ‘Nǔ e Aklúnɔ Nǔbǐwúkpétɔ́ Jexóva ɖɔ é ɖíe:
“Un ná wa nǔ xá we, hwi axɔ́sú Ejípu tɔn Falawɔ́ɔn,
hwi xumɛkanlin ɖaxó e ɖo ayǐmlɔ́mlɔ́ ɖo Nilu* sín tɔsisa lɛ́ mɛ é.
A ɖɔ: ‘Tɔsisa Nilu ɔ, ce wɛ.
Nyiɖésúnɔ wɛ bló nú nyiɖée.’
4 Amɔ̌, un ná dó klɔcée aglan mɛ nú we, bo ná bló bɔ hweví Nilu towe tɔn lɛ́ ná tɛ́ cí zǎ towe lɛ́ wú.
Un ná dɔn we tɔ́n sín Nilu towe mɛ, gɔ́ nú hweví ɖěɖěe ɖo Nilu ɔ mɛ, bo tɛ́ cí zǎ towe wú lɛ́ é bǐ.
5 Un ná jó we dó nyi gbětótló mɛ, hwi kpó hweví e ɖo Nilu towe mɛ lɛ́ é bǐ kpó.
A ná j’ayǐ jɛ gle mɛ agbawungba, bɔ è ná xo we kplé ǎ, è ka ná lɛ́ cyán we kplé ǎ.
Un ná sɔ́ we ná gběkanlin e ɖo ayǐkúngban jí lɛ́ é kpó xɛ e nɔ zɔn gbɔn jǐnukúnsin lɛ́ é kpó, bɔ a ná nyí nǔɖuɖu nú yě.
6 Énɛ́ ɔ, mɛ e nɔ nɔ Ejípu lɛ́ é bǐ ná wá tuun ɖɔ nyɛ wɛ nyí Jexóva,
ɖó fántín* ɖɔhun wɛ alɔgɔ́ e yě wá nú togun Izlayɛ́li tɔn é cí.
7 Hwenu e yě zunfán alɔ towe é ɔ, yě nyínyɛ́ we,
bɔ a tlɛ́n abɔ̌ta nú yě.
Hwenu e yě gán jɛ wǔ we é ɔ, a wɛ́n,
bɔ é sín wǔ we, bɔ zǎkɛ́tɛ́* yětɔn lɛ́ xo dɔjɔ.”
8 “‘Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Un ná sɛ́ hwǐ dó we, bo ná hu gbɛtɔ́ kpó kanlin kpó, éé ɖo gɔ̌n towe lɛ́ é. 9 Ejípu to ɔ ná húzú nɔtɛn e è vívá, bɔ é lɛ́ jɛ vɔ̌ é; bɔ yě ná wá tuun ɖɔ nyɛ wɛ nyí Jexóva, ɖó a* ɖɔ: ‘Tɔsisa Nilu ɔ, ce wɛ; nyi wɛ nyí mɛ e bló é.’ 10 Énɛ́ wú wɛ un ná tɔ́n ahwan hwi kpó Nilu towe kpó, bo ná bló bɔ Ejípu to ɔ ná húzú fí e è vívá é kpó fí xúxú kpó, ɛɛn, gbětótló e jɛ vɔ̌ é ɖé, sín Migidɔ́lu yi Siɛ́ni, káká yi dogbó Etiopíi tɔn jí. 11 Gbɛtɔ́ alǒ kanlinhwan ɖě sɔ́ ná gbɔn fínɛ́ dín ǎ, bɔ mɛɖé sɔ́ ná nɔ mɛ ǎ nú xwe 40. 12 Un ná bló bɔ Ejípu to ɔ ná húzú to e jɛ vɔ̌ hú gǎn to lɛ́ bǐ é, bɔ toxo tɔn lɛ́ ná húzú toxo e jɛ vɔ̌ hú gǎn toxo lɛ́ bǐ é nú xwe 40; bɔ un ná gba Ejípunu lɛ́ dó gbɔn akɔta lɛ́ mɛ, bo ná fúnfún yě kpé gbɔn to lɛ́ mɛ.”
13 “‘Ðó nǔ e Aklúnɔ Nǔbǐwúkpétɔ́ Jexóva ɖɔ é ɖíe: “Ðo xwe 40 lɛ́ gúdo ɔ, un ná xo Ejípunu lɛ́ kplé sín togun ɖěɖěe mɛ è gba yě dó gbɔn lɛ́ é mɛ; 14 un ná kplá kannumɔ Ejípunu lɛ́ lɛ́ kɔ wá Patlɔ́si to mɛ, to e nyí jɔtɛn yětɔn é, bɔ ɖo fínɛ́ ɔ, yě ná húzú axɔ́súɖuto e ma hwɛ́n nǔɖé ǎ é. 15 Ejípu ná vɔ́ da hú axɔ́súɖuto ɖěvo lɛ́, bo sɔ́ ná kpa acɛ nú akɔta ɖěvo lɛ́ ɖě ǎ; un ná bló bɔ kɛ́n yětɔn ná ɖe kpo sɔmɔ̌ bɔ yě sɔ́ ná kpé wú bo ná sɔ́ akɔta ɖěvo lɛ́ dó acɛ yětɔn glɔ́ ɖě ǎ. 16 Izlayɛ́li togun ɔ sɔ́ ná lɛ́ ɖeji dó wǔ tɔn gbeɖé ǎ, é nyɔ́ wa ɔ, nǔ ɖokpó e yě ná nɔ flín dó wǔ tɔn é wɛ nyí ɖɔ alɔdó tɔn e yě byɔ́ é ɔ, nǔ wɛ é nyí bɔ yě wa nyi do. Bɔ togun Izlayɛ́li tɔn ná wá tuun ɖɔ nyɛ wɛ nyí Aklúnɔ Nǔbǐwúkpétɔ́ Jexóva.”’”
17 Ðo xwe 27gɔ́ ɔ mɛ, ɖo azǎn nukɔntɔn, sun nukɔntɔn ɔ tɔn gbe ɔ, Jexóva lɛ́ ɖɔ xó nú mì, bo ɖɔ: 18 “Gbɛtɔ́ví è, axɔ́sú Babilɔ́nu tɔn Nabukodonɔzɔ́ɔ* ɖó azɔ̌ syɛ́nsyɛ́n kɔ jí nú ahwankpá tɔn hwenu e é tɔ́n ahwan Tíi é. Mɛ lɛ́ bǐ sún ahɔn, bɔ abɔ̌ta lɛ́ bǐ lɛ́ mɔ́. Amɔ̌, é kpó ahwankpá tɔn kpó mɔ ajɔ ɖěbǔ yí nú azɔ̌ syɛ́nsyɛ́n e é wa ɖó Tíi wútu é ǎ.
19 “Énɛ́ wú ɔ, nǔ e Aklúnɔ Nǔbǐwúkpétɔ́ Jexóva ɖɔ é ɖíe: ‘Un ná ná Ejípu to ɔ axɔ́sú Babilɔ́nu tɔn Nabukodonɔzɔ́ɔ,* bɔ é ná bɛ́ dɔkun tɔn lɛ́ yi, bo ná bɛ́ nǔ e é yí ɖo ahwangbénu lɛ́ é kpó nǔ e é vɔ mɛ bo yí lɛ́ é kpó gěgé sín mɛ, bɔ é ná nyí ajɔ nú ahwankpá tɔn.’
20 “‘Ðó azɔ̌ syɛ́nsyɛ́n e é wa dó tɔ́n ahwan toxo ɔ* é wútu ɔ, un ná ná ɛ Ejípu to ɔ dó d’ajɔ ɛ, ɖó nyɛ wɛ yě wa azɔ̌ ná,’ wɛ Aklúnɔ Nǔbǐwúkpétɔ́ Jexóva ɖɔ.
21 “Ðo gbe énɛ́ gbe ɔ, un ná bló bɔ zo ɖé ná wú nú togun Izlayɛ́li tɔn,* bɔ un ná hun ali ɔ nú we bɔ a ná ɖɔ xó ɖo tɛ́ntin yětɔn; bɔ yě ná wá tuun ɖɔ nyɛ wɛ nyí Jexóva.”